Llenyddiaeth Saesneg a Hanes (BA)

Mae ymchwil wrth wraidd profiad myfyrwyr Prifysgol Caerdydd ac mae’r canfyddiadau diweddaraf yn llywio pob rhaglen.

Rydym yn cynnig amgylchedd dysgu cefnogol, lle byddwch yn caffael ystod o sgiliau a chyfoeth o wybodaeth arbenigol. Byddwch chi’n dysgu trwy sawl dull, megis darlithoedd rhyngweithiol, seminarau lle mae trafodaethau bywiog, gweithdai, gwaith grŵp a thiwtorialau. Bydd y gweithgareddau hyn ar y campws yn cael eu cyfuno ag ystod o amgylcheddau ar-lein a fydd yn cyfoethogi eich profiad dysgu ac yn eich galluogi i ymestyn eich astudiaethau y tu hwnt i'r ystafell ddosbarth. Mae seminarau a gweithdai’n cynnig profiad gwerth chweil i ymgysylltu'n feirniadol â'r syniadau a’r darllen allweddol ar bwnc. Maen nhw’n gyfle da i ystyried syniadau, cydweithio’n agos â’r darlithwyr a dysgu oddi wrth y myfyrwyr eraill. Yn ail ran eich gradd, cewch gyfle i ymgymryd â phrosiectau annibynnol gyda chefnogaeth arbenigwr yn y maes ac addysgu un i un (yr ail flwyddyn a’r flwyddyn olaf mewn hanes, a’r flwyddyn olaf mewn Llenyddiaeth Saesneg).

Mae’n dulliau addysgu’n meithrin sgiliau deallusol megis meddwl yn feirniadol, dadansoddi’n fanwl, cloriannu tystiolaeth, llunio dadleuon, rhoi damcaniaethau ar waith a defnyddio iaith yn effeithiol mewn traethodau a thrafodaethau. At hynny, byddwn ni’n eich helpu i weithio mewn tîm, cynnal ymchwil yn annibynnol, a rheoli eich amser mewn awyrgylch cefnogol.

Sut y caf fy nghefnogi?

Byddwch yn cael cymorth gan nifer o staff gwahanol, rhai yn canolbwyntio ar berfformiad academaidd mewn maes penodol a rhai’n rhoi sylw i ddysgu a chynnydd mewn ffordd fwy cyfannol.

Byddwch yn cael tiwtoriaid personol mewn Llenyddiaeth Saesneg a Hanes a fydd yn eich arwain trwy gydol eich astudiaethau. Byddwch yn cwrdd â'ch tiwtoriaid personol yn rheolaidd mewn grwpiau ac yn unigol i fyfyrio ar eich cynnydd a'ch datblygiad ar draws eich astudiaethau. Gall eich tiwtoriaid personol hefyd eich cyfeirio at gymorth priodol os byddwch yn cael anawsterau neu os bydd angen gwybodaeth benodol arnoch am eich amser ym Mhrifysgol Caerdydd. Gall myfyrwyr sy'n siarad Cymraeg ofyn am diwtor personol sy'n siarad Cymraeg.

Rhoddir cefnogaeth ychwanegol sy'n benodol i fodiwlau gan diwtoriaid seminarau, darlithwyr a/neu gynullwyr modiwlau; bydd cynghorydd academaidd a fydd yn cwrdd â chi’n rheolaidd yn rhoi cefnogaeth ar gyfer prosiectau ymchwil annibynnol. Mae arweinwyr eich modiwlau yn cael sesiynau oriau swyddfa wythnosol yn ystod wythnosau addysgu y gallwch eu mynychu os oes gennych unrhyw gwestiynau am ddeunyddiau neu asesiadau.

Trwy amgylchedd dysgu rhithwir y brifysgol, byddwch yn gallu cael gafael ar ddeunydd amlgyfrwng perthnasol, cyflwyniadau, taflenni darlithoedd, llyfryddiaethau, dolenni pellach, ymarferion electronig a byrddau trafod.

Mae ein timau Cymorth Addysg israddedig yn cynnig gwasanaethau academaidd a chymorth i fyfyrwyr, ac maent yno i gynnig gwybodaeth ac arweiniad mewn ymateb i unrhyw ymholiadau sydd gennych.

Mae’r brifysgol yn cynnig amryw wasanaethau megis Dyfodol Myfyrwyr i’ch helpu i gynllunio eich gyrfa; gwasanaethau cymorth a digwyddiadau i’ch helpu i reoli eich iechyd emosiynol, corfforol a meddwl; a chymorth ar gyfer materion ariannol ac i fyfyrwyr ag anableddau.

Mae'r Ganolfan Datblygu Ysgrifennu (sydd wedi'i lleoli yn yr Ysgol Saesneg, Cyfathrebu ac Athroniaeth) yn darparu cymorth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau.

Sut caf fy asesu?

Mae asesiadau’n cynnwys beirniadaeth ffynhonnell, darllen llenyddiaeth yn fanwl, prosiectau ymchwil, adolygiadau, cyflwyniadau, portffolios creadigol-feirniadol a phostiadau blog, ochr yn ochr â mathau mwy traddodiadol o asesu fel traethodau a phrofion/arholiadau. Mae rhai o'n hasesiadau yn eich galluogi i weithio ar y cyd ar brosiect a chyfleu'ch canfyddiadau i gynulleidfa anarbenigol, tra bod eraill yn cynnwys ysgrifennu a chreu ar gyfer cynulleidfaoedd gwahanol; er enghraifft, efallai y gofynnir i chi ddylunio arddangosfa amgueddfa neu greu canllaw ar gyfer defnyddio ffynonellau; ac efallai y cewch gyfle i greu podlediadau a thestunau digidol ar gyfer y cyfryngau cymdeithasol. Mae traethodau hir ym maes hanes yn caniatáu i chi fynd i'r afael â chwestiynau hanesyddol sylfaenol neu archwilio mater neu ddadl hanesyddol yn fanylach, tra bod y traethawd hir yn y naill bwnc neu'r llall yn eich galluogi i archwilio un testun yn gyson ac yn fanwl.

Ym mhob achos, mae ein hasesiadau wedi'u cynllunio i'ch cefnogi i ddatblygu eich syniadau, eich sgiliau a'ch cymwyseddau. Maent yn helpu i roi’r sgiliau i chi gysylltu eich gwybodaeth â materion lleol, cenedlaethol a byd-eang, ac yn eich annog i fod yn arloesol a chreadigol; dod o hyd i ffyrdd newydd o fynd i'r afael â phroblemau neu ofyn cwestiynau; cydweithio i ddatrys problemau a chyflwyno canfyddiadau; a chyflwyno dadleuon ar sail tystiolaeth. Mae'r sgiliau a ddatblygir ac a asesir trwy gydol y rhaglen yn eich paratoi ar gyfer ystod o yrfaoedd graddedig. Mae adborth unigol a grŵp ar asesiadau a mathau eraill o ddysgu yn rhoi cyfle i chi fyfyrio ar eich lefel cyrhaeddiad gyfredol neu ddiweddar.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Deall llenyddiaeth yn systematig o ddiwylliannau a chyfnodau gwahanol (gan gynnwys cyn 1800) a'r amrywiaeth o brif genres llenyddol ar draws rhyddiaith, barddoniaeth a drama.
• Deall yn systematig y berthynas rhwng llenyddiaeth a ffurfiau diwylliannol eraill, neu gymhlethdod ac amrywiaeth y gorffennol mewn un wlad neu mewn perthynas â themâu neu destunau penodol.
• Deall yn systematig y tybiaethau a dulliau newidiol y mae haneswyr yn eu defnyddio i esbonio'r gorffennol, neu'r cydadwaith rhwng darllen a gwahanol fathau o ysgrifennu.
• Deall yn systematig sut mae diwylliant, iaith, technoleg ac economeg yn effeithio ar sut, ble, a chan bwy y mae testunau neu wybodaeth ddisgyblaethol yn cael eu cynhyrchu a'u derbyn.

Sgiliau Deallusol:

• Archwilio gwahanol fathau o ddeunyddiau llenyddol neu ddiwylliannol yn agos ac yn feirniadol.
• Trefnu ac amddiffyn dadleuon am ystod o faterion, problemau a dadleuon hanesyddol gan ddefnyddio syniadau a dulliau hanesyddiaethol.
• Datblygu a chymhwyso dadleuon sy'n ymateb i ffynonellau llenyddol a beirniadol neu sy'n gwerthuso newid hanesyddol a diwylliannol yn feirniadol.
• Ffurfio a chyfiawnhau dadleuon am ystod o faterion, problemau a dadleuon hanesyddol gan ddefnyddio syniadau a dulliau hanesyddiaethol a/neu lenyddol.
• Casglu ffynonellau sylfaenol priodol ynghyd, pwyso a mesur eu natur, a'u dadansoddi'n feirniadol i ateb cwestiynau a datrys problemau.

Sgiliau Ymarferol Proffesiynol:

• Casglu a gwerthuso gwybodaeth gymhleth yn systematig a thystiolaeth amrywiol gyda chywirdeb.
• Cyfathrebu'n berswadiol, gan gyfleu syniadau academaidd a dadleuon technegol i gynulleidfaoedd arbenigol neu anarbenigol a hynny drwy ddefnyddio technegau ysgrifenedig neu lafar.
• Asesu a datrys problemau'n annibynnol, gan ystyried barn pobl eraill mewn ffordd systematig a gwerthusol.

Sgiliau Trosglwyddadwy/Allweddol:

• Esbonio gwybodaeth a syniadau yn glir ac yn broffesiynol, gan gymhwyso gwybodaeth a sgiliau uwch i heriau neu gyd-destunau anghyfarwydd neu fyd ehangach.
• Arddangos mentergarwch drwy gymryd cyfrifoldeb am strwythuro a rheoli amser tasg ymchwil, gan weithio mewn timau pan fo'n briodol.
• Datblygu cysylltiadau gwaith cadarnhaol ac effeithiol gydag eraill mewn timau, yn enwedig trwy ddeialog ac adborth adeiladol a chydweithredol.
• Cynnig eich atebion llawn dychymyg eich hun yn seiliedig ar dystiolaeth.
• Datblygu sgiliau mentergarwch i ddatrys problemau a dadansoddi tystiolaeth amryfal, rannol neu amwys gan feddwl yn feirniadol, yn fentrus ac yn greadigol.