Athroniaeth a Gwleidyddiaeth (BA)

Mae hon yn radd amser llawn tair blynedd, gyda 120 credyd astudio ym mhob blwyddyn. Byddwch yn astudio 60 credyd y flwyddyn mewn athroniaeth a 60 credyd y flwyddyn mewn gwleidyddiaeth.

Mae'r modiwlau a ddangosir yn esiampl o'r cwricwlwm arferol. Byddant yn cael eu hadolygu cyn blwyddyn academaidd 2025/2026. Bydd y modiwlau terfynol yn cael eu cyhoeddi erbyn mis Medi 2025

Blwyddyn un

Mae'r modiwlau ym mlwyddyn 1 yn eich cyflwyno i'r meysydd allweddol o athroniaeth a gwleidyddiaeth sy'n ymddangos trwy gydol y radd.

Yn athroniaeth, mae hyn yn cynnwys astudio testunau clasurol a dadleuon cyfredol am foesoldeb, cyfiawnder, gwybodaeth a chred, natur cyfathrebu, a’r berthynas rhwng meddyliau a chyrff. Mewn Gwleidyddiaeth, gallwch ddewis o ystod o fodiwlau mewn meysydd sylfaenol. Byddwch yn dysgu sut i ysgrifennu i safonau academaidd a phroffesiynol, ac ymarfer a datblygu'r sgiliau sy'n hanfodol i'r radd.

Blwyddyn dau

Ym mlwyddyn 2, byddwch yn archwilio cysylltiadau ar draws y radd mewn modiwl craidd ar athroniaeth wleidyddol. Byddwch yn dewis un neu ddau fodiwl mewn athroniaeth meddwl, seicoleg, iaith ac epistemoleg. Mae hyn yn eich paratoi ar gyfer modiwlau yn y flwyddyn olaf sy'n aml yn cyfuno gwahanol feysydd athroniaeth. Gallwch archwilio maes arall o athroniaeth trwy fodiwlau dewisol. Mewn Gwleidyddiaeth, byddwch yn dewis o blith ystod eang o fodiwlau dewisol mewn gwleidyddiaeth a chysylltiadau rhyngwladol.

Byddwch yn ymarfer ymhellach sgiliau allweddol cyfathrebu, cydweithio, a meddwl yn feirniadol, dod yn fwy annibynnol yn eich astudiaethau, a gwella eich gallu i fyfyrio ar eich gwaith eich hun er mwyn cyrraedd eich potensial.

Blwyddyn tri

Yn eich blwyddyn olaf, byddwch yn cael eich trwytho yn niwylliannau ymchwil athroniaeth a gwleidyddiaeth i gael dealltwriaeth ddyfnach o sut y gall ymchwil gyfredol effeithio ar y byd.

Yn y modiwl craidd Athroniaeth ar Waith, byddwch yn darganfod y cyfraniad gwerthfawr y gall sgiliau athronyddol a gwybodaeth athronyddol ei wneud mewn ystod o sefydliadau a rolau proffesiynol. Yn y modiwl hwn, byddwch yn dysgu sut i gymhwyso ymchwil athronyddol a wneir ar hyn o bryd ym Mhrifysgol Caerdydd i gynhyrchu argymhellion polisi ymarferol mewn ymateb i broblem gyfoes y byd real go iawn.

Mewn modiwlau dewisol, byddwch yn ymgysylltu ymhellach â'r ymchwil ddiweddaraf yn ein meysydd arbenigedd. Mewn Athroniaeth, mae'r modiwlau hyn yn aml yn integreiddio gwahanol feysydd a astudiwyd yn gynharach yn y radd, ac yn aml yn canolbwyntio ar broblemau o bryder cymdeithasol cyfoes. Bydd y modiwlau gwleidyddiaeth opsiynol yn eich herio i feddwl yn ddyfnach am natur cysylltiadau rhyngwladol a datblygiadau gwleidyddol. Byddwch hefyd yn cael cyfle i ysgrifennu traethawd hir, gyda chefnogaeth goruchwyliwr academaidd.

Mae'r Brifysgol wedi ymrwymo i ddarparu amrywiaeth eang o opsiynau modiwl lle'n bosibl. Ond byddwch yn ymwybodol er y byddwn yn gwneud pob ymdrech i gynnig dewis, gall hyn gael ei gyfyngu mewn rhai amgylchiadau. Y rheswm am hyn yw'r ffaith mai dim ond nifer cyfyngedig o leoedd sydd ar gael ar rai modiwlau, a gaiff eu dyrannu ar sail y cyntaf i'r felin. Mae'n ofynnol i fodiwlau eraill sicrhau isafswm nifer o fyfyrwyr cyn gallu eu cynnal, er mwyn gwneud yn siŵr y gellir cyflwyno addysg o ansawdd priodol. Gall modiwlau gael eu cyfyngu oherwydd gwrthdaro yn yr amserlen hefyd, ac er bod y Brifysgol yn ymdrechu i amharu cyn lleied â phosibl ar eich dewis, byddai'n syniad da i chi ofyn am gyngor gan yr Ysgol berthnasol am y dewisiadau modiwl sydd ar gael.