Amdanom ni

Rydym yn ysgol groesawgar, lewyrchus a chartrefol.

Er mai ni yw'r adran Gymraeg hynaf yng Nghymru, rydym yn edrych tua'r dyfodol ac ar ddatblygiad ein hiaith, ein cymdeithas a'n hunaniaeth yn y Gymru gyfoes.

Cyfunir astudiaethau ym maes iaith a llên â modiwlau unigryw sy’n ymwneud â’r Gymraeg yn y Gymru gyfoes. Rydym yn defnyddio dulliau arloesol a blaengar wrth addysgu ar ein holl fodiwlau. Mae'r amrywiaeth eang o fodiwlau ar gael i fyfyrwyr israddedig yn cynnwys astudiaethau cyfieithu, technoleg iaith mewn oes ddigidol, sosioieithyddiaeth, caffael iaith, ethnigrwydd ac amlddiwylliannedd, mapio’r Cymry, a diwylliant Cymraeg dinas Caerdydd, a llawer mwy.

Gyda staff academaidd blaenllaw a gweithgar yn eu meysydd, rydym yn dylanwadu ar fywyd cymdeithasol, diwylliannol a gwleidyddol yng Nghymru a thu hwnt.

Rydym yn bwydo ein harbenigeddau ymchwil i’n dysgu ac yn awyddus i feithrin eich sgiliau a chyfrannu at eich llwyddiant mewn ffordd a fydd yn gwneud gwahaniaeth i'ch dyfodol. Cewch nifer o gyfleoedd hefyd i ddilyn cyfnod o brofiad gwaith mewn amrediad o sefydliadau.

Cewch hefyd ddod i adnabod staff yr ysgol yn ystod digwyddiadau cymdeithasol a gynhelir yn ystod y flwyddyn academaidd. Bydd hyn, yn ogystal â’r gefnogaeth a dderbyniwch gan staff yr ysgol, yn sicrhau y byddwch yn teimlo fel aelod o deulu Ysgol y Gymraeg ymhell ar ôl i chi orffen astudio gyda ni.

Y tu hwnt i raglenni gradd, rydym yn helpu sicrhau ffyniant yr iaith trwy wasanaethu'r gymuned leol. Mae Dysgu Cymraeg Caerdydd yn dysgu'r iaith i dros 1,700 o oedolion yng Nghaerdydd. Yn ogystal â hyn, rydym yn darparu’r Cynllun Sabothol Cenedlaethol dan nawdd Llywodraeth Cymru yng Nghanolbarth De Cymru a De-ddwyrain Cymru.