Crefydd, Athroniaeth a Moeseg (BA)

Mae ymchwil wrth wraidd profiad myfyrwyr Prifysgol Caerdydd gyda’r canfyddiadau diweddaraf yn llywio pob rhaglen. Caiff llawer o'ch dosbarthiadau eu haddysgu gan arbenigwyr a gydnabyddir yn rhyngwladol sy'n cyfrannu at wybodaeth wreiddiol yn eu maes.

Rydym yn cynnig amgylchedd dysgu cefnogol, wedi'i gynllunio i'ch helpu i ddod yn feddyliwr beirniadol annibynnol. Byddwch yn dysgu drwy ystod eang o ddulliau addysgu gan gynnwys darlithoedd rhyngweithiol, seminarau a gweithdai bywiog yn seiliedig ar drafodaethau. Mae’r seminarau a’r gweithdai’n cynnig cyfle gwerthfawr i drin a thrafod prif syniadau a deunydd darllen amryw bynciau. Dyma gyfle gwerthfawr i drafod syniadau, gweithio'n agos gyda'ch darlithwyr a dysgu gan fyfyrwyr eraill. Bydd gennych fynediad at holl ddeunyddiau'r cwrs trwy ein hamgylchedd dysgu electronig.

 Byddwch yn datblygu eich galluoedd i ddadansoddi testunau a dadleuon yn fanwl, gwerthuso tystiolaeth, cydweithio ar ddatrys problemau, llunio eich dadleuon eich hun, a chyflwyno'ch syniadau'n glir i eraill.

Sut y caf fy nghefnogi?

Byddwch yn cael cymorth gan nifer o staff gwahanol, gyda rhai yn canolbwyntio ar berfformiad academaidd mewn maes penodol ac eraill yn rhoi sylw i ddysgu a chynnydd mewn ffordd fwy cyfannol.

Eich prif ffynonellau cymorth yw eich arweinwyr modiwl a'ch Tiwtoriaid Personol. Caiff dau diwtor personol eu dyrannu i chi, un ym maes Crefydd a'r llall mewn Athroniaeth. Mae eich arweinwyr modiwl yn cynnal sesiynau galw heibio yn ystod yr wythnosau addysgu y gallwch eu mynychu os oes gennych unrhyw gwestiynau am ddeunyddiau cwrs neu'r asesiadau. Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd, a'ch cynnydd academaidd, yn ogystal ag ar faterion bugeiliol. Fe'ch gwahoddir i gwrdd â'ch Tiwtor Personol yn rheolaidd trwy gydol y radd, ac maent ar gael ar gyfer cyfarfodydd ychwanegol yn ôl yr angen. Gall myfyrwyr sy'n siarad Cymraeg ofyn am diwtor personol sy'n siarad Cymraeg.

Mae ein Timau Israddedig yn darparu cefnogaeth academaidd a chefnogaeth i fyfyrwyr ac maent yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r Brifysgol yn cynnig amrywiol wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cynorthwyo gyda materion ariannol, a chynnig cymorth i fyfyrwyr ag anableddau. Mae'r gwasanaethau hyn wedi'u cyd-leoli yng Nghanolfan Bywyd Myfyrwyr y Brifysgol. Bydd y llyfrgelloedd, mannau astudio a chanolfannau adnoddau eraill i gyd ar gael i chi.

Byddwch yn cael adborth rheolaidd ar eich cynnydd. Bydd adborth llafar mewn darlithoedd, gweithdai a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn adborth ffurfiannol ar syniadau eich asesiadau, ac adborth manwl ar yr holl waith cwrs pan fydd wedi'i farcio. Os byddwch yn dilyn modiwl traethawd hir, byddwch yn derbyn adborth rheolaidd ar eich prosiect gan eich goruchwyliwr.

Mae gennym wefan Dysgu Canolog lle gallwch gyrchu fideos, lluniau, taflenni darlithoedd, llyfryddiaethau, dolenni at ddeunydd darllen pellach, ymarferiadau electronig a chylchoedd trafod. Lle bo'n bosibl, caiff darlithoedd wyneb yn wyneb eu recordio er mwyn i chi allu gwylio ac astudio yn eich amser eich hun.

Gwasanaethau Cymorth

Mae'r Ganolfan Datblygu Ysgrifennu (sydd ar gyfer myfyrwyr yn yr Ysgol Saesneg, Cyfathrebu ac Athroniaeth yn unig) yn cynnig cefnogaeth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i gynorthwyo gyda'ch asesiadau.

Amrywiaeth
Ein nod yw creu amgylchedd cynhwysol, cefnogol a chroesawgar sy’n parchu urddas staff a myfyrwyr o bob oed, ethnigrwydd, anabledd, strwythur teuluol, rhywedd, cenedl, cyfeiriadedd rhywiol, hil, crefydd neu gred arall, a chefndir economaidd-gymdeithasol. 

Sut caf fy asesu?

Mae eich asesiadau wedi'u cynllunio i ddatblygu sgiliau allweddol cynyddol mewn cyfathrebu, cydweithio, meddwl yn feirniadol a myfyrio. Byddwn yn asesu lefel eich gwybodaeth a'ch dealltwriaeth ym mhob modiwl drwy gyfuniad o aseiniadau, gan gynnwys dadansoddiadau beirniadol o destunau, traethodau, adolygiadau beirniadol, asesiadau gwaith grŵp a thrafodaethau grŵp, ac asesu eich sgiliau eich hun yn fyfyriol. Yn y flwyddyn olaf, byddwch yn cymryd rhan mewn prosiect athroniaeth cydweithredol mawr sy'n cynnwys ysgrifennu a chyflwyno i gynulleidfa broffesiynol. Gall modiwlau dewisol gynnig amrywiaeth ehangach o asesiadau, gan gynnwys ysgrifennu ar gyfer cynulleidfa gyhoeddus, myfyrio ar weithred o addoli crefyddol, rhoi sylwadau ar waith celf neu waith cyfryngol, neu greu podlediad.

Rydym yn cynnig cyfleoedd ffurfiannol i brofi eich meddwl a'ch dysgu ac adborth drwy gydol eich taith ddysgu i'ch paratoi ar gyfer yr asesiadau crynodol sy'n ffurfio eich marc graddio. Mae'r sgiliau damcaniaethol a chymhwysol a gaiff eu datblygu a'u hasesu drwy gydol eich gradd yn eich paratoi ar gyfer amryw o yrfaoedd graddedigion.

Pa sgiliau bydda i'n eu hymarfer a'u datblygu?

Mae Deilliannau Dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych

Erbyn diwedd y rhaglen, byddwch yn gallu:

Gwybodaeth a Dealltwriaeth:

GD1: Archwilio cymhlethdod y syniadau, cysyniadau a therminoleg sylfaenol sy'n berthnasol i grefyddau ac i astudio crefydd, gan gynnwys ei dimensiwn moesegol.

GD2: Arsylwi a mynegi'r ystod o safbwyntiau, arferion, testunau a diwylliant materol a nodwyd o fewn traddodiadau crefyddol yn fyd-eang.

GD3: Gwerthuso'n feirniadol rai o'r damcaniaethau a'r dadleuon canolog, a'u cymwysiadau, mewn athroniaeth foesol, gymdeithasol neu wleidyddol.

GD4: Gwerthuso'n feirniadol rai o'r damcaniaethau a'r dadleuon canolog, a'u cymwysiadau, mewn epistemoleg, athroniaeth iaith, neu athroniaeth meddwl.

GD5: Dadansoddi'n feirniadol ddamcaniaethau a dadleuon o waith athronyddol cyfoes, gan gynnwys croestoriadau o wahanol feysydd athroniaeth neu ymchwil ryngddisgyblaethol.

GD6: Cymhwyso ymchwil athronyddol trwy ddrafftio dogfennau polisi neu strategaeth, neu argymhellion gweithredu, mewn ymateb i broblem foesegol neu gymdeithasol yn y byd go iawn sydd o bryder cymdeithasol cyfoes.

GD7: Deall a dehongli problemau moesegol a'r offer methodolegol ar gyfer mynd i'r afael â nhw mewn meysydd academaidd a chyhoeddus.

Sgiliau Deallusol:

SD1: Gwerthfawrogi a dadansoddi gwahanol safbwyntiau a ffyrdd o fyw byd-eang yn feirniadol.

SD2: Dehongli a dadansoddi'n feirniadol destunau allweddol, digwyddiadau, a dadleuon moesegol o amrywiol draddodiadau crefyddol.

SD3: Egluro honiadau a dadleuon athronyddol cymhleth ac arbenigol.

SD4: Llunio dadleuon sy'n cefnogi honiadau mewn ymateb i gwestiynau athronyddol.

SD5: Cymhwyso technegau safonol dadansoddi athronyddol i werthuso honiadau a dadleuon athronyddol yn feirniadol.

Sgiliau Ymarferol Proffesiynol:

SY 1: Cyfleu gwybodaeth a dadleuon cymhleth mewn fformatau gwahanol sy'n briodol i wahanol ddibenion.

SY 2: Cyfrannu mewn modd cydweithredol i drafodaethau grŵp a phrosiectau tîm.

SY 3: Mynegi a gwerthuso eich sgiliau academaidd a phroffesiynol eich hun.

Sgiliau Trosglwyddadwy/Allweddol:

SA 1: Ymateb i broblemau yn greadigol, yn feirniadol ac yn annibynnol.

SA 2: Gweithredu cyfarwyddiadau tasg a rheoli llwyth gwaith yn effeithiol i gwrdd â therfynau amser.

SA 3: Cyflwyno a gweithredu ar adborth adeiladol.