Llenyddiaeth Saesneg ac Athroniaeth (BA)

Drwy gydol y radd, ein nod yw eich cefnogi i ddod yn feddyliwr annibynnol. Byddwch yn dysgu trwy ystod eang o ddulliau addysgu, gan gynnwys darlithoedd rhyngweithiol, seminarau bywiog yn seiliedig ar drafodaeth, a gweithdai. Mae’r seminarau a’r gweithdai’n cynnig cyfle gwerthfawr i drin a thrafod prif syniadau a deunydd darllen amryw bynciau. Maen nhw’n gyfle da i ystyried syniadau, cydweithio’n agos â’r darlithwyr a dysgu oddi wrth y myfyrwyr eraill. Bydd gennych fynediad i ddeunyddiau cwrs trwy ein hamgylchedd dysgu electronig.

Yn yr amgylchedd cefnogol hwn, byddwch yn datblygu eich gallu i ddadansoddi testunau a dadleuon yn agos, gwerthuso tystiolaeth, gweithio ar y cyd trwy broblemau, llunio eich dadleuon eich hun, mireinio eich sgiliau beirniadol, a chyflwyno'ch syniadau'n glir i eraill.   

Sut y caf fy nghefnogi?

Eich prif ffynonellau cymorth yw eich arweinwyr modiwl, eich Tiwtoriaid Personol a'n Canolfan Datblygu Ysgrifennu fewnol. Mae eich arweinwyr modiwl ar gael yn ystod wythnosau addysgu os oes gennych unrhyw gwestiynau am ddeunyddiau cwrs neu asesiadau. Byddwch hefyd yn cael tiwtor personol mewn Llenyddiaeth Saesneg ac Athroniaeth a byddwch yn cwrdd â nhw'n rheolaidd yn ystod y flwyddyn academaidd. Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd, a'ch cynnydd academaidd, yn ogystal ag ar faterion bugeiliol. Fe'ch gwahoddir i gwrdd â'ch Tiwtor Personol yn rheolaidd trwy gydol y radd, ac maent ar gael ar gyfer cyfarfodydd ychwanegol yn ôl yr angen.

Mae Canolfan Datblygu Ysgrifennu'r ysgol yn darparu cymorth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau.

Mae ein tîm Gwasanaethau Proffesiynol yn darparu cymorth academaidd a chymorth i fyfyrwyr ac mae yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r brifysgol yn cynnig amrywiaeth o wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cefnogi gyda materion ariannol, a darparu cymorth i fyfyrwyr ag anableddau. Mae'r gwasanaethau hyn wedi'u cydleoli yng Nghanolfan Bywyd Myfyrwyr y brifysgol. Bydd llyfrgelloedd, mannau astudio a chanolfannau adnoddau eraill i gyd ar gael i chi.

Sut caf fy asesu?

Mae eich asesiadau wedi'u cynllunio i ddatblygu'n gronnol sgiliau allweddol mewn cyfathrebu, cydweithio, meddwl yn feirniadol a myfyrio. Gall y rhain gynnwys dadansoddiadau beirniadol o destunau, traethodau, arholiadau, adolygiadau beirniadol, cyflwyniadau, gwaith grŵp ac asesiadau trafodaeth grŵp, ac asesiadau myfyriol o'ch sgiliau eich hun. Yn y flwyddyn olaf, byddwch yn cymryd rhan mewn prosiect athroniaeth cydweithredol mawr sy’n cynnwys ysgrifennu a chyflwyno ar gyfer cynulleidfa broffesiynol, ac mewn llenyddiaeth Saesneg byddwch yn cydweithio ag eraill i gynhyrchu darn o waith sydd ar gael i’r cyhoedd.

Gall modiwlau dewisol gynnig amrywiaeth ehangach o asesiadau, gan gynnwys ysgrifennu ar gyfer cynulleidfa gyhoeddus, rhoi sylwadau ar waith celf neu ddarn cyfryngol, neu aseiniadau creadigol.

Byddwch yn derbyn adborth rheolaidd ar eich cynnydd wrth i chi symud drwy'r radd. Bydd adborth llafar mewn darlithoedd, gweithdai a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn sylwadau ffurfiannol ar syniadau traethawd a gwaith drafft, ac adborth manwl ar yr holl waith cwrs wedi'i farcio.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Deall yn systematig lenyddiaeth o wahanol ddiwylliannau a chyfnodau (gan gynnwys cyn 1800) a’r ystod o brif genres llenyddol ar draws rhyddiaith, barddoniaeth a drama.
• Asesu yn feirniadol rai o'r damcaniaethau a dadleuon canolog, a'u cymwysiadau, mewn athroniaeth foesol, gymdeithasol neu wleidyddol, ac mewn epistemoleg, athroniaeth iaith, neu athroniaeth meddwl.
• Archwilio yn feirniadol ddamcaniaethau a dadleuon o ymchwil athronyddol gyfoes, a all ddod o groestoriad gwahanol feysydd athroniaeth neu o ymchwil ryngddisgyblaethol.
• Cymhwyso ymchwil athronyddol trwy ddrafftio dogfennau polisi neu strategaeth, neu argymhellion gweithredu, mewn ymateb i broblem foesegol neu gymdeithasol yn y byd go iawn sydd o bryder cymdeithasol cyfoes.
• Deall yn systematig y berthynas rhwng llenyddiaeth a ffurfiau diwylliannol eraill a dadansoddi sut mae diwylliant, iaith, technoleg ac economeg yn effeithio ar gynhyrchu a derbyn testunau.

Sgiliau Deallusol:

• Archwilio gwahanol fathau o ddeunyddiau llenyddol a diwylliannol yn fanwl ac yn feirniadol.
• Cymhwyso technegau safonol dadansoddi athronyddol i werthuso honiadau a dadleuon athronyddol yn feirniadol.
• Datblygu ymatebion annibynnol ac arloesol i ddeunydd ieithyddol, llenyddol, beirniadol, diwylliannol a chreadigol, yn ysgrifenedig ac ar lafar, ac ar gyfer cynulleidfaoedd gwahanol.
• Datblygu ymatebion annibynnol ac arloesol i honiadau a dadleuon athronyddol cymhleth ac arbenigol, yn ysgrifenedig ac ar lafar, ac ar gyfer gwahanol gynulleidfaoedd.
• Llunio a threfnu dadleuon sy'n ymateb yn greadigol i ffynonellau llenyddol a beirniadol neu'n cefnogi honiadau mewn ymateb i gwestiynau athronyddol.

Sgiliau Ymarferol Proffesiynol:

• Casglu a gwerthuso gwybodaeth gymhleth a thystiolaeth amrywiol yn systematig gyda chywirdeb.
• Cyfleu gwybodaeth a dadleuon cymhleth mewn fformatau gwahanol sy'n briodol i wahanol ddibenion.
• Datblygu trafodaethau grŵp a phrosiectau tîm mewn modd cydweithredol.
• Mynegi ac asesu eich sgiliau academaidd a phroffesiynol eich hun.

Sgiliau Trosglwyddadwy/Allweddol:

• Asesu a datrys problemau yn annibynnol, gan ystyried safbwyntiau pobl eraill mewn ffordd systematig a gwerthusol.
• Cymhwyso gwybodaeth a sgiliau uwch i heriau neu gyd-destunau anghyfarwydd neu fyd ehangach.
• Arddangos mentergarwch drwy gymryd cyfrifoldeb am strwythuro a rheoli amser tasg ymchwil, gan weithio mewn timau pan fo'n briodol.
• Datblygu perthynas waith gadarnhaol ac effeithiol ag eraill mewn timau, yn enwedig trwy ddeialog ac adborth adeiladol a chydweithredol.
• Datblygu gwytnwch, y gallu i addasu a chreadigrwydd, gan fyfyrio'n weithredol ar eich astudiaethau a'ch cyflawniadau eich hun.