Crefydd a Diwinyddiaeth (BA)

Mae ymchwil wrth wraidd profiad myfyrwyr Prifysgol Caerdydd gyda’r canfyddiadau diweddaraf yn llywio pob rhaglen. Caiff llawer o'ch dosbarthiadau eu haddysgu gan arbenigwyr a gydnabyddir yn rhyngwladol sy'n cyfrannu at wybodaeth wreiddiol yn eu maes.

Rydym ni’n cynnig amgylchedd dysgu cefnogol, lle byddwch yn datblygu ystod o sgiliau a chyfoeth o wybodaeth arbenigol. Byddwch chi’n dysgu trwy sawl dull megis darlithoedd rhyngweithiol, seminarau lle ceir trafodaethau bywiog, gweithdai, gwaith grŵp a thiwtorialau. Ategir y gweithgareddau campws hyn gydag adnoddau sydd ar gael trwy Dysgu Canolog, amgylchedd ar-lein sydd wedi'i gynllunio i gyfoethogi eich profiad dysgu a'ch galluogi i ymestyn eich astudiaethau y tu hwnt i'r ystafell ddosbarth. Mae’r seminarau a’r gweithdai’n cynnig cyfle gwerthfawr i drin a thrafod prif syniadau a deunydd darllen amryw bynciau. Maent yn gyfle gwerthfawr i archwilio syniadau, gweithio'n agos gyda'ch tiwtoriaid, a dysgu oddi wrth fyfyrwyr eraill. Yn eich ail flwyddyn a'r flwyddyn olaf, cewch gyfle i ymgymryd ag ystod o brosiectau annibynnol gyda chefnogaeth arbenigwr yn y maes a hyfforddiant un-i-un.

Mae ein dulliau addysgu’n meithrin sgiliau deallusol megis meddwl yn feirniadol, dadansoddi’n fanwl, cloriannu tystiolaeth, llunio dadleuon, rhoi damcaniaethau ar waith a defnyddio iaith yn effeithiol mewn traethodau a thrafodaethau. Rydym hefyd yn eich helpu i sicrhau profiad mewn meysydd fel gweithio mewn tîm, ymchwil annibynnol a rheoli amser.

Sut y caf fy nghefnogi?

Byddwch yn cael cymorth gan nifer o staff gwahanol, gyda rhai yn canolbwyntio ar berfformiad academaidd mewn maes penodol ac eraill yn rhoi sylw i ddysgu a chynnydd mewn ffordd fwy cyfannol.

Dyrennir tiwtor personol i chi fydd yn eich tywys trwy gydol cyfnod eich astudiaethau. Byddwch yn cwrdd â'ch tiwtor personol yn rheolaidd i fyfyrio ar eich cynnydd a'ch datblygiad ar draws eich astudiaethau.

Rhoddir cefnogaeth ychwanegol sy'n benodol i fodiwlau gan diwtoriaid seminarau, darlithwyr a/neu gynullwyr modiwlau; bydd cynghorydd academaidd yn cwrdd â chi’n rheolaidd ac yn rhoi cefnogaeth ar gyfer prosiectau ymchwil annibynnol. Mae gan eich arweinwyr modiwl sesiynau wythnosol yn ystod oriau swyddfa yn yr wythnosau addysgu y gallwch eu mynychu os oes gennych unrhyw gwestiynau am ddeunyddiau cwrs neu asesiadau.

Mae ein Timau Cefnogi Addysg israddedig yn cynnig gwasanaethau academaidd a chymorth myfyrwyr, ac maent yno i gynnig gwybodaeth ac arweiniad mewn ymateb i unrhyw ymholiadau sydd gennych.

Mae gennym wefan Dysgu Canolog lle gallwch gyrchu fideos, lluniau, taflenni darlithoedd, llyfryddiaethau, dolenni at ddeunydd darllen pellach, ymarferiadau electronig a chylchoedd trafod. Lle bo'n bosibl, caiff darlithoedd wyneb yn wyneb eu recordio er mwyn i chi allu gwylio ac astudio yn eich amser eich hun. Mae llyfrgelloedd rhagorol, cyfoeth o archifau a chasgliadau arbennig, a chanolfannau adnoddau hefyd ar gael i chi.

Mae'r Brifysgol yn cynnig amrywiol wasanaethau cymorth trwy ein timau Bywyd Myfyrwyr. Mae'r gwasanaethau hyn wedi'u lleoli yn adeilad pwrpasol y Ganolfan Bywyd Myfyrwyr. Mae'r gwasanaethau hyn yn cynnwys Dyfodol Myfyrwyr (gwasanaeth gyrfaoedd y Brifysgol), gwasanaethau cwnsela, gwasanaethau anabledd a dyslecsia, yn ogystal â chyngor ar iechyd a lles neu faterion ariannol.

Ein nod yw creu amgylchedd cynhwysol, cefnogol a chroesawgar sy’n parchu urddas staff a myfyrwyr o bob oed, ethnigrwydd, anabledd, strwythur teuluol, rhywedd, cenedl, cyfeiriadedd rhywiol, hil, crefydd neu gred arall, a chefndir economaidd-gymdeithasol. 

Sut caf fy asesu?

Byddwn yn asesu eich lefel o wybodaeth a dealltwriaeth ym mhob modiwl trwy gyfuniad o aseiniadau, gan gynnwys prosiectau creadigol, adolygiadau, cyflwyniadau a beirniadu ffynhonnell ochr yn ochr â ffurfiau mwy traddodiadol o asesu megis traethodau. Mae rhai o'r asesiadau’n caniatáu i chi weithio ar y cyd ar brosiect, tra bo eraill yn cynnwys ysgrifennu a chreu ar gyfer gwahanol gynulleidfaoedd; er enghraifft, efallai y gofynnir i chi gynllunio arddangosfa amgueddfa neu ysgrifennu erthygl newyddion; ac efallai y cewch gyfle i greu podlediadau a thestunau digidol ar gyfer y cyfryngau cymdeithasol.  Mae'r asesiadau hyn yn caniatáu i chi ddod yn arbenigwr a chymhwyso'ch gwybodaeth mewn amrywiaeth eang o broffesiynau.

Diben yr holl asesiadau yw eich helpu i ddatblygu eich syniadau, eich sgiliau a'ch galluoedd. Rydym yn cynnig cyfleoedd ffurfiannol i brofi eich meddwl a'ch dysgu ac adborth drwy gydol eich taith ddysgu i'ch paratoi ar gyfer yr asesiadau crynodol sy'n ffurfio eich marc graddio. Mae'r asesiadau'n helpu i roi’r sgiliau i chi gysylltu eich gwybodaeth â materion lleol, cenedlaethol a byd-eang, ac yn eich annog i fod yn arloesol a chreadigol; dod o hyd i ffyrdd newydd o fynd i'r afael â phroblemau neu ofyn cwestiynau; cydweithio i ddatrys problemau a chyflwyno canfyddiadau; a chyflwyno dadleuon ar sail tystiolaeth. Mae'r sgiliau damcaniaethol a chymhwysol a gaiff eu datblygu a'u hasesu drwy gydol eich gradd yn eich paratoi ar gyfer amryw o yrfaoedd graddedigion.

Pa sgiliau bydda i'n eu hymarfer a'u datblygu?

Mae Deilliannau Dysgu’r rhaglen yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych

Erbyn diwedd y rhaglen, byddwch yn gallu:

Gwybodaeth a Dealltwriaeth:

GD 1: Deall testunau, digwyddiadau, themâu a materion allweddol yn systematig wrth astudio crefydd a diwinyddiaeth.

GD 2: Adnabod a gosod datblygiadau cyfoes o ran crefydd yn eu cyd-destun ac mewn astudiaethau crefydd a diwinyddiaeth.

GD 3: Dangos gwybodaeth a dealltwriaeth systematig o gymhlethdod syniadau, cysyniadau, a therminoleg sylfaenol sy'n berthnasol i grefyddau ac i astudio crefydd a diwinyddiaeth.

GD 4: Cymhwyso'n feirniadol amrywiol ddulliau o astudio crefydd a diwinyddiaeth megis hanesyddol, diwinyddol, ieithegol, athronyddol, anthropolegol, cymdeithasegol, ieithyddol, a diwylliannol-faterol.

Sgiliau Deallusol:

SD 1: Datblygu a chymhwyso dadleuon am natur crefydd fel categori o ymddygiad dynol.

SD 2: Trefnu ac amddiffyn dadleuon am brosesau newid a'u ffactorau achosol mewn perthynas â diwinyddiaeth a chrefydd yn y gymdeithas ddynol.

SD 3: Cynhyrchu a chyfiawnhau dadleuon am effaith foesegol deialogau crefyddol mewn cymdeithas hanesyddol a chyfoes.

SD 4: Dadansoddi dealltwriaeth gyffredin o le crefyddau a'u dysgeidiaeth mewn cymdeithasau.

Sgiliau Ymarferol Proffesiynol:

SY 1: Dangos sgiliau proffesiynol a phersonol sydd eu hangen i weithredu yn y gweithle yn hyderus ac yn broffesiynol.

SY 2: Cymhwyso sgiliau meddwl yn feirniadol, rhesymu, a'r gallu i amgyffred a chrynhoi gwybodaeth a syniadau cymhleth trwy ddadansoddi tystiolaeth a’i gwerthuso.

SY 3: Asesu a datrys problemau'n annibynnol, gan ystyried barn pobl eraill mewn ffordd systematig a gwerthusol.

Sgiliau Trosglwyddadwy/Allweddol:

SA 1: Dangos gallu i ddatrys problemau a gwreiddioldeb wrth feddwl drwy ddefnyddio gwybodaeth a sgiliau i fynd i'r afael â phroblemau cyfarwydd ac anghyfarwydd.

SA 2: Rheoli amser a threfniadau personol wrth gwblhau tasgau.

SA 3: Meddu ar y gallu i gyfathrebu gwybodaeth gymhleth mewn amrywiol fformatau megis adroddiadau a chyflwyniadau llafar ac ysgrifenedig, vlogs, traethodau, a thraethodau hir.

SA 4: Gweithio ar eich pen eich hun ar brosiectau sydd â sail ddamcaniaethol ac empirig sy'n defnyddio tystiolaeth ymchwil briodol a pherthnasol

SA 5: Cynhyrchu prosiectau gwreiddiol, creadigol ac entrepreneuraidd, gan ddefnyddio menter, cydbwyso risgiau a chanfod cyfleoedd.

SA 6: Adnabod, myfyrio’n weithredol, a mynegi gan gyfeirio at eich astudiaethau a’ch hunaniaeth eich hun, eich sgiliau, eich gwybodaeth a’ch dealltwriaeth eich hun yn hyderus ac mewn amrywiaeth o gyd-destunau.