Tsieinëeg Fodern (BA)

Rydyn ni’n defnyddio amryw ddulliau addysgu megis darlithoedd, seminarau, dosbarthiadau iaith a gweithdai. 

Mae cynnwys darlithoedd yn cyfleu trosolwg o brif gysyniadau a fframweithiau pwnc, gan roi'r sgiliau a fydd yn eich galluogi i gynnal ymchwil yn annibynnol ar gyfer y seminarau a datblygu a gweithredu eich syniadau eich hun. Gallai’r deunyddiau hyn gael eu cyflwyno i chi wyneb yn wyneb neu mewn fformat digidol fel y gallwch eu hastudio ar eich liwt eich hun.

Mae seminarau’n ddosbarthiadau rhyngweithiol sy'n cynnwys grŵp bychan o fyfyrwyr ac aelod o dîm addysgu'r modiwl. Gall ffurf y seminarau amrywio, gan gynnwys trafodaeth grŵp cyfan, gwaith grwpiau bach a chyflwyniadau a arweinir gan fyfyrwyr. Mae seminarau’n cynnig awyrgylch egnïol lle gallwch chi archwilio ac ymgysylltu’n feirniadol â syniadau a dadleuon sydd wedi’u cyflwyno yn y darlithoedd. 

Mae ein ffordd o ddysgu iaith yn canolbwyntio ar ddysgu gweithredol a chyfranogiad ystyrlon myfyrwyr. Bydd digon o gyfleoedd i ddefnyddio a datblygu'r cymwyseddau a sgiliau iaith allweddol yn rheolaidd. Mae dosbarthiadau wedi'u dylunio i ehangu’ch hyfedredd ieithyddol a gwella'ch hyder a'ch sgiliau cyfathrebu mewn awyrgylch cyfeillgar a chefnogol. 

Mae paratoi ar gyfer dosbarth ac astudio’n annibynnol yn rhan bwysig o'ch dysgu. Rhwng dosbarthiadau, byddwch chi’n paratoi deunydd, tystiolaeth a dadleuon, ac yn cwblhau tasgau iaith yn unigol neu mewn grwpiau. I’ch helpu i ddysgu iaith yn annibynnol, mae’r Ysgol Ieithoedd Modern wedi llunio adnoddau a gweithgareddau dysgu cymeradwy ac rydyn ni’n eich annog i’w defnyddio yn rhan o’ch dysgu annibynnol. 

Sut y caf fy nghefnogi?

Byddwch yn cael eich arwain trwy eich astudiaethau gan Diwtor Personol, a fydd yn gallu rhoi cyngor i chi ar faterion academaidd. Eich tiwtor personol fydd y ddolen gyswllt bob amser ynghylch unrhyw anawsterau sy’n effeithio ar eich astudiaethau. Byddwch yn cwrdd â'ch tiwtor personol ddwywaith yn ystod eich blwyddyn gyntaf a'ch blwyddyn olaf pan fyddwch wedi’ch lleoli yng Nghaerdydd, ond mae croeso i chi gysylltu â nhw ar unrhyw adeg arall os oes angen help neu gyngor arnoch.  Bydd pob aelod o staff academaidd ar gael i gwrdd â myfyrwyr yn ôl oriau penodol.  

Yn ystod eich 2 flynedd o astudio ym Mhrifysgol Normal Beijing, bydd Cydlynydd Blwyddyn Dramor yn cael ei aseinio i chi, a fydd yn cadw mewn cysylltiad â chi ac yn monitro eich cynnydd.

Mae gan bob modiwl ofod pwrpasol ar Amgylchedd Dysgu Rhithwir Prifysgol Caerdydd, lle y byddwn ni’n eich tywys trwy weithgareddau’r wythnos a’r tasgau y bydd angen eu cwblhau. Bydd yno ddeunyddiau ac adnoddau dysgu megis recordiadau o ddarlithoedd, tasgau ac adnoddau iaith a dolenni at adnoddau digidol gan gynnwys y deunyddiau llyfrgell ar ffurf electronig. Mae gan bob modiwl ym Mhrifysgol Caerdydd a Phrifysgol Normal Beijing Gydlynydd Modiwl dynodedig a fydd hefyd yn gallu cynnig cymorth i fyfyrwyr sy'n astudio eu modiwlau. 

Mae staff Gwasanaethau Proffesiynol ar gael yn Hyb y Myfyrwyr Israddedig i ateb eich cwestiynau. At hynny, mae gennym Swyddog Cefnogi Myfyrwyr pwrpasol yn yr ysgol, a all eich cynghori a’ch llywio yn ôl yr angen mewn awyrgylch cefnogol, caredig a chyfrinachol. Cynigir cefnogaeth debyg i fyfyrwyr yn ystod eu cyfnod ym Mhrifysgol Normal Beijing trwy'r Swyddfa Materion Addysgu, y Swyddfa Cyfnewidiadau a Chydweithredu Rhyngwladol a'r Swyddfa Myfyrwyr Rhyngwladol. 

Mae Bywyd Myfyrwyr, yng Nghanolfan Bywyd y Myfyrwyr, yn cynnig ystod o wasanaethau. Mae’r gwasanaethau cymorth hyn yn cynnwys: Cyngor ar Arian, Dyfodol Myfyrwyr, Cwnsela, Iechyd a Lles, y Gwasanaeth Anabledd Myfyrwyr, Sgiliau Astudio Academaidd a Mentora Myfyrwyr, a llyfrgelloedd a chanolfannau adnoddau ardderchog.

Oherwydd natur unigryw’r rhaglen Tsieinëeg Fodern (BA), mae cymorth sylweddol yn cael ei gynnwys i sicrhau eich bod mor barod ag y gallwch fod i deithio i Tsieina ar gyfer eich ail a thrydedd flwyddyn astudio.

Byddwch yn mynychu cyfarfodydd cyn gadael gyda'r Cydlynydd Academaidd ar gyfer Tsieinëeg yn ogystal ag ysgolheigion gwadd o Brifysgol Normal Beijing, a'r swyddfa Cyfleoedd Byd-eang. Bydd y cyfarfodydd yn cynnig gwybodaeth ddiwylliannol bwysig am foesau ac ymddygiad yn Tsieina, teithio, bwyd a siopa, cadw'n ddiogel, cyfnodau gwyliau a materion ymarferol eraill.

Sut caf fy asesu?

Diben yr asesu yw eich helpu i hel syniadau, meithrin sgiliau a datblygu galluoedd. Maent yn eich annog i fod yn arloesol a chreadigol, i feddwl yn feirniadol am y testunau a'r diwylliannau rydych chi'n dod ar eu traws ac i gyflwyno dadleuon sy'n seiliedig ar dystiolaeth yn Saesneg a thrwy gyfrwng Tsieinëeg Mandarin.

Byddwch yn astudio blociau adeiladu Tsieinëeg Mandarin, gan gynnwys patrymau a strwythurau gramadegol a geirfaol. Byddwn ni’n asesu’r sgiliau hynny yn rheolaidd eich ystod modiwlau iaith sy’n adlewyrchu natur gynyddol a chronnus dysgu iaith.

Rydyn ni’n defnyddio ffurfiau asesu traddodiadol (megis traethodau, arholiadau, cwisys, arholiadau llafar, cyflwyniadau a thraethawd hir) yn ogystal â mathau mwy arloesol (creu flogiau, podlediadau, prosiectau fideo a sain, cyfweliadau, portffolios a chyflwyniadau posteri). 

Tra'n astudio ym Mhrifysgol Normal Beijing, cewch eich hasesu fel unrhyw fyfyriwr arall sy'n astudio yno. Bydd Prifysgol Normal Beijing hefyd yn gofyn i chi gwblhau dulliau asesu traddodiadol ar gyfer y cyd-destun addysg uwch Tsieineaidd, gan gynnwys gwaith cwrs, arholiadau terfynol a marcio cyfranogiad parhaus yn y dosbarth.

Rhoddir adborth ysgrifenedig am waith ar ôl ei asesu i’ch helpu i wella ar gyfer yr asesiadau nesaf, a bydd cyfleoedd i chi drafod yr adborth gyda’ch tiwtoriaid. At hynny, bydd amryw ymarferion megis cwisys, cyflwyniadau, traethodau a phrosiectau. Bydd y tiwtoriaid yn rhoi adborth ffurfiannol i chi i wella’ch dysgu a’ch dealltwriaeth cyn sefyll yr asesiadau crynodol.

Pa sgiliau bydda i'n eu hymarfer a'u datblygu?

Pan fyddwch wedi llwyddo i gwblhau’r rhaglen, byddwch chi’n gallu:

Gwybodaeth a Dealltwriaeth:

GD 1 Siarad, ysgrifennu, a deall Tsieinëeg Mandarin i safon gradd.  

GD 2 Deall strwythurau, cyweiriau ac amrywiadau Tsieinëeg Mandarin a defnyddio'r iaith yn hyblyg ac effeithiol at ddibenion cymdeithasol, academaidd a phroffesiynol, fel y bo'n briodol.

GD 3 Dadansoddi’n feirniadol agweddau ar ddiwylliant, hanes a chymdeithas Tsieina drwy dynnu ar ystod o ddeunyddiau ac ymagweddau. 

GD 4 Arddangos gwybodaeth feirniadol, ymwybyddiaeth a dealltwriaeth fanwl o’r tebygrwydd a’r gwahaniaethau rhwng diwylliant a chymdeithas Tsieina a’ch rhai eich hun.

GD 5 Cymhwyso dealltwriaeth ryngddiwylliannol fanwl gan gynnwys gwybodaeth benodol am y diwylliant Tsieineaidd, i lywio a chyfryngu rhwng mwy nag un diwylliant.

Sgiliau Deallusol:

SD 1 Cyfathrebu'n glir, yn gryno ac yn effeithiol â chynulleidfaoedd amrywiol, ar bapur ac ar lafar, yn Saesneg a Tsieinëeg Mandarin.

SD 2 Defnyddio amrywiaeth o strategaethau i ddidoli a dadansoddi gwybodaeth.

SD 3 Dod i gasgliadau ynghylch cryfderau a gwendidau safbwyntiau a dadleuon, gan eu cyfiawnhau trwy resymu’n gadarn a dehongli deunydd gwreiddiol yn fanwl.

SD 4 Gwerthuso syniadau a dadleuon yn feirniadol trwy gyflwyno gwybodaeth a syniadau yn gydlynol gan ddefnyddio amryw sgiliau ar bapur ac ar lafar. 

SD 5 Defnyddio technegau ymchwil perthnasol ac effeithiol i gynllunio ac ysgrifennu neu gyflwyno testunau academaidd (traethodau, cyflwyniadau, testunau clyweledol) gan ddefnyddio tystiolaeth a’r confensiynau cyfeirnodi cywir.

Sgiliau Ymarferol Proffesiynol:

SY 1 Defnyddio cyfryngau digidol yn effeithiol ar gyfer dod o hyd i wybodaeth, cyfathrebu a dysgu. 

SY 2 Defnyddio sgiliau ieithyddol uwch mewn lleoliad proffesiynol. 

SY 3 Nodi a disgrifio problemau a gweithio ar y cyd i'w datrys.

SY 4 Dangos gwydnwch, hyblygrwydd ac annibyniaeth drwy’r cyfnod trochi Tsieinëeg Mandarin.

Sgiliau Trosglwyddadwy/Allweddol:

SA 1 Defnyddio sgiliau meddwl yn feirniadol a rhesymu i ddadansoddi a gwerthuso tystiolaeth a syniadau amrywiol. 

SA 2 Defnyddio sgiliau ymchwil ymarferol. 

SA 3 Creu syniadau gwreiddiol a chymhwyso ffordd greadigol, llawn dychymyg a dyfeisgar o feddwl wrth ymateb i anghenion a phroblemau a nodwyd.   

SA 4 Dysgu o adborth adeiladol a derbyn ei negeseuon.

SA 5 Bod yn ddyfeisgar ac ysgwyddo cyfrifoldeb am eich dysgu a'ch datblygiad proffesiynol eich hun.

SA 6 Defnyddio amryw sgiliau cyflogadwyedd a menter megis creadigrwydd, mentergarwch, trefnu, rheoli amser, gweithio'n annibynnol a gweithio mewn tîm.

SA 7 Gweithredu fel dinesydd byd-eang, gan ymgysylltu â gwahaniaeth diwylliannol a’i werthfawrogi trwy brofiad ymarferol o fyw ac astudio yn Tsieina.