Astudio drwy gyfrwng y Gymraeg
Rydyn ni'n falch o fod yn brifysgol ddwyieithog blaenllaw Cymru sydd â'r Gymraeg wrth galon popeth a wnawn yn academaidd ac yn ddiwylliannol.
Drwy ddewis astudio gyda ni yn Gymraeg, yr unig brifysgol yng Nghymru sy'n rhan o Grŵp Russell, cewch gyfle i ymgolli yn yr iaith a'r diwylliant Cymraeg a bod yn rhan o gymuned ffyniannus.
Bydd hyn yn agor drysau i fyd lle mae amrywiaeth ddiwylliannol yn gwella eich rhagolygon gwaith, lle mae dysgu wedi'i deilwra i'ch anghenion, a byddwn yn gwneud ein gorau glas i'ch cefnogi ar bob cam o'ch taith academaidd.
Beth sy'n ein gwneud ni'n unigryw
Cartref oddi cartref
Rydyn ni'n cynnig ysgoloriaethau ar gyfer astudio yn Gymraeg, cyfleoedd dysgu mewn grwpiau llai, tiwtoriaid Cymraeg, a llety gyda siaradwyr Cymraeg eraill
Y gorau yng Nghymru
Bydd cyfle i fwynhau profiad gwaith gyda sefydliadau blaenllaw yng Nghymru megis Llywodraeth Cymru, Senedd Cymru, Yr Urdd, BBC, ITV Cymru Wales, a llawer mwy
Cymuned Gymreig
Ni oedd y brifysgol gyntaf yng Nghymru i ddysgu yn y Gymraeg ac mae ein Hacademi Gymraeg yn dod â'n gweithgareddau Cymraeg at ei gilydd yn ein prifysgol ddwyieithog, gynhwysol a rhyngwladol
Pam astudio'n Gymraeg?
Mae 82% o fusnesau yng Nghymru yn dweud bod defnyddio'r Gymraeg yn ychwanegu gwerth at eu gwasanaethau. O ganlyniad, mae llawer o gyflogwyr yn chwilio am weithwyr sydd â sgiliau dwyieithog i wasanaethu eu cwsmeriaid yn well.
Mae astudio'n ddwyieithog yn eich helpu i gael dealltwriaeth ddyfnach o'ch dewis bwnc. Mae'n cyfoethogi eich profiad dysgu drwy gynnig:
- mwy o ddewis
- safbwyntiau gwahanol - gan gynnwys safbwynt Cymreig - ar eich pwnc
- profiadau unigryw ac amrywiol wrth ddysgu a thu hwnt
Byddwch yn dysgu'r sgiliau, yr hyder a'r profiad i ddefnyddio'r Gymraeg yn y gweithle ac i gyfrannu'n ddwyieithog at fywyd economaidd, cymdeithasol a diwylliannol Cymru.
Rydyn ni'n cynnig hyd at 65 o gyrsiau sy'n cwmpasu ystod eang o bynciau, a addysgir yn gyfan gwbl neu'n rhannol yn Gymraeg.
Gallwch hefyd sefyll eich arholiadau a'ch aseiniadau yn Gymraeg, p'un a ydych wedi bod yn astudio trwy gyfrwng y Gymraeg ai peidio, a chael mynediad at diwtor personol sy'n siarad Cymraeg a fydd yn eich cefnogi drwy gydol eich astudiaethau yma.
Doedd gen i ddim ffydd bod fy sgiliau Cymraeg yn ddigon da i astudio ar lefel gradd, ond mae'r gefnogaeth a gefais gan y darlithwyr wedi bod yn anhygoel. Os ydych chi'n ansicr, rwy'n eich annog i fynd amdani. Does dim byd i'w golli, ond mae llawer i'w ennill. Dewis modiwlau cyfrwng Cymraeg fu'r dewis gorau i mi ei wneud erioed.
Cymorth ariannol
Rydyn ni'n deall pwysigrwydd nawdd ariannol ac ysgoloriaethau wrth wneud cais i'r brifysgol. Ochr yn ochr â'r Coleg Cymraeg Cenedlaethol, rydyn ni'n cynnig ystod eang o gymorth ariannol i'ch helpu i ganolbwyntio ar eich astudiaethau a thwf personol yn eich dewis iaith.
Byddwn yn dyfarnu £250 y flwyddyn i chi am bob 20 credyd rydych chi'n eu hastudio yn y Gymraeg a £500 y flwyddyn am bob 40 credyd rydych chi'n eu hastudio yn y Gymraeg trwy'r Ysgoloriaeth Astudio yn Gymraeg.
Mae hyd at £1,000 hefyd ar gael gydag Ysgoloriaeth Yr Academi Gymraeg Betty Campbell. Rydyn ni'n annog myfyrwyr a allai wynebu rhwystrau neu ansicrwydd wrth ddewis astudio yn Gymraeg.
Astudio hyblyg
Gallwch astudio rhai modiwlau drwy gyfrwng y Gymraeg. Yn dibynnu ar eich dewis o bwnc, gallech gyfuno darlithoedd Saesneg gyda thiwtorialau cyfrwng Cymraeg, neu ddewis eu gwneud i gyd yn Gymraeg. Mae'n dibynnu arnoch chi.
Gallwch chi hefyd gyfuno eich sgiliau Cymraeg gyda chyfleoedd i ddysgu ieithoedd eraill yn y brifysgol. Bydd rhai cyrsiau'n rhoi cyfle i chi dreulio blwyddyn dramor.
Dinesydd Caerdydd
Bydd myfyrwyr israddedig sy'n nodi eu bod yn siaradwyr rhugl, neu fod ganddyn nhw sgiliau Cymraeg, hefyd yn cael eu cofrestru'n awtomatig (optio allan dewisol) yn ein Modiwl Dinesydd Caerdydd Yr Academi Gymraeg.
Mae'r modiwl 5 credyd yma'n darparu amgylchedd dysgu rhyngweithiol i fyfyrwyr blwyddyn gyntaf sydd â sgiliau Cymraeg. Mae'n caniatáu iddyn nhw ddod i adnabod Caerdydd a'r Gymraeg o fewn y gymuned leol a'r brifysgol.
Cartref oddi cartref
Mae rhai fflatiau yn Llys Senghennydd a Gogledd Talybont wedi'u neilltuo ar gyfer myfyrwyr israddedig sy'n siaradwyr Cymraeg neu'n ddysgwyr, ac mae gan y ddau lety gymuned Gymraeg ffyniannus.
Dewiswch yr opsiwn yma ar eich cais ar-lein os ydych chi'n dymuno gofyn am y llety yma.
