Dychwelwch i Ymarfer (Nyrsio) (Credyd Israddedig Sefydliadol) Dysgu cyfunol rhan amser

Byddwch yn dysgu o fewn carfan o fyfyrwyr nyrsio o feysydd cymysg er mwyn datblygu eich dealltwriaeth o rôl y nyrs yn ogystal â’r meysydd nyrsio eraill a gynrychiolir. Fel ‘arbenigwyr drwy brofiad’, byddwch hefyd yn cael cyfleoedd gwerthfawr i ddysgu mewn modd rhyngbroffesiynol gan weithwyr gofal iechyd proffesiynol eraill a chan leisiau go iawn defnyddwyr gwasanaethau a’u gofalwyr.

Caiff strategaethau dysgu wyneb yn wyneb traddodiadol, fel darlithoedd, gweithdai a seminarau, eu hategu gan gyfleoedd digidol ar-lein, efelychiadau clinigol ac adnoddau sydd â’r nod o wella’ch profiad dysgu yn gyffredinol. Bydd y rhain yn eich galluogi i adennill eich hyder a’ch cymhwysedd, ac i ennill gwybodaeth, sgiliau a galluoedd newydd a fydd yn eich arfogi ar gyfer dychwelyd i gofrestr Cyngor Nyrsio a Bydwreigiaeth y DU ac yn helpu i’ch paratoi ar gyfer rôl fel goruchwylydd ymarfer yn y dyfodol, yn dilyn cyfnod o breceptoriaeth glinigol.

Sut y caf fy nghefnogi?

Bydd tiwtor personol maes, sy’n aelod o’r grŵp staff academaidd ac yn nyrs gymwysedig, yn cael ei neilltuo ar eich cyfer. Cewch eich annog i drefnu cyfarfodydd â’ch tiwtor personol drwy gydol eich amser ar y rhaglen ac, yn ystod y cyfarfodydd hyn, gallwch gael cymorth bugeiliol, myfyrio ar eich cynnydd cyffredinol, a cheisio goruchwyliaeth academaidd. Bydd tiwtoriaid personol hefyd yn helpu i’ch cyfeirio at ffynonellau eraill o gymorth fel Cyswllt Anabledd Myfyrwyr yr ysgol a’r rhaglen a gwasanaethau’r brifysgol gyfan, gan gynnwys Cefnogi a Lles Myfyrwyr a’r Tîm Sgiliau Academaidd a Mentora (gweler Llawlyfr y Myfyrwyr am fwy o wybodaeth). Gall tiwtoriaid personol sy’n siarad Cymraeg fod ar gael i fyfyrwyr sy’n dewis cael cymorth drwy gyfrwng y Gymraeg.

Mae’r ysgol yn gweithio mewn partneriaeth â’r Coleg Cymraeg Cenedlaethol i roi cyfleoedd i fyfyrwyr Cymraeg astudio elfennau o’r rhaglen drwy gyfrwng y Gymraeg. Bydd mentoriaid sy’n siarad Cymraeg hefyd ar gael mewn rhai meysydd clinigol yn ein byrddau iechyd partner.

Yn yr amgylchedd clinigol, cewch eich cefnogi gan oruchwylwyr ymarfer ac aseswyr ymarfer wrth i chi weithio i gyflawni eich dau asesiad Dychwelyd i Ymarfer perthnasol a meysydd hyfedredd. Yn y lleoliad academaidd, bydd asesydd academaidd hefyd wedi’i neilltuo ar eich cyfer a fydd yn adolygu eich cynnydd ac yn goruchwylio’ch oriau clinigol a’ch cofnodion yn yr e-bortffolio. Gall goruchwylwyr ymarfer neu aseswyr ymarfer sy’n siarad Cymraeg fod ar gael i chi os ydych yn dewis cael cymorth drwy gyfrwng y Gymraeg yn yr amgylchedd clinigol.

I gefnogi dysgu trwy ymarfer, byddwch hefyd yn ymgymryd â gweithgareddau a senarios efelychol, a chewch fynediad at sesiynau sgiliau clinigol galw heibio mewn ystafell efelychu bwrpasol. Bydd hyn yn eich galluogi i ymarfer, datblygu ac atgyfnerthu eich sgiliau clinigol mewn amgylchedd diogel a chefnogol.

Sut caf fy asesu?

Mae’r cwricwlwm yn ymgorffori amrediad amrywiol a chreadigol o strategaethau a dulliau asesu crynodol a ffurfiannol sy’n adlewyrchu dull gweithredu cynhwysol sy’n canolbwyntio ar y dysgwr ac sy’n gyson â deilliannau dysgu arfaethedig y rhaglen. 

Nod asesu ffurfiannol, megis ffug arholiad rhifedd ac adborth myfyriol ffurfiannol, sy’n ymgorffori gwerthuso gan gymheiriaid a defnyddwyr gwasanaethau, yw cefnogi eich dysgu a’ch helpu wrth nodi eich cryfderau eich hun a meysydd i’w datblygu, a bydd yn helpu i’ch paratoi ar gyfer eich asesiadau crynodol. Nod asesu crynodol yw rhoi syniad o’r graddau rydych wedi llwyddo i gyflawni deilliannau dysgu arfaethedig y modiwl a bydd yr adborth a ddarperir yn eich galluogi i nodi meysydd i’w datblygu ar gyfer datblygiad proffesiynol pellach a pharhaus. 

Bydd eich cyflawniadau wrth ymarfer yn cael eu cofnodi mewn dogfen asesu ymarfer (PAD) ar ffurf e-bortffolio sy’n cael ei arwain gan y myfyriwr.  Caiff gwaith asesu’r deilliannau dysgu ei gwmpasu mewn addasiad o’r ddogfen asesu ymarfer cyn cofrestru ar gyfer israddedigion dros Gymru gyfan er mwyn adlewyrchu’r safonau asesu ymarfer newydd a osodwyd gan y Cyngor Nyrsio a Bydwreigiaeth.  Mae’r e-bortffolio hwn yn cynnwys dau asesiad perthnasol ar gyfer: ymarfer (rheoli meddyginiaethau, ac arwain a chydlynu gofal), a’r elfennau hyfedredd clinigol, atodiad/rhestr a myfyriol ar gyfer israddedigion yn y drydedd flwyddyn.  I gefnogi’r gwaith asesu, bydd goruchwylwyr ymarfer, asesydd ymarfer ac asesydd academaidd yn cael eu neilltuo ar eich cyfer.  Byddwch yn treulio isafswm o 300 o oriau o fewn amgylchedd dysgu ymarfer clinigol.  Er mwyn dangos cynnydd rheolaidd, bydd disgwyl i chi ymgymryd â thua 15 awr glinigol yr wythnos neu 30 awr ymhen pythefnos a chofnodi’r oriau hyn. Caiff hyn ei oruchwylio gan eich asesydd academaidd. 

Pa sgiliau bydda i'n eu hymarfer a'u datblygu?

Mae'r deilliannau dysgu ar gyfer y rhaglen hon yn disgrifio'r hyn y byddwch yn gallu ei wneud o ganlyniad i'ch astudiaeth ym Mhrifysgol Caerdydd. Byddant yn eich helpu i ddeall yr hyn a ddisgwylir gennych.

Gellir gweld y deilliannau dysgu ar gyfer y rhaglen hon isod:

Gwybodaeth a dealltwriaeth:

Arfarnu'r sylfaen wybodaeth a thystiolaeth sy'n tanategu'r hyfedredd nyrsio ar gyfer Dychwelyd i Ymarfer yn feirniadol.

Sgiliau ymarferol proffesiynol:

Arwain, rheoli a chydlynu gofal.

Gwaith cyfrifo ac optimeiddio wrth weinyddu meddyginiaethau sy'n ddiogel ac yn gymwys wrth ddychwelyd i nyrsio oedolion, nyrsio iechyd meddwl neu nyrsio plant a phobl ifanc.

Sgiliau trosglwyddadwy/allweddol:

Dangos hyder, cymhwysedd ac ymagweddau ac ymddygiad proffesiynol priodol, gan gynnwys atebolrwydd a chyfrifoldeb dros eich dysgu eich hun a dysgu eraill.