Archaeoleg a Hanes yr Henfyd (BA)

Rydym yn defnyddio amrywiaeth o ddulliau addysgu, gan gynnwys darlithoedd, seminarau, dosbarthiadau datrys problemau gweithredol, sesiynau ymarferol, teithiau maes, a thiwtorialau un-i-un. Byddwch hefyd yn ymgymryd ag astudiaeth a gwaith ymchwil annibynnol, dan arweiniad tiwtoriaid neu ar eich pen eich hun.

Mae darlithoedd yn darparu trosolwg o gysyniadau a fframweithiau allweddol pwnc, gan eich paratoi chi ar gyfer ymgymryd â gwaith ymchwil annibynnol a datblygu eich syniadau eich hun ar gyfer y seminarau, dosbarthiadau gweithredol ac asesiadau. Efallai y bydd y deunyddiau hyn yn cael eu dosbarthu i chi wyneb yn wyneb neu eu darparu ar ffurf electronig fel y gallwch eu hastudio ar eich cyflymder a'ch hwylustod eich hun.

Mae seminarau a dosbarthiadau datrys problemau gweithredol yn darparu amgylchedd deinamig lle gallwch archwilio'r syniadau a'r dadleuon a amlinellir mewn darlithoedd. Mae'r sesiynau hyn fel arfer yn cynnwys grŵp o fyfyrwyr ac arweinydd y grŵp (aelod o'r tîm addysgu). Gall eu ffurf amrywio, gan gynnwys trafodaeth grŵp sy’n cynnwys pawb, gwaith mewn grwpiau bach a chyflwyniadau sy’n cael eu harwain gan y myfyrwyr. Maen nhw’n cynnig cyfle buddiol i ddadlau ac i ymgymryd yn feirniadol â’r prif syniadau a deunydd darllen, ac i ymchwilio i feysydd o ddiddordeb arbennig gydag arbenigwr yn y maes.

Hyrwyddir sgiliau archaeolegol trwy ystod o sesiynau ymarferol a chymryd rhan mewn prosiectau gwaith maes yn uniongyrchol, gan gynnwys cloddio, arolygon, rhaglenni ôl-gloddio a phrosiectau curadurol mewn amgueddfeydd.

Wrth astudio ar gyfer gradd yn y Dyniaethau, byddwch yn ymgymryd ag astudiaeth hunangyfeiriedig, gan ddefnyddio llyfrgelloedd, archifau ffisegol a digidol a chasgliadau o dystiolaeth. Byddwch yn cael eich cefnogi yn hyn o beth ac yn dysgu i ddod yn fyfyriwr annibynnol hyderus yn ystod eich gradd.

Sut y caf fy nghefnogi?

Byddwch yn cael cymorth gan nifer o staff gwahanol, rhai yn canolbwyntio ar berfformiad academaidd mewn maes penodol a rhai’n rhoi sylw i ddysgu a chynnydd mewn ffordd fwy cyfannol.

Dyrennir tiwtor personol i chi fydd yn eich tywys trwy gydol cyfnod eich astudiaethau. Byddwch yn cwrdd â'ch tiwtor personol yn rheolaidd i fyfyrio ar eich cynnydd a'ch datblygiad ar draws eich astudiaethau. Gall eich tiwtor personol hefyd eich cyfeirio at gymorth priodol os byddwch yn cael anawsterau neu os bydd angen gwybodaeth benodol arnoch am eich amser ym Mhrifysgol Caerdydd.

Darperir cefnogaeth ychwanegol benodol i’r modiwl gan diwtoriaid seminarau, darlithwyr a/neu gynullwyr modiwlau. Darperir cefnogaeth ar gyfer prosiectau a’r traethawd hir gan oruchwyliwr academaidd a fydd yn cwrdd â chi’n rheolaidd.

Mae'r holl fodiwlau'n defnyddio Amgylchedd Dysgu Rhithwir Prifysgol Caerdydd, lle byddwch yn gallu cael mynediad at holl ddeunyddiau'r cwrs, gan gynnwys recordiadau darlithoedd, taflenni, manylion yr holl asesiadau, meini prawf asesu a dolenni i adnoddau digidol, gan gynnwys y deunyddiau llyfrgell sydd ar gael yn electronig fformat.

Mae ein Tîm Cefnogi Addysgu i israddedigion yn cynnig cymorth academaidd a chefnogi myfyrwyr, gan roi gwybodaeth ac arweiniad mewn ymateb i unrhyw ymholiadau a allai fod gyda chi.

Y tu hwnt i’r Ysgol, mae’r Brifysgol yn cynnig amrywiaeth o wasanaethau gan gynnwys Dyfodol Myfyrwyr i’ch helpu i gynllunio eich gyrfa, gwasanaethau cymorth, a digwyddiadau i’ch helpu i reoli eich iechyd emosiynol, meddyliol a chorfforol, cymorth gyda materion ariannol a chymorth i fyfyrwyr ag anableddau.

Sut caf fy asesu?

Byddwch yn dod ar draws ystod o asesiadau gwahanol yn ystod eich astudiaeth, gan gynnwys traethodau, ymarferion dadansoddi ffynonellau, arholiadau, cyflwyniadau, prosiectau creadigol a gwaith ymarferol, ynghyd ag asesiadau eraill a fydd yn eich galluogi i ddangos hyblygrwydd a dod yn gyfarwydd â gwahanol lwyfannau digidol megis blogiau, fideo-flogiau a chyfryngau cymdeithasol, ysgrifennu mewn fformatau gwahanol ar gyfer cynulleidfaoedd arbenigol ac anarbenigol, a thasgau proffesiynol megis ysgrifennu adroddiadau neu gynigion yn y byd academaidd a'r byd gwaith ehangach.

Diben ein hasesiadau yw eich helpu i gasglu syniadau, meithrin sgiliau a datblygu galluoedd. Maent yn eich annog i fod yn arloesol ac yn greadigol, i ddod o hyd i ffyrdd newydd o fynd i'r afael â phroblemau neu ofyn cwestiynau, i gydweithio i ddatrys problemau a chyflwyno canfyddiadau, ac i gyflwyno dadleuon sy'n seiliedig ar dystiolaeth. Bydd y sgiliau sydd wedi’u meithrin a’u hasesu yn ystod y rhaglen yn eich paratoi ar gyfer amryw yrfaoedd.

Darperir adborth ysgrifenedig unigol ar yr holl waith a asesir i'ch helpu i wella perfformiad mewn asesiadau yn y dyfodol, a byddwch yn cael cyfleoedd i drafod yr adborth hwn gyda'r tiwtoriaid. Yn ogystal, byddwch yn gwneud ymarferion ymarfer amrywiol, megis cyflwyniadau a chynlluniau traethawd neu brosiect, a darperir adborth ffurfiannol mewn dosbarthiadau a thiwtorialau i'ch helpu i wella'ch dysgu a'ch dealltwriaeth cyn i chi gwblhau eich asesiadau crynodol. 

Pa sgiliau bydda i'n eu hymarfer a'u datblygu?

Mae Deilliannau Dysgu’r rhaglen hon yn disgrifio'r hyn y byddwch chi’n gallu ei wneud o ganlyniad i astudio ym Mhrifysgol Caerdydd. Byddan nhw’n eich helpu i ddeall yr hyn mae disgwyl ichi ei wneud. 

Mae deilliannau dysgu’r rhaglen hon isod:

Gwybod a deall:

Erbyn diwedd y rhaglen, byddwch chi’n gallu:

GD1: Dadansoddi'n feirniadol ystod eang o gymdeithasau a diwylliannau hynafol trwy dynnu ar ystod ryngddisgyblaethol o ddeunyddiau ac ymagweddau.

GD2: Dadansoddi a gwerthuso'n feirniadol ystod eang o ddeunydd ffynhonnell sylfaenol, gan gynnwys tystiolaeth lenyddol, ddogfennol, epigraffig, weledol ac archaeolegol.

GD3: Gwerthuso'n feirniadol a defnyddio ystod o ddamcaniaethau, ymagweddau a dulliau ar gyfer astudio archaeoleg a hanes yr henfyd.

GD4: Gwerthuso a beirniadu'n feirniadol ddehongliadau modern gwahanol o'r gorffennol.

GD5: Dadansoddi'n feirniadol ddadleuon ynghylch lle archaeoleg a hanes yr henfyd mewn cymdeithas a gwleidyddiaeth gyfoes.

GD6: Asesu ffyrdd y gall archaeoleg a hanes yr henfyd gyfrannu at ein dealltwriaeth o ddatblygiadau diwylliannol, amgylcheddol a chymdeithasol yn y gorffennol a'r presennol.

Sgiliau Deallusol:

Erbyn diwedd y rhaglen, byddwch chi’n gallu:

SD1: Nodi a dadansoddi’n feirniadol batrymau newid hanesyddol neu archaeolegol a dod o hyd i archwiliadau manwl o themâu, penodau a digwyddiadau penodol ynddynt.

SD2: Gwerthuso'n feirniadol ddadleuon archaeolegol a hanesyddol a'u lleoli yn natblygiad y ddwy ddisgyblaeth.

SD3: Diffinio problemau a chwestiynau hanesyddol neu archaeolegol cymhleth, a nodi damcaniaethau, dulliau a thystiolaeth briodol i fynd i'r afael â nhw.

SD4: Llunio a chyfiawnhau dadleuon a chasgliadau annibynnol yn seiliedig ar ddadansoddiad beirniadol o dystiolaeth anghyflawn.

Sgiliau Ymarferol Proffesiynol:

Erbyn diwedd y rhaglen, byddwch chi’n gallu:

SY1: Helpu i adnabod, archwilio a chofnodi safleoedd archaeolegol.

SY2: Defnyddio sgiliau archaeolegol mewn sefyllfa broffesiynol.

SY3: Paratoi allbynnau proffesiynol o ansawdd ar gyfer amrywiaeth o gynulleidfaoedd yn y sector treftadaeth sy'n ymwneud â chanfyddiadau ymchwil archaeolegol.

SY4: Defnyddio ystod o adnoddau gwybodaeth a chronfeydd data i ddod o hyd i ddeunydd ffynhonnell sylfaenol.

SY5: Cymryd rhan mewn ymchwil i leoli a dewis ysgolheictod modern priodol.

SY6: Dylunio, cyflawni a chyflwyno darn sylweddol o ymchwil annibynnol sy'n cyfuno dwy ddisgyblaeth.

Erbyn diwedd y rhaglen, byddwch chi’n gallu:

ST1: Datrys problemau cymhleth trwy ddefnyddio gwybodaeth a sgiliau rhyngddisgyblaethol i fynd i'r afael â phroblemau cyfarwydd ac anghyfarwydd.

ST2: Defnyddio sgiliau meddwl yn feirniadol a rhesymu i ddadansoddi a gwerthuso tystiolaeth a syniadau amrywiol.

ST3: Cymhathu a chyfosod gwybodaeth a syniadau cymhleth o ddwy ddisgyblaeth wahanol.

ST4: Cyfleu gwybodaeth a dadleuon cymhleth ac amrywiol i amrywiaeth o gynulleidfaoedd ac mewn amrywiaeth o gyfryngau, yn ysgrifenedig ac ar lafar.

ST5: Defnyddio amrywiaeth o sgiliau cyflogadwyedd a menter, megis creadigrwydd, menter, trefnu, rheoli amser, gweithio'n annibynnol a gweithio mewn tîm, a'r defnydd o dechnoleg gwybodaeth.

ST6: Cydymffurfio â deddfwriaeth iechyd a diogelwch a safonau proffesiynol mewn ystod o leoliadau archaeolegol a threftadaeth.