Nyrsio Iechyd Cyhoeddus Cymunedol Arbenigol (MSc)

Sut y caf fy addysgu?

Mae dulliau addysgu ar y rhaglen yn dilyn model dysgu cyfunol, lle defnyddir dulliau addysgu lluosog i ddarparu ar gyfer gwahanol arddulliau dysgu, tra hefyd yn defnyddio dulliau priodol i gyflwyno deunydd perthnasol mewn ymarfer SCPHN. Mae hyn yn cynnwys defnyddio darlithoedd, seminarau, gweithdai, dysgu drwy ddatrys problemau, gweithdai sgiliau, a gwaith dadlau. Mae'r trafodaethau hyn ar ffurf gwaith ar y cyd rhwng myfyrwyr a hwyluswyr, neu waith grŵp rhwng cymheiriaid. Rydym hefyd yn defnyddio astudio dan gyfarwyddyd ac astudio hunan-gyfeiriedig gyda'r nod o ddatblygu eich galluoedd fel dysgwr gydol oes annibynnol  ymhellach. Fel y byddech yn disgwyl mewn astudiaethau ôl-raddedig, darperir rhag-ddarllen i'ch cynorthwyo i baratoi ar gyfer unrhyw sesiynau lle defnyddir trafodaeth grŵp, cyngor academaidd ar asesiadau neu ddadleuon. Er mwyn dysgu ar lefel ôl-radd mae angen i chi gymryd cyfrifoldeb dros eich dysg, a byddwn yn annog hyn trwy gydol y rhaglen.

Cyflwynir sesiynau addysgu gan dîm y rhaglen, gyda mewnbwn rheolaidd gan ymarferwyr SCPHN arbenigol a dysgu rhyngbroffesiynol gan y tîm amlddisgyblaethol. Mae defnyddwyr gwasanaeth hefyd yn cyfrannu at sesiynau addysgu, gan ddarparu persbectif manwl gan yr union bobl y mae ymwelwyr iechyd yn eu gwasanaethu.

Yn ogystal, ymgorfforir technoleg efelychu a rhith-realiti, gan eich galluogi i ddefnyddio'ch gwybodaeth mewn amgylchedd diogel wedi’i efelychu, gan ganiatáu i chi ddatblygu eich hyder a’ch cymhwysedd ar gyfer sefyllfaoedd yn y byd go iawn.

Sut y caf fy asesu?

Mae’r cwricwlwm yn cynnwys ystod amrywiol a chreadigol o strategaethau a dulliau asesu dilys, sy’n adlewyrchu dull gweithredu cynhwysol sy’n canolbwyntio ar y dysgwr ac sy’n gyson â deilliannau dysgu bwriadedig y rhaglen.

Cafodd yr asesiadau ffurfiannol ar gyfer pob modiwl eu teilwra i gynorthwyo wrth baratoi ar gyfer yr asesiad crynodol, gan gynnig cymorth i gyflawni canlyniadau asesu cadarnhaol. Mae pob asesiad ffurfiannol yn cynnig cyfleoedd am adborth gan eich cymheiriaid a staff academaidd.

Mae canllawiau ysgrifenedig a meini prawf asesu i gyd-fynd â phob asesiad sy'n cyfateb â chanlyniadau dysgu'r rhaglen a modiwlau unigol. Cynhelir pob arholiad wyneb yn wyneb ar ein campws ym Mharc y Mynydd Bychan.

Byddwch yn cael eich asesu’n grynodol yn y ffyrdd canlynol:

• Traethodau
• Prosiect ymchwil seiliedig ar dystiolaeth
• Adnodd e-ddysgu
• Cyflwyniadau llafar ar y campws 
• Arholiad clinigol strwythuredig integredig (ISCE) ar y campws 
• Archwiliad yn seiliedig ar ymarfer
• Dogfen asesu ymarfer Cymru gyfan (PAD)

Sut y caf fy nghefnogi?

Byddwn yn neilltuo tiwtor personol i chi o dîm academaidd SCPHN, a byddwch yn cyfarfod yn rheolaidd â’r tiwtor drwy gydol y rhaglen i gefnogi eich datblygiad cyffredinol a rhoi cymorth bugeiliol personol i chi. Mae tiwtoriaid personol sy’n siarad Cymraeg ar gael os ydych chi’n ffafrio cael cymorth drwy gyfrwng y Gymraeg.

Byddwch yn ymgymryd â dysgu wrth ymarfer yn ychwanegol, lle byddwch yn cael eich cefnogi gan dîm teiran sy'n cynnwys Asesydd Ymarfer iechyd gwadd SCPHN, Goruchwyliwr Ymarfer enwebedig, ac Asesydd Academaidd enwebedig.  Bydd y tîm hwn yn gweithio ar y cyd â chi i'ch galluogi i gyflawni gofynion y rhaglen ymarfer.

Byddwch hefyd yn aelod o Set Dysgu Gweithredol, sy'n cynnwys cymryd rhan mewn cyfres o drafodaethau myfyriol rhwng cymheiriaid yn ystod y rhaglen. Cefnogir y setiau hyn gan yr Aseswr Academaidd a'u nod yw eich galluogi i fynd i'r afael â materion ymarfer SCPHN go iawn gyda'ch cymheiriaid trwy drafodaethau myfyriol a datblygu eich sgiliau arwain. 

Mae pob modiwl yn y rhaglen yn gwneud defnydd helaeth o Amgylchedd Dysgu Rhithwir Prifysgol Caerdydd Blackboard Ultra, lle byddwch chi'n dod o hyd i ddeunyddiau ar gyfer y cwrs, dolenni i ddeunyddiau cysylltiedig ac enghreifftiau o asesiadau. Cofnodir pob darlith wyneb yn wyneb trwy Panopto ac maent ar gael i chi edrych arnynt trwy gydol eich rhaglen.

Byddwch yn cael adborth llafar ac ysgrifenedig ar eich asesiadau ffurfiannol wrth i ni eich paratoi chi ar gyfer eich asesiad crynodol. Bydd adborth personol ar eich holl asesiadau crynodol yn cael ei ddarparu'n electronig trwy ein platfform dysgu rhithwir, sy'n ceisio galluogi eich datblygiad parhaus trwy gynnig adborth i lywio eich asesiadau yn y dyfodol.

Yn ogystal, mae'r Brifysgol yn cynnig ystod eang o wasanaethau a gweithgareddau sydd wedi'u cynllunio i'ch cefnogi chi. Mae'r rhain yn cynnwys gwasanaeth cwnsela myfyrwyr, gwasanaeth cynghori myfyrwyr, cyfleusterau gofal dydd, a chyfleusterau chwaraeon ac ymarfer corff, yn ogystal â gwybodaeth am y campws a gwasanaethau llyfrgell a TG.

Mae rhagor o wybodaeth am yr hyn y gall y brifysgol ei gynnig i chi ar y ddolen ganlynol:

Bywyd myfyrwyr – Astudio – Prifysgol Caerdydd

Pa sgiliau y byddaf yn eu hymarfer a’u datblygu?

Mae Deilliannau Dysgu’r rhaglen hon yn disgrifio'r hyn y byddwch chi’n ei gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych..

Mae Deilliannau Dysgu'r Rhaglen hon i'w gweld isod:

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a dealltwriaeth:

• Cymhwyso lefelau uwch o wybodaeth SCHPN yn feirniadol i atal afiechyd, diogelu iechyd a hybu lles gan roi ystyriaeth gynhwysfawr i ddylanwadau economaidd, nodau datblygu cynaliadwy, a fframweithiau deddfwriaethol, moesegol a rheoleiddiol.
• Dangos dealltwriaeth gynhwysfawr o benderfynyddion iechyd cymdeithasol mewn ystod amrywiol o boblogaethau, gan gydnabod pa mor anrhagweladwy a chymhleth y gall amgylcheddau, cymunedau a phoblogaethau amrywiol fod.

• Dangos dealltwriaeth systematig o ddulliau sy'n meithrin perthnasoedd llawn ymddiriedaeth sy'n galluogi SCPHN i nodi, asesu a chynllunio ar gyfer anghenion iechyd a lles plant a theuluoedd, hybu iechyd a sefydlu ymyriadau sy'n seiliedig ar dystiolaeth sy'n canolbwyntio ar yr unigolyn a meddyginiaethau priodol ar bresgripsiwn.

• Dadansoddi canllawiau deddfwriaethol a chanllawiau sy'n seiliedig ar dystiolaeth yn feirniadol i ddarparu cyngor iechyd sy'n canolbwyntio ar y teulu, gan ystyried ffactorau unigol, amgylcheddol a genetig.

Sgiliau Deallusol:

• Datblygu a chynnal dadansoddiadau annibynnol, wedi’u hymchwilio’n ofalus, o bolisi sy’n effeithio ar ddarpariaeth y gwasanaeth iechyd i blant, teuluoedd a phoblogaethau, gan ddefnyddio gwerthusiad beirniadol o amryw o ffynonellau o dystiolaeth sy’n sail i arferion ymwelwyr iechyd.
• Cyfuno a chymhwyso gwybodaeth o ymchwil a’i archwilio i arwain datblygiad gwasanaeth wrth wella iechyd plant, teuluoedd a chymunedau, gan rannu arfer da.
• Dangos gallu i feddwl yn feirniadol ac yn annibynnol wrth wneud diagnosis ac ymdrin â phroblemau iechyd cymhleth, rhoi meddyginiaethau priodol ar bresgripsiwn, datblygu ac arwain ar atebion arloesol sy'n canolbwyntio ar yr unigolyn, yn wrth-wahaniaethol, yn ddiwylliannol gymwys ac yn gynhwysol.
• Arddangos amrywiaeth o ddulliau arwain sy'n dangos cydweithrediad a thosturi wrth arwain strategaethau gwella ansawdd mewn partneriaeth â rhanddeiliaid.

Sgiliau Ymarferol Proffesiynol:

• Ymarfer fel SCPHN annibynnol sy'n ymarfer menter ac yn gwerthuso'n feirniadol ac yn myfyrio ar eu hymarfer i alluogi datblygiad proffesiynol parhaus wrth gadw at safonau hyfedredd yr NMC a Chod yr NMC..
• Gweithio fel aelod cydweithredol o’r tîm amlddisgyblaethol sy’n gallu gwneud penderfyniadau mewn sefyllfaoedd cymhleth ac anodd eu rhagweld, gan ddarparu gofal sy’n seiliedig ar dystiolaeth i ystod gymhleth o boblogaethau, gan ystyried materion moesegol a chyfreithiol.
• Dangos y gallu i ddefnyddio sgiliau cyfathrebu gwell, gan eiriol dros degwch, cydraddoldeb a chyfiawnder cymdeithasol, gan ddefnyddio amryw o ddulliau rhannu gwybodaeth i gyfleu gwybodaeth i gynulleidfaoedd amrywiol.

• Ymateb yn arbenigol i lefelau lluosog o gymhlethdod, anrhagweladwyedd ac ansicrwydd mewn cyd-destunau gofal iechyd trwy arddangos a defnyddio rhesymu arbenigol i ddarparu gofal effeithiol ar draws ystod o leoliadau cymunedol.

• Cymhwyso crebwyll proffesiynol lefel uchel i arsylwi, adnabod ac ymateb i arwyddion o gam-drin ac esgeulustod ar hyd cwrs bywyd trwy eiriol dros y rhai sydd fwyaf agored i niwed a’u hamddiffyn.

Sgiliau Trosglwyddadwy/Allweddol (SA)::

• Dangos creadigrwydd a gwreiddioldeb wrth ddatrys problemau yn yr amgylchedd academaidd ac ymarferol, gan gynnwys ymrwymiad i fynd i'r afael ag anghydraddoldebau iechyd trwy atal ac ymyrryd yn gynnar, gan ddangos entrepreneuriaeth o fewn ymarfer ymwelwyr iechyd. 
• Cymryd rhan weithredol wrth barhau â’ch datblygiad personol a phroffesiynol, gyda myfyrio beirniadol ac ymrwymiad i ddysgu annibynnol gydol oes yn sail i hynny.
• Dangos sgiliau cyfathrebu uwch yn yr amgylchedd academaidd ac ymarferol i gydweithio a gweithio mewn partneriaeth ag asiantaethau eraill.
• Ymarfer hunanreolaeth effeithiol a gallu uwch i addysgu ac ysgogi eraill, gan ddefnyddio amryw o sgiliau arwain a rheoli.
• Dangos sgiliau digidol a thechnolegol uwch mewn addysg ac ymarfer i ddiwallu anghenion pobl a chymunedau.