Cymraeg a Llenyddiaeth Saesneg (BA)

Mae ymchwil wrth wraidd profiad myfyrwyr Prifysgol Caerdydd ac mae’r canfyddiadau diweddaraf yn llywio pob rhaglen.

Drwy gydol y radd, ein nod yw eich cefnogi i ddod yn feddyliwr annibynnol. Byddwch yn dysgu trwy ystod eang o ddulliau addysgu, gan gynnwys darlithoedd rhyngweithiol, seminarau bywiog yn seiliedig ar drafodaeth, a gweithdai. Mae’r seminarau a’r gweithdai’n cynnig cyfle gwerthfawr i drin a thrafod prif syniadau a deunydd darllen amryw bynciau. Maen nhw’n gyfle da i ystyried syniadau, cydweithio’n agos â’r darlithwyr a dysgu oddi wrth y myfyrwyr eraill. O ran y Gymraeg, mae rôl allweddol hefyd i diwtorialau, gweithdai a dosbarthiadau iaith, yn enwedig ar gyfer y myfyrwyr sy'n dilyn y llwybr ail iaith. Bydd gennych fynediad i ddeunyddiau cwrs trwy ein hamgylchedd dysgu electronig.

Yn yr amgylchedd cefnogol hwn, byddwch yn datblygu eich gallu i ddadansoddi testunau a dadleuon yn fanwl, gwerthuso tystiolaeth, gweithio ar y cyd trwy broblemau, llunio eich dadleuon eich hun, mireinio eich sgiliau iaith, a chyflwyno'ch syniadau'n glir i eraill.  

Sut y caf fy nghefnogi?

Eich prif ffynonellau cymorth yw eich arweinwyr modiwl a'ch Tiwtoriaid Personol. Byddwch yn cael tiwtor personol mewn Llenyddiaeth Gymraeg a Saesneg. Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd, a'ch cynnydd academaidd, yn ogystal ag ar faterion bugeiliol, a byddwch yn cael eich gwahodd i gwrdd â nhw'n rheolaidd yn ystod y flwyddyn academaidd. Mae eich arweinwyr modiwl hefyd ar gael yn ystod wythnosau addysgu os oes gennych unrhyw gwestiynau am ddeunyddiau cwrs neu asesiadau.

Mae'r Ganolfan Datblygu Ysgrifennu yn darparu cymorth arbenigol ar gyfer ysgrifennu academaidd ar draws y rhaglen. Mae hyn yn cynnwys mynediad at ddeunyddiau ar-lein, gweithdai a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau.

Mae ein timau Gwasanaethau Proffesiynol mewn Llenyddiaeth Gymraeg a Saesneg yn darparu cymorth academaidd a chymorth i fyfyrwyr ac maent yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r brifysgol yn cynnig amrywiaeth o wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cefnogi gyda materion ariannol, a darparu cymorth i fyfyrwyr ag anableddau. Mae'r gwasanaethau hyn wedi'u cydleoli yng Nghanolfan Bywyd Myfyrwyr y brifysgol. Bydd llyfrgelloedd, mannau astudio a chanolfannau adnoddau eraill i gyd ar gael i chi.

Sut caf fy asesu?

Mae eich asesiadau wedi'u cynllunio i ddatblygu'n gronnol sgiliau allweddol mewn cyfathrebu, cydweithio, dadansoddi beirniadol a myfyrio. Gall y rhain gynnwys dadansoddiadau beirniadol o destunau, traethodau, arholiadau, adolygiadau beirniadol, cyflwyniadau, gwaith grŵp ac asesiadau trafodaeth grŵp, ac asesiadau myfyriol o'ch sgiliau eich hun. Yn y flwyddyn olaf, byddwch yn cymryd rhan mewn prosiect cydweithredol mewn llenyddiaeth Saesneg sy'n cynnwys cyfleu eich canfyddiadau i gynulleidfa anarbenigol. Yn y Gymraeg, byddwch yn ymgymryd â phrosiect ymchwil annibynnol.

Gall modiwlau dewisol gynnig amrywiaeth ehangach o asesiadau, gan gynnwys rhoi sylwadau ar waith celf neu ddarn cyfryngol, neu aseiniadau creadigol.

Byddwch yn derbyn adborth rheolaidd ar eich cynnydd wrth i chi symud drwy'r radd. Bydd adborth llafar mewn darlithoedd, gweithdai a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn sylwadau ffurfiannol ar syniadau traethawd a gwaith drafft, ac adborth manwl ar yr holl waith cwrs wedi'i farcio.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Deall strwythurau, cyweiriau ac amrywiaethau Cymraeg a'u defnyddio'n hyblyg ac yn effeithiol at ddibenion cymdeithasol, academaidd a phroffesiynol, fel y bo'n briodol.
• Beirniadu datblygiad y Gymraeg a’i llenyddiaeth mewn cyfnodau hanesyddol gwahanol, o gyd-destun ieithyddol, llenyddol a chymdeithasol yn ogystal â dealtwriaeth o’r ymdrechion i adfer a hyrwyddo’r iaith.
• Deall yn systematig lenyddiaeth Saesneg a/neu Gymraeg o wahanol ddiwylliannau a chyfnodau (gan gynnwys cyn 1800) a’r ystod o brif genres llenyddol ar draws rhyddiaith, barddoniaeth a drama.
• Deall yn systematig y perthnasoedd rhwng llenyddiaeth a ffurfiau diwylliannol eraill, megis ffilm, celf, cerddoriaeth, a diwylliannau materol/digidol.
• Deall yn systematig sut mae diwylliant, iaith, technoleg ac economeg yn effeithio ar sut, ble, a chan bwy y mae testunau'n cael eu cynhyrchu a'u derbyn.

Sgiliau Deallusol:

• Asesu’n feirniadol sut y crëir ystyron drwy iaith, a grym affeithiol iaith.
• Datblygu a chymhwyso dadleuon sy'n ymateb yn annibynnol i ffynonellau ieithyddol a/neu lenyddol a beirniadol. 
• Gwerthuso’n feirniadol destunau, data, cysyniadau a damcaniaethau sy’n berthnasol i gyd-destun yr iaith Gymraeg a llenyddiaeth Gymraeg, gan ddefnyddio’r eirfa a therminoleg briodol.
• Archwilio gwahanol fathau o ddata ieithyddol a/neu ddeunyddiau llenyddol a diwylliannol yn fanwl ac yn feirniadol.

Sgiliau Ymarferol Proffesiynol:

• Cyfathrebu’n berswadiol, gan gyfleu syniadau academaidd a dadleuon technegol i gynulleidfaoedd arbenigol ac anarbenigol, gan ddefnyddio technegau ysgrifenedig neu lafar yn y Gymraeg a’r Saesneg.
• Cymhwyso gwybodaeth, dealltwriaeth a sgiliau mewn cyd-destun proffesiynol.
• Asesu a datrys problemau yn annibynnol, gan ystyried safbwyntiau pobl eraill mewn ffordd systematig a gwerthusol
• Casglu a gwerthuso gwybodaeth gymhleth a thystiolaeth amrywiol yn systematig.

Sgiliau Trosglwyddadwy/Allweddol:

• Defnyddio rhaglenni TG yn effeithiol, gan gynnwys meddalwedd cyfrwng Cymraeg, i gyflwyno a dadansoddi deunyddiau.
• Egluro gwybodaeth a syniadau yn glir ac yn broffesiynol, gan gymhwyso gwybodaeth a sgiliau uwch i heriau neu gyd-destunau anghyfarwydd neu fyd ehangach.
• Arddangos mentergarwch drwy gymryd cyfrifoldeb am strwythuro a rheoli amser tasg ymchwil, gan weithio mewn timau pan fo'n briodol.
• Datblygu perthynas waith gadarnhaol ac effeithiol ag eraill mewn timau, yn enwedig trwy ddeialog ac adborth adeiladol a chydweithredol.
• Datblygu ymatebion creadigol, beirniadol ac annibynnol i broblemau neu dasgau.