Cerddoriaeth ac Iaith Fodern (BA)

Mae hon yn rhaglen radd 4 blynedd ac mae wedi'i strwythuro i'ch galluogi i ddatblygu a chymwyseddau iaith a cherddorol i ddod yn feddyliwr beirniadol dyfeisgar, annibynnol, amlieithog, sy'n barod ar gyfer cyflogaeth broffesiynol.

Ym mhob blwyddyn, byddwch chi’n astudio ar gyfer 120 o gredydau. Treulir eich trydedd flwyddyn yn astudio neu'n gweithio mewn gwlad lle siaredir eich iaith ddewisol. 

Mae sawl modiwl yn rhagofyniad ar gyfer astudio pynciau tebyg ar lefelau uwch mewn blynyddoedd diweddarach, felly fe'ch cynghorir i ystyried yr ystod gyfan o fodiwlau wrth ddewis modiwlau ar y dechrau i wneud yn siŵr eich bod am ddilyn 'llwybr' o'ch dewis. Er enghraifft, mewn cerddoriaeth, er mwyn cwblhau'r modiwl portffolio cyfansoddi prosiect mawr ym mlwyddyn 3, mae’n rhaid i chi gwblhau'r holl fodiwlau ‘cyfansoddi’ hanfodol ym mlynyddoedd 1 a 2 yn llwyddiannus. Mae modiwlau mewn cerddoriaeth wedi'u cynllunio'n benodol i'ch cefnogi a sicrhau bod gennych ddigon o dechnegau, sgiliau a phrofiad er mwyn llwyddo ar y rhaglen.

Mae'r modiwlau a ddangosir yn esiampl o'r cwricwlwm arferol. Byddant yn cael eu hadolygu cyn blwyddyn academaidd 2025/2026. Bydd y modiwlau terfynol yn cael eu cyhoeddi erbyn mis Medi 2025

Blwyddyn un

Mae blwyddyn 1 wedi'i threfnu i roi i chi’r medrau a'r wybodaeth hanfodol a fydd yn sylfaen i’ch astudio. Mae cyfuno cerddoriaeth gyda'ch dewis iaith yn eich galluogi i brofi mwy nag un maes astudio ac i ddatblygu'r hyblygrwydd a'r cymhwysedd rhyngddiwylliannol y mae darpar gyflogwyr yn chwilio amdano. Byddwch yn astudio 60 credyd o fodiwlau cerdd a 60 credyd o fodiwlau iaith a diwylliannol.

Ar ochr yr ieithoedd, byddwch yn astudio un iaith dramor fodern ar naill ai lefel elfennol neu lefel elfennol uchaf. Bydd blwyddyn gyntaf y rhaglen yn gosod sylfaen drylwyr yng ngramadeg yr iaith i fyfyrwyr llwybr y dechreuwyr, ac yn meithrin medrau ieithyddol i fyfyrwyr ar y llwybr Elfennol Uchaf. Yn ogystal â'ch gwersi iaith, byddwch yn astudio modiwl diwylliannol-hanesyddol ar gyfer eich dewis iaith.

Mewn cerddoriaeth, cynigir modiwlau cwbl ddewisol mewn theori a dadansoddi cerddoriaeth, cyfansoddi (offerynnau unigol ac ensembles bach), cerddoroldeb ymarferol (perfformiad unigol), portffolio ymarferol (ensembles, arwain, hyfforddiant clywedol), a thechnegau mewn jazz a cherddoriaeth boblogaidd. Mae yna hefyd driawd o fodiwlau a fydd yn rhoi cymorth mawr ei angen i chi o ran ymwybyddiaeth hanesyddol ac arddull o genres a thraddodiadau cerddorol (Gorllewinol ac Anorllewinol, Cerddoriaeth Boblogaidd, Jazz a Ffilm, yn ogystal â Theatr Gerdd) a datblygu gallu i ysgrifennu a siarad yn hyderus, yn rhugl ac yn feirniadol am gerddoriaeth.

I ategu eich astudiaethau academaidd, eir ati i’ch annog i ymuno â'r ensembles craidd a arweinir gan yr Ysgol os byddwch yn dewis peidio â'u cymryd yn ffurfiol fel modiwlau academaidd.

Blwyddyn dau

Ym mlwyddyn 2, byddwch yn astudio dau fodiwl 30 credyd mewn ieithoedd modern a thri modiwl 20 credyd mewn cerddoriaeth.

Mae elfennau iaith blwyddyn 2 yn adeiladu ar waith y flwyddyn gyntaf. Byddwch wedi datblygu o lefel modiwlau iaith blwyddyn 1, a dylech weld sut mae eich galluoedd ieithyddol, ymwybyddiaeth ddiwylliannol a'ch hyder cyffredinol fel defnyddiwr iaith yn parhau i dyfu. Byddwch chi’n mireinio’ch medrau ieithyddol trwy astudio modiwl iaith ar lefel Ganolradd neu Ganolradd uchaf. Mae'r modiwl hwn yn eich paratoi ar gyfer eich amser dramor ym mlwyddyn 3.

Yn ogystal ag iaith, byddwch yn astudio 30 credyd yn edrych ar ddiwylliannau, cymdeithasau a hanesion eich dewis iaith o safbwynt byd-eang. Byddwch chi’n gwybod rhagor am ddylanwad diwylliannau eraill a datblygiadau a digwyddiadau ehangach ar y rhanbarthau ieithyddol a daearyddol hynny.

Bydd modd meithrin rhagor o fedrau ieithyddol a phroffesiynol trwy ddewis astudio modiwl busnes neu gyfieithu ynghylch un o'ch ieithoedd.

Ym mlwyddyn 2 cerddoriaeth, cewch gyfle i atgyfnerthu eich cryfderau ochr yn ochr â pharhau â’ch gweithgareddau mewn amrywiaeth o ddisgyblaethau, gan ddewis eich modiwlau o dri o leiaf o'r pedwar grŵp:

• Sgiliau Dadansoddol a Beirniadol
• Cyfansoddi a Chynhyrchu
• Sgiliau Cerddorol Ymarferol
• Cerddoleg a Lleoliad

Mae modiwlau blwyddyn 2 ar Fusnes Cerddoriaeth wedi'u cynllunio i'ch helpu i ddeall canghennau gwahanol o'r proffesiwn cerddoriaeth yn well ac i roi cyfle am leoliad gwaith byr mewn maes sy'n gysylltiedig â cherddoriaeth neu'r celfyddydau, yn semester y gwanwyn.

Y tu allan i'ch astudiaethau ffurfiol, bydd gennych gyfle i gymryd rhan yn ein prosiect Mentora Ieithoedd Tramor Modern (MFL), dan gefnogaeth Llywodraeth Cymru. Mae mentoriaid wedi’u hyfforddi i ysbrydoli ac ysgogi disgyblion ysgolion uwchradd a’u helpu i ystyried eu sefyllfa a’u rôl yn ein byd amlieithog ac amlddiwylliannol.

At hynny, bydd cyfle i hyrwyddo dysgu ieithoedd trwy ymuno â Chynllun y Llysgenhadon o Fyfyrwyr Ieithoedd. Ar ôl hyfforddiant, gall llysgenhadon ieithoedd siarad yn gyhoeddus am eu profiad o ddysgu ieithoedd a medrau cyfieithu. Gallai fod cyfle ichi gymryd rhan mewn amryw weithgareddau megis sesiynau cyflwyno ieithoedd a chyfieithu, helpu ysgolion i hyrwyddo ieithoedd ar eu safleoedd

Blwyddyn tri: Blwyddyn Ryngosod

Byddwch chi’n treulio’r drydedd flwyddyn mewn gwlad arall lle y bydd cyfle i fireinio medrau ieithyddol, dod i adnabod y diwylliant yn well a datblygu’n gymeriad annibynnol, dyfeisgar a gwydn. Bydd astudio neu weithio dramor yn baratoad rhagorol ar gyfer eich blwyddyn olaf gan feithrin hyder ac aeddfedrwydd mae cyflogwyr yn eu gwerthfawrogi.

Byddwch yn treulio blwyddyn academaidd lawn yng ngwlad yr iaith rydych yn ei hastudio.

Mae tair ffordd o dreulio blwyddyn dramor.

1. Rydym wedi sefydlu rhaglenni cyfnewid sy'n cynnig cyfleoedd i astudio mewn sefydliadau mewn dinasoedd yn Awstria, Gwlad Belg, Brasil, Canada, Ffrainc, yr Almaen, yr Eidal, Mecsico, Periw, Portiwgal, Sbaen, a'r Swistir.
2. Addysgu - mae modd bwrw tymor yn gynorthwywr addysgu mewn cynllun o dan nawdd y Cyngor Prydeinig lle y gallech chi weithio yn un o ddinasoedd neu drefi amrywiaeth helaeth o wledydd. Mae’r dewis hwnnw’n cynnig profiad addysgu uniongyrchol gan eich galluogi i ennill cyflog digonol, er mai dim ond yn rhan-amser y byddwch chi’n gweithio. Cyn dechrau yn y cynllun, bydd y Cyngor Prydeinig yn cynnig penwythnos hyfforddi yn y wlad ddewisoch chi. Ar ben hynny, dylai’r ysgol lle y byddwch chi’n gweithio eich helpu i gyflawni rôl athro a dod o hyd i lety.
3. Lleoliad gwaith - byddwch yn ymgymryd â lleoliad gwaith gyda sefydliad neu gwmni ym myd yr iaith fodern. Cewch chi drefnu hynny trwy bobl rydych chi’n eu hadnabod neu gysylltu â’r sefydliadau yn uniongyrchol. Gall yr ysgol hysbysebu swyddi o’r fath, hefyd. I ofalu y bydd digon o gyfleoedd i ddefnyddio’r iaith ddewisoch chi yno a chael profiad buddiol, bydd angen sêl bendith yr ysgol ar drefniadau o’r fath.

Beth bynnag ddewiswch chi, bydd blwyddyn dramor yn gyfle gwych i ddeall rhagor am yr iaith, cydio mewn diwylliant arall a chael profiad o weithio neu astudio’n rhyngwladol.

Rhaid i fyfyrwyr nad ydyn nhw’n ddinasyddion o’r wlad lle y byddan nhw’n gweithio neu’n astudio gael teitheb i wneud hynny. Does dim rheolaeth na dylanwad gyda ni ar brosesau ofyn am deitheb ond byddwn ni’n eich helpu i lunio’ch cais a pharatoi ar gyfer eich blwyddyn dramor.

Blwyddyn pedwar

Wrth i ni eich croesawu yn ôl i Gaerdydd ar gyfer eich blwyddyn olaf, byddwch chi’n mireinio’ch medrau ieithyddol, meddwl beirniadol ac ymchwil ymhellach.

Byddwch yn astudio un modiwl iaith Uwch 30 credyd, un modiwl dewisol 30 credyd o ochr iaith eich gradd yn ogystal â 60 credyd o'r Ysgol Cerddoriaeth.

Byddwch yn gallu ehangu eich sylfaen sgiliau a'ch gorwelion trwy fodiwlau diwylliannol-hanesyddol dewisol a thrwy gyfoeth o opsiynau allgyrsiol. Gall modiwlau dewisol y flwyddyn olaf amrywio o flwyddyn i flwyddyn ond, ar y cyfan, byddan nhw’n cynnwys amryw bynciau a themâu cyfoes sy’n berthnasol i un iaith neu wedi’u cyflwyno mewn fframwaith cymharol, trawswladol. Gall themâu a phynciau'r flwyddyn olaf gynnwys llenyddiaeth, ffilmiau a’r diwylliant gweledol, hanes, gwladychiaeth ac astudiaethau rhyw.

Mewn cerddoriaeth, gallwch ddewis o leiaf 3 o'r 4 grŵp pwnc a chael cyfle i astudio un o'r 4 modiwl prosiect mawr: traethawd hir, prosiect mewn Ethnogerddoleg, prosiect mewn Dadansoddi Cerddoriaeth, a Chyfansoddi 3 (Portffolio Cyfansoddi). Ceir hefyd gyfle i gymryd mân brosiect mewn perfformio (Sgiliau Cerddoriaeth Ymarferol) gwerth 20 credyd.

Cewch y cyfle i ysgrifennu traethawd hir lle y byddwch chi’n llunio ac yn cynnal prosiect ymchwil ar bwnc o'ch dewis, o dan oruchwyliaeth un o'r staff academaidd.

Ar ben hynny, gallech chi gymryd rhan yn ein modiwl addysgu poblogaidd iawn lle y byddwch chi’n treulio cyfnod mewn ysgol leol sy’n bartner inni.

Mae'r Brifysgol wedi ymrwymo i ddarparu amrywiaeth eang o opsiynau modiwl lle'n bosibl. Ond byddwch yn ymwybodol er y byddwn yn gwneud pob ymdrech i gynnig dewis, gall hyn gael ei gyfyngu mewn rhai amgylchiadau. Y rheswm am hyn yw'r ffaith mai dim ond nifer cyfyngedig o leoedd sydd ar gael ar rai modiwlau, a gaiff eu dyrannu ar sail y cyntaf i'r felin. Mae'n ofynnol i fodiwlau eraill sicrhau isafswm nifer o fyfyrwyr cyn gallu eu cynnal, er mwyn gwneud yn siŵr y gellir cyflwyno addysg o ansawdd priodol. Gall modiwlau gael eu cyfyngu oherwydd gwrthdaro yn yr amserlen hefyd, ac er bod y Brifysgol yn ymdrechu i amharu cyn lleied â phosibl ar eich dewis, byddai'n syniad da i chi ofyn am gyngor gan yr Ysgol berthnasol am y dewisiadau modiwl sydd ar gael.