Llenyddiaeth Saesneg (BA)

Drwy gydol y radd, bydd ein haddysgu a arweinir gan ymchwil yn eich cefnogi i ddod yn annibynnol, yn greadigol ac yn feirniadol yn eich ymatebion i lenyddiaeth a ffurfiau eraill ar ddiwylliant, megis ffilm, celf a ffotograffiaeth.

Mae addysgu’r flwyddyn gyntaf yn darparu sylfaen, gyda darlithoedd a thrafodaethau seminar wedi'u strwythuro'n ofalus i'ch helpu i ddatblygu sgiliau allweddol a magu hyder yn y brifysgol. Mae’r addysgu ym Mlynyddoedd 2 a 3 yn seiliedig ar ddarlithoedd a seminarau ac yn symud yn raddol i gyfeiriad arbenigo ac ymchwil annibynnol wrth i chi ddatblygu fel darllenydd a beirniad. Yn yr amgylchedd cefnogol hwn, byddwch yn datblygu eich gallu i ddadansoddi testunau a dadleuon yn drylwyr, gweithio ar y cyd trwy broblemau, llunio eich dadleuon eich hun, a chyflwyno'ch syniadau'n glir i eraill.

Drwy gydol y rhaglen, ond yn enwedig ym modiwl craidd y flwyddyn olaf, byddwch yn datblygu sgiliau cyfathrebu a chydweithio y gallwch eu trosglwyddo i fyd cyflogaeth.

Sut y caf fy nghefnogi?

Eich prif ffynonellau cymorth yn eich astudiaethau yw eich arweinwyr modiwl, eich Tiwtor Personol a'n Canolfan Datblygu Ysgrifennu fewnol. Mae gan eich arweinwyr modiwl sesiynau oriau swyddfa wythnosol yn ystod wythnosau addysgu y gallwch eu mynychu os oes gennych unrhyw gwestiynau am ddeunyddiau cwrs neu asesiadau.

Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd, a'ch cynnydd academaidd, yn ogystal ag ar faterion bugeiliol. Fe'ch gwahoddir i gwrdd â'ch Tiwtor Personol yn rheolaidd trwy gydol y radd, ac maent ar gael ar gyfer cyfarfodydd ychwanegol yn ôl yr angen. Gall myfyrwyr sy'n siarad Cymraeg ofyn am diwtor personol sy'n siarad Cymraeg.

Mae Canolfan Datblygu Ysgrifennu'r ysgol yn darparu cymorth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau.

Mae swyddfa israddedig yr Ysgol Saesneg, Cyfathrebu ac Athroniaeth yn darparu cymorth academaidd a chymorth i fyfyrwyr ac mae yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r brifysgol yn cynnig amrywiaeth o wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cefnogi gyda materion ariannol, a darparu cymorth i fyfyrwyr ag anableddau. Lleolir y gwasanaethau hyn yng Nghanolfan Bywyd Myfyrwyr y brifysgol. Bydd llyfrgelloedd, mannau astudio a chanolfannau adnoddau eraill i gyd ar gael i chi.

Sut caf fy asesu?

Mae eich asesiadau wedi'u cynllunio'n gynyddol i ddatblygu sgiliau allweddol mewn cyfathrebu, cydweithio, meddwl yn feirniadol, a myfyrio. Mae'r asesiadau hyn yn cynnwys traethodau, asesiadau trafodaeth grŵp, ac asesiadau myfyriol. Yn y flwyddyn olaf, byddwch yn cymryd rhan mewn prosiect cydweithredol sy'n cynnwys cyfleu eich canfyddiadau i gynulleidfa anarbenigol. Gellir asesu modiwlau dewisol trwy waith creadigol, ymatebion creadigol-beirniadol, neu ddarnau barn byr.

Byddwch yn derbyn adborth rheolaidd ar eich cynnydd wrth i chi symud drwy'r radd. Bydd adborth llafar mewn darlithoedd, gweithdai a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn sylwadau ffurfiannol ar syniadau traethawd a gwaith drafft, ac adborth manwl ar yr holl waith cwrs wedi'i farcio. 

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Deall llenyddiaeth o wahanol ddiwylliannau a chyfnodau yn systematig (gan gynnwys cyn 1800) a’r ystod o brif genres llenyddol ar draws rhyddiaith, barddoniaeth a drama.
• Deall yn systematig y perthnasoedd rhwng llenyddiaeth a ffurfiau diwylliannol eraill, megis ffilm, celf, cerddoriaeth, a diwylliannau materol/digidol.
• Deall yn systematig y cydadwaith rhwng darllen ac ysgrifennu, a rhwng y beirniadol, y creadigol, a'r damcaniaethol.
• Deall yn systematig sut mae diwylliant, iaith, technoleg ac economeg yn effeithio ar sut, ble, a chan bwy y mae testunau’n cael eu cynhyrchu a’u derbyn.

Sgiliau Deallusol:

• Archwilio gwahanol fathau o ddeunyddiau llenyddol a diwylliannol yn fanwl ac yn feirniadol.
• Cyfleu dehongliadau yn gywir ar gyfer cynulleidfa arbenigol.
• Datblygu a chymhwyso dadleuon sy’n ymateb yn greadigol i ffynonellau llenyddol a beirniadol.
• Cyfathrebu'n effeithiol ar lafar neu'n ysgrifenedig ar gyfer cynulleidfa anarbenigol.

Sgiliau Ymarferol Proffesiynol:

• Casglu a gwerthuso gwybodaeth gymhleth a thystiolaeth amrywiol yn gywir gyda chywirdeb.
• Cyfathrebu’n berswadiol, gan gyfleu syniadau academaidd a dadleuon technegol i gynulleidfaoedd arbenigol ac anarbenigol, gan ddefnyddio technegau ysgrifenedig neu lafar.
• Asesu a datrys problemau yn annibynnol, gan ystyried safbwyntiau pobl eraill mewn ffordd systematig a gwerthusol.

Sgiliau Trosglwyddadwy/Allweddol:

• Esbonio gwybodaeth a syniadau yn glir ac yn broffesiynol, gan gymhwyso gwybodaeth a sgiliau uwch i heriau neu gyd-destunau anghyfarwydd neu fyd ehangach.
• Datblygu mentergarwch drwy gymryd cyfrifoldeb am strwythuro a rheoli amser tasg ymchwil, gan weithio mewn timau pan fo'n briodol.
• Datblygu perthynas waith gadarnhaol ac effeithiol gydag eraill mewn timau, yn enwedig trwy ddeialog ac adborth adeiladol a chydweithredol.