Y Gyfraith gyda'r Gymraeg (LLB)

Mae arddull a fformat yr addysgu ar y rhaglen yn amrywiol, i adlewyrchu a darparu ar gyfer amrywiaeth o arddulliau dysgu, ac i'ch helpu i ddatblygu eich sgiliau dysgu annibynnol. Mae ein hymagwedd at addysgu yn meithrin cymuned ddysgu myfyrwyr, er mwyn i chi allu derbyn cefnogaeth gan gyd-fyfyrwyr a chydweithio â myfyrwyr eraill.  

Addysgir modiwlaugan dimau o ddarlithwyr gyda chymysgedd o brofiad academaidd a phroffesiynol fel eich bod yn elwa ar eu gwybodaeth o enghreifftiau a senarios bywyd go iawn cyfoes.  Bydd eich modiwlau Cymraeg hefyd yn cynnig cyfle ar gyfer gweithdai a dosbarthiadau iaith.

Ein nod yw sicrhau eich bod yn graddio gyda'r sgiliau hunanddibyniaeth, trosglwyddadwy cyfathrebu a chyfraith-benodol a fydd yn eich paratoi ar gyfer y dyfodol. Byddwn yn eich helpu i ddatblygu'r nodweddion hyn y tu allan i'r ystafell ddosbarth trwy ddarparu amrywiaeth o ddeunyddiau addysgu a dysgu a gweithgareddau y bydd angen i chi eu cyflawni yn eich amser eich hun naill ai'n unigol neu mewn grwpiau gyda myfyrwyr eraill.  

Mae ein haddysgu a'n dysgu wyneb yn wyneb yn bersonol yn cael eu cefnogi a'u hategu gan amrywiol offer digidol. Mae pob modiwl yn gwneud defnydd helaeth o Ddysgu Canolog, sef Amgylchedd Dysgu Rhithwir (VLE) y brifysgol. Ar Dysgu Canolog, fe welwch fforymau trafod, fideos wedi'u recordio ymlaen llaw, dolenni i adnoddau perthnasol ar y we, deunyddiau amlgyfrwng a deunyddiau cwrs.

Sut y caf fy nghefnogi?

Byddwch yn derbyn cefnogaeth fugeiliol bwrpasol drwy gyfrwng y Gymraeg drwy ein cynllun tiwtor personol yn y Gyfraith ac yn Ysgol y Gymraeg. Gall ein Tiwtor Cymorth Academaidd helpu gyda materion sy’n effeithio ar eich gallu i fynychu dosbarthiadau neu gwblhau asesiadau, ac mae Cynllun Mentora Myfyrwyr hefyd ar gael drwy’r brifysgol. 

Mae Swyddog Anabledd ac Amrywiaeth dynodedig yn sicrhau bod addasiadau rhesymol yn cael eu gwneud os byddwch yn datgan anabledd. Yn ogystal â hyn, mae gan y brifysgol ystod o wasanaethau i'ch cefnogi, gan gynnwys y Gwasanaeth Cwnsela, y Gwasanaeth Anabledd a Dyslecsia, a'r Gwasanaeth Cymorth i Fyfyrwyr.

Rydym yn cynnig rhaglen helaeth o gyngor ar yrfaoedd a gweithdai gydag Ymgynghorydd Gyrfaoedd y Gyfraith mewnol a Chydlynydd Cynllun Pro-bono, yn ogystal â gwasanaeth Dyfodol Myfyrwyr (gyrfaoedd) y brifysgol.

Adborth

Byddwch yn cael adborth rheolaidd ar eich cynnydd drwy gydol eich rhaglen. Ceir adborth amrywiol ee adborth ffurfiannol ar lafar yn ystod sesiynau grwpiau bach, mewn seminarau, a thiwtorialau. Mae adborth wedi'i gynllunio i'ch helpu i ddatblygu fel dysgwr ac academydd, fel y gallwch wella eich perfformiad mewn asesiadau crynodol yn y dyfodol. Yn ogystal ag oriau dosbarth rheolaidd, mae gan bob aelod o staff addysgu Oriau Cefnogi Myfyrwyr lle gallwch gwrdd a thrafod unrhyw ymholiadau dysgu sy'n codi o'r modiwl neu o'ch astudiaethau yn gyffredinol.

Bydd gennych fynediad i lyfrgell ffisegol y gyfraith ac ar-lein, gyda mynediad at ystod eang o ddeunyddiau sylfaenol ac eilaidd, gan gynnwys llyfrau, cyfnodolion, a chronfeydd data ar-lein ar gyfer cyrchu achosion, deddfwriaeth, a deunyddiau digidol eraill sy'n berthnasol i'ch astudiaethau.

Sut caf fy asesu?

Mae tasgau asesu yn amrywio o fodiwl i fodiwl i sicrhau eich bod yn datblygu ystod eang o sgiliau cyfreithiol, ieithyddol a throsglwyddadwy. Bydd y rhain yn cynnwys, ond heb fod yn gyfyngedig i, draethodau academaidd traddodiadol, dyddiadau myfyriol, neu lythyrau cyngor i gleientiaid damcaniaethol cwmni cyfreithiol. 

Bydd cyflwyniadau yn profi sgiliau eiriolaeth, fel petaech yn cyflwyno o flaen barnwr, tra bydd eraill wedi'u hanelu at fath gwahanol o gynulleidfa, megis cynulleidfa academaidd. 

Bydd asesiadau yn Ysgol y Gymraeg yn eich annog i fod yn arloesol a chreadigol, i feddwl yn feirniadol am iaith a llenyddiaeth a datblygu eich sgiliau cyfathrebu mewn ysgrifennu a lleferydd.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych. 

O gwblhau eich rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

GD 1 Dangos gwybodaeth systematig a dealltwriaeth o gysyniadau cyfreithiol sylfaenol

GD 2 Gwerthuso’n feirniadol gynnwys a chymhwysiad rheolau, egwyddorion a damcaniaethau cyfreithiol mewn amrywiaeth o gyd-destunau gwleidyddol, economaidd, cymdeithasol, diwylliannol a moesegol

GD 3 Dangos dealltwriaeth systematig o arwyddocâd cydlyniad athrawiaethol corff o statudau a/neu gyfraith achosion

GD 4 Archwilio’r potensial i gyfraith ar y lefelau datganoledig, DU, a rhyngwladol wrthsefyll newid neu drawsnewid.

GD5 Deall strwythurau, cofrestrau ac amrywiaethau Cymraeg a'u defnyddio'n hyblyg ac yn effeithiol at ddibenion cymdeithasol, academaidd a phroffesiynol, fel y bo'n briodol

GD6 Beirniadu datblygiad y Gymraeg a'i llenyddiaeth mewn cyfnodau hanesyddol gwahanol, o gyd-destun ieithyddol, llenyddol, a chymdeithasol

Sgiliau Deallusol(SD):

SD 1 Gwerthuso dadleuon cystadleuol yn feirniadol a gwneud dyfarniadau rhesymegol o fewn fframwaith moesegol priodol

SD 2 Ymgymryd ag ymchwil gyfreithiol sylfaenol gan nodi materion perthnasol gan ddefnyddio ffynonellau sylfaenol ac eilaidd perthnasol

SD 3 Dehongli a chymhwyso rheolau, egwyddorion a chysyniadau haniaethol cyfreithiol i sefyllfaoedd ffeithiol cymhleth i ddatrys problemau

SD 4 Dadansoddi’n feirniadol sut y crëir ystyron drwy iaith, a grym affeithiol iaith

SD 5 Datblygu ymatebion annibynnol ac arloesol i ddeunydd ieithyddol, llenyddol, beirniadol, diwylliannol a chreadigol yn ysgrifenedig ac ar lafar, ac ar gyfer cynulleidfaoedd gwahanol

SD 6 Gwerthuso’n feirniadol destunau, data cysyniadau, dadleuon a damcaniaethau sy’n berthnasol i gyd-destun yr iaith Gymraeg a llenyddiaeth Gymraeg, gan ddefnyddio’r eirfa a’r derminoleg briodol

Sgiliau Ymarferol Proffesiynol(SY):

SY 1 Cyfathrebu'n berswadiol ar draws cynulleidfaoedd a genres, gan gyfleu syniadau academaidd a dadleuon technegol-gyfreithiol i gynulleidfaoedd arbenigol ac anarbenigol gan ddefnyddio technegau gweledol, ysgrifenedig neu lafar.

SY 2 Cynnig atebion ymarferol a moesegol yn annibynnol i broblemau cyfreithiol gwirioneddol neu ddamcaniaethol sy'n seiliedig ar gleientiaid

SY 3 Gwerthuso a chydnabod amwysedd ac ansicrwydd yn y gyfraith mewn modd systematig

SY 4 Cynhyrchu amrywiaeth o ddeunydd gan ddefnyddio Cymraeg ysgrifenedig a llafar sy'n briodol ar gyfer y gweithle ac a fwriedir i fynd i'r afael ag ystod o gynulleidfaoedd

SY 5 Cymhwyso gwybodaeth, dealltwriaeth a sgiliau mewn cyd-destun proffesiynol trwy brofiad gwaith, myfyrio a gwerthuso'n feirniadol cyfleoedd profiad gwaith

SY 6 Dangos meddwl beirniadol, rhesymu a'r gallu i gymhathu a chrynhoi gwybodaeth a syniadau cymhleth trwy ddethol yn annibynnol a dadansoddi'n feirniadol ystod briodol o dystiolaeth.

Sgiliau Trosglwyddadwy/Allweddol(SA):

SA 1 Ymchwilio ac astudio'n greadigol, yn annibynnol ac yn fyfyriol, gan gymhwyso gwybodaeth a sgiliau uwch i heriau neu i gyd-destunau anghyfarwydd neu ehangach yn y byd

SA 2 Dangos mentergarwch drwy gymryd cyfrifoldeb am strwythuro a rheoli amser ymchwil neu dasg sy'n canolbwyntio ar gleientiaid, gan weithio mewn timau pan fo'n briodol

SA 3 Dangos hyfedredd technegol mewn Cymraeg a/neu Saesneg ysgrifenedig a llafar a chymhwysedd wrth gymhwyso terminoleg ysgolheigaidd, llenyddol a chyfreithiol-dechnegol, gallu cymhwyso sgiliau gwerthuso, dadansoddi a barnu beirniadol yn effeithiol mewn ystod amrywiol o gyd-destunau

SA 4 Dangos llythrennedd digidol a'r gallu i asesu hygrededd ffynonellau gwybodaeth.

SA5 Dangos menter, gwydnwch, gallu i addasu a chreadigrwydd, myfyrio'n weithredol ar astudiaethau a chyflawniadau eich hun

SA6 Defnyddio sgiliau meddwl yn feirniadol a rhesymu i ddadansoddi a gwerthuso tystiolaeth a syniadau amrywiol.