Athroniaeth ac Ieithyddiaeth (BA)

Drwy gydol y radd, ein nod yw eich cefnogi i ddod yn feddyliwr annibynnol, creadigol a beirniadol.

Mae addysgu'r flwyddyn gyntaf yn darparu cymorth wedi'i strwythuro'n ofalus trwy ddarlithoedd a thrafodaethau seminar i'ch helpu i ddatblygu sgiliau allweddol a magu hyder. Erbyn y flwyddyn olaf byddwch yn dysgu trwy ddarllen annibynnol dan arweiniad a gweithdai a seminarau rhyngweithiol llai, gan drafod ymchwil newydd gydag academyddion a gydnabyddir yn rhyngwladol sy'n gweithio yn y maes hwnnw ar hyn o bryd. Bydd gennych fynediad i holl ddeunyddiau'r cwrs trwy ein hamgylchedd dysgu electronig.

Yn yr amgylchedd cefnogol hwn byddwch yn datblygu eich gallu i ddadansoddi testunau a dadleuon yn drylwyr, gweithio ar y cyd trwy broblemau, llunio eich dadleuon eich hun, a chyflwyno'ch syniadau'n glir i eraill.   

Sut y caf fy nghefnogi?

Eich prif ffynonellau cymorth mewn athroniaeth yw eich arweinwyr modiwl a'ch Tiwtor Personol. Bydd gennych un Tiwtor Personol mewn athroniaeth ac un mewn ieithyddiaeth. Mae gan eich arweinwyr modiwl sesiynau galw heibio yn ystod wythnosau addysgu y gallwch eu mynychu os oes gennych unrhyw gwestiynau am ddeunyddiau cwrs neu asesiadau. Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd, a'ch cynnydd academaidd, yn ogystal ag ar faterion bugeiliol. Fe'ch gwahoddir i gwrdd â'ch Tiwtor Personol yn rheolaidd trwy gydol y radd, ac maent ar gael ar gyfer cyfarfodydd ychwanegol yn ôl yr angen. Bydd myfyrwyr Cymraeg eu hiaith yn cael cynnig tiwtor personol sy'n siarad Cymraeg.

Mae'r Ganolfan Datblygu Ysgrifennu (ar gyfer myfyrwyr yn yr Ysgol Saesneg, Cyfathrebu ac Athroniaeth yn unig) yn darparu cymorth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau.

Mae ein Tîm Gwasanaethau Proffesiynol yn darparu cymorth academaidd a chymorth i fyfyrwyr ac mae yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r brifysgol yn cynnig amrywiaeth o wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cefnogi gyda materion ariannol, a darparu cymorth i fyfyrwyr ag anableddau. Mae'r gwasanaethau hyn wedi'u cydleoli yng Nghanolfan Bywyd Myfyrwyr y brifysgol. Bydd llyfrgelloedd, mannau astudio a chanolfannau adnoddau eraill i gyd ar gael i chi.

Adborth

Byddwch yn cael adborth rheolaidd ar eich cynnydd. Bydd adborth llafar mewn darlithoedd, gweithdai a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn sylwadau ffurfiannol ar syniadau traethawd, ac adborth manwl ar yr holl waith cwrs wedi'i farcio. Os byddwch yn dilyn y modiwl Traethawd Hir, byddwch yn derbyn adborth rheolaidd ar eich prosiect gan eich goruchwyliwr.

Sut caf fy asesu?

Mae eich asesiadau wedi'u cynllunio i ddatblygu'n gronnol sgiliau allweddol mewn cyfathrebu, cydweithio, meddwl yn feirniadol a myfyrio. Mae’r asesiadau hyn yn cynnwys dadansoddiadau beirniadol o destunau, traethodau, asesiadau trafodaeth grŵp, tasgau wythnosol, tasgau dadansoddol, ac asesiad myfyriol o’ch sgiliau eich hun. Yn y flwyddyn olaf, byddwch yn cymryd rhan mewn prosiect cydweithredol mawr sy'n cynnwys ysgrifennu a chyflwyno ar gyfer cynulleidfa broffesiynol. Gall modiwlau dewisol gynnig amrywiaeth ehangach o asesiadau, gan gynnwys ysgrifennu ar gyfer cynulleidfa gyhoeddus, neu roi sylwadau ar waith celf neu ddarn cyfryngol.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Gwerthuso yn feirniadol rai o'r damcaniaethau a dadleuon canolog, a'u cymwysiadau, mewn athroniaeth foesol, gymdeithasol neu wleidyddol.
• Gwerthuso yn feirniadol rai o'r damcaniaethau a dadleuon canolog, a'u cymwysiadau, mewn epistemoleg, athroniaeth iaith, neu athroniaeth meddwl.
• Dadansoddi'n feirniadol ddamcaniaethau a dadleuon o waith ieithyddol ac athronyddol cyfoes, a all ddod o groestoriad gwahanol feysydd o'r disgyblaethau hyn neu o ymchwil ryngddisgyblaethol.
• Cymhwyso ymchwil athronyddol i gynhyrchu polisi neu strategaeth, neu argymell gweithredoedd, mewn ymateb i broblemau moesegol neu gymdeithasol y byd go iawn neu broblemau cymdeithasol cyfoes eraill.
• Dangos gwybodaeth a dealltwriaeth systematig o feysydd craidd iaith Saesneg ac ieithyddiaeth, gan gynnwys seineg, gramadeg, semanteg, pragmateg, a disgwrs.
• Dangos gwybodaeth a dealltwriaeth systematig o sut mae iaith yn gweithio yn y byd cymdeithasol.
• Dangos gwybodaeth a dealltwriaeth systematig o'r cydadwaith rhwng dadansoddiad o ddata ieithyddol a ffynonellau beirniadol a damcaniaethol.

Sgiliau Deallusol:

• Egluro honiadau a dadleuon athronyddol ac ieithyddol cymhleth ac arbenigol.
• Llunio dadleuon sy'n cefnogi honiad mewn ymateb i gwestiynau athronyddol ac ieithyddol.
• Cymhwyso technegau safonol dadansoddi athronyddol i werthuso honiadau a dadleuon athronyddol yn feirniadol.
• Cymhwyso terminoleg ddisgrifiadol sy'n berthnasol i’r iaith Saesneg a ffenomenau ieithyddol.
• Dadansoddi gwahanol fathau o ddata ieithyddol.
• Gwerthuso effaith defnydd iaith mewn ystod o gyd-destunau.

Sgiliau Ymarferol Proffesiynol:

• Cyfleu gwybodaeth a dadleuon cymhleth mewn fformatau gwahanol sy'n briodol i wahanol ddibenion.
• Cyfrannu mewn modd cydweithredol at drafodaethau a phrosiectau tîm.
• Mynegi a gwerthuso eich sgiliau athronyddol a phroffesiynol eich hun.
• Dangos ymwybyddiaeth feirniadol o wahanol gonfensiynau ysgrifennu ac offer ysgrifennu, a'r gallu i'w defnyddio a'u haddasu'n llwyddiannus ar gyfer gwahanol fathau o asesu.

Sgiliau Trosglwyddadwy/Allweddol:

• Ymateb i broblemau yn greadigol, yn feirniadol ac yn annibynnol.
• Gweithredu cyfarwyddiadau tasg a rheoli llwyth gwaith yn effeithiol i gwrdd â therfynau amser.
• Cyflwyno a gweithredu ar adborth adeiladol.