Cerddoriaeth a Llenyddiaeth Saesneg (BA)

Bydd eich astudiaethau cerddoriaeth yn cael eu harwain a’u llywio gan arbenigedd ein staff academaidd ar draws meysydd cyfansoddi, perfformio, cerddoleg, ethnogerddoleg, a cherddoriaeth boblogaidd. Os ydych yn dilyn modiwl Cerddoriaeth Ymarferol, caiff hyfforddiant offerynnol ei ariannu'n llawn ar eich prif offeryn astudio. Mae hyn yn cynnwys cyfeiliant yn eich datganiad terfynol. Byddwch yn cael 24 gwers hanner awr yn ystod y flwyddyn. 

Gan ddefnyddio dull a arweinir gan ymchwil, bydd addysgu llenyddiaeth Saesneg yn eich cefnogi i ddod yn annibynnol, yn greadigol ac yn feirniadol yn eich ymatebion i lenyddiaeth a ffurfiau eraill ar ddiwylliant, megis ffilm, celf a ffotograffiaeth. Mae addysgu blwyddyn gyntaf yn darparu sylfaen gyda darlithoedd wedi'u strwythuro'n ofalus a thrafodaethau seminar i'ch helpu i ddatblygu sgiliau allweddol a magu hyder wrth i chi ddod o hyd i'ch traed yn y brifysgol. Mae’r addysgu ym Mlwyddyn 2 a’r flwyddyn olaf yn seiliedig ar ddarlithoedd a seminarau ac yn symud yn raddol i gyfeiriad arbenigo ac ymchwil annibynnol wrth i chi ddatblygu fel darllenydd a beirniad. Yn yr amgylchedd cefnogol hwn, byddwch yn datblygu eich gallu i ddadansoddi testunau a dadleuon yn drylwyr, gweithio ar y cyd trwy broblemau, llunio eich dadleuon eich hun, a chyflwyno'ch syniadau'n glir i eraill. Drwy gydol y rhaglen, ond yn enwedig ym modiwl craidd y flwyddyn olaf, byddwch yn datblygu sgiliau cyfathrebu a chydweithio y gallwch eu trosglwyddo i fyd cyflogaeth.

Sut y caf fy nghefnogi?

Eich prif ffynonellau cymorth yw eich arweinwyr modiwl a'ch Tiwtoriaid Personol (un ar gyfer pob disgyblaeth). Mae eich arweinwyr modiwl hefyd yn cael sesiynau oriau swyddfa wythnosol yn ystod wythnosau addysgu y gallwch eu mynychu os oes gennych unrhyw gwestiynau am ddeunyddiau cwrs neu asesiadau.

Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd, a'ch cynnydd academaidd, yn ogystal ag ar faterion bugeiliol. Fe'ch gwahoddir i gwrdd â'ch Tiwtor Personol yn rheolaidd trwy gydol y radd, ac maent ar gael ar gyfer cyfarfodydd ychwanegol yn ôl yr angen. Gall myfyrwyr sy'n siarad Cymraeg ofyn am diwtor personol sy'n siarad Cymraeg.

Mae'r Ganolfan Datblygu Ysgrifennu (a leolir yn yr Ysgol Saesneg, Cyfathrebu ac Athroniaeth) yn darparu cymorth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau.

Mae ein timau Gwasanaethau Proffesiynol yn darparu cymorth academaidd a chymorth i fyfyrwyr ac maent yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r brifysgol yn cynnig amrywiaeth o wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cefnogi gyda materion ariannol, a darparu cymorth i fyfyrwyr ag anableddau. Lleolir y gwasanaethau hyn yng Nghanolfan Bywyd Myfyrwyr y brifysgol. Bydd llyfrgelloedd, mannau astudio a chanolfannau adnoddau eraill i gyd ar gael i chi.

Byddwch yn derbyn adborth rheolaidd ar eich cynnydd wrth i chi symud drwy'r radd. Bydd adborth llafar mewn darlithoedd, gweithdai a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn sylwadau ffurfiannol ar syniadau traethawd a gwaith drafft, ac adborth manwl ar yr holl waith cwrs wedi'i farcio. Os byddwch yn dewis ysgrifennu traethawd hir yn y flwyddyn olaf (nid yw hyn yn orfodol), byddwch yn derbyn adborth rheolaidd ar eich prosiect gan eich goruchwyliwr.

Sut caf fy asesu?

Cynllunnir asesiadau yn gynyddol i ddatblygu sgiliau allweddol mewn cyfathrebu, cydweithio, meddwl yn feirniadol, a myfyrio.  

Rydym yn defnyddio fformatau asesu traddodiadol (fel traethodau, arholiadau, cwisiau, arholiadau llafar, trafodaethau grŵp, asesiadau myfyriol, darnau barn, cyflwyniadau, perfformiadau cerddoriaeth a thraethawd hir) yn ogystal â ffurfiau asesu mwy arloesol (creu blogiau fideo, podlediadau, prosiectau fideo a sain, cyfweliadau, portffolios a chyflwyniadau poster).  

Yn y flwyddyn olaf, byddwch yn cymryd rhan mewn prosiect llenyddiaeth Saesneg cydweithredol sy'n cynnwys cyfleu eich canfyddiadau i gynulleidfa anarbenigol.

Rhoddir adborth ysgrifenedig am waith ar ôl ei asesu i’ch helpu i wella ar gyfer yr asesiadau nesaf, a bydd cyfleoedd i chi drafod yr adborth gyda’ch tiwtoriaid. At hynny, bydd amryw ymarferion megis posau, cyflwyniadau, traethodau a phrosiectau. Bydd y tiwtoriaid yn rhoi adborth ffurfiannol i wella’ch dysgu a’ch deall cyn sefyll yr asesiadau crynodol.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Deall yn systematig lenyddiaeth o wahanol ddiwylliannau a chyfnodau (gan gynnwys cyn 1800) a’r ystod o brif genres llenyddol ar draws rhyddiaith, barddoniaeth a drama.
• Deall yn systematig y berthynas rhwng llenyddiaeth a ffurfiau diwylliannol eraill a dadansoddi sut mae diwylliant, iaith, technoleg ac economeg yn effeithio ar gynhyrchu a derbyn testunau.
• Gwybod amrywiaeth o arddulliau a thechnegau cerddorol, trwy berfformio, cyfansoddi pastiche, dadansoddi a/neu sylwebaeth feirniadol o gerddoriaeth.
• Dangos lefel sylweddol o wybodaeth arbenigol, creadigrwydd, sgìl a dealltwriaeth mewn un neu fwy o'r canlynol: perfformio cerddoriaeth, cyfansoddi, ethnogerddoleg, dadansoddi cerddoriaeth, cerddoleg hanesyddol/feirniadol.
• Rhoi tystiolaeth o ymwybyddiaeth o is-ddisgyblaethau cyfansoddol cerddoriaeth a dangos cymhwysedd mewn hanfodion mwy nag un o’r rhain yn ychwanegol at eich arbenigedd(au) dewisol. 

Sgiliau Deallusol:

• Archwilio gwahanol fathau o ddeunyddiau llenyddol a cherddorol yn fanwl ac yn feirniadol.
• Cyfathrebu dehongliadau annibynnol ac arloesol yn gywir ar lafar ac yn ysgrifenedig ar gyfer cynulleidfaoedd arbenigol neu anarbenigol.
• Datblygu a chymhwyso dadleuon sy’n ymateb yn greadigol i ffynonellau llenyddol a cherddorol.
• Cyfleu ymwybyddiaeth o'r cyd-destunau cymdeithasol, hanesyddol a diwylliannol y gwneir cerddoriaeth ynddynt.
• Meddwl yn ddadansoddol ac yn fyfyriol am gerddoriaeth, gan nodi patrymau ffurfiol, hanesyddol a diwylliannol sylweddol yn y ffordd y caiff ei pherfformio, ei chyfansoddi neu ei defnyddio. 

Sgiliau Ymarferol Proffesiynol:

• Casglu a gwerthuso gwybodaeth gymhleth a thystiolaeth amrywiol yn systematig gyda chywirdeb.
• Cyfathrebu'n berswadiol, gan gyfleu syniadau academaidd a dadleuon technegol i gynulleidfaoedd arbenigol neu anarbenigol, gan ddefnyddio technegau ysgrifenedig neu lafar.
• Asesu a datrys problemau yn feirniadol yn annibynnol, gan ystyried barn pobl eraill.
• Datblygu perthynas waith agos gyda cherddorion eraill wrth baratoi perfformiadau ensemble neu brosiectau cydweithredol eraill. 

Sgiliau Trosglwyddadwy/Allweddol:

• Egluro gwybodaeth a syniadau yn glir ac yn broffesiynol, gan gymhwyso gwybodaeth a sgiliau uwch i heriau neu gyd-destunau anghyfarwydd neu fyd ehangach.
• Arddangos mentergarwch drwy gymryd cyfrifoldeb am strwythuro a rheoli amser tasg ymchwil, gan weithio mewn timau pan fo'n briodol.
• Datblygu perthynas waith gadarnhaol ac effeithiol ag eraill mewn timau, yn enwedig trwy ddeialog ac adborth adeiladol a chydweithredol.
• Datblygu sgiliau arwain a hunanreoli.