Cyfieithu (BA)

Rydyn ni’n defnyddio amryw ddulliau addysgu megis darlithoedd, seminarau, dosbarthiadau iaith a gweithdai. Mae cynnwys darlithoedd yn cyfleu trosolwg o brif gysyniadau a fframweithiau pwnc, gan roi'r medrau a fydd yn eich galluogi i gynnal ymchwil yn annibynnol ar gyfer y seminarau, datblygu’ch syniadau eich hun a’u rhoi nhw ar waith. Gallen ni gyflwyno’r deunyddiau hynny’n bersonol neu ar ffurf ddigidol fel y bydd modd eu hastudio wrth eich pwysau. 

Mae seminarau’n ddosbarthiadau rhyngweithiol sy'n cynnwys grŵp bychan o fyfyrwyr ac aelod o dîm addysgu'r modiwl. Gall ffurf y seminarau amrywio megis trafodaeth gan y grŵp i gyd, gwaith mewn grwpiau bychain a chyflwyniadau o dan adain myfyrwyr. Mae seminarau’n cynnig awyrgylch egnïol lle y gallwch chi gnoi cil ar syniadau a dadleuon sydd wedi’u cyflwyno yn y darlithoedd. Er enghraifft, gallech chi ddefnyddio dulliau cyfieithu penodol yn eich ieithoedd, elwa ar ymarfer defnyddio technoleg gyfieithu neu drafod rhai syniadau beiddgar o hanes cyfieithu.

Mae’n ffordd o ddysgu iaith yn canolbwyntio ar ddysgu gweithredol a chyfranogiad ystyrlon myfyrwyr. Bydd digon o gyfleoedd i ddefnyddio a datblygu'r cymwyseddau a medrau iaith allweddol yn rheolaidd. Mae dosbarthiadau wedi'u trefnu i ehangu’ch hyfedredd ieithyddol a gwella'ch hyder a'ch medrau cyfathrebu mewn awyrgylch cyfeillgar a chefnogol.

Mae paratoi ar gyfer dosbarth ac astudio’n annibynnol yn rhan bwysig o'ch dysgu. Rhwng dosbarthiadau, byddwch chi’n paratoi deunydd, tystiolaeth a dadleuon, ac yn cwblhau tasgau iaith yn unigol neu mewn grwpiau. I’ch helpu i ddysgu iaith yn annibynnol, mae Ysgol yr Ieithoedd Modern wedi llunio adnoddau a gweithgareddau dysgu cymeradwy ac rydyn ni’n eich annog i’w defnyddio yn rhan o’ch dysgu annibynnol. 

Sut y caf fy nghefnogi?

Tiwtor personol fydd yn eich arwain trwy’ch astudiaethau, gan eich cynghori ar faterion academaidd. Eich tiwtor personol fydd y ddolen gyswllt bob amser ynghylch unrhyw anawsterau sy’n effeithio ar eich astudiaethau. Byddwch chi’n cyfarfod â’ch tiwtor personol ddwywaith yn ystod pob blwyddyn academaidd ond dyma’ch annog chi i gysylltu â’ch tiwtor unrhyw bryd os oes angen cymorth neu gyngor arnoch chi. Bydd pob aelod o staff academaidd ar gael i gwrdd â myfyrwyr yn ôl oriau penodol. 

Yn ystod eich blwyddyn dramor, bydd cydlynydd astudiaethau tramor yn cysylltu â chi bob hyn a hyn ac yn cadw llygad ar eich cynnydd. 

Mae gan bob modiwl le neilltuedig yng Nghyfleuster Dysgu Rhithwir Prifysgol Caerdydd, lle y byddwn ni’n eich tywys trwy weithgareddau’r wythnos a’r tasgau y bydd angen eu cwblhau. Bydd yno ddeunyddiau ac adnoddau dysgu megis recordiadau o ddarlithoedd, tasgau ac adnoddau iaith a dolenni ag adnoddau digidol gan gynnwys deunyddiau’r llyfrgelloedd ar ffurf electronig. 

Mae staff y Gwasanaethau Proffesiynol ar gael yng nghanolfan yr israddedigion i ateb eich cwestiynau. At hynny, mae swyddog cynorthwyo myfyrwyr sy’n gallu’ch cynghori a’ch llywio yn ôl yr angen mewn awyrgylch cefnogol, caredig a chyfrinachol.

Mae Gwasanaethau Bywyd y Myfyrwyr, yng Nghanolfan Bywyd y Myfyrwyr, yn cynnig ystod o wasanaethau. Mae’r gwasanaethau cymorth hynny’n cynnwys: Cynghori ar arian, dyfodol myfyrwyr, cwnsela, iechyd a lles, mentora, medrau astudio academaidd, Gwasanaeth Anableddau’r Myfyrwyr a llyfrgelloedd a chanolfannau adnoddau ardderchog.

Sut caf fy asesu?

Diben yr asesu yw’ch helpu i hel syniadau, meithrin medrau a datblygu galluoedd. 

Byddwch chi’n gweld amrywiaeth o fformatau asesu. Mae gwaith ein cwrs cyfieithu yn asesu’ch gallu i drosi’r testunau gwreiddiol i’r Saesneg ar ffurf effeithiol a phriodol ac i bwyso a mesur y broses. Bydd prosiectau a chyflwyniadau grŵp yn cryfhau'ch medrau rhyngbersonol. 

Byddwch chi’n astudio blociau adeiladu iaith hefyd, gan gynnwys patrymau a strwythurau gramadegol a geiriadurol. Byddwn ni’n asesu’r medrau hynny yn rheolaidd yn ystod modiwlau iaith sy’n adlewyrchu natur gynyddol a chronnus dysgu iaith. 

Rydyn ni’n defnyddio ffurfiau asesu traddodiadol (megis traethodau, posau, profion yn y dosbarth, arholiadau llafar a thraethodau hir) yn ogystal â mathau mwy arloesol (megis portffolios cyfieithu, prosiectau chwarae rolau, blogiau, cyfweliadau a chyflyniadau posteri). 

Rhoddir adborth ysgrifenedig am waith ar ôl ei asesu i’ch helpu i wella ar gyfer yr asesiadau nesaf, a bydd cyfleoedd ichi drafod yr adborth gyda’ch tiwtoriaid. At hynny, bydd amryw ymarferion megis posau, cyflwyniadau, traethodau a phrosiectau. Bydd y tiwtoriaid yn rhoi adborth ffurfiannol i wella’ch dysgu a’ch deall cyn sefyll yr asesiadau crynodol.

Pa sgiliau bydda i'n eu hymarfer a'u datblygu?

Erbyn diwedd y rhaglen, byddwch chi’n gallu:

Gwybod a deall:

GD 1 Siarad, ysgrifennu a deall un neu ddwy iaith dramor fodern yn ôl safon gradd.  

GD 2 Deall strwythurau, cyweiriau ac amrywiaethau'r ieithoedd rydych chi'n eu dysgu a'u defnyddio fel y bo'n briodol. 

GD3: Dangos eich bod yn gwybod galwedigaeth cyfieithu a’i dulliau yn drylwyr yn ogystal â defnyddio’r hyn rydych chi’n ei wybod mewn tasgau cyfieithu ymarferol a chyd-destunau proffesiynol.   

GD 4 Defnyddio gwybodaeth fanwl a phrofiad uniongyrchol o ddiwylliannau eraill, a dealltwriaeth gynnil o bwysigrwydd diwylliannol, cymdeithasol a gwleidyddol maes cyfieithu i lywio a chyfieithu rhwng diwylliannau. 

Medrau deallusol:

SD 1 Cyfathrebu mewn modd eglur, cryno ac effeithiol â chynulleidfaoedd amryfal ar bapur ac ar lafar yn Saesneg ac un neu ddwy iaith dramor fodern.   

SD 2 Dadansoddi amrywiaeth o destunau cyffredinol ac arbenigol, datrys problemau cyfieithu cymhleth a myfyrio ar y dulliau cyfieithu priodol wrth ymgymryd â thasgau a phrosiectau cyfieithu.   

SD 3 Defnyddio medrau ieithyddol uwch ac arbenigedd diwylliannol i hel gwybodaeth a dehongli ystyron mewn ystod eang o gyd-destunau.  

SD 4 Gwerthuso syniadau a dulliau cyfieithu yn feirniadol trwy ddadleuon wedi’u llunio’n dda, wedi’u cyflwyno mewn fformatau academaidd a phroffesiynol priodol – traethodau, cyflwyniadau, sylwebaethau cyfieithu – gyda thystiolaeth berthnasol a chyfeiriadau.    

Medrau ymarferol proffesiynol:

SY 1 Defnyddio rhaglenni TG, gan gynnwys technoleg cyfieithu a chyfryngau digidol, lle bo'n briodol.  

SY 2 Defnyddio medrau ac arferion cyfieithu uwch mewn lleoliad proffesiynol. 

SY 3 Gweithio’n rhan o dîm, gan ddatblygu dull cydweithredol o ddatrys problemau.  

SY 4 Cyfieithu a golygu ystod o destunau cyffredinol ac arbenigol yn effeithiol yn ôl safonau proffesiynol ac arferion creadigrwydd.   

Medrau trosglwyddadwy/allweddol:

SA 1 Rhesymu, gwerthuso tystiolaeth a datrys problemau, gan gysylltu elfennau damcaniaethol â rhai ymarferol.   

SA 2 Ymchwilio i wybodaeth a dehongli data perthnasol.  

SA 3 Creu syniadau gwreiddiol a defnyddio dull creadigol, llawn dychymyg a dyfeisgar o feddwl wrth ymateb i anghenion a phroblemau.   

SA 4 Dysgu yn sgîl beirniadaeth adeiladol a derbyn ei negeseuon.  

SA 5 Bod yn ddyfeisgar ac ysgwyddo cyfrifoldeb am eich dysgu a'ch datblygu proffesiynol eich hun.  

SA 6 Defnyddio amryw fedrau cyflogadwyedd a menter megis creadigrwydd, mentro, trefnu, rheoli amser, gweithio'n annibynnol a gweithio mewn tîm. 

SA 7 Cyfathrebu a chyfryngu ar draws ieithoedd a diwylliannau.