Allgymorth i ysgolion a cholegau

Mae amrywiaeth o opsiynau ar gael i’r myfyrwyr hynny sydd â diddordeb mewn gyrfa ym maes gofal iechyd. Ymhlith y rhain mae Nyrsio, Bydwreigiaeth, Ffisiotherapi, Therapi Galwedigaethol, Radiograffeg a Radiotherapi. Er mwyn eu helpu i wneud penderfyniad gwybodus, bydd y sesiwn yn cyfeirio at nodweddion y cyrsiau, y broses ddethol, y gofynion mynediad (gan gynnwys awgrymiadau ar gyfer profiad gwaith a’r datganiad personol) a’r cyllid sydd ar gael gan y GIG i'r rhai sy'n astudio yng Nghymru.

Os yw eich myfyrwyr yn awyddus i wybod sut beth fyddai dyfodol ym maes gofal iechyd, mae gennyn ni adnoddau i’w helpu i ystyried yr holl lwybrau gwerth chweil sydd ar gael.

Mae cyrsiau Meddygaeth a Deintyddiaeth yn enwog am fod yn rhai cystadleuol iawn. Gyda phrofion ychwanegol megis Prawf Tueddfryd Clinigol y Prifysgolion (UCAT), cyfweliadau a phrofiad gwaith i’w hystyried, mae'n bwysig bod ymgeiswyr yn barod.

Yn ogystal â thrafod y gwahanol arddulliau cwrs sydd ar gael ym mhrifysgolion y DU, mae'r cyflwyniad hwn hefyd yn rhoi trosolwg cryno o gynnwys cwrs Prifysgol Caerdydd ochr yn ochr â chyngor ac arweiniad ar y broses derbyn myfyrwyr.

Ni yw’r unig brifysgol Grŵp Russell yng Nghymru, ac rydyn ni’n ymfalchïo yn rhagoriaeth ein hymchwil, ein rhagoriaeth academaidd a’n henw da rhyngwladol. Mae prifysgolion Grŵp Russell ymhlith rhai o'r prifysgolion mwy cystadleuol yn y DU, ac maen nhw’n chwilio am fyfyrwyr galluog a thalentog o bob cefndir.

Bydd y cyflwyniad hwn yn ymchwilio i’r manteision ac yn rhoi cyngor ar ymgeisio i brifysgolion cystadleuol, a fydd yn rhoi syniad o’r hyn rydyn ni’n chwilio amdano mewn cais.

Gyda mwy na 50,000 o gyrsiau i ddewis ohonyn nhw ym mhrifysgolion y DU, gall fod yn anodd i fyfyrwyr benderfynu pa gwrs a phrifysgol sy’n iawn iddyn nhw. Mae ein cyflwyniad yn trafod manteision mynd i’r brifysgol ac yn cyfeirio at y cwestiynau y dylai myfyrwyr fod yn eu gofyn iddyn nhw eu hunain – gyda ffocws penodol ar bedair elfen: cwrs, campws, gyrfa a dinas.

Rydyn ni hefyd yn pwysleisio pa mor bwysig yw ystyried y pethau ychwanegol mewn prifysgolion, megis clybiau chwaraeon, cymdeithasau, y gallu i astudio dramor a’r holl gyfleoedd eraill sydd ar gael.

Mae mynd i'r brifysgol yn gam enfawr i lawer o bobl. Bydd paratoi ymlaen llaw yn helpu i sicrhau bod y broses o bontio i’r brifysgol mor ddiffwdan â phosibl.

Yn y sesiwn hon, byddwn ni’n trafod y camau nesaf ar ôl i chi gyflwyno eich cais UCAS a’r hyn i’w wneud os na fydd pethau’n mynd yn ôl y disgwyl. Byddwn ni hefyd yn rhoi cyngor ar baratoi ar gyfer y brifysgol ac yn rhannu gwybodaeth am gyllidebu, gostyngiadau i fyfyrwyr a llety.

Yn y sesiwn hon, byddwn ni’n sôn am wahanol elfennau’r broses ymgeisio, dyddiadau cau UCAS, sut i wneud cais, y mathau o gynigion sy’n cael eu gwneud a sut i ymateb.

Byddwn ni’n cyfeirio’n fras at y prif bethau i’w hystyried wrth ddewis prifysgol ond yn treulio’r rhan fwyaf o’r amser yn trafod y ffurflen gais ei hun, gwallau cyffredin a’r datganiad personol.

Mae’r sesiwn hon, sy’n rhoi trosolwg cyffredinol o fywyd yn y brifysgol, yn ymdrin â phynciau allweddol megis sut i ymchwilio i gyrsiau, dulliau addysgu yn y brifysgol, bywyd myfyrwyr a chyllid.

Nodwch fod y cyflwyniad hwn yn rhoi trosolwg cyffredinol a chryno o bob pwnc. Rydyn ni’n cynnal sesiynau ar wahân ar lawer o’r pynciau, megis bywyd myfyrwyr a chyllid myfyrwyr, os hoffech chi gael cyflwyniadau manylach.

Gan gymryd i ystyriaeth ddatblygiadau diweddar a pharhaus ym maes cyllid myfyrwyr, mae modd teilwra’r cyflwyniad ar gyllid myfyrwyr i gynulleidfaoedd yng Nghymru a Lloegr er mwyn sicrhau bod myfyrwyr a rhieni’n cael y cyngor a’r arweiniad diweddaraf sy’n berthnasol i ble maen nhw’n byw.

Ar ôl trafod y system benthyciadau myfyrwyr, byddwn ni hefyd yn trafod pynciau pwysig yng nghyd-destun cyllid myfyrwyr, megis cyllidebu, gwaith rhan-amser a ffyrdd o arbed arian wrth astudio.

Mae ein sesiwn ar fywyd myfyrwyr yn trafod disgwyliadau myfyrwyr o’u cymharu â’r sefyllfa wirioneddol ac yn rhoi syniad i’r myfyrwyr o’r hyn y gallan nhw ei ddisgwyl yn y brifysgol. Mae’n ymdrin ag ystod o bynciau, gan gynnwys cyrraedd y brifysgol, astudio, ffordd o fyw a chyllidebu. Mae hefyd yn rhoi cyngor ar sut i wneud yn fawr o’ch amser yn y brifysgol.

Gall cymryd rhan mewn cyfweliadau godi ofn ar lawer o fyfyrwyr, ond gall paratoi ymlaen llaw eu helpu i deimlo’n llai nerfus. Mae’r cyflwyniad hwn yn trafod y gwahanol fathau o gyfweliadau, yn rhoi cyngor ar baratoi ac yn sôn am y gwallau cyffredin i’w hosgoi.

Rydyn ni’n gobeithio gallu sicrhau bod gan fyfyrwyr yr hyder i fynd i gyfweliadau ag agwedd gadarnhaol er mwyn perfformio hyd eithaf eu gallu yn y cyfweliad.

Boed ein lleoliad mewn prifddinas sy’n ffynnu, rhagoriaeth ein hymchwil neu ein rhagoriaeth academaidd, mae gan Brifysgol Caerdydd lawer i'w gynnig. Bydd y sesiwn hon yn trafod beth y gall myfyrwyr ei ddisgwyl o ran y Brifysgol ei hun a’r ddinas. Mae’n ymdrin â nifer o bynciau sy'n amrywio o'n rhagoriaeth academaidd a'n cyfleusterau i gyfleoedd byd-eang a’n lleoliad mewn prifddinas.