Ceiswyr lloches

Rydym yn cynnig amrywiaeth o gefnogaeth i Geiswyr Lloches, Ffoaduriaid a phobl eraill sy'n ceisio Noddfa yn y DU.

Mae Caerdydd yn croesawu pobl sy'n ceisio diogelwch. Mae am greu teimlad o gynhwysiant drwy annog pobl i dderbyn diwylliant, sgiliau a gwahaniaethau ac rydym yn cefnogi hyn ym Mhrifysgol Caerdydd.

Rydym yn y broses o geisio statws Prifysgol Noddfa, menter sy'n cydnabod arferion da prifysgolion o ran croesawu, cefnogi a grymuso pobl sy'n chwilio am noddfa. Ein nod yw denu a recriwtio myfyrwyr â photensial academaidd, ni waeth beth fo'u cefndir neu eu profiad personol.

Ydy'r gefnogaeth hon ar eich cyfer chi?

Mae nifer o wahanol opsiynau statws swyddogol. Mae'r rhestr ganlynol yn rhoi trosolwg syml a chewch hyd i fanylion pellach ar Wefan Fisâu a Mewnfudo'r DU.

• Ceisiwr Lloches: rydych chi'n gwneud cais am loches, neu rydych chi'n aros am benderfyniad gan lywodraeth y DU.
• Ffoadur: rydych wedi cael caniatâd i aros yn y DU ac wedi derbyn statws 'ffoadur' swyddogol. Mae gennych lythyr gan Fisâu a Mewnfudo'r DU (UKVI) i gadarnhau hyn.
• Diogelwch Dyngarol: mae gennych ganiatâd i aros yn y DU am resymau dyngarol. Mae gennych lythyr gan Fisâu a Mewnfudo'r DU (UKVI) i gadarnhau hyn.
• Caniatâd cyfyngedig i aros (LLR) neu ganiatâd yn ôl disgresiwn i aros (DLR): rydych wedi cael caniatâd i aros yn y DU dros dro. Mae gennych lythyr gan Fisâu a Mewnfudo'r DU (UKVI) i gadarnhau hyn.

Gwneud cais i ymgymryd â chwrs

Bydd mynd i un o Ddiwrnodau Agored Prifysgol Caerdydd yn rhoi’r cyfle i chi siarad â myfyrwyr a staff ac ymweld â gwahanol rannau o'r Brifysgol. Gallwch hefyd gael gwybodaeth bwysig am lety, cyllid myfyrwyr a darpariaeth arall o ran cymorth i fyfyrwyr drwy siarad yn anffurfiol â'n staff proffesiynol.

Pan fyddwch yn gwneud cais i fynd i brifysgol drwy UCAS cewch gyfle i ddatgelu eich bod yn geisiwr lloches neu'n ffoadur. Byddem yn eich annog i roi tic ie ar gyfer y cwestiwn hwn er mwyn i ni allu cysylltu â chi cyn gynted â phosibl ynghylch y cymorth sydd ar gael i chi. Mae UCAS hefyd yn rhoi gwybodaeth ac arweiniad a chanllaw ynghylch ysgrifennu eich datganiad personol.

Os nad ydych yn barod eto ar gyfer addysg ar lefel prifysgol, edrychwch ar y cymorth sydd ar gael gan Dîm Ehangu Cyfranogiad Prifysgol Caerdydd. Mae’n cynnig cyrsiau cymunedol achrededig ar Lefel 3 yn rhad ac am ddim ledled Caerdydd mewn partneriaeth â Campws Cyntaf a'r adran Addysg Barhaus a Phroffesiynol. Cysylltwch â nhw drwy ebostio outreach@caerdydd.ac.uk neu ffoniwch 02920 870020.

Mae’r tîm Datblygiad Proffesiynol Parhaus hefyd yn cynnig cyrsiau annibynnol ar Lefelau 4 a 5, yn ogystal â Llwybrau at Radd. Cysylltwch â nhw yn outreach@caerdydd.ac.uk neu ffoniwch nhw ar 02920 870000.

Cyllid

Gan eich bod yn geisiwr lloches, cewch eich ystyried yn fyfyriwr rhyngwladol, a bydd eich ffioedd cychwynnol yr un fath â ffioedd myfyrwyr rhyngwladol. Gallech fod yn gymwys i gael gostyngiad mewn ffioedd dysgu (hepgor ffioedd dysgu), a phob blwyddyn, rhoddir Dyfarniad Cyfle i ddau ymgeisydd llwyddiannus. Mae rhagor o wybodaeth ar gael ar ein tudalen Cymorth Ariannol i Geiswyr Lloches.

Gan eich bod yn ffoadur sy'n byw yn y DU byddwch yn cael eich ystyried yn fyfyriwr cartref a gallech fod yn gymwys i gael cyllid gan Cyllid Myfyrwyr yn dibynnu ar eich statws preswylio. Mae Cyllid Myfyrwyr Lloegr a Chyllid Myfyrwyr Cymru yn rhestru'r meini prawf preswylio ac i bwy y maent yn berthnasol ar eu tudalennau gwe. Mae rhagor o wybodaeth am ba gyllid sydd ar gael i fyfyrwyr cartref ar gael ar ein tudalennau gwe ynghylch ariannu.

Cymorth Pontio

Mae'n bwysig i ni fod eich proses pontio i'r brifysgol yn haws o ganlyniad i’r ffaith eich bod yn gallu cael gafael ar wybodaeth ac arweiniad mewn perthynas ag unrhyw gwestiynau sydd gennych cyn i chi ddechrau ac ar ôl hynny.

Mae ein Tîm Allgymorth yn cynnig gwybodaeth, cyngor ac arweiniad i'ch helpu i baratoi ar gyfer y Brifysgol. Darllenwch eu tudalennau cymryd rhan i weld pa brosiectau y gallwch chi gymryd rhan ynddynt.

Os ydych wedi ticio'r blwch yn UCAS, bydd ein cyswllt penodol mewn cysylltiad i ateb unrhyw gwestiynau sydd gennych cyn dechrau'r cwrs a gall eich cyfeirio at wasanaethau yn y Brifysgol y gallech fod eu hangen.

Cymorth tra byddwch yn astudio

Ein nod yw meithrin profiad rhagorol a chefnogol ar gyfer myfyrwyr. Meithrin ac annog dyfodol hyderus a llwyddiannus i bawb.

Lena Smith yw'r cyswllt penodedig ar gyfer Ceiswyr Lloches a Ffoaduriaid ac mae'n cynnig y gefnogaeth ganlynol trwy gydol eich astudiaethau:

• cymorth wrth wneud cais am gyllid myfyrwyr a grantiau a bwrsariaethau amgen
• cymorth o ran materion academaidd, gan gynnwys cysylltu â'ch adran academaidd a gwneud myfyrwyr yn ymwybodol o sut i wneud cais am amgylchiadau esgusodol os oes angen
• cymorth o ran unrhyw faterion tai.
• cyfeirio at dimau prifysgol eraill megis cefnogi myfyrwyr sydd ag anabledd, cyngor ar iechyd a lles neu ddatblygu sgiliau astudio academaidd
• cynnal digwyddiadau a gweithgareddau a bod ar gael i siarad â myfyrwyr fel bo’r angen.

Gallwch gysylltu â Kathryn drwy Gyswllt Myfyrwyr drwy ebostio studentconnect@caerdydd.ac.uk

Cymorth pwrpasol arall

Rydym hefyd yn cynnig cymorth a gwybodaeth benodol arall yn ychwanegol i’r cymorth bywyd myfyrwyr cyffredinol sydd ar gael i bob myfyriwr.

Cysylltwch â ni