Cymraeg ac Athroniaeth (BA)

Trwy gydol y radd, ein nod yw eich cefnogi i ddod yn feddyliwr annibynnol. Byddwch yn dysgu drwy ystod eang o ddulliau addysgu, gan gynnwys darlithoedd rhyngweithiol, seminarau bywiog yn seiliedig ar drafodaethau, a gweithdai.

Mae’r seminarau a’r gweithdai’n cynnig cyfle gwerthfawr i drin a thrafod prif syniadau a deunydd darllen amryw bynciau. Maen nhw’n gyfle da i ystyried syniadau, cydweithio’n agos â’r darlithwyr a dysgu oddi wrth y myfyrwyr eraill. O ran y Gymraeg, mae rôl allweddol hefyd i diwtorialau, gweithdai a dosbarthiadau iaith (yn enwedig ar gyfer y myfyrwyr sy'n dilyn y llwybr ail iaith). Bydd gennych fynediad i holl ddeunyddiau'r cwrs trwy ein hamgylchedd dysgu electronig.

Yn yr amgylchedd cefnogol hwn, byddwch yn datblygu eich gallu i ddadansoddi testunau a dadleuon yn ofalus, gwerthuso tystiolaeth, gweithio ar y cyd trwy broblemau, llunio eich dadleuon eich hun, mireinio eich sgiliau iaith, a chyflwyno'ch syniadau'n glir i eraill.   

Sut y caf fy nghefnogi?

Eich prif ffynonellau cymorth yw eich arweinwyr modiwl a'ch Tiwtoriaid Personol.  Bydd gennych un Tiwtor Personol yn y Gymraeg ac un mewn Athroniaeth. Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd a'ch cynnydd academaidd, yn ogystal ag ar faterion bugeiliol a chewch eich gwahodd i gwrdd â nhw'n rheolaidd trwy gydol eich gradd. Mae arweinwyr eich modiwlau hefyd ar gael yn ystod wythnosau addysgu os oes gennych unrhyw gwestiynau am ddeunyddiau neu asesiadau'r cwrs.

Mae'r Ganolfan Datblygu Ysgrifennu (ar gyfer myfyrwyr yn yr Ysgol Saesneg, Cyfathrebu ac Athroniaeth yn unig) yn darparu cymorth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau.

Mae ein timau Gwasanaethau Proffesiynol yn y Gymraeg ac Athroniaeth yn darparu cymorth academaidd a chymorth i fyfyrwyr ac maent yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r brifysgol yn cynnig amrywiaeth o wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cefnogi gyda materion ariannol, a darparu cymorth i fyfyrwyr ag anableddau. Mae'r gwasanaethau hyn wedi'u cydleoli yng Nghanolfan Bywyd Myfyrwyr y brifysgol. Bydd llyfrgelloedd, mannau astudio a chanolfannau adnoddau eraill i gyd ar gael i chi.

Adborth

Byddwch yn cael adborth rheolaidd ar eich cynnydd. Bydd adborth llafar mewn darlithoedd, gweithdai a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn adborth ffurfiannol ar syniadau asesu, ac adborth manwl ar yr holl waith cwrs wedi'i farcio. Byddwch yn derbyn adborth rheolaidd ar eich prosiect ymchwil blwyddyn olaf gan eich goruchwyliwr.

Sut caf fy asesu?

Mae eich asesiadau wedi'u cynllunio i ddatblygu'n gronnol sgiliau allweddol mewn cyfathrebu, cydweithio, meddwl yn feirniadol a myfyrio. Gall y rhain gynnwys dadansoddiadau beirniadol o destunau, traethodau, arholiadau, adolygiadau beirniadol, cyflwyniadau, gwaith grŵp ac asesiadau trafod grŵp, ac asesiad myfyriol o'ch sgiliau eich hun. Yn y flwyddyn olaf, byddwch yn cymryd rhan mewn prosiect athroniaeth cydweithredol mawr sy'n cynnwys ysgrifennu a chyflwyno ar gyfer cynulleidfa broffesiynol, ac yn Gymraeg byddwch yn ymgymryd â phrosiect ymchwil annibynnol.

Gall modiwlau dewisol gynnig amrywiaeth ehangach o asesiadau, gan gynnwys ysgrifennu ar gyfer cynulleidfa gyhoeddus, rhoi sylwadau ar waith celf neu ddarn o gyfryngau, neu aseiniadau creadigol.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Deall strwythurau, cyweiriau ac amrywiaethau Cymraeg a'u defnyddio'n hyblyg ac yn effeithiol at ddibenion cymdeithasol, academaidd a phroffesiynol, fel y bo'n briodol.
• Beirniadu datblygiad y Gymraeg a’i llenyddiaeth mewn cyfnodau hanesyddol gwahanol, o gyd-destun ieithyddol, llenyddol a chymdeithasol yn ogystal â dealtwriaeth o’r ymdrechion i adfer a hyrwyddo’r iaith.
• Dadansoddi'n feirniadol agweddau ar ddiwylliant, llenyddiaeth, hanes a chymdeithas y Gymraeg, gan dynnu ar ystod o ddeunyddiau a dulliau. 
• Gwerthuso yn feirniadol rai o'r damcaniaethau a dadleuon canolog, a'u cymwysiadau, mewn athroniaeth foesol, gymdeithasol neu wleidyddol.
• Gwerthuso yn feirniadol rai o'r damcaniaethau a dadleuon canolog, a'u cymwysiadau, mewn epistemoleg, athroniaeth iaith, neu athroniaeth meddwl.
• Dadansoddi'n feirniadol ddamcaniaethau a dadleuon o ymchwil athronyddol gyfoes, a allai ddod o groestoriad gwahanol feysydd athroniaeth neu o ymchwil ryngddisgyblaethol.
• Cymhwyso ymchwil athronyddol trwy ddrafftio dogfennau polisi neu strategaeth, neu argymhellion gweithredu, mewn ymateb i broblem foesegol neu gymdeithasol yn y byd go iawn sydd o bryder cymdeithasol cyfoes.

Sgiliau Deallusol:

• Dadansoddi’n feirniadol sut y crëir ystyron drwy iaith, a grym affeithiol iaith.
• Datblygu ymatebion annibynnol ac arloesol i ddeunydd ieithyddol, llenyddol, beirniadol, diwylliannol a chreadigol yn ysgrifenedig ac ar lafar, ac ar gyfer cynulleidfaoedd gwahanol. 
• Gwerthuso’n feirniadol destunau, cysyniadau a damcaniaethau sy’n berthnasol i gyd-destun yr iaith Gymraeg a llenyddiaeth Gymraeg, gan ddefnyddio’r eirfa a therminoleg briodol. 
• Egluro honiadau a dadleuon athronyddol cymhleth ac arbenigol.
• Llunio dadleuon gwybodus sydd â chefnogaeth dda iddynt.
• Cymhwyso technegau dadansoddi athronyddol, ieithyddol neu ddiwylliannol i werthuso testunau, honiadau a dadleuon yn feirniadol.

Sgiliau Ymarferol Proffesiynol:

• Cynhyrchu amrywiaeth o ddeunydd gan ddefnyddio Cymraeg ysgrifenedig a llafar sy'n briodol ar gyfer y gweithle ac a fwriedir ar gyfer ystod o gynulleidfaoedd. 
• Cymhwyso gwybodaeth, dealltwriaeth a sgiliau mewn cyd-destun proffesiynol.
• Defnyddio technegau ymchwil perthnasol ac effeithiol i gynhyrchu traethawd estynedig neu brosiect ymchwil estynedig dan oruchwyliaeth.
• Cyfathrebu gwybodaeth gymhleth mewn fformatau gwahanol sy'n briodol i wahanol ddibenion.
• Cyfrannu mewn modd cydweithredol i drafodaethau grŵp a phrosiectau tîm.
• Mynegi a gwerthuso eich sgiliau academaidd a phroffesiynol eich hun.

Sgiliau Trosglwyddadwy/Allweddol:

• Defnyddio rhaglenni TG perthnasol yn effeithiol, gan gynnwys meddalwedd cyfrwng Cymraeg, i gyflwyno a dadansoddi deunyddiau.
• Ymateb i broblemau yn greadigol, yn feirniadol ac yn annibynnol.
• Gweithredu cyfarwyddiadau tasg a rheoli llwyth gwaith yn effeithiol i gwrdd â therfynau amser.

• Cyflwyno a gweithredu ar adborth adeiladol.

• Dangos menter, gwydnwch, gallu i addasu a chreadigrwydd, gan fyfyrio'n weithredol ar eich astudiaethau a chyflawniadau eich hun.