Cemeg (MChem)

Ein nod yw cynnig amgylchedd rhagorol ar gyfer addysg gemegol ac mae ein graddau israddedig yn adlewyrchu ein cryfderau a’n diddordebau ymchwil presennol. Mae prosiectau yn y flwyddyn olaf yn gwbl integredig yn ein grwpiau ymchwil. Ein nod yw darparu addysg arbenigol a gofal bugeiliol cynhwysfawr i'ch galluogi i gyflawni hyd eithaf eich gallu.

Addysgir trwy gyfres o ddarlithoedd, tiwtorialau, gweithdai a dosbarthiadau ymarferol. Cefnogir hyn gan y deunyddiau sydd ar Dysgu Canolog, sef amgylchedd dysgu rhithwir y Brifysgol. 

Gwaith labordy 

Mae’r pwyslais ar dechnegau sylfaenol a chofnodi arsylwadau mewn modd syml ond cywir ym mlwyddyn un. Addysgir sgiliau drwy arddangosiadau ymarferol ac fe’u cefnogir gan ystod o adnoddau e-ddysgu sydd ar gael yn hwylus ac yn rhad ac am ddim i bob myfyriwr.</p> 
 
Mae hunan-brofi yn cynnig dealltwriaeth o wahanol dechnegau ymarferol yn ogystal â'r cyfle i gywiro camgymeriadau cyn mynd i sesiynau labordy. 

Mae gwaith labordy yn gweithio tuag at arbrofion sylweddol sy’n gofyn am gynllunio, dadansoddi a dehongli canlyniadau yn ofalus, yn ogystal ag adrodd safonol, proffesiynol. Mae gwaith ymarferol yn cynnig profiad ym mhob un o brif weithdrefnau a thechnegau'r labordy. Mae wedi'i ddylunio i ymestyn lefel eich hyfedredd mewn cemeg ymarferol, gan eich paratoi i ymgymryd â phrosiect ymchwil annibynnol yng nghamau olaf eich gradd.</p> 

Prosiect ymchwil

Mae gan bob un o’n cyrsiau Cemeg elfen gref o ymchwil annibynnol, o dan oruchwyliaeth. Ym mlwyddyn olaf y cwrs MChem, byddwch yn ymuno â grŵp ymchwil sy'n gweithio yn eich hoff faes cemeg ac yn cael pwnc i'w ymchwilio. Byddwch yn cyflwyno canlyniadau eich gwaith ar lafar ac yn ysgrifenedig drwy weithio o dan arweiniad arbenigwr yn y maes. Yn y gorffennol, mae hyn wedi arwain at fyfyrwyr israddedig yn ysgrifennu papurau a gyhoeddwyd ar y cyd.

Sut y caf fy nghefnogi?

Byddwch yn cael eich cefnogi gan amrywiaeth o diwtoriaid academaidd, ac mae un ohonynt hefyd yn gweithredu fel eich tiwtor personol. Byddwch yn gweld un o’ch tiwtoriaid bob wythnos, naill ai fel rhan o grŵp tiwtorial bach neu ar sail un-i-un mewn sesiwn diwtorial bersonol.  Mae’r holl staff yn gweithredu polisi drws agored, sy’n golygu y gallwch bob amser fynd at staff gyda phroblemau – boed y rheiny’n academaidd neu’n broblemau eraill.   

Byddwch yn cael llawlyfr cynhwysfawr sy'n briodol i'ch blwyddyn astudio. Mae'n cynnwys manylion am weithdrefnau a pholisïau'r Ysgol.

Rydym yn gwneud defnydd helaeth o Amgylchedd Dysgu Rhithwir y Brifysgol (Dysgu Canolog) er mwyn rhannu gwybodaeth. 

Sut caf fy asesu?

Cynhelir asesiadau ffurfiannol a chrynodol yn ystod pob blwyddyn astudio. Mae hyn yn rhoi mesur o berfformiad i'ch hysbysu chi, staff, a darpar gyflogwyr am eich cynnydd a'ch cyrhaeddiad. Hefyd gall helpu'r broses ddysgu trwy dynnu sylw at feysydd llwyddiant a meysydd y mae angen mwy o sylw arnynt. Mae asesu ar gyfer y radd MChem yn cynnwys dulliau a ddewisir i weddu i ddeilliannau pob modiwl a’r cwrs cyfan, gan gynnwys:

• Arholiadau ffurfiol gyda therfynau amser penodol
• Profion dosbarth
• Adroddiadau ar waith labordy
• Cynllunio, cynnal ac adrodd ar waith prosiect
• Traethodau
• Ymarferion datrys problemau (fel aseiniadau gweithdy)
• Cyflwyniadau llafar
• Paratoi ac arddangos posteri.

Pa sgiliau bydda i'n eu hymarfer a'u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.  

O gwblhau eich rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth: 

GD 1: Arddangos gwybodaeth a dealltwriaeth systematig o ddamcaniaethau a dadleuon canolog, a'u cymwysiadau mewn ymchwil cemeg gyfredol.

GD 2: Arddangos dealltwriaeth fanwl o feysydd arbenigol cemeg a'r materion a'r problemau cysylltiedig sydd ar flaen y gad mewn ymchwil gyfredol.

GD 3: Gwerthuso'n feirniadol systemau a phrosesau cemegol cyfarwydd ac anghyfarwydd yn annibynnol a datblygu syniadau sy'n caniatáu i waith ymchwil gael ei wneud. 

GD 4: Arddangos dealltwriaeth systematig o wybodaeth fathemategol mewn algebra a chalcwlws sylfaenol a thrin rhifiadol sy'n briodol ar gyfer dadansoddi a gwerthuso problemau cemegol a ddefnyddir mewn amrywiaeth o sefyllfaoedd. 

Sgiliau Deallusol: 

SD 1: Nodi a gweithredu modelau priodol i ddarparu esboniadau a rhagfynegiadau o fewn cyd-destun pynciau uwch neu ymchwil gyfredol gan gymhwyso cysyniadau cemeg craidd.

SD 2: Cynllunio, cynnal, a gwerthuso ymchwil ymchwiliol gan ddangos dealltwriaeth integredig o dechnegau ar gyfer synthesis, dadansoddi a/neu fodelu cyfrifiadol. 

SD 3: Dadansoddi a dehongli'n feirniadol ddata sy'n deillio o arsylwadau a mesuriadau labordy i ddiffinio a datrys problemau mewn cyd-destunau byd go iawn a haniaethol.

Sgiliau Ymarferol Proffesiynol: 

SY 1: Cyfathrebu'n berswadiol, gan ddefnyddio ystod o gyfryngau, gan fynegi syniadau academaidd a dadleuon technegol mewn modd sy'n briodol i gynulleidfaoedd arbenigol ac anarbenigol.

SY 2: Ymchwilio, dadansoddi, a chymhwyso ffynonellau llenyddiaeth sylfaenol i sgiliau cyfrifiadol, prosesu data, a chwilio electronig sy'n ymwneud â gwybodaeth gemegol i ddatblygu dadleuon, damcaniaethau a phenderfyniadau rhesymegol

manwl. 

SY 3: Nodi cyfrifoldebau moesegol, gan gynnwys rôl y fferyllydd o fewn perthnasoedd proffesiynol cydweithredol ac o ran materion economaidd a chymdeithasol. 

Sgiliau Trosglwyddadwy/ Allweddol: 

SA 1: Arddangos menter ac annibyniaeth trwy gymryd cyfrifoldeb am strwythuro a rheoli amser tasg ymchwil, gan weithio mewn timau pan fo'n briodol. 

SA 2: Ymchwilio ac astudio'n greadigol, yn annibynnol ac yn fyfyriol, gan gymhwyso gwybodaeth a sgiliau uwch i heriau neu i gyd-destunau anghyfarwydd neu ehangach yn y byd.

SA 3: Datblygu ymwybyddiaeth o'ch cryfderau a'ch gwendidau gan ddefnyddio arweiniad/adborth i ddatblygu strategaethau ar gyfer dysgu sy'n dod i'r amlwg. 

SA 4: Cymhwyso sgiliau gwerthuso beirniadol, dadansoddi a barn yn effeithiol mewn ystod amrywiol o gyd-destunau, gan allu mynd i'r afael â phroblemau ar ryngwyneb disgyblaethau eraill.

SA 5: Arddangos llythrennedd digidol mewn cymwysiadau cemeg ac anghemegol eang a dangos hyder ac annibyniaeth wrth gymhwyso profiadau i gymwysiadau cysylltiedig anghyfarwydd.