Cymdeithaseg (MSc)

Sut y caf fy addysgu?

Gan dynnu ar ymchwil gyfredol sydd ar flaen y gad ym maes ymholi cymdeithasegol, mae’r rhaglen yn cynnig y cyfle i astudio materion cymdeithasol byw mewn modd bywiog a deniadol. Addysgir y cwrs gan arbenigwyr a gydnabyddir yn rhyngwladol, sy’n adlewyrchu cymeriad cyfoes a byd-eang y cwrs. Bydd pob cydran o’r elfen a addysgir o’r cwrs yn tynnu ar ddamcaniaeth gymdeithasol glasurol a chyfoes, yn ogystal ag ar arloesedd cyfredol yn nulliau ymchwil y gwyddorau cymdeithasol. Byddwch yn dysgu cymhwyso elfennau craidd cynnwys y cwrs ac ymgysylltu'n feirniadol â nhw, a hynny trwy fynd i’r afael â sbardunau aflonyddwch a newid cymdeithasol yn y 'byd go iawn'. Bydd y sgiliau hyn yn cael eu cymhwyso yn y traethawd hir, sef darn o ymchwil annibynnol a wneir gan bob myfyriwr ar y rhaglen, a hynny i bwnc o'u dewis. 

Y prif ddull cyflwyno fydd addysgu wyneb yn wyneb ar amrywiaeth o ffurfiau. Bydd y dulliau addysgu yn cynnwys darlithoedd sy’n darparu ‘mapiau ffordd’ ar gyfer meysydd cynnwys newydd a heriol, ynghyd â sesiynau mwy rhyngweithiol a fydd yn rhoi cyfle i chi drafod eich ymgysylltiad eich hun â’r deunyddiau a’r cynnwys ag arbenigwyr pwnc a chymheiriaid. Bydd y staff yn hwyluso cyfleoedd dysgu sy’n eich galluogi i gysylltu “trafferthion personol â materion cyhoeddus (byd-eang)” mewn modd beirniadol. Trefnir y sesiynau o amgylch syniadau a dulliau cymdeithasegol allweddol, gyda gweithgareddau’n cael eu cynllunio i asesu eich gallu i wneud synnwyr o fywyd cymdeithasol yn yr 21^ain Ganrif. 

Bydd disgwyl i chi fynychu'r holl weithgareddau addysgu a nodir ar yr amserlen. Bydd disgwyl i chi hefyd ymgymryd ag astudiaeth annibynnol i baratoi ar gyfer gweithgareddau dosbarth, a datblygu'r rhain er mwyn cwblhau eich asesiadau yn llwyddiannus. Ar gyfer cam y traethawd hir, bydd goruchwyliwr yn cael ei neilltuo i chi a fydd yn gweithio gyda chi i ddatblygu eich syniadau a chwblhau prosiect ymchwil annibynnol.

Sut y caf fy asesu?

Oherwydd natur yr wybodaeth, y ddealltwriaeth a'r sgiliau a ddatblygir yn ystod y cwrs, y prif ddull asesu fydd eitemau gwaith cwrs ysgrifenedig. Bydd y rhain ar amrywiaeth o ffurfiau, megis traethodau hir, briffiau polisi, dadansoddi data eilaidd, darnau myfyriol byrrach, nodiadau dadansoddol, a thasgau portffolio. Gellir defnyddio mathau eraill o waith ysgrifenedig hefyd, megis maniffestos ac ysgrifennu creadigol. Bydd y tasgau ysgrifenedig hyn yn cael eu hategu gan fathau eraill o asesu lle bo hyn yn briodol i'r modiwl. Mae enghreifftiau o'r tasgau hyn yn cynnwys fideos neu bosteri, cyflwyniadau grŵp neu unigol, a phrofion ar-lein neu yn y dosbarth.

Bydd i bob modiwl fwy nag un eitem asesu, a rennir fel arfer rhwng tasgau canol tymor a thasgau diwedd y semester. Bydd yr asesiadau’n cael eu mapio’n agos i ddeilliannau dysgu’r modiwl a’r rhaglen, a bydd gennych ddigon o gyfle i ddangos eich cymhwysedd a’ch arbenigedd ar draws yr amrywiaeth o asesiadau a gynigir gan y rhaglen.

Bydd pob modiwl yn darparu o leiaf un cyfle i gael adborth ffurfiannol (gweler yr adran ar “Sut y byddaf yn cael fy nghefnogi?”). Bydd yna gyswllt agos rhwng yr adborth ffurfiannol a'r asesiadau crynodol, a bydd yn eich helpu i weithio tuag at gwblhau’r asesiadau hynny'n llwyddiannus. Darperir adborth (ar wahanol ffurfiau) ar bob darn o waith cwrs. 

Sut y caf fy nghefnogi?

Bydd tiwtor personol o’r tîm cymdeithaseg yn cael ei neilltuo i chi, a bydd ar gael i drafod eich cynnydd a rhoi cyngor ac arweiniad ar eich astudiaethau academaidd. At hynny, gall Hyb y Myfyrwyr, a'r Swyddfa Rhaglenni a Addysgir, sydd ill dau wedi'u lleoli yn Adeilad Morgannwg, ddarparu cyngor ar sut i gael mynediad at wasanaethau’r brifysgol.

Mae pob modiwl o’r cwrs yn defnyddio Amgylchedd Dysgu Rhithwir (VLE) Prifysgol Caerdydd, sef Dysgu Canolog, lle y byddwch yn dod o hyd i ddeunyddiau cyrsiau, dolenni i ddeunyddiau cysylltiedig, a gwybodaeth sy'n ymwneud â thasgau asesu, yn cynnwys, er enghraifft, meini prawf asesu, sgiliau astudio, a chanllawiau ar gyfer cyflwyno asesiadau.

Bydd staff academaidd yn darparu cymorth penodol ar gyfer y modiwlau ac yn cynnal oriau swyddfa wythnosol neu sesiynau galw heibio, a hynny naill ai wyneb yn wyneb neu ar-lein. Cefnogir y traethawd hir gan oruchwyliwr a fydd yn cwrdd â chi’n rheolaidd ac yn eich arwain at gwblhau’r darn hwn o waith annibynnol.

Adborth Ffurfiannol

Mae adborth ffurfiannol yn adborth nad yw’n cyfrannu at eich cynnydd nac at benderfyniadau ynghylch dosbarthiad y radd.  Nod adborth ffurfiannol yw gwella eich dealltwriaeth a'ch dysgu cyn i chi gwblhau'r eitemau gwaith cwrs sy'n rhan o'ch gradd ar gyfer pob modiwl. Bwriad adborth ffurfiannol yw eich helpu i nodi cryfderau a gwendidau yn eich gwaith, yn ogystal â meysydd sgiliau penodol i’w datblygu. 

Ceir ffurf allweddol ar adborth ffurfiannol trwy gymryd rhan mewn gweithgareddau dysgu, yn enwedig trafodaethau yn y dosbarth. Mae'r rhain yn gyfleoedd pwysig i chi brofi eich dealltwriaeth o syniadau a chysyniadau allweddol, yn ogystal ag i roi cynnig ar ddadleuon cyn ysgrifennu eitemau gwaith cwrs. Bydd pob modiwl yn cynnwys ystod o gyfleoedd ychwanegol i gael adborth ffurfiannol, megis cyflwyniadau, arwain trafodaethau, adroddiadau byr, adolygiadau, a mathau eraill o waith ysgrifenedig. Mae'r cyfleoedd hyn i gyd wedi'u cynllunio i'ch helpu i ddatblygu eich gwaith ar gyfer yr eitemau asesu crynodol ym mhob modiwl a’r ymchwil ar gyfer eich traethawd hir.  

Adborth Crynodol

Yn ogystal â'ch gradd, bydd adborth ar asesiadau crynodol yn amlygu cryfderau a gwendidau penodol mewn perthynas â'r meini prawf marcio ar gyfer y dasg honno a/neu'r modiwl. O'r adborth hwn, byddwch yn gallu deall yn well i ba raddau yr ydych wedi bodloni deilliannau dysgu'r modiwl, yn ogystal â'r meysydd y mae angen eu datblygu. Bydd yr adborth yn cael ei ysgrifennu mewn modd adeiladol fel y gallwch nodi meysydd clir i'w gwella cyn eich asesiadau nesaf. 

Mae’r holl adborth ar y gwaith cwrs yn cael ei ddarparu’n electronig i sicrhau ei fod yn hygyrch ac yn hawdd ei ddarllen. Efallai y bydd cynullwyr rhai modiwlau yn dewis gwneud recordiadau llais digidol ychwanegol. Yn achos profion dosbarth, bydd cynullydd y modiwl yn rhoi adborth i'r dosbarth cyfan, ond gallwch hefyd drafod eich papur prawf unigol a'r marc a ddyfarnwyd iddo â chynullydd y modiwl.

Pa sgiliau y byddaf yn eu hymarfer a’u datblygu?

Erbyn diwedd y Rhaglen, byddwch yn gallu:

Gwybodaeth a Dealltwriaeth:

• GD 1 Amlygu dealltwriaeth ddofn a systematig o amrywiaeth o newidiadau a heriau byd-eang o safbwynt cymdeithasegol 
• GD 2 Trafod damcaniaeth ac ymchwil gymdeithasegol glasurol a chyfoes o ran materion “y byd go iawn” mewn modd beirniadol
• GD 3 Asesu a gwerthuso adroddiadau cymdeithasegol gwahanol, sy'n aml yn cystadlu, am ffenomenau cyfoes  
• GD 4 Amlygu gwerthfawrogiad beirniadol o ddulliau ymchwil cymdeithasol traddodiadol ac arloesol, a’r modd y cânt eu cymhwyso wrth astudio'r byd cymdeithasol
• GD 5 Cynllunio a datblygu traethawd ymchwil annibynnol sy'n canolbwyntio ar y maes cymdeithaseg, gan ddefnyddio sgiliau dadansoddi a dulliau ymchwil priodol

Sgiliau Deallusol:

• SD 1 Syntheseiddio ac integreiddio damcaniaeth a data wrth lunio dadansoddiad cymdeithasegol amlwg o faterion a ffenomenau cyfoes 
• SD 2 Dewis a chymhwyso damcaniaeth gymdeithasol glasurol a chyfoes wrth drafod materion cymdeithasol cyfoes 
• SD 3 Casglu a/neu werthuso data ymchwil a gynhyrchir gan amrywiaeth o ddulliau ymchwil cymdeithasol ac sy'n ymwneud â materion o bwys cymdeithasegol.
• SD 4 Nodi a datblygu pwnc ymholi cymdeithasegol addas i'w ddilyn mewn ymchwil annibynnol

Sgiliau Ymarferol Proffesiynol:

• SY 1 Beirniadu, herio, a symud y tu hwnt i ddealltwriaeth synnwyr cyffredin o ffenomen gymdeithasol  
• SY 2 Amddiffyn a dadlau dros gynigion a lywir gan ddamcaniaeth ac sydd â sail empirig i hybu cyfiawnder cymdeithasol a lleddfu anghydraddoldebau
• SY 3 Cyfleu dealltwriaeth o gymhlethdod mewn iaith sy'n fanwl gywir, yn berswadiol ac yn ddeallusol drylwyr
• SY 4 Dadansoddi a gwerthuso ystod o dystiolaeth yn feirniadol i lunio barn resymegol ar gyfer traethawd ymchwil

Sgiliau Trosglwyddadwy/Allweddol:

• SA 1 Syntheseiddio a beirniadu canfyddiadau ymchwil a damcaniaethau sy’n ymwneud â phroblemau cymdeithasol amrywiol ar gyfer ystod o gynulleidfaoedd gwahanol
• SA 2 Defnyddio a chymhwyso technoleg gwybodaeth mewn gwaith ysgolheigaidd ac i gynnal ymchwil ansoddol neu feintiol
• SA 3 Datblygu strategaethau effeithiol ar gyfer cynnal ymchwil annibynnol, rheoli amser, a gweithio gyda chymheiriaid mewn sefydliad/gweithle  
• SA 4 Cyfathrebu crynodebau, deongliadau a gwerthusiadau o waith ymchwil a pholisi mewn amrywiaeth o fformatau ysgrifenedig
• SA 5 Yn annibynnol, casglu, gwerthuso a dadansoddi data a thystiolaeth ar gyfer tasg ymchwil, yn cynnwys traethawd ymchwil