Iaith a Llenyddiaeth Saesneg (BA)

Drwy gydol y radd, ein nod yw eich cefnogi i ddod yn feddyliwr annibynnol, creadigol a beirniadol.

Mae addysgu'r flwyddyn gyntaf yn darparu cymorth wedi'i strwythuro'n ofalus trwy ddarlithoedd a thrafodaethau seminar i'ch helpu i ddatblygu sgiliau allweddol a magu hyder. Mae addysgu ym Mlynyddoedd 2 a 3 yn seiliedig ar ddarlithoedd a seminarau ac yn symud yn raddol i gyfeiriad arbenigo ac ymchwil annibynnol. Erbyn y flwyddyn olaf byddwch yn dysgu trwy ddarllen annibynnol dan arweiniad a gweithdai a seminarau rhyngweithiol llai, gan drafod ymchwil newydd gydag academyddion a gydnabyddir yn rhyngwladol sy'n gweithio yn y maes hwnnw ar hyn o bryd. Bydd gennych fynediad i holl ddeunyddiau'r cwrs trwy ein hamgylchedd dysgu electronig.

Yn yr amgylchedd cefnogol hwn byddwch yn datblygu eich gallu i ddadansoddi testunau a dadleuon yn drylwyr, gweithio ar y cyd trwy broblemau, llunio eich dadleuon eich hun, a chyflwyno'ch syniadau'n glir i eraill.  Byddwch hefyd yn datblygu sgiliau cyfathrebu a chydweithio y gallwch eu trosglwyddo i fyd cyflogaeth. 

Sut y caf fy nghefnogi?

Eich prif ffynonellau cymorth yw eich arweinwyr modiwl, eich Tiwtoriaid Personol a Chanolfan Datblygu Ysgrifennu'r ysgol. Bydd gennych un Tiwtor Personol mewn Iaith Saesneg ac un mewn Llenyddiaeth. Mae gan eich arweinwyr modiwl sesiynau galw heibio yn ystod wythnosau addysgu y gallwch eu mynychu os oes gennych unrhyw gwestiynau am ddeunyddiau cwrs neu asesiadau. Gall Tiwtoriaid Personol eich cynghori ar faterion academaidd, gan gynnwys sgiliau astudio, gyrfaoedd, a'ch cynnydd academaidd, yn ogystal ag ar faterion bugeiliol. Fe'ch gwahoddir i gwrdd â'ch Tiwtor Personol yn rheolaidd trwy gydol y radd, ac maent ar gael ar gyfer cyfarfodydd ychwanegol yn ôl yr angen. Bydd myfyrwyr Cymraeg eu hiaith yn cael cynnig tiwtor personol sy'n siarad Cymraeg.

Mae Canolfan Datblygu Ysgrifennu'r ysgol yn darparu cymorth arbenigol ar gyfer ysgrifennu academaidd ar draws y rhaglen. Gallwch gael mynediad at ddeunyddiau ar-lein, gweithdai, a chyfarfodydd un-i-un am unrhyw agwedd ar ysgrifennu academaidd i'ch cefnogi gyda'ch asesiadau.

Mae ein Tîm Gwasanaethau Proffesiynol yn darparu cymorth academaidd a chymorth i fyfyrwyr ac mae yno i'ch helpu gyda gwybodaeth ac arweiniad os oes gennych unrhyw ymholiadau. Y tu hwnt i'r ysgol, mae'r brifysgol yn cynnig amrywiaeth o wasanaethau cymorth a digwyddiadau i'ch helpu i gynllunio'ch gyrfa, rheoli eich iechyd emosiynol, meddyliol a chorfforol, eich cefnogi gyda materion ariannol, a darparu cymorth i fyfyrwyr ag anableddau. Mae'r gwasanaethau hyn wedi'u cydleoli yng Nghanolfan Bywyd Myfyrwyr y brifysgol. Bydd llyfrgelloedd, mannau astudio a chanolfannau adnoddau eraill i gyd ar gael i chi.

Sut caf fy asesu?

Mae eich asesiadau wedi'u cynllunio i ddatblygu'n gronnol sgiliau allweddol mewn cyfathrebu, cydweithio, meddwl yn feirniadol, a myfyrio. Gall y rhain gynnwys dadansoddiadau beirniadol o destunau, traethodau, arholiadau, adolygiadau beirniadol, cyflwyniadau, gwaith grŵp ac asesiadau trafodaeth grŵp, tasgau dadansoddol, tasgau wythnosol, ac asesiad myfyriol o'ch sgiliau eich hun. Yn y flwyddyn olaf, mewn Iaith Saesneg, byddwch yn gweithio ar ddadansoddi data a chyflwyno eich canfyddiadau ar gyfer cynulleidfaoedd amrywiol, ac mewn Llenyddiaeth Saesneg byddwch yn cydweithio ag eraill i gynhyrchu darn o waith sydd ar gael i’r cyhoedd.

Byddwch yn derbyn adborth rheolaidd ar eich cynnydd wrth i chi symud drwy'r radd. Bydd adborth llafar mewn darlithoedd, gweithdai a seminarau yn eich helpu i asesu eich dealltwriaeth o ddeunydd y cwrs a'ch ymatebion beirniadol iddo. Byddwch yn derbyn sylwadau ffurfiannol ar syniadau traethawd a gwaith drafft, ac adborth manwl ar yr holl waith cwrs wedi'i farcio.

Pa sgiliau bydda i'n eu hymarfer a'u datblygu?

Drwy ymgysylltu’n llawn â’r cwrs hwn, byddwch yn caffael ac yn datblygu amrywiaeth o sgiliau gwerthfawr, yn rhai penodol i’r ddisgyblaeth a ‘sgiliau cyflogadwyedd’ mwy cyffredinol. Bydd y rhain yn fodd i chi:

• deall pynciau cymhleth gyda hyder
• gofyn y cwestiynau iawn am destunau cymhleth
• cael gwerthfawrogiad llawn dychymyg o safbwyntiau a dewisiadau gwahanol a dadansoddi'r rhain yn feirniadol
• nodi a defnyddio data perthnasol
• cynnig eich atebion llawn dychymyg eich hun yn seiliedig ar dystiolaeth
• cyfathrebu'n glir, yn gryno ac yn argyhoeddiadol yn ysgrifenedig ac ar lafar
• gweithio yn ôl terfynau amser a blaenoriaethau, a rheoli amrywiaeth o dasgau ar yr un pryd
• dysgu yn sgîl beirniadaeth adeiladol ac ymgorffori ei mewnwelediadau
• gweithio’n rhan o dîm, gan ddatblygu dull cydweithredol o ddatrys problemau
• defnyddio rhaglenni TG a'r cyfryngau digidol, lle bo'n briodol
• Cymryd cyfrifoldeb am eich rhaglen ddysgu a’ch datblygiad proffesiynol eich hun

Beth yw deilliannau dysgu'r cwrs/rhaglen?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Dangos gwybodaeth a dealltwriaeth systematig o feysydd craidd iaith Saesneg ac ieithyddiaeth, gan gynnwys seineg, gramadeg, semanteg, pragmateg, a disgwrs.
• Dangos gwybodaeth a dealltwriaeth systematig o sut mae iaith yn gweithio yn y byd cymdeithasol.
• Deall yn systematig lenyddiaeth o wahanol ddiwylliannau a chyfnodau (gan gynnwys cyn 1800) a’r ystod o brif genres llenyddol ar draws rhyddiaith, barddoniaeth a drama.
• Deall yn systematig y perthnasoedd rhwng llenyddiaeth a ffurfiau diwylliannol eraill, megis ffilm, celf, cerddoriaeth, a diwylliannau materol/digidol.
• Deall yn systematig sut mae diwylliant, iaith, technoleg ac economeg yn effeithio ar sut, ble, a chan bwy y mae testunau'n cael eu cynhyrchu a'u derbyn.

Sgiliau Deallusol:

• Cymhwyso terminoleg ddisgrifiadol sy'n berthnasol i iaith Saesneg a ffenomenau ieithyddol.
• Dadansoddi gwahanol fathau o ddata ieithyddol.
• Datblygu ac egluro dadleuon cymhleth ac arbenigol sy'n cefnogi honiadau mewn ymateb i gonfensiynau'r genre.
• Gwerthuso effaith defnydd iaith mewn ystod o gyd-destunau.
• Archwilio gwahanol fathau o ddeunyddiau llenyddol a diwylliannol yn fanwl ac yn feirniadol.

Sgiliau Ymarferol Proffesiynol:

• Deall ac egluro syniadau, dadleuon ac ymchwil empirig yn systematig gyda chywirdeb.
• Dangos ymwybyddiaeth feirniadol o wahanol gonfensiynau ysgrifennu ac offer ysgrifennu, a'r gallu i'w defnyddio a'u haddasu'n llwyddiannus.
• Asesu a datrys problemau yn annibynnol, gan ystyried safbwyntiau pobl eraill mewn ffordd systematig a gwerthusol.

Sgiliau Trosglwyddadwy/Allweddol:

• Trefnu a chyfleu syniadau a dadleuon cymhleth mewn fformatau gwahanol sy'n addas i wahanol gynulleidfaoedd, gan ddefnyddio confensiynau cyfeirio priodol.
• Datblygu mentergarwch drwy gymryd cyfrifoldeb am strwythuro a rheoli amser tasg ymchwil, gan weithio mewn timau pan fo'n briodol.
• Myfyrio ar adborth adeiladol ac ymateb iddo.