Bancio a Chyllid (BSc)

Addysgir pob modiwl gan ymchwilwyr gweithredol yn eich maes astudio. Golyga hyn nid yn unig bod eich darlithwyr yn arbenigwyr pwnc, ond hefyd bod cynnwys y modiwl yn cael ei lywio gan y datblygiadau diweddaraf yn y maes. Byddwch yn gweld sgiliau meddwl a thechnegau o’r radd flaenaf, wedi’u cyfuno ag enghreifftiau cyfoes o bob rhan o’r byd sy’n dod â’r ddamcaniaeth yn fyw.

Mae'r rhan fwyaf o fodiwlau'n defnyddio dull cyfunol, gan ddarparu dwy awr o ddarlithoedd neu sesiynau enghreifftiol bob wythnos ochr yn ochr â thiwtorialau grŵp bach wythnosol neu bythefnosol. Ategir y rhain gan lu o weithgareddau astudio annibynnol ar-lein (fideos, aseiniadau, byrddau trafod, darllen ac ati). Bydd gofyn i chi fynychu pob elfen bersonol a disgwylir i chi reoli eich amser yn effeithiol i gwblhau'r holl waith a neilltuwyd. Mae technoleg hefyd yn dod i mewn i'r ystafell ddosbarth, gyda pholau ar-lein a mathau eraill o ryngweithio yn gyffredin hyd yn oed mewn darlithoedd mawr.

O'r flwyddyn gyntaf ymlaen, bydd sesiynau'n cael eu haddysgu yn ein hystafell fasnachu â 65 terfynell. Yma, cewch gyfle i ymgysylltu â'r un feddalwedd a ddefnyddir yn y sector ariannol a hyd yn oed ddysgu sut i reoli eich portffolio rhithwir eich hun o asedau ariannol.

Bydd rhai gweithgareddau dysgu yn digwydd mewn labordai cyfrifiadurol, wrth i chi fynd i’r afael â meddalwedd a ddefnyddir yn eang fel Excel (y mae cyflogwyr yn gyson yn gosod premiwm uchel arno) a phecynnau mwy technegol seiliedig ar godio fel R.

Sut y caf fy nghefnogi?

Neilltuir tiwtor personol i bob myfyriwr, sydd ar gael ar gyfer cymorth bugeiliol ac i'ch cyfeirio at y timau cymorth arbenigol niferus yn yr Ysgol Busnes a'r Brifysgol. Mae'r rhain yn amrywio o gwnsela neu gyngor ariannol i gymorth anabledd neu help gyda fisa. Byddwch hefyd yn cyfarfod â chyfarwyddwr eich rhaglen yn ystod y cyfnod sefydlu – aelod o staff academaidd sydd â chyfrifoldeb cyffredinol am y radd BSc Bancio a Chyllid – sydd bob amser ar gael i ateb eich ymholiadau.

Mae gan yr Ysgol Busnes sawl tîm arbenigol ar y safle. Gall ein swyddog cymorth myfyrwyr eich helpu gydag amrywiaeth o faterion, o ymholiadau am ffioedd a benthyciadau myfyrwyr i gymorth emosiynol. Mae ein Parth Cyfleoedd yn gartref i’n timau gyrfaoedd a lleoliadau arobryn, sydd wrth law i gynnig cyngor arbenigol i’ch helpu i gael swydd ddelfrydol.

Mae'r rhaglen yn rhoi pwyslais cryf ar gefnogi eich astudiaethau. Mae tiwtorialau grŵp bach wythnosol neu bythefnosol wedi’u cynllunio i fod yn rhyngweithiol, gan roi digon o gyfle i drafod eich gwaith gyda’ch tiwtor dosbarth a’ch cyfoedion. Mae pob darlithydd modiwl hefyd yn cynnal oriau swyddfa wythnosol. Yn ystod y cyfnod hwn, gallwch ymweld â'u swyddfa heb apwyntiad i gael arweiniad a chyngor un-i-un.

Drwy gydol eich amser gyda ni, byddwch yn cael y cyfle i gyflwyno eich atebion aseiniad ar gyfer adborth drwy ein amgylchedd dysgu rhithiol: Dysgu Canolog. Bydd adborth bob amser yn cyd-fynd â'r meini prawf marcio modiwl a'r canlyniadau dysgu, gan bwysleisio sut y gallwch wella'ch gwaith yn y dyfodol a darparu cyngor defnyddiol wrth i chi baratoi i gyflwyno gwaith cwrs ffurfiol neu sefyll arholiadau.

Sut caf fy asesu?

Mae'r rhaglen BSc Bancio a Chyllid yn defnyddio ystod amrywiol o asesu. Mae gan bob modiwl elfen o waith cwrs, sy'n eich galluogi i ymchwilio'n fanylach i agweddau ar gynnwys y modiwl. Mae llawer o'r gwaith cwrs yn adlewyrchu'r mathau o weithgareddau y mae bancwyr proffesiynol, arianwyr ac economegwyr yn ymgymryd â nhw. Bydd rhai modiwlau yn gofyn i chi gynhyrchu briffiau byr gyda therfynau amser o 24 neu 48 awr, gan adlewyrchu'r hyn sy'n digwydd pan ddaw cais brys i mewn gan gleient neu uwch reolwr. Bydd gan eraill brosiectau tymor hwy, gydag elfennau o waith grŵp, codio cyfrifiadurol, efelychiadau masnachu, cyflwyniadau a/neu adroddiadau terfynol. Bydd rhai modiwlau yn eich galluogi i ddangos eich creadigrwydd, gan gynhyrchu fideos cryno sy'n gyffredin mewn meysydd fel newyddiaduraeth ariannol. Defnyddir dulliau asesu mwy traddodiadol, megis arholiadau a thraethodau academaidd hefyd lle bo'n briodol.

Rydym yn deall bod gwneud yn dda mewn asesiadau yn bwysig i'n myfyrwyr. Am y rheswm hwn, rydym wedi datblygu dewislen meini prawf marcio a ddefnyddir ar draws yr holl fodiwlau ac a ddarperir i chi ar y diwrnod cyntaf. Wedi'i gynllunio i fod yn dryloyw ac yn syml i'w ddilyn, bydd pob asesiad yn dewis sawl elfen o'r ddewislen i ddangos yn union beth fydd eich aseswr yn chwilio amdano.

Credwn fod gan hyn nifer o fanteision. Yn gyntaf, mae pob modiwl yn defnyddio dull cyson, gan sicrhau bod y marcio bob amser yn dryloyw ac yn deg. Yn ail, ac yn bwysicach fyth, trwy alinio'r adborth a gewch â'r meini prawf marcio, byddwch yn gallu trosglwyddo ei wersi ar unwaith i fodiwlau eraill lle defnyddir yr un maen prawf.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Deall ymddygiad, strwythur a strategaethau rheoli risg sefydliadau bancio a marchnadoedd ariannol. 
• Dangos gwybodaeth a dealltwriaeth systematig o'r amgylchedd rheoleiddiol a moesegol a'i effaith ar fanciau a marchnadoedd ariannol. 

Sgiliau Deallusol:

• Gwerthuso rhinweddau cymharol dadleuon, damcaniaethau, a thystiolaeth economaidd amgen yn ymwneud â bancio a chyllid. 
• Llunio argymhellion polisi bancio neu ariannol i gyflawni amcan penodol, wedi'i lywio gan ddadansoddiad economaidd priodol. 
• Dadansoddi ymddygiad banciau a marchnadoedd ariannol mewn perthynas â'r llywodraeth, fframweithiau rheoleiddio a pholisi banc canolog trwy gyfuno damcaniaethau economaidd priodol, a dulliau mathemategol ac econometrig.
• Egluro canlyniadau dadansoddiad economaidd trwy gyfuno dadl eiriol â chynrychioliad mathemategol, econometrig a graffigol.

Sgiliau Ymarferol Proffesiynol:

• Asesu ansawdd a pherthnasedd tystiolaeth wahanol wrth fynd i'r afael â phroblemau mewn bancio a chyllid. 
• Symleiddio materion cymhleth yn ymwneud â bancio a chyllid er mwyn galluogi defnydd ystyrlon o offer economeg. 
• Defnyddio meddalwedd technegol priodol i gynnal dadansoddiad ariannol. 
• Cyfleu canlyniadau dadansoddiad ariannol i gynulleidfaoedd arbenigol ac anarbenigol mewn ffordd sy'n cael effaith. 
• Cymhwyso rhesymu economaidd priodol i gynorthwyo gwneud penderfyniadau mewn cyd-destun proffesiynol a/neu fusnes. 

Sgiliau Trosglwyddadwy/Allweddol:

• Datrys problemau a ddiffinnir yn fras mewn cydweithrediad ag eraill. 
• Gweithio'n annibynnol i ddatrys problemau a ddiffinnir yn fras.