Cemeg (BSc)

Ein nod yw cynnig amgylchedd rhagorol ar gyfer addysg gemegol ac mae ein graddau israddedig yn adlewyrchu ein cryfderau a’n diddordebau ymchwil presennol. Mae prosiectau yn y flwyddyn olaf yn gwbl integredig yn ein grwpiau ymchwil. Ein nod yw darparu addysgu arbenigol a gofal bugeiliol cynhwysfawr i'ch galluogi i wireddu hyd at eithaf eich gallu.

Addysgir trwy gyfres o ddarlithoedd, tiwtorialau, gweithdai a dosbarthiadau ymarferol. Cefnogir hyn gan y deunyddiau sydd ar Dysgu Canolog, sef amgylchedd dysgu rhithwir y Brifysgol. 

Gwaith labordy 

Mae’r pwyslais ar dechnegau sylfaenol a chofnodi arsylwadau mewn modd syml ond cywir ym mlwyddyn un. Addysgir sgiliau drwy arddangosiadau ymarferol ac fe’u cefnogir gan ystod o adnoddau e-ddysgu sydd ar gael yn hwylus ac yn rhad ac am ddim i bob myfyriwr. 
 
Mae hunan-brofi yn cynnig dealltwriaeth o wahanol dechnegau ymarferol yn ogystal â'r cyfle i gywiro camgymeriadau cyn mynd i sesiynau labordy. 

Mae gwaith labordy yn gweithio tuag at arbrofion sylweddol sy’n gofyn am gynllunio, dadansoddi a dehongli canlyniadau yn ofalus, yn ogystal ag adrodd safonol, proffesiynol. Mae gwaith ymarferol yn cynnig profiad ym mhob un o brif weithdrefnau a thechnegau'r labordy. Mae wedi'i ddylunio i ymestyn lefel eich hyfedredd mewn cemeg ymarferol, gan eich paratoi i ymgymryd â phrosiect ymchwil annibynnol yng nghamau olaf eich gradd. 
 
Prosiect 

Mae gan bob un o’n cyrsiau cemeg elfen gref o waith prosiect annibynnol, o dan oruchwyliaeth. Ym mlwyddyn olaf y cwrs BSc, byddwch yn gweithio ar brosiect yn y maes cemeg sydd orau gennych ac yn cael pwnc i'w ymchwilio neu ei ddatblygu. Byddwch yn cyflwyno canlyniadau eich gwaith ar lafar ac yn ysgrifenedig trwy weithio o dan arweiniad arbenigwr yn y maes. Yn y gorffennol, mae hyn wedi arwain at fyfyrwyr israddedig yn ysgrifennu papurau a gyhoeddwyd ar y cyd. 

Sut y caf fy nghefnogi?

Byddwch yn cael eich cefnogi gan ystod o diwtoriaid academaidd, ac mae un ohonynt hefyd yn gweithredu fel eich tiwtor personol. Byddwch yn gweld un o’ch tiwtoriaid bob wythnos, naill ai fel rhan o grŵp tiwtorial bach neu ar sail un-i-un mewn sesiwn diwtorial bersonol.  Mae’r holl staff yn gweithredu polisi drws agored, sy’n golygu y gallwch bob amser fynd at staff gyda phroblemau – boed y rheiny’n academaidd neu’n broblemau eraill.   

Byddwch yn cael llawlyfr cynhwysfawr sy'n briodol i'ch blwyddyn astudio, sy’n cynnwys manylion am weithdrefnau a pholisïau'r Ysgol. 

Rydym yn gwneud defnydd helaeth o Amgylchedd Dysgu Rhithwir (Dysgu Canolog) y Brifysgol i rannu gwybodaeth a deunyddiau addysgu a chefnogi eich dysgu.

Sut caf fy asesu?

Cynhelir asesiadau ffurfiannol a chrynodol yn ystod pob blwyddyn astudio. Mae hyn yn rhoi mesur o berfformiad i'ch hysbysu chi, ni fel staff, a darpar gyflogwyr am eich cynnydd a'ch cyrhaeddiad. Hefyd gall helpu'r broses ddysgu trwy dynnu sylw at feysydd llwyddiant a meysydd y mae angen mwy o sylw arnynt.

Mae'r asesu'n cynnwys cyfuniad o ddulliau sy'n cael eu dewis i weddu i ganlyniadau penodol pob modiwl a'r cwrs yn ei gyfanrwyddyn cynnwys: 

• Arholiadau ffurfiol gyda therfynau amser penodedig 
• Profion dosbarth 
• Adroddiadau ar waith labordy 
• Cynllunio, cynnal ac adrodd ar waith prosiect 
• Traethodau 
• Ymarferion datrys problemau (fel aseiniadau gweithdy) 
• Cyflwyniadau llafar 
• Paratoi ac arddangos posteri. 

Pa sgiliau bydda i'n eu hymarfer a'u datblygu?

Mae Deilliannau Dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Maent hefyd yn eich helpu i ddeall yr hyn a ddisgwylir gennych chi.

O gwblhau eich rhaglen yn llwyddiannus, byddwch yn gallu:

Gwybodaeth a Dealltwriaeth:

• Arddangos gwybodaeth a dealltwriaeth o ddamcaniaethau allweddol a chymwysiadau dadansoddol, a'u cymhwysiad i theori gemegol o'r radd flaenaf gyfredol.
• Arddangos dealltwriaeth systematig o wybodaeth fathemategol a thrin rhifiadol sy'n briodol ar gyfer dadansoddi a gwerthuso problemau cemegol.
• Gwerthuso'n feirniadol systemau a phrosesau cemegol cyfarwydd ac anghyffredin.

Sgiliau Deallusol:

• Gweithredu modelau priodol i ddarparu esboniadau a rhagfynegiadau o fewn cyd-destun pynciau uwch, gan gymhwyso cysyniadau cemeg craidd.
• Cynllunio, cynnal a gwerthuso gwaith ymchwiliol sy'n arddangos dealltwriaeth o dechnegau ar gyfer synthesis, dadansoddi a/neu fodelu cyfrifiadol.
• Dadansoddi a dehongli data sy'n deillio o arsylwadau a mesuriadau labordy i ddiffinio a datrys problemau mewn cyd-destunau amrywiol.

Sgiliau Ymarferol Proffesiynol:

• Cyfathrebu'n effeithiol ar draws cynulleidfaoedd a genres, gan gyfleu syniadau academaidd a dadleuon technegol i gynulleidfaoedd arbenigol ac anarbenigol.
• Deall sut mae cemeg yn cyfrannu at ac yn datrys problemau mewn cyd-destunau byd go iawn a haniaethol.
• Nodi cyfrifoldebau'r cemegydd o fewn perthnasoedd proffesiynol cydweithredol.

Sgiliau Trosglwyddadwy/Allweddol:

• Arddangos menter trwy strwythuro a rheoli amser tasg ymchwiliol, gan weithio mewn timau pan fo hynny'n briodol.
• Astudio'n greadigol, yn annibynnol, ac yn fyfyriol, gan gymhwyso gwybodaeth a sgiliau i heriau neu gyd-destunau ehangach.
• Arddangos llythrennedd digidol wrth werthuso, dadansoddi ac asesu gwybodaeth mewn cyd-destunau cysylltiedig.
• Datblygu ymwybyddiaeth o'ch cryfderau a'ch gwendidau gan ddefnyddio arweiniad/adborth i ddatblygu strategaethau ar gyfer dysgu gydag ymreolaeth sy'n dod i'r amlwg.