Cymraeg ac Iaith Fodern (BA)

Rydyn ni’n defnyddio amryw ddulliau addysgu megis darlithoedd, seminarau, dosbarthiadau iaith a gweithdai. 

Mae cynnwys darlithoedd yn cyfleu trosolwg o brif gysyniadau a fframweithiau pwnc, gan roi'r sgiliau a fydd yn eich galluogi i gynnal ymchwil yn annibynnol ar gyfer y seminarau a datblygu a gweithredu eich syniadau eich hun. Gallai’r deunyddiau hyn gael eu cyflwyno i chi wyneb yn wyneb neu mewn fformat digidol fel y gallwch eu hastudio ar eich liwt eich hun.

Mae seminarau’n ddosbarthiadau rhyngweithiol sy'n cynnwys grŵp bychan o fyfyrwyr ac aelod o dîm addysgu'r modiwl. Gall ffurf y seminarau amrywio, gan gynnwys trafodaeth grŵp cyfan, gwaith grwpiau bach a chyflwyniadau a arweinir gan fyfyrwyr. Mae seminarau’n cynnig awyrgylch egnïol lle gallwch chi archwilio ac ymgysylltu’n feirniadol â syniadau a dadleuon sydd wedi’u cyflwyno yn y darlithoedd. 

Mae'r holl addysgu yn canolbwyntio ar ddysgu gweithredol a chyfranogiad ystyrlon myfyrwyr, gyda chyfleoedd yn cael eu darparu i ymarfer a datblygu cymwyseddau a sgiliau allweddol. 

Mae paratoi ar gyfer dosbarth ac astudio’n annibynnol yn rhan bwysig o'ch dysgu. Rhwng dosbarthiadau, byddwch chi’n paratoi deunydd, tystiolaeth a dadleuon, ac yn cwblhau tasgau iaith yn unigol neu mewn grwpiau. Mae ymchwil hefyd yn ganolog i brofiad myfyrwyr ym Mhrifysgol Caerdydd a chaiff ein holl addysgu ei lywio gan y canfyddiadau diweddaraf ac ymholiad academaidd.

Mae’n dulliau addysgu’n meithrin sgiliau deallusol megis meddwl yn feirniadol, dadansoddi’n fanwl, cloriannu tystiolaeth, llunio dadleuon, rhoi damcaniaethau ar waith a defnyddio iaith yn effeithiol mewn traethodau a thrafodaethau. At hynny, byddwn ni’n eich helpu i weithio mewn tîm, cynnal ymchwil yn annibynnol a rheoli amser mewn awyrgylch cefnogol.

Sut y caf fy nghefnogi?

Byddwch yn cael eich arwain trwy eich astudiaethau gan Diwtor Personol, a fydd yn gallu rhoi cyngor i chi ar faterion academaidd. Eich tiwtor personol fydd y ddolen gyswllt bob amser ynghylch unrhyw anawsterau sy’n effeithio ar eich astudiaethau. Byddwch chi’n cyfarfod â’ch tiwtor personol ddwywaith yn ystod pob blwyddyn academaidd ac fe’ch anogir chi i gysylltu â’ch tiwtor unrhyw bryd os oes angen cymorth neu gyngor arnoch chi.

Yn ystod eich blwyddyn dramor, bydd cydlynydd astudiaethau tramor yn cysylltu â chi bob hyn a hyn ac yn cadw llygad ar eich cynnydd.

Mae gan ein modiwlau le penodol ar Amgylchedd Dysgu Rhithwir Prifysgol Caerdydd lle byddwch yn cael eich arwain trwy'r gweithgareddau a'r tasgau wythnosol y mae angen i chi eu cwblhau. Bydd gennych hefyd fynediad at ddeunyddiau dysgu ac adnoddau a rennir megis recordiadau darlithoedd, tasgau ac adnoddau, gwybodaeth am asesiadau a dolenni i adnoddau digidol gan gynnwys y deunyddiau llyfrgell sydd ar gael mewn fformat electronig. 

Bydd staff Gwasanaethau Proffesiynol Ysgol y Gymraeg a'r Ysgol Ieithoedd Modern hefyd ar gael i roi cyngor ac arweiniad i chi mewn amgylchedd cefnogol, gofalgar a chyfrinachol.

Yn ogystal, mae Bywyd Myfyrwyr sydd wedi’i leoli yng Nghanolfan Bywyd y Myfyrwyr, yn cynnig ystod o wasanaethau. Mae’r gwasanaethau cymorth hyn yn cynnwys: Cynghori ar arian, dyfodol myfyrwyr, cwnsela, iechyd a lles, mentora, medrau astudio academaidd, Gwasanaeth Anableddau’r Myfyrwyr a llyfrgelloedd a chanolfannau adnoddau ardderchog.

Sut caf fy asesu?

Diben yr asesu yw eich helpu i hel syniadau, meithrin medrau a datblygu galluoedd. Mae anogaeth arnoch i fod yn arloesol ac yn greadigol gan feddwl yn feirniadol am y testunau a’r diwylliannau a welwch chi a chyflwyno dadleuon yn ôl tystiolaeth trwy’r Gymraeg, y Saesneg a’r iaith fodern rydych chi’n ei hastudio. 

Rydyn ni’n defnyddio ffurfiau asesu traddodiadol (megis traethodau, posau, profion yn y dosbarth, arholiadau llafar a thraethodau hir) yn ogystal â mathau mwy arloesol (megis portffolios cyfieithu, prosiectau chwarae rolau, blogiau, cyfweliadau a chyflyniadau posteri). Mae asesiadau hefyd yn cynnwys beirniadaethau ffynhonnell, prosiectau ymchwil, adolygiadau, portffolios creadigol-feirniadol a phostiadau blogiau. 

Mae rhai o'n hasesiadau yn eich galluogi i weithio ar y cyd ar brosiect, tra bod eraill yn cynnwys ysgrifennu a chreu ar gyfer gwahanol gynulleidfaoedd. Cewch gyfle, er enghraifft, i ddewis asesiad ysgrifennu creadigol Cymraeg, neu asesiadau sy’n gofyn ichi lunio dogfennau polisi neu feirniadaethau. Tra bod traethodau hir yn caniatáu ichi archwilio mater neu ddadl llenyddol, diwylliannol neu ieithyddol yn fanylach.

Ym mhob achos, mae ein hasesiadau wedi'u cynllunio i'ch cefnogi i ddatblygu eich syniadau, eich sgiliau a'ch cymwyseddau. Maent yn helpu i roi’r sgiliau i chi gysylltu eich gwybodaeth â materion lleol, cenedlaethol a byd-eang, ac yn eich annog i fod yn arloesol a chreadigol; dod o hyd i ffyrdd newydd o fynd i'r afael â phroblemau neu ofyn cwestiynau; cydweithio i ddatrys problemau a chyflwyno canfyddiadau; a chyflwyno dadleuon ar sail tystiolaeth. 

Mae adborth unigol a grŵp ar asesiadau a mathau eraill o ddysgu yn rhoi cyfle i chi fyfyrio ar eich lefel cyrhaeddiad gyfredol neu ddiweddar. Rhoddir adborth ysgrifenedig am waith ar ôl ei asesu i’ch helpu i wella ar gyfer yr asesiadau nesaf a bydd cyfleoedd i chi drafod yr adborth gyda’ch tiwtoriaid.

Pa sgiliau bydda i'n eu hymarfer a'u datblygu?

Mae Deilliannau Dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych. 

Pan fyddwch wedi llwyddo i gwblhau’r rhaglen, byddwch chi’n gallu:

Gwybodaeth a Dealltwriaeth (GD):

GD1/KU1 Siarad, ysgrifennu, a deall iaith dramor fodern i safon gradd.  

GD 2 Deall strwythurau, cyweiriau ac amrywiaethau’r Gymraeg a’r iaith dramor fodern yr ydych yn ei dysgu a’u defnyddio’n hyblyg ac effeithiol at ddibenion cymdeithasol, academaidd a phroffesiynol, fel y bo’n briodol.

GD3 Dadansoddwch yn feirniadol agweddau ar ddiwylliannau, llenyddiaethau, hanesion a chymdeithasau Cymru a'r gwledydd lle siaredir eich iaith dramor fodern trwy ddefnyddio amrywiaeth o ddeunyddiau a dulliau. 

GD 4 Dangos faint rydych chi’n ei wybod ac yn ei ddeall ynghylch pa mor debyg neu annhebyg yw diwylliannau a chymdeithasau eraill.

GD5 Deall a gwybod perthynas gwahanol ddiwylliannau â’i gilydd yn fanwl fel y gallwch chi lywio a chyfryngu rhwng mwy nag un.

GD6 Beirniadu datblygiad y Gymraeg a’i llenyddiaeth mewn cyfnodau hanesyddol gwahanol, o gyd-destun ieithyddol, llenyddol, cymdeithasol a phroffesiynol yn ogystal â gwerthuso ymdrechion i adfer a hyrwyddo’r iaith

Sgiliau Deallusol(SD):

SD1 Cyfathrebu'n glir, yn gryno ac yn effeithiol i gynulleidfaoedd amrywiol, yn ysgrifenedig ac ar lafar, yn Saesneg ac mewn iaith dramor fodern.

SD2 Mabwysiadu ystod o strategaethau i gychwyn a chynnal dadansoddiad o wybodaeth ac iaith.

SD3 Dod i gasgliadau ynghylch cryfderau a gwendidau safbwyntiau a dadleuon, gan eu cyfiawnhau trwy resymu’n gadarn a dehongli deunydd gwreiddiol yn fanwl.

SD4 Gwerthuso syniadau a dadleuon yn feirniadol trwy gyflwyno gwybodaeth a syniadau yn gydlynol gan ddefnyddio amryw fedrau ar bapur ac ar lafar. 

SD5 Defnyddio technegau ymchwil perthnasol ac effeithiol i gynllunio ac ysgrifennu neu gyflwyno testunau academaidd (traethodau, cyflwyniadau, testunau clyweledol) gan ddefnyddio tystiolaeth a’r confensiynau cyfeirnodi cywir.

SD6 Beirniadu testunau, data, defnyddiau, cysyniadau a damcaniaethau sy’n berthnasol i’r iaith Gymraeg a llenyddiaeth Gymraeg, gan ddefnyddio geirfa a therminoleg briodol.

Sgiliau Ymarferol Proffesiynol(SY):

SY1 Defnyddio cyfryngau digidol yn effeithiol ar gyfer dod o hyd i wybodaeth, cyfathrebu a dysgu. Defnyddio cyfryngau digidol yn effeithiol ar gyfer dod o hyd i wybodaeth, cyfathrebu a dysgu. 

SY2 Cymhwyso sgiliau ieithyddol uwch i gynhyrchu ystod o ddeunydd gan ddefnyddio Cymraeg ysgrifenedig a llafar a/neu, Saesneg ac Iaith Fodern sy'n briodol i'r gweithle ac y bwriedir iddi fynd i'r afael ag ystod o gynulleidfaoedd 

SY3 Nodi a disgrifio problemau a gweithio ar y cyd i'w datrys. 

SY4 Dangos gwytnwch, gallu i addasu ac annibyniaeth trwy dreulio amser yn niwylliant iaith dramor fodern. 

SY5 Dangos meddwl beirniadol, rhesymu a'r gallu i gymhathu a chrynhoi gwybodaeth a syniadau cymhleth trwy ddethol yn annibynnol a dadansoddi'n feirniadol ystod briodol o dystiolaeth.

SY6 Cymhwyso gwybodaeth, dealltwriaeth a sgiliau mewn cyd-destun proffesiynol.

Sgiliau Trosglwyddadwy/Allweddol(SA):

SA1 Defnyddio medrau meddwl yn feirniadol a rhesymu i ddadansoddi a gwerthuso tystiolaeth a syniadau amrywiol.

SA2 Defnyddio sgiliau ymchwil ymarferol.

SA3 Creu syniadau gwreiddiol a defnyddio dull creadigol, llawn dychymyg a dyfeisgar o feddwl wrth ymateb i anghenion a phroblemau.   

SA4 Dysgu yn sgîl beirniadaeth adeiladol a derbyn ei negeseuon.

SA5 Bod yn ddyfeisgar ac ysgwyddo cyfrifoldeb am eich dysgu a'ch datblygu proffesiynol eich hun. 

SA6 Defnyddio amryw fedrau cyflogadwyedd a menter megis creadigrwydd, mentro, trefnu, rheoli amser, gweithio'n annibynnol a gweithio mewn tîm. 

SA7 Ymddwyn fel dinesydd byd-eang gan gydio mewn gwahaniaethau diwylliannol a’u gwerthfawrogi trwy brofiad o wledydd eraill.