Astudiaethau Pensaernïol (BSc)

Wrth galon eich profiad yn Ysgol Pensaernïaeth Cymru fydd y gwaith prosiect dylunio, sy’n greiddiol i ymarfer pensaernïaeth. Mae’r gwaith prosiect dylunio yn cael ei wneud yn ein stiwdios dylunio ffisegol pwrpasol; yma gallwch weithio gyda'ch cyd-fyfyrwyr, rhannu syniadau a rhoi cymorth i'ch gilydd.  Bydd eich astudiaethau'n cael eu llywio gan gysylltiad ag ymarferwyr addysgu ac ymchwilwyr sy’n arwain y byd ac a fydd, trwy diwtorialau wythnosol, yn eich annog i ddatblygu dulliau creadigol newydd o ddylunio. Byddwch yn cael eich annog i arbrofi gyda dyluniadau, i gymryd risgiau creadigol ac i ehangu eich meddwl. 

Yn ogystal ag astudio annibynnol, bydd darlithoedd yn archwilio'r materion cyd-destunol sy'n llywio gwaith prosiect dylunio. Bydd tiwtorialau ac ymgyngoriadau unigol a grwpiau bach yn darparu adborth a blaenborth ar eich gwaith. Mae teithiau maes ac ymweliadau safle yn rhoi cyfle i chi brofi pensaernïaeth, lleoedd a gofodau yn uniongyrchol, ac i ddadansoddi cyd-destunau, diwylliannau a chymunedau i lywio eich astudiaethau dylunio.

Sut y caf fy nghefnogi?

Byddwch yn cael eich cefnogi mewn nifer o ffyrdd trwy gydol eich profiad dysgu.  Rydym yn cynnal cyfarfodydd blwyddyn rheolaidd fel y gallwch chi a gweddill eich carfan drafod materion blwyddyn gyfan, ac fel y gallwn ninnau wrando ac ymateb i'ch adborth. Darperir cymorth ar lefel y modiwlau gan arweinwyr y modiwlau, a darperir cymorth ar gyfer prosiectau dylunio a thraethodau hir gan Diwtor Dylunio.

Byddwch yn cyfarfod â’ch Tiwtor Personol yn rheolaidd i fyfyrio ar eich cynnydd a’ch datblygiad, ac mae gan y Brifysgol hefyd wasanaeth mentora dan arweiniad myfyrwyr i’ch cefnogi trwy eich astudiaethau. 

Bydd gennych fynediad i holl ddeunyddiau'r cwrs, gan gynnwys recordiadau o ddarlithoedd, taflenni, manylion yr holl asesiadau, meini prawf asesu a dolenni i adnoddau digidol, a hynny trwy Amgylchedd Dysgu Rhithwir Prifysgol Caerdydd.

Y tu hwnt i’r Ysgol, mae’r Brifysgol yn cynnig amrywiaeth o wasanaethau i’ch helpu i gynllunio eich gyrfa, ac yn cynnal digwyddiadau i’ch helpu i reoli eich iechyd emosiynol, meddyliol a chorfforol, ynghyd ag i ddarparu cymorth gyda materion ariannol, a chymorth i fyfyrwyr ag anableddau.

Sut caf fy asesu?

Byddwch yn profi ystod o ddulliau asesu gwahanol a fydd yn eich galluogi i amlygu eich dysgu ar draws y pwnc a chael adborth gwerthfawr y gellir ei gymhwyso i ddysgu yn y dyfodol. 

Fel yn achos pynciau creadigol eraill, bydd llawer o'r asesu yn digwydd trwy gyfrwng eich gwaith cwrs. Gall y gwaith cwrs fod yn bwnc-benodol, megis adroddiad technegol, neu’n bortffolio o astudiaethau wedi'u coladu o un pwnc neu ragor. Trwy eich portffolio dylunio byddwch yn arddangos eich gwaith prosiect yn y stiwdio ac yn cynnwys tystiolaeth o ddysgu ar draws yr ystod o fodiwlau y byddwch wedi'u hastudio. Mae Adolygiadau o Brosiectau Dylunio, lle byddwch yn cyflwyno eich gwaith prosiect i banel o adolygwyr, yn darparu adborth gwerthfawr i lywio eich gwaith prosiect.  Bydd portffolios myfyriol yn asesu dirnadaeth bersonol mewn perthynas â gwybodaeth, arsylwi a phrofiadau ar draws pynciau a'r ddisgyblaeth. 

Pa sgiliau bydda i'n eu hymarfer a'u datblygu?

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

GD 1 Dehongli ac esblygu briffiau dylunio a chynigion dilynol mewn ymateb i wybodaeth am safleoedd, cymunedau, hanes, technoleg, pobl a defnyddwyr, ynghyd ag arsylwadau arnynt a deongliadau ohonynt.

GD 2 Deall ac integreiddio amrywiaeth o systemau, cydosodiadau a dulliau codi adeiladau cynaliadwy, gan gynnwys adeiladweithiau a deunyddiau, i gynigion dylunio pensaernïol a threfol.

GD 3 Cyflwyno ymatebion priodol i anghenion safleoedd a deiliaid, a hynny trwy wasanaethau a thechnolegau cynaliadwy i leihau’r effaith ar yr amgylchedd.

GD 4 Cyfuno egwyddorion ffiseg adeiladu a pherfformiad o fewn cyd-destun cysur amgylcheddol, modelu ynni a golau dydd, a dadansoddi cylch bywyd.

GD 5 Gwerthuso'n feirniadol a chyfuno gwybodaeth am draddodiadau, symudiadau, arddulliau a damcaniaethau hanesyddol a diwylliannol ym maes pensaernïaeth, a chelfyddydau cysylltiedig.

Sgiliau Deallusol:

SD 1 Cysylltu a chymhwyso dulliau a thechnegau priodol o ddadansoddi a dehongli mewn perthynas â hanes a damcaniaethau dylunio pensaernïol. 

SD 2 Mynd ati, trwy brosesau ailadroddol, i ffurfio cysyniadau a strategaethau dylunio sy’n seiliedig ar ddealltwriaeth drylwyr o nifer o gyd-destunau ac ysbrydoliaethau.

SD 3 Wrth ddatblygu syniadau pensaernïol, mynd ati i ddadansoddi paramedrau damcaniaethol, ffisegol, cymdeithasol ac amgylcheddol dylunio pensaernïol, paramedrau sy'n aml yn gwrth-ddweud ei gilydd, a myfyrio arnynt.

SD 4 Mynd ati’n feirniadol i asesu cynigion dylunio a safleoedd o ran y modd y maent yn dylanwadu ar lesiant y preswylwyr, y gofynion o ran yr amgylchedd, yr hinsawdd a bioamrywiaeth, y gwaith adeiladu, a diogelwch rhag tân/diogelwch bywyd.

SD 5 Cynnig ac amddiffyn priodweddau gofodol, arbrofol a chyfansoddol cynigion dylunio fel y bônt yn briodol i ddefnyddwyr adeiladau a chymdeithas yn ehangach.

Sgiliau Ymarferol Proffesiynol:

SYP 1 Llunio cynigion dylunio pensaernïol a threfol cymhleth sydd wedi’u datrys yn dda ac sy’n ymateb i gyd-destunau cymdeithasol, diwylliannol, amgylcheddol ac economaidd-gymdeithasol amrywiol.

SYP 2 Mynd ati'n feirniadol i werthuso a defnyddio dulliau dadansoddi ac ymchwilio priodol i ddatblygu dadleuon, damcaniaethau a phenderfyniadau dylunio rhesymegol.

SYP 3 Dewis ac integreiddio technegau ac offer cynrychioliadol a chyflwyniadol mewn modd systematig, a hynny’n gyson â chonfensiynau proffesiynol mewn gwaith dylunio, gwaith ysgrifenedig, modelu a thechnoleg.

SYP 4 Nodi cyfrifoldebau moesegol a hanfodion ymarfer, gan gynnwys rôl y pensaer mewn perthnasoedd proffesiynol cydweithredol ac o ran prosesau economaidd, cyfreithiol a rheoleiddiol.

Sgiliau Trosglwyddadwy/Allweddol:

SA 1 Mewn perthynas ag uchelgeisiau gyrfa, datblygu safbwynt personol ar ddylunio mewn cyd-destunau moesegol a phroffesiynol.

SA 2 Nodi a chymhwyso technegau myfyrio sy'n llywio perfformiad unigol a chydweithredol a dysgu mewn sefyllfaoedd cymhleth ac anrhagweladwy.

SA 3 Ymarfer amrywiaeth o sgiliau cyflogadwyedd trosglwyddadwy, gan gynnwys: gweithio ar y cyd ac yn annibynnol; rheoli amser; meddwl mewn modd dadansoddol a rhesymegol ac wysg eich ochr i fynd i'r afael â phroblemau cymhleth; a gwrando ar farn eraill, ei pharchu a chyfrannu ati.

SA 4 Cymhwyso ystod o ddulliau a chyfryngau cyfathrebu effeithiol a phriodol wrth gyflwyno cynigion dylunio, ymchwil, damcaniaethau, syniadau a phenderfyniadau.