Cymraeg ac Ieithyddiaeth (BA)

Drwy gydol y radd, ein nod yw eich cefnogi i ddod yn feddyliwr annibynnol, creadigol a beirniadol.

Mae addysgu'r flwyddyn gyntaf yn darparu cymorth wedi'i strwythuro'n ofalus trwy ddarlithoedd a thrafodaethau seminar i'ch helpu i ddatblygu sgiliau allweddol a magu hyder. Bydd y gweithgareddau dysgu'n amrywio o fodiwl i fodiwl, ond gallant gynnwys darlithoedd, trafodaethau seminar, cyflwyniadau myfyrwyr, a gwaith grwpiau bach. O ran y Gymraeg, mae rôl allweddol hefyd i diwtorialau, gweithdai a dosbarthiadau iaith (yn enwedig ar gyfer y myfyrwyr sy'n dilyn y llwybr ail iaith). Byddwch hefyd yn cael mynediad at yr holl ddeunyddiau trwy ein hamgylchedd dysgu electronig.

Trwy'r ail flwyddyn a'r flwyddyn olaf, byddwch yn dysgu fwyfwy trwy ddarllen annibynnol dan arweiniad a gweithdai a seminarau rhyngweithiol, gan drafod ymchwil newydd gydag academyddion cydnabyddedig yn rhyngwladol sy'n gweithio yn y maes hwnnw ar hyn o bryd.

Yn yr amgylchedd cefnogol hwn, byddwch yn datblygu eich galluoedd i ddadansoddi testunau, llunio dadleuon, gweithio ar y cyd trwy broblemau, a chyflwyno'ch syniadau'n glir i eraill.  

Disgwylir i chi wneud y gwaith darllen a gwaith paratoi perthnasol arall i'ch galluogi i gymryd rhan lawn yn y gweithgareddau hyn ac fe'ch anogir i archwilio adnoddau'r llyfrgell.

Sut y caf fy nghefnogi?

Eich prif ffynonellau cymorth yw eich arweinwyr modiwlau a'ch Tiwtor Personol. Byddwch yn cael Tiwtor Personol yn y Gymraeg ac ieithyddiaeth. Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd, a'ch cynnydd academaidd, yn ogystal ag ar faterion bugeiliol. Maent hefyd yn gweithredu fel pwynt cyswllt cyntaf os ydych chi'n profi unrhyw anawsterau. Fe'ch gwahoddir i gwrdd â'ch Tiwtor Personol yn rheolaidd trwy gydol y radd, ac maent ar gael ar gyfer cyfarfodydd ychwanegol yn ôl yr angen. Mae gan eich arweinwyr modiwl sesiynau galw heibio yn ystod wythnosau addysgu y gallwch eu mynychu os oes gennych unrhyw gwestiynau am ddeunyddiau cwrs neu asesiadau. Mae'r Ganolfan Datblygu Ysgrifennu (yn unig ar gyfer myfyrwyr yn yr Ysgol Saesneg, Cyfathrebu ac Athroniaeth) yn darparu cymorth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau. 

Mae ein timau Gwasanaethau Proffesiynol ym maes Cymraeg ac ieithyddiaeth yn darparu cymorth academaidd a chymorth i fyfyrwyr ac mae yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r brifysgol yn cynnig amrywiaeth o wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cefnogi gyda materion ariannol, a darparu cymorth i fyfyrwyr ag anableddau. Mae'r gwasanaethau hyn wedi'u cyd-leoli yng Nghanolfan Bywyd Myfyrwyr y brifysgol. Bydd llyfrgelloedd, mannau astudio a chanolfannau adnoddau eraill i gyd ar gael i chi.

Adborth:

Byddwch yn cael adborth rheolaidd ar eich cynnydd. Bydd adborth llafar mewn darlithoedd a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn sylwadau ffurfiannol ar syniadau traethawd, ac adborth manwl ar yr holl waith cwrs wedi'i farcio. Byddwch hefyd yn gallu trafod eich perfformiad cyffredinol yn rheolaidd gyda'ch Tiwtoriaid Personol.

Sut caf fy asesu?

Mae eich asesiadau wedi'u cynllunio i ddatblygu'n gronnol sgiliau allweddol mewn cyfathrebu, cydweithio, meddwl yn feirniadol, a myfyrio.

Defnyddir ystod o ddulliau asesu ffurfiannol a chrynodol, gan gynnwys traethodau, arholiadau, cyflwyniadau, portffolios, a thasgau wythnosol.

Pa sgiliau bydda i'n eu hymarfer a'u datblygu?

Mae Deilliannau Dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

Pan fyddwch wedi llwyddo i gwblhau’r rhaglen, byddwch chi’n gallu:

Gwybodaeth a Dealltwriaeth (GD):

• Deall strwythurau, cyweiriau ac amrywiaethau Cymraeg a'u defnyddio'n hyblyg ac yn effeithiol at ddibenion cymdeithasol, academaidd a phroffesiynol, fel y bo'n briodol. 
• Beirniadu datblygiad y Gymraeg a’i llenyddiaeth mewn cyfnodau hanesyddol gwahanol, o gyd-destun ieithyddol, llenyddol a chymdeithasol yn ogystal â dealtwriaeth o’r ymdrechion i adfer a hyrwyddo’r iaith. 
• Dadansoddi'n feirniadol agweddau ar ddiwylliant, llenyddiaeth, hanes a chymdeithas y Gymraeg, gan dynnu ar amrywiaeth o ddeunyddiau ac ymagweddau.
• Dangos gwybodaeth a dealltwriaeth systematig o feysydd craidd iaith Saesneg ac ieithyddiaeth, gan gynnwys seineg, gramadeg, semanteg, pragmateg, a disgwrs.
• Dangos gwybodaeth a dealltwriaeth systematig o sut mae iaith yn gweithio yn y byd cymdeithasol.
• Dangos gwybodaeth a dealltwriaeth systematig o gydadwaith dadansoddiad o ddata ieithyddol â ffynonellau beirniadol a damcaniaethol.

Sgiliau Deallusol:

• Cymhwyso terminoleg ddisgrifiadol sy'n berthnasol i iaith Saesneg a ffenomenau ieithyddol
• Dadansoddi gwahanol fathau o ddata ieithyddol.
• Llunio ac egluro dadleuon cymhleth ac arbenigol sy'n cefnogi honiadau mewn ymateb i gonfensiynau'r genre.
• Gwerthuso effaith defnyddio iaith mewn cyd-destun penodol.
• Gwerthuso’n feirniadol destunau, cysyniadau a damcaniaethau sy’n berthnasol i gyd-destun yr iaith Gymraeg a llenyddiaeth Gymraeg, gan ddefnyddio’r eirfa a therminoleg briodol.  

Sgiliau Ymarferol Proffesiynol:

• Cynhyrchu amrywiaeth o ddeunydd gan ddefnyddio Cymraeg ysgrifenedig a llafar sy'n briodol ar gyfer y gweithle ac a fwriedir ar gyfer ystod o gynulleidfaoedd.  
• Darllen a gwerthuso syniadau, dadleuon ac ymchwil empirig yn feirniadol.
• Dangos ymwybyddiaeth feirniadol o wahanol gonfensiynau ysgrifennu ac offer ysgrifennu, a'r gallu i'w defnyddio a'u haddasu'n llwyddiannus ar gyfer gwahanol fathau o asesu.
• Asesu a datrys problemau'n annibynnol, gan ystyried barn pobl eraill mewn ffordd systematig a gwerthusol.

Cymhwyso gwybodaeth, dealltwriaeth a sgiliau mewn cyd-destun proffesiynol.

Sgiliau Trosglwyddadwy/Allweddol:

• Defnyddio meddalwedd a rhaglenni TG perthnasol yn effeithiol, gan gynnwys meddalwedd iaith Gymraeg, i gyflwyno a dadansoddi deunyddiau.
• Trefnu a chyfathrebu syniadau a dadleuon cymhleth mewn gwahanol fformatau sy'n addas i wahanol gynulleidfaoedd, gan ddefnyddio confensiynau cyfeirio priodol.
• Defnyddio ystod o sgiliau cyflogadwyedd, gan gynnwys cyfathrebu, cydweithio, rheoli amser, a'r gallu i ddilyn cyfarwyddiadau.
• Myfyrio ar adborth adeiladol ac ymateb iddo
• Datblygu ymatebion creadigol, beirniadol ac annibynnol i broblemau neu dasgau.