Cwrs Ymarfer Cyfreithwyr (LLM)

Sut y caf fy addysgu?

Mae astudio ar gyfer LLM yn ddwys ac yn heriol a bydd angen i chi fanteisio ar yr addysgu a ddarperir er mwyn llwyddo. Bydd y Cwrs Ymarfer Cyfreithwyr yn cael ei gyflwyno wyneb yn wyneb gydag elfennau o ddysgu cyfunol. Bydd sesiynau grŵp bach wyneb yn wyneb (SGS) yn cael eu cyfoethogi gan recordiadau darlithoedd, adnoddau ar-lein ac ymarferion sgiliau.

Bydd y sesiynau grŵp bach yn cael eu haddysgu mewn grwpiau fel arfer a bydd y rhan fwyaf o’r sesiynau yn parhau am oddeutu 2 awr, ond bydd rhai yn hirach neu'n fyrrach yn ddibynnol ar y sgiliau a'r pynciau a gaiff eu hystyried yn y sesiwn.  Bydd elfen ymarferol gref yn perthyn i’r addysgu ym mhob pwnc a bydd llawer o sesiynau grŵp bach hefyd yn cynnwys elfen o waith ymarferol. Bydd hyn yn helpu i wreiddio'ch gwybodaeth drwy gymhwyso'r gyfraith yn ymarferol ac yn eich galluogi i ddatblygu eich sgiliau dadansoddi. Byddwch hefyd yn cael llawer o gyfleoedd i ymarfer ateb y mathau perthnasol o gwestiynau a myfyrio ar eich dysgu er mwyn paratoi ar gyfer eich asesiadau SQE1.

 Mae'r addysgu ar draws modiwlau cam un wedi'i ddylunio mewn ffordd gyfannol fel y bydd y modiwlau'n ategu ei gilydd. Bydd y sgiliau y byddwch yn eu hymarfer yn y modiwlau SQE2 yn cael eu haddysgu yng nghyd-destun pwnc FLK gwahanol er mwyn sicrhau bod y gweithgareddau dysgu y byddwch yn ymgymryd â nhw yn y pynciau FLK yn sail i'r gweithgareddau sgiliau trwy roi'r wybodaeth bynciol sydd ei hangen arnoch. Bydd y gwersi sgiliau yn SQE2, yn eu tro, yn rhoi'r cyfle i chi ddatblygu eich arbenigedd pwnc trwy atgyfnerthu'r wybodaeth honno a rhoi cyfle pellach i chi gymhwyso, dadansoddi a gwerthuso wrth greu gwaith gwreiddiol yn y maes cyfreithiol hwnnw hefyd.  Bydd gwersi yn y pynciau SQE1 a sgiliau SQE2 yn rhedeg gydol y flwyddyn (o ddechrau mis Medi tan y mis Mai canlynol).

Byddwch yn cael eich cyflwyno i ymchwil gyfreithiol yn ystod y tymor cyntaf a’r ail dymor a fydd yn eich cynorthwyo i baratoi ar gyfer y Prosiect Ymchwil 15,000 o eiriau neu'r Portffolio Myfyriol. Bydd eich Prosiect Ymchwil / Portffolio Myfyriol yn cael ei oruchwylio wedi i chi gwblhau'r cam a addysgir.

Sut y caf fy asesu?

Mae'r Cwrs Ymarfer Cyfreithwyr yn cynnwys asesiadau ffurfiannol a chrynodol. Nid yw asesiadau ffurfiannol yn cyfrif tuag at eich gradd, ond yn hytrach yn rhoi cyfle i chi ymarfer ar gyfer eich asesiadau crynodol ac yn caniatáu i chi a'ch tiwtor fyfyrio ar y cynnydd rydych wedi'i wneud. Mae asesiadau crynodol yn cyfrif tuag at eich gradd. Mae eich marciau yn yr asesiadau hyn yn cyfrif tuag at eich dilyniant ffurfiol o gam un (modiwlau a addysgir) i gam dau (y traethawd hir), a thuag at benderfynu ar eich dyfarniad terfynol. Bydd yr asesiadau crynodol yng ngham un yn amrywio yn ôl modiwl:

Modiwlau Gwybodaeth Gyfreithiol Weithredol (FLK) SQE1 (FLK1 ac FLK2)

Caiff pob un o'r modiwlau hyn eu hasesu trwy ddau bapur arholiad crynodol, ar ffurf profion amlddewis, sy'n cynnwys ystod o gwestiynau amlddewis a chwestiynau sengl ateb gorau. Mae'r cwestiynau yn yr asesiadau hyn wedi'u cynllunio i brofi'r modd y cymhwysir egwyddorion cyfreithiol sylfaenol y gellir eu disgwyl gan gyfreithiwr newydd gymhwyso yng Nghymru a Lloegr heb iddo gyfeirio at lyfrau a nodiadau. Bydd gofyn i chi ddadansoddi senarios ffeithiol byr ac yna gwerthuso'r opsiynau a roddir i chi a dewis y cyngor cywir neu orau i'w roi i'r cleient. Mae'r asesiad ar gyfer y modiwlau hyn yn dilyn y dull asesu a ddefnyddir yn yr asesiad SQE1 allanol a gaiff ei redeg gan yr SRA. Bydd asesiadau ffurfiannol o fodiwlau FLK1 ac FLK2 yn dilyn ymagwedd debyg.  

Modiwl sgiliau cyfreithiol SQE2

Bydd yr asesiad yn cynnwys ymarfer ym mhob un o'r chwe sgìl SQE2:

• Cyfweld Cleientiaid a Nodiadau Presenoldeb / Dadansoddiadau Cyfreithiol
• Eiriolaeth
• Dadansoddiadau Achos a Mater
• Ymchwil Gyfreithiol
• Ysgrifennu Cyfreithiol; a
• Drafftio Cyfreithiol

Byddwch yn cael y cyfle i ymarfer pob sgìl sawl gwaith a byddwch yn derbyn adborth gan eich cyfoedion a'ch tiwtoriaid. Byddwch yn myfyrio ar eich gwaith eich hun er mwyn dewis yr enghreifftiau rydych am eu defnyddio ar gyfer eich asesiad crynodol.

Sylwer y bydd angen i chi gofrestru'n uniongyrchol gyda'r SRA i sefyll SQE1 ac SQE2 yn allanol a thalu'r ffioedd arholi a godir gan yr SRA a'i ddarparwr asesu, Kaplan. Nid yw'r ffioedd arholiad SQE allanol hynny wedi’u cynnwys yn ffioedd y cwrs ar gyfer y Cwrs Ymarfer Cyfreithwyr.

Prosiect Ymchwil / Portffolio Myfyriol

Byddwch yn cael y cyfle i adeiladu ar y sgiliau ymchwil gyfreithiol a'r wybodaeth yr ydych wedi’i hennill ar y Cwrs Ymarfer Cyfreithwyr trwy gyflwyno darn o waith 15,000 o eiriau. Bydd hwn naill ai'n Brosiect Ymchwil (darn o ymchwil annibynnol fanwl ar faes ymarfer cyfreithiol) neu'n Bortffolio Myfyriol (myfyrio ar eich profiad mewn gwaith pro bono neu brofiad gwaith cyfreithiol a'i werthuso). Bydd yr ail opsiwn ond yn cael ei gynnig os oes gennych brofiad sylweddol o waith cyfreithiol neu weithgareddau pro bono.

Sut y caf fy nghefnogi?

Rhoddir pwyslais ar ddysgu wyneb yn wyneb ar y Cwrs Ymarfer Cyfreithwyr a byddwch yn cael cyswllt sylweddol â'ch tiwtoriaid a'ch cyd-fyfyrwyr drwy'r nifer fawr o sesiynau grŵp bach.

Cefnogir yr holl fodiwlau gan adnoddau ar yr amgylchedd ddysgu rhithwir, lle byddwch yn cyrchu ystod eang o ddeunyddiau ar gyfer eich modiwlau, gan gynnwys recordiadau o ddarlithoedd a phrofion  amlddewis.

Byddwch yn cael cymorth bugeiliol penodedig drwy ein cynllun tiwtor personol. Rydym yn cynnig rhaglen helaeth o ddarlithoedd gyrfaoedd a gweithdai yn yr Ysgol gydag Ymgynghorydd Gyrfaoedd mewnol a'r cyfle i ymgysylltu ag un o gynlluniau pro bono'r Ysgol. Mae Swyddog Anabledd ac Amrywiaeth yn sicrhau bod addasiadau rhesymol yn cael eu gwneud ar gyfer myfyrwyr ag anableddau.

Mae gan y Brifysgol amrywiaeth o wasanaethau i’ch cefnogi, gan gynnwys y Gwasanaeth Gyrfaoedd, y Gwasanaeth Cwnsela, y Gwasanaeth Anabledd a Dyslecsia, y Gwasanaeth Cymorth i Fyfyrwyr, ac adnoddau llyfrgell gwych ar-lein ac ar y safle.

Byddwch hefyd yn cael eich cefnogi gan eich goruchwyliwr yn ystod eich Prosiect Ymchwil neu Bortffolio Myfyriol, a fydd yn cynnwys cyfarfodydd goruchwylio a drefnwyd.

Adborth

Byddwch yn derbyn adborth ar eich asesiadau ffurfiannol a chrynodol gydol y cwrs i'ch helpu i wella'ch gwaith. Bydd eich tiwtoriaid hefyd yn rhoi adborth llafar ac ysgrifenedig i chi mewn sesiynau grŵp bach, a byddwch yn cael y cyfle i roi adborth i’ch cyfoedion a’i dderbyn. Bydd eich goruchwyliwr yn rhoi adborth i chi ar y Prosiect Ymchwil neu'r Portffolio Myfyriol ac yn eich cefnogi i ddatblygu eich cynnig ac ymgymryd â chamau cychwynnol eich ymchwil.

Pa sgiliau y byddaf yn eu hymarfer a’u datblygu?

Mae deilliannau dysgu’r rhaglen hon yn disgrifio'r hyn y byddwch chi wedi’i gyflawni erbyn diwedd y rhaglen ym Mhrifysgol Caerdydd ac yn nodi'r wybodaeth a'r medrau fydd gennych chi. Byddant hefyd yn eich helpu i ddeall yr hyn a ddisgwylir gennych

Pan fyddwch wedi llwyddo i gwblhau eich Rhaglen, byddwch yn gallu:

Gwybodaeth a Dealltwriaeth:

GD 1: Nodi a gwerthuso problemau dilys sy'n wynebu cleientiaid ar draws meysydd ymarfer allweddol Gwybodaeth Gyfreithiol Weithredol.

GD 2: Llunio atebion priodol ac effeithiol trwy gymhwyso dealltwriaeth gynhwysfawr o'r meysydd Gwybodaeth Gyfreithiol Weithredol, gan gymhwyso'r ddealltwriaeth hon i egwyddorion cyfreithiol, gweithdrefnol a thystiolaethol cymhleth.

GD 3: Amgyffred problemau moesegol yn systematig o fewn fframwaith gofynion proffesiynol a rheoliadol, gan lunio ymatebion a dulliau gweithredu priodol ac effeithiol.

GD 4: Datblygu darn estynedig o waith gan ddefnyddio gwaith myfyrio neu ymchwil sy'n canolbwyntio ar un neu fwy o feysydd ymarfer cyfreithiol, gan ddefnyddio methodolegau a sgiliau dadansoddi priodol.

Sgiliau Deallusol:

SD 1: Dangos dull gwybodus beirniadol o gasglu a gwerthuso gwybodaeth, myfyrio ar unrhyw fylchau yn yr wybodaeth, a nodi ffynhonnell yr wybodaeth ofynnol.

SD 2: Datblygu ac amddiffyn dadleuon perswadiol ar lafar a/neu'n ysgrifenedig, gan dynnu ar ymchwil gyfreithiol annibynnol a/neu ddadansoddiad o agweddau cyfreithiol, ffeithiol, gweithdrefnol a thystiolaethol achos.

SD 3: Syntheseiddio llawer iawn o wybodaeth gyfreithiol a'i defnyddio i ddadansoddi trafodion ac achosion ymarferol cleientiaid.

SD 4: Mynegi chwilfrydedd deallusol drwy eich ymchwil, er mwyn mynd ar drywydd gwybodaeth a dealltwriaeth bellach o fewn maes arbenigol.

Sgiliau Ymarferol Proffesiynol:

SY 1: Defnyddio Sgiliau Cyfreithiol ysgrifenedig a llafar allweddol i gyflawni amcanion cleientiaid a chymhwyso a throsglwyddo sgiliau i gyd-destunau gwahanol.

SY 2: Gwerthfawrogi amcanion cleient, gan ystyried y blaenoriaethau ariannol, masnachol a phersonol, y cyfyngiadau, a'r risg a'r buddion cysylltiedig, ac argymell dulliau priodol o gyflawni'r amcanion.

SY 3: Dadansoddi problemau cyfreithiol cymhleth trwy werthuso a syntheseiddio’r data sydd ar gael a dadleuon gwrthwynebol er mwyn creu methodoleg ar gyfer eu datrys.

SY 4: Cyfleu syniadau cymhleth yn effeithiol, ar lafar ac yn ysgrifenedig, cyfrannu at drafodaethau, a'u cyflwyno yn effeithiol.

SY 5: Gwerthuso ystod o ffynonellau priodol yn feirniadol, gan ddefnyddio eich sgiliau ymchwil i farnu dilysrwydd casgliadau cyfreithiol.

SY 6: Myfyrio ar eich dysgu a'ch adborth eich hun mewn modd beirniadol, gan osod nodau ar gyfer datblygiad personol parhaus ac ymarfer proffesiynol yn y dyfodol.

Sgiliau Trosglwyddadwy/Allweddol:

SA 1: Cyflwyno gwybodaeth, methodolegau, a chanlyniadau ysgrifenedig i safon sy'n addas ar gyfer amrywiaeth o gynulleidfaoedd, gan gynnwys ymarferwyr, cleientiaid ac academyddion.

SA 2: Cynllunio, trefnu a rheoli gwaith yn effeithiol, gan ddangos annibyniaeth a menter.

SA 3: Datblygu sgiliau rhesymu rhesymegol a meddwl yn feirniadol trwy drafod a dadlau.