Biocemeg gyda Blwyddyn Hyfforddiant Proffesiynol (BSc)

Addysgir y rhaglen astudio gan academyddion a gydnabyddir yn rhyngwladol fel arbenigwyr ym meysydd biocemeg, bioleg foleciwlaidd, bio- a nanotechnoleg, biowybodeg a pheirianneg protein. Mae ein dull addysgu wedi’i lywio gan yr ymchwil ddiweddaraf ac mae wedi’i gyfeirio gan arferion presennol y diwydiant, gan sicrhau bod y cwricwlwm yn academaidd drylwyr ac yn berthnasol i ofynion proffesiynol. Mae aelodau'r staff yn integreiddio eu hymchwil a'u profiad diwydiant i'r cwricwlwm, gan gynnig cipolwg uniongyrchol ar y datblygiadau diweddaraf mewn bioleg synthetig, ffarmacoleg a chemeg ddadansoddol.

Mae'r cwricwlwm yn cyfuno gwybodaeth ddamcaniaethol â chymhwysiad ymarferol. Mae darlithoedd, a ategir gan sesiynau ymarferol, yn rhoi sylfaen gref i chi mewn theori ac ymarfer, tra bod seminarau, gweithdai a thiwtorialau yn eich helpu i gymhwyso’r hyn rydych wedi’i ddysgu. Mae'r fformatau rhyngweithiol hyn yn cefnogi prosiectau ymarferol a thrafodaethau manwl, fel y gallwch fynd i'r afael â heriau'r byd go iawn a gwella eich parodrwydd proffesiynol.

Mae integreiddio ymchwil yn elfen allweddol o’n addysgu. Byddwch yn ymwneud â’r data diweddaraf, astudiaethau achos perthnasol, a’r canfyddiadau ymchwil diweddaraf, gan gysylltu theori academaidd â materion ymarferol. Mae dysgu ymarferol yn ganolbwynt i'r rhaglen, gan roi'r cyfle i chi ddatblygu sgiliau ymarferol mewn cyd-destunau realistig. Trwy brosiectau tîm ac ymchwil unigol, byddwch yn cymhwyso technegau gwyddor data soffistigedig i heriau dadansoddol cymhlethdodau byd-eang. Bydd eich lleoliad Blwyddyn Hyfforddiant Proffesiynol yn gwella'r cyfleoedd hyn ymhellach trwy eich galluogi i ryngweithio mewn amgylchedd gwaith proffesiynol, gan weithio mewn timau a gyda grwpiau cydweithredol.

Sut y caf fy nghefnogi?

Rydym am sicrhau eich bod yn cael y profiad gorau drwy gydol eich amser gyda ni a byddwch yn elwa o ystod o gefnogaeth. O’r cychwyn cyntaf, byddwch yn derbyn gofal tiwtor personol a fydd yn brif bwynt cyswllt i chi, gan gynnig arweiniad cyfrinachol ar faterion academaidd a phersonol. Byddant yn eich helpu i weithio trwy'ch astudiaethau ac yn ffynhonnell gyson o gefnogaeth trwy gydol eich gradd, gan gynnwys eich lleolaid Blwyddyn Hyfforddiant Proffesiynol.

O ran cymorth academaidd, y porth dysgu ar-lein a ddefnyddiwn yw Dysgu Canolog.

Mae'r Brifysgol yn darparu ystod eang o wasanaethau cymorth i fyfyrwyr. Gall hyn gynnwys gweithdai sgiliau astudio, sesiynau cyfarwyddyd gyrfa, cymorth iechyd meddwl a lles, a gwasanaethau anabledd. Mae'r gwasanaethau hyn wedi'u cynllunio i sicrhau eich bod yn teimlo bod gennych gefnogaeth a'ch grymuso i lwyddo.

Byddwch hefyd yn cael mynediad at gefnogaeth ragorol yn ein Canolfan Bywyd Myfyrwyr, sef ein both un-stop ar gyfer eich holl anghenion myfyrwyr. P’un a ydych yn chwilio am gyngor ar iechyd a lles, paratoi ar gyfer eich dyfodol, rheoli arian neu fyw yng Nghaerdydd, bydd ein staff cymorth arbenigol ac ymroddedig wrth law i’ch cefnogi. Rydyn ni yma i'ch helpu chi i lwyddo a gwneud y gorau o'ch bywyd myfyriwr.

Adborth

Drwy gydol y rhaglen, bydd gennych nifer o gyfleoedd i dderbyn adborth a chymryd mantais ohono yn ystod sesiynau adborth pwrpasol. Mae gweithgareddau fel asesiadau cymheiriaid, a hunanasesiadau yn rhan annatod o'r broses hon. Yn ogystal, byddwch yn derbyn adborth adeiladol gan ein staff addysgu, gan ddarparu mewnwelediadau i helpu eich twf proffesiynol, i baratoi ar gyfer eich gyrfa yn y dyfodol. Yn ystod eich lleoliad Blwyddyn Hyfforddiant Proffesiynol bydd adborth anffurfiol parhaus gan oruchwyliwr eich lleoliad; rhoddir adborth ffurfiol trwy drafodaeth canol-lleoliad gyda'ch goruchwyliwr lleoliad a'ch Tiwtor Personol.

Sut caf fy asesu?

Mae natur yr asesiadau yn amrywio fesul modiwl ac yn cynnwys gwaith cwrs, prosiectau portffolio, asesiadau ysgrifenedig, profion dosbarth, cyflwyniadau llafar a phoster, a phrosiectau ymarferol. Mae pob modiwl a lleoliad yn defnyddio mathau penodol o asesiadau i werthuso gwybodaeth ddamcaniaethol a sgiliau ymarferol yn effeithiol.

Defnyddir asesiadau trwy gydol y rhaglen i wella dysgu er mwyn sicrhau eich bod yn deall cysyniadau sylfaenol. Bydd asesiadau’n cefnogi dysgu annibynnol a gydol oes, ac wedi’u cynllunio i roi myfyrwyr wrth galon y broses ddysgu ac i helpu myfyrwyr i gymryd perchnogaeth dros eu dysgu eu hunain. Bydd myfyrwyr yn cael eu cefnogi yn eu hasesiadau gan aelodau o dimau modiwl a thiwtoriaid personol.

Pa sgiliau bydda i'n eu hymarfer a'u datblygu?

Drwy gydol y cwrs, bydd myfyrwyr yn datblygu cymwyseddau gwyddonol yn ogystal â 'sgiliau cyflogadwyedd' allweddol trosglwyddadwy a fydd yn amhrisiadwy beth bynnag fo eich dewis gyrfa yn y dyfodol. Mae’r rhain yn cynnwys:

• dysgu annibynnol ac astudio hunangyfeiriedig;
• casglu, trefnu a dadansoddi gwybodaeth i greu dadleuon rhesymegol ac argyhoeddiadol;
• meddwl yn feirniadol a datrys problemau;
• cyfathrebu syniadau cymhleth mewn ffordd eglur ac effeithiol (gan ddefnyddio'r holl gyfryngau);
• gweithio'n effeithiol mewn tîm ac yn unigol;
• cymwyseddau TG, gan gynnwys pecynnau cyflwyno, graffeg ac ystadegau;
• perfformio a dehongli dadansoddiadau ystadegol o ddata;
• rheoli amser yn effeithiol a sgiliau trefnu.

O ganlyniad i ymgysylltu’n llawn â’r cwrs hwn, dylech allu gwneud y canlynol:

• dadansoddi, cyfosod a chrynhoi gwybodaeth o amryw o ffynonellau;
• trafod y berthynas rhwng strwythur/ffurfiant a swyddogaeth/rheoliad moleciwlau, organelau, celloedd, meinweoedd, organebau a phoblogaethau;
• cyfathrebu gwybodaeth wyddonol, a gwybodaeth arall, yn effeithiol i amrywiaeth o gynulleidfaoedd, gan gynnwys y cyhoedd yn gyffredinol, gan ddefnyddio amrywiaeth o fformatau a dulliau;
• trafod materion cyfredol mewn perthynas ag ymchwil, ymchwiliadau a/neu ddadleuon;
• cyfosod dadl neu farn, yn seiliedig ar dystiolaeth a data cadarn;
• pennu dilysrwydd a chywirdeb canlyniadau ystadegol;
• adeiladu ar wybodaeth a dealltwriaeth o rôl ac effaith eiddo deallusol (IP) mewn amgylchedd ymchwil;
• gweithio'n effeithiol mewn amgylchedd sy'n seiliedig ar grŵp, fel arweinydd ac aelod o dîm;
• dangos y sgiliau angenrheidiol ar gyfer dysgu gydol oes annibynnol (er enghraifft sgiliau trosglwyddadwy gweithio'n annibynnol, rheoli amser, trefnu, menter a gwybodaeth);
• nodi targedau, a gweithio tuag at y targedau ar gyfer datblygiad personol, datblygiad proffesiynol, datblygiad academaidd a datblygiad gyrfa;
• arddangos sgiliau cynllunio ac arweinyddiaeth ar gyfer gosod, a bodloni, nodau cyraeddadwy yn y gweithle.