Ynni Cynaladwy a'r Amgylchedd (MSc)

Sut y caf fy addysgu?

Defnyddir ystod eang o ddulliau addysgu i ddarparu'r deunydd amrywiol sy'n llunio cwricwlwm y rhaglen. Bydd gofyn i chi fynychu astudiaethau mewn darlithoedd, labordai a thiwtorialau yn ystod y semester, ac ymgymryd â phrosiect ymchwil unigol yn ddiweddarach.

Er bod modiwl 10 credyd yn cynrychioli cyfanswm o 100 awr o astudio, fel arfer bydd hyn yn cynnwys 24-36 awr o amser cyswllt gyda staff addysgu. Bwriedir i'r oriau sy'n weddill fod ar gyfer astudio’n breifat, gwaith cwrs, adolygu ac asesu. Felly disgwylir i bob myfyriwr dreulio cryn dipyn o amser (20 awr yr wythnos fel arfer) yn astudio'n annibynnol.

Ar ddechrau Cam 2, byddwch yn cael goruchwyliwr prosiect. Fel rheol, caiff pwnc y traethawd hir ei ddewis o blith amrywiaeth o deitlau prosiect a gynigir gan staff academaidd mewn ymgynghoriad â phartneriaid diwydiannol, a hynny ym meysydd ymchwil presennol neu ddiddordeb diwydiannol fel arfer. Rydych hefyd yn cael eich annog i gyflwyno eich syniadau eich hun ar gyfer prosiect.

Bydd Dysgu Canolog, amgylchedd dysgu rhithwir Prifysgol Caerdydd, yn cael ei ddefnyddio'n helaeth i gyfathrebu â myfyrwyr, cefnogi darlithoedd a darparu deunyddiau cyffredinol rhaglenni, fel rhestrau darllen a disgrifiadau o’r modiwlau. Gellir ei ddefnyddio hefyd ar gyfer asesiadau hunan-brofi ac i roi adborth.

Sut y caf fy asesu?

Asesir cyflawniad deilliannau dysgu yn y rhan fwyaf o fodiwlau drwy gyfuniad o aseiniadau gwaith cwrs, ynghyd ag arholiadau'r Brifysgol ym mis Ionawr neu ym mis Mai. Mae arholiadau'n cyfrif am draean i hanner yr asesiad yng Ngham 1 y rhaglen, yn dibynnu ar yr opsiynau a ddewiswyd, a'r gweddill yn waith prosiect a darnau o waith cwrs yn bennaf.

Mae angen cwblhau Cam 2 yn llwyddiannus, sef y Traethawd Hir, a chael marc o 50% neu uwch er mwyn cael MSc. Gellir dyfarnu Teilyngdod i ymgeiswyr sy'n cyflawni 60% a Rhagoriaeth i’r rhai sy’n cyflawni 70% ar gyfartaledd. Gall ymgeiswyr nad ydyn nhw’n llwyddo i ennill cymhwyster MSc gael Diploma Ôl-raddedig Addysg Uwch ar gyfer y 120 credyd yng Ngham 1. Gall ymgeiswyr nad ydyn nhw’n llwyddo i gwblhau’r 120 credyd angenrheidiol ar gyfer Cam 1 fod yn gymwys ar gyfer dyfarniad Tystysgrif Ôl-raddedig Addysg Uwch am gyflawni o leiaf 60 credyd.

Sut y caf fy nghefnogi?

Bydd tiwtor personol yn cael ei neilltuo i chi er mwyn eich helpu gyda chynnydd academaidd a chymorth bugeiliol pan fo angen. Bydd y tiwtor personol yn cwrdd â chi yn gynnar yn y rhaglen, ac yn ôl yr angen wedi hynny. Ar gyfer cyfnod y traethawd hir, bydd myfyrwyr yn cael goruchwyliwr ym maes perthnasol eu gwaith ymchwil, a dylent ddisgwyl cwrdd â’r goruchwyliwr yn rheolaidd.

Yn ogystal â'r ystod eang o wasanaethau cymorth sy’n cael eu darparu’n ganolog gan Brifysgol Caerdydd, bydd myfyrwyr ag anghenion penodol yn cael eu cefnogi yn ôl yr angen.

Adborth

Byddwch yn cael adborth ysgrifenedig ar gyfer aseiniadau gwaith cwrs ysgrifenedig, ac adborth llafar ar gyfer cyflwyniadau a asesir.

Pa sgiliau y byddaf yn eu hymarfer a’u datblygu?

Fel myfyriwr ar y rhaglen MSc hon byddwch yn ymarfer ac yn datblygu'r sgiliau canlynol:

Gwybodaeth a Dealltwriaeth

• Deall natur amlddisgyblaethol astudiaethau amgylcheddol ac ynni cynaliadwy, a'r angen i integreiddio gwybodaeth o amrywiaeth o ddisgyblaethau peirianneg wrth reoli heriau ynni cynaliadwy.
• Defnyddio cyfreithiau gwyddonol sylfaenol sy'n sail i weithredu ystod eang o systemau ynni adnewyddadwy ac anadnewyddadwy pwysig, a hynny mewn modd priodol.
• Cydnabod a gallu defnyddio perthnasoedd a thechnegau rheoli ynni sylfaenol ar gyfer amrywiaeth o sefyllfaoedd penodol.
• Esbonio a chyflwyno gwybodaeth sy'n gysylltiedig ag arfarnu ac asesu prosiectau ynni.
• Esbonio rôl yr asiantaethau sy'n plismona gwahanol sectorau'r amgylchedd.
• Cymharu a gwrthgyferbynnu'r gwahanol heriau a gyflwynir yn sgil llygredd lleol a byd-eang.
• Amlinellu strwythur fframwaith rheoleiddio'r DU ar gyfer rheoli risg a pheryglon sy'n berthnasol i systemau ynni cynaliadwy, a gallu esbonio ei esblygiad, ei gryfderau a'i wendidau.
• Esbonio’r dulliau a ddefnyddir mewn diwydiant ar gyfer nodi, mesur a lliniaru risgiau a pheryglon.
• Dangos gwybodaeth sydd ar flaen y gad o ran amrywiaeth o ddisgyblaethau amgylcheddol ac ynni cynaliadwy, o blith: thermodynameg, trosglwyddo gwres, modelu hydro-amgylcheddol, cynaliadwyedd, systemau ynni amgen, ôl troed carbon isel, monitro cyflwr, modelu a rhagweld.

Sgiliau Deallusol

• Defnyddio gwybodaeth a dulliau gwyddonol, sy'n seiliedig ar dystiolaeth, wrth asesu a datrys heriau amgylcheddol ac ynni cynaliadwy, yn aml heb fawr o wybodaeth ac o bosibl, gwybodaeth anghyson.
• Delio â materion amgylcheddol ac ynni cynaliadwy cymhleth yn systematig ac yn greadigol.
• Bod yn wreiddiol wrth fynd i'r afael â phroblemau cyfarwydd ac anghyfarwydd.
• Adolygu cefndir problem systemau ynni cynaliadwy yn feirniadol a llunio rhaglen o waith i fynd i'r afael â'r mater.
• Cyflawni prosiect ymchwil sylweddol ym maes amgylcheddol ac ynni cynaliadwy yn systematig, sy'n cynnwys bod yn wreiddiol wrth gymhwyso gwybodaeth ac arfer barn peirianneg feirniadol.
• Casglu, gwerthuso, cyfosod a dehongli data ansoddol a meintiol mewn amrywiaeth o ffyrdd; a chanfod ffyrdd o gael data newydd pan fo angen.
• Ystyried, cynllunio, gweithredu a chyfleu canlyniadau darn manwl estynedig o waith prosiect unigol.
• Cynnal dadl feirniadol, yn ysgrifenedig a thrwy gyflwyniadau.

Sgiliau Ymarferol

• Defnyddio dulliau mathemategol ac arbrofol priodol ar gyfer modelu a dadansoddi problemau amgylcheddol ac ynni cynaliadwy.

Sgiliau Trosglwyddadwy

• Trin, cyflwyno ac adrodd ar ddata mewn amrywiaeth o ffyrdd.
• Rheoli adnoddau ac amser.
• Cyfleu syniadau, egwyddorion a theorïau'n effeithiol drwy ddulliau llafar, ysgrifenedig a chorfforol neu ymarferol.
• Llunio adolygiad cryno o lenyddiaeth.
• Defnyddio offer technoleg gwybodaeth a chyfathrebu (TGCh) yn effeithiol, gan gynnwys taenlenni, proseswyr geiriau, systemau cronfa ddata a'r Rhyngrwyd.
• Gweithio'n effeithiol mewn grŵp tuag at gyflawni nodau a thargedau penodol.