Cemeg Feddyginiaethol gyda Blwyddyn mewn Diwydiant (BSc)

Ein nod yw cynnig amgylchedd rhagorol ar gyfer addysg gemegol ac mae ein graddau israddedig yn adlewyrchu ein cryfderau a’n diddordebau ymchwil presennol. Mae prosiectau yn y flwyddyn olaf yn gwbl integredig yn ein grwpiau ymchwil. Ein nod yw darparu addysgu arbenigol a gofal bugeiliol cynhwysfawr i'ch galluogi i gyflawni hyd eithaf eich gallu.

Addysgir trwy gyfres o ddarlithoedd, tiwtorialau, gweithdai a dosbarthiadau ymarferol. Cefnogir hyn gan y deunyddiau sydd ar Dysgu Canolog, sef amgylchedd dysgu rhithwir y Brifysgol. 

Gwaith labordy 

Mae’r pwyslais ar dechnegau sylfaenol a chofnodi arsylwadau mewn modd syml ond cywir ym mlwyddyn un. Addysgir sgiliau trwy arddangosiadau ymarferol ac fe’u cefnogir gan ystod o adnoddau e-ddysgu sydd ar gael yn hwylus ac yn rhad ac am ddim i bob myfyriwr. 
  
Mae hunan-brofi yn cynnig dealltwriaeth o wahanol dechnegau ymarferol yn ogystal â'r cyfle i gywiro camgymeriadau cyn mynd i sesiynau labordy. 

Mae gwaith labordy yn gweithio tuag at arbrofion sylweddol sy’n gofyn am gynllunio, dadansoddi a dehongli canlyniadau yn ofalus, yn ogystal ag adrodd safonol, proffesiynol. Mae gwaith ymarferol yn cynnig profiad ym mhob un o brif weithdrefnau a thechnegau'r labordy. Mae wedi'i gynllunio i ymestyn lefel eich hyfedredd mewn cemeg ymarferol, gan eich paratoi i ymgymryd â phrosiect ymchwil annibynnol yng nghamau olaf eich gradd. 

Prosiect 

Mae gan bob un o’n cyrsiau Cemeg elfen gref o waith prosiect annibynnol, o dan oruchwyliaeth. Yn eich blwyddyn olaf, byddwch yn gweithio ar brosiect yn eich maes cemeg dewisol ac yn cael pwnc i’w archwilio neu ei ddatblygu. Byddwch yn cyflwyno canlyniadau eich gwaith ar lafar ac yn ysgrifenedig trwy weithio o dan arweiniad arbenigwr yn y maes.  

Lleoliad  

Byddwch yn treulio eich trydedd flwyddyn yn gweithio yn rôl cyflogai ar leoliad diwydiannol, gan ennill profiad gwerthfawr a dysgu amrywiaeth eang o sgiliau. 

Sut y caf fy nghefnogi?

Byddwch yn cael eich cefnogi gan amrywiaeth o diwtoriaid academaidd, a bydd un ohonynt hefyd yn gweithredu fel eich tiwtor personol. Byddwch yn gweld un o’ch tiwtoriaid bob wythnos, naill ai fel rhan o grŵp tiwtorial bach neu ar sail un-i-un mewn sesiwn diwtorial bersonol.  Mae’r holl staff yn gweithredu polisi drws agored, sy’n golygu y gallwch bob amser fynd at staff gyda phroblemau – boed y rheiny’n academaidd neu’n broblemau eraill.   

Byddwch yn cael llawlyfr cynhwysfawr sy'n briodol i'ch blwyddyn astudio. Mae'n cynnwys manylion am weithdrefnau a pholisïau'r Ysgol.   

Rydym yn gwneud defnydd helaeth o Amgylchedd Dysgu Rhithwir (Dysgu Canolog) y Brifysgol i rannu gwybodaeth a deunyddiau addysgu a chefnogi eich dysgu.

Bydd cydlynydd lleoliadau diwydiant yr Ysgol a thîm gyrfaoedd y Brifysgol yn eich cefnogi i ddod o hyd i leoliadau diwydiannol a gwneud cais amdanynt.

Sut caf fy asesu?

Cynhelir asesiadau ffurfiannol a chrynodol yn ystod pob blwyddyn astudio. Mae hyn yn rhoi mesur o berfformiad i'ch hysbysu chi, staff, a darpar gyflogwyr am eich cynnydd a'ch cyrhaeddiad. Hefyd gall helpu'r broses ddysgu trwy dynnu sylw at feysydd llwyddiant a meysydd y mae angen mwy o sylw arnynt.

Mae asesu'n cynnwys cyfuniad o ddulliau sy'n cael eu dewis i gyd-fynd â chanlyniadau pob modiwl a'r rhaglen gyfan. Mae'r dulliau hyn yn cynnwys y canlynol:

• Arholiadau ffurfiol a phrofion dosbarth gyda therfynau amser penodol ar gyfer modiwlau theori
• Adroddiadau ac allbynnau (cyfansoddion, data, cod) o waith labordy a gwaith cyfrifiadurol i amlygu meistrolaeth ar sgiliau ymarferol ac adrodd i safonau proffesiynol
• Cynllunio a chynnal gwaith prosiect ac adrodd amdano
• Traethodau ar gyfer amlygu’r gallu i chwilio, cyfosod a gwerthuso'r llenyddiaeth
• Datrys problemau ar ffurf aseiniadau gweithdy neu ymarferion ar-lein sy'n galluogi rhoi theori ar waith
• Cyflwyniadau llafar
• Paratoi ac arddangos posteri
• Ym mlwyddyn eich lleoliad byddwch yn cael eich asesu trwy lunio adroddiadau a fydd yn ymdrin â'r profiad gwaith, y sgiliau a'r profiad a gafwyd. At hynny, bydd cyflwyniad fideo o'ch lleoliad yn cael ei gynhyrchu.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau eich rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Amlygu gwybodaeth systematig a dealltwriaeth o ddamcaniaethau a dadleuon canolog, a'u cymwysiadau i theori gemegol feddyginiaethol gyfredol o'r radd flaenaf.
• Gwerthuso'n feirniadol systemau a phrosesau cemegol cyfarwydd ac anghyffredin.
• Amlygu dealltwriaeth o wybodaeth fathemategol sy'n briodol ar gyfer dadansoddi a gwerthuso problemau biolegol a chemegol.
• Dangos sut y mae astudio eich pwnc arbenigol yn cael ei drefnu a'i ymarfer mewn lleoliad diwydiannol. 

Sgiliau Deallusol:

• Gweithredu modelau priodol i ddarparu esboniadau a rhagfynegiadau cymhwyso cysyniadau cemeg meddyginiaethol craidd.
• Cynllunio, cynnal a gwerthuso gwaith ymchwiliol gan ddefnyddio methodolegau priodol ar gyfer synthesis, dadansoddi a modelu cyfrifiadurol.
• Dadansoddi a dehongli data sy'n deillio o arsylwadau a mesuriadau labordy i ddiffinio a datrys problemau mewn cyd-destunau byd go iawn a haniaethol.
• Amlygu’r gallu i wella ac arallgyfeirio eich arbenigedd/arbenigeddau pwnc trwy ymgymryd â lleoliad llwyddiannus gyda darparwr profiad diwydiannol. 

Sgiliau Ymarferol Proffesiynol:

• Cyfathrebu'n effeithiol â chynulleidfaoedd amrywiol, gan egluro syniadau academaidd a dadleuon technegol i gynulleidfaoedd arbenigol ac anarbenigol.
• Ymchwilio, dadansoddi a chymhwyso ffynonellau llenyddiaeth sylfaenol i sgiliau cyfrifiadurol, prosesu data, a chwilio electronig sy'n ymwneud â gwybodaeth gemegol i ddatblygu dadleuon, rhagdybiaethau a phenderfyniadau rhesymegol.
• Nodi cyfrifoldebau a hanfodion ymarfer o fewn cydberthnasau proffesiynol cydweithredol, gan gynnwys sefyllfaoedd cymdeithasol ac economaidd yn y diwydiant fferyllol.

Sgiliau Trosglwyddadwy/Allweddol:

• Amlygu menter trwy strwythuro a rheoli tasg ymchwiliol mewn amser, gweithio mewn timau pan fo hynny'n briodol.
• Astudio'n greadigol, yn annibynnol ac yn fyfyriol, gan gymhwyso gwybodaeth a sgiliau i heriau neu gyd-destunau ehangach.
• Datblygu ymwybyddiaeth o'ch cryfderau a'ch gwendidau gan ddefnyddio arweiniad/adborth i ddatblygu strategaethau ar gyfer dysgu sy'n dod i'r amlwg.
• Cymhwyso sgiliau gwerthuso beirniadol, dadansoddi a barnu yn effeithiol mewn ystod amrywiol o gyd-destunau cemeg feddyginiaethol.
• Amlygu llythrennedd digidol a'r gallu i asesu hygrededd ffynonellau gwybodaeth.