Dulliau Ymchwil y Gwyddorau Cymdeithasol (MSc)

Sut y caf fy addysgu?

Gan ddefnyddio’r dulliau mae eich darlithwyr yn eu defnyddio yn eu hymchwil nhw, mae’r rhaglen hon yn cynnig cyfle i ddatblygu sgiliau ymchwil uwch a’u cymhwyso i bynciau o’ch dewis mewn modd bywiog a diddorol. Caiff y cwrs hwn ei addysgu gan arbenigwyr a gydnabyddir yn rhyngwladol o’r pum ysgol sy’n cyfrannu iddo – Ysgol y Gwyddorau Cymdeithasol, Ysgol Busnes Caerdydd, yr Ysgol Daearyddiaeth a Chynllunio, yr Ysgol Seicoleg, ac Ysgol y Gyfraith a Gwleidyddiaeth – gan adlewyrchu cymeriad rhyngddisgyblaethol y cwrs. Mae’r cefndiroedd disgyblaeth yn cynnwys cymdeithaseg, troseddeg, addysg, gwaith cymdeithasol, polisi cymdeithasol, seicoleg gymdeithasol, astudiaethau cyfreithiol-gymdeithasol, gwleidyddiaeth a daearyddiaeth ddynol.

Mae’r rhaglen wedi’i strwythuro o gwmpas semester craidd yr hydref, gan gyflwyno myfyrwyr i’r athroniaethau sy’n sylfaen i ymchwil wyddonol gymdeithasol yn ogystal â dulliau ansoddol a meintiol. Dilynir hyn gan semester y gwanwyn, sy’n cynnig mwy o opsiynau, gan y byddwch yn dewis dulliau uwch i fireinio eich sgiliau, a fydd yn cael eu cymhwyso yn y traethawd hir, sef darn o ymchwil annibynnol o’ch dewis. Yn olaf, bydd y traethawd hir yn cael ei oruchwylio gan gydweithiwr o un o’r ysgolion cyfranogol, gan eich galluogi i gymhwyso eich dysgu methodolegol i bwnc ymchwil ym maes: cymdeithaseg, troseddeg, addysg, gwaith cymdeithasol, polisi cymdeithasol, astudiaethau cyfreithiol-gymdeithasol, gwleidyddiaeth neu ddaearyddiaeth ddynol. Bydd yr holl ymchwil a gynhelir fel rhan o’r radd hon yn unol â phroses gymeradwyo moeseg y Brifysgol.

Y prif ddull cyflwyno fydd addysgu wyneb yn wyneb ar amrywiaeth o ffurfiau. Bydd y dulliau addysgu yn cynnwys darlithoedd sy’n darparu ‘mapiau ffordd’ ar gyfer meysydd cynnwys newydd a heriol, ynghyd â sesiynau mwy rhyngweithiol a fydd yn rhoi cyfle i chi drafod eich ymgysylltiad eich hun â’r deunyddiau a’r cynnwys ag arbenigwyr pwnc a chymheiriaid. Bydd disgwyl i chi fynd i'r holl weithgareddau addysgu a nodir ar yr amserlen. Bydd disgwyl i chi hefyd ymgymryd ag astudiaeth annibynnol i baratoi ar gyfer gweithgareddau dosbarth, a datblygu'r rhain er mwyn cwblhau eich asesiadau’n llwyddiannus. Ar gyfer cam y traethawd hir, bydd goruchwyliwr yn cael ei neilltuo i chi a fydd yn gweithio gyda chi i ddatblygu eich syniadau a chwblhau prosiect ymchwil annibynnol.

Sut y caf fy asesu?

Oherwydd natur y wybodaeth, y ddealltwriaeth a'r sgiliau a ddatblygir yn ystod y cwrs, y prif ddull asesu fydd eitemau gwaith cwrs ysgrifenedig. Bydd y rhain ar amrywiaeth o ffurfiau, fel traethodau hir, darnau myfyriol byrrach, nodiadau dadansoddol, a thasgau portffolio. Bydd y tasgau ysgrifenedig hyn yn cael eu hategu gan fathau eraill o asesu lle bo hyn yn briodol i'r modiwl, gan gynnwys profion dosbarth ac asesiadau ar ffurf arholiad.

Bydd i bob modiwl fwy nag un eitem asesu, a rennir fel arfer rhwng tasgau canol tymor a thasgau diwedd y semester. Bydd yr asesiadau’n cael eu mapio’n agos i ddeilliannau dysgu’r modiwl a’r rhaglen, a bydd gennych ddigon o gyfle i ddangos eich cymhwysedd a’ch arbenigedd ar draws yr amrywiaeth o asesiadau a gynigir gan y rhaglen. Bydd pob modiwl yn darparu o leiaf un cyfle ar gyfer adborth ffurfiannol. Bydd yna gyswllt agos rhwng yr adborth ffurfiannol a'r asesiadau crynodol, a bydd yn eich helpu i weithio tuag at gwblhau’r asesiadau hynny'n llwyddiannus. Darperir adborth (ar wahanol ffurfiau) ar bob darn o waith cwrs.

Ar ôl cwblhau'r gydran a addysgir yn llwyddiannus, byddwch yn paratoi traethawd hir hyd at 20,000 o eiriau.

Sut y caf fy nghefnogi?

Bydd tiwtor personol o’r tîm addysgu’n cael ei neilltuo i chi, a bydd ar gael i drafod eich cynnydd a rhoi cyngor ac arweiniad ar eich astudiaethau academaidd. At hynny, gall Hyb y Myfyrwyr, a'r Swyddfa Rhaglenni a Addysgir, ddarparu cyngor ar sut i gael mynediad at wasanaethau’r brifysgol.

Mae pob modiwl o’r cwrs yn defnyddio Amgylchedd Dysgu Rhithwir (VLE) Prifysgol Caerdydd, sef Dysgu Canolog, lle y byddwch yn dod o hyd i ddeunyddiau cyrsiau, dolenni i ddeunyddiau cysylltiedig, a gwybodaeth sy'n ymwneud â thasgau asesu, yn cynnwys, er enghraifft, meini prawf asesu, sgiliau astudio, a chanllawiau ar gyfer cyflwyno asesiadau.

Bydd staff academaidd yn darparu cymorth penodol ar gyfer y modiwlau ac yn cynnal oriau swyddfa wythnosol neu sesiynau galw heibio, a hynny naill ai wyneb yn wyneb neu ar-lein. Cefnogir y traethawd hir gan oruchwyliwr a fydd yn cwrdd â chi’n rheolaidd ac yn eich arwain at gwblhau’r darn hwn o waith annibynnol.

Adborth ffurfiannol

Mae adborth ffurfiannol yn adborth nad yw’n cyfrannu at eich cynnydd nac at benderfyniadau ynghylch dosbarthiad y radd.  Nod adborth ffurfiannol yw gwella eich dealltwriaeth a'ch dysgu cyn i chi gwblhau'r eitemau gwaith cwrs sy'n rhan o'ch gradd ar gyfer pob modiwl. Bwriad adborth ffurfiannol yw eich helpu i nodi cryfderau a gwendidau yn eich gwaith, yn ogystal â meysydd sgiliau penodol i’w datblygu.

Ceir ffurf allweddol ar adborth ffurfiannol trwy gymryd rhan mewn gweithgareddau dysgu, yn enwedig trafodaethau yn y dosbarth. Mae'r rhain yn gyfleoedd pwysig i chi brofi eich dealltwriaeth o syniadau a chysyniadau allweddol, yn ogystal ag i roi cynnig ar ddadleuon cyn ysgrifennu eitemau gwaith cwrs. Mae'r cyfleoedd hyn i gyd wedi'u cynllunio i'ch helpu i ddatblygu eich gwaith ar gyfer yr eitemau asesu crynodol ym mhob modiwl a’r ymchwil ar gyfer eich traethawd hir. 

Adborth Crynodol

Yn ogystal â'ch gradd, bydd adborth ar asesiadau crynodol yn amlygu cryfderau a gwendidau penodol mewn perthynas â'r meini prawf marcio ar gyfer y dasg honno a/neu'r modiwl. O'r adborth hwn, byddwch yn gallu deall yn well i ba raddau yr ydych wedi bodloni deilliannau dysgu'r modiwl, yn ogystal â'r meysydd y mae angen eu datblygu. Bydd yr adborth yn cael ei ysgrifennu mewn modd adeiladol fel y gallwch nodi meysydd clir i'w gwella cyn eich asesiadau nesaf. 

Mae’r holl adborth ar y gwaith cwrs yn cael ei ddarparu’n electronig i sicrhau ei fod yn hygyrch ac yn hawdd ei ddarllen. Efallai y bydd cynullwyr rhai modiwlau yn dewis gwneud recordiadau llais digidol ychwanegol. Yn achos profion dosbarth, bydd cynullydd y modiwl yn rhoi adborth i'r dosbarth cyfan, ond gallwch hefyd drafod eich papur prawf unigol a'r marc a ddyfarnwyd iddo â chynullydd y modiwl.

Pa sgiliau y byddaf yn eu hymarfer a’u datblygu?

Mae deilliannau dysgu’r rhaglen yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu meithrin. Byddant hefyd yn eich helpu i ddeall yr hyn a ddisgwylir gennych.

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Dangos dealltwriaeth systematig o ystod o ddulliau gwyddonol cymdeithasol.
• Dangos ymagwedd feirniadol tuag at theorïau presennol ac ymagweddau at ddulliau gwyddorau cymdeithasol, gan gynnwys gwerthfawrogi’r berthynas rhwng gwahanol ymagweddau disgyblaethol.
• Dangos dealltwriaeth ddofn o ddulliau penodol sy’n cael ei llywio gan ddarllen arbenigol.

Sgiliau deallusol:

• Gwerthuso’n feirniadol syniadau neu ddulliau ymchwil a llunio dadl haniaethol, gan ddadlau dros ymagweddau methodolegol amgen lle bo’n berthnasol.
• Dylunio a chynnal ymchwiliadau’n annibynnol i fynd i’r afael â phynciau o ddiddordeb damcaniaethol neu bolisi, a gwerthuso ymagweddau methodolegol i gynhyrchu data empirig. 
• Nodi, diffinio a dadansoddi materion a syniadau cymhleth, gan arfer barn feirniadol wrth werthuso ffynonellau gwybodaeth a dangos dadansoddi hyblyg a chreadigol o ddata/theorïau/tystiolaeth gymhleth neu wrthgyferbyniol.

Sgiliau ymarferol proffesiynol:

• Dangos cymhwysedd wrth gymhwyso dulliau gwyddonol cymdeithasol penodol mewn ymchwiliad o’r byd cymdeithasol, gan gasglu data ansoddol a/neu feintiol mewn modd trylwyr a methodolegol gadarn.
• Dangos gallu ar gyfer gwerthuso dadleuon methodolegol yn feirniadol, gan asesu ymagweddau sy’n cystadlu wrth ymchwilio’n empirig i ffenomena gwyddorau cymdeithasol.
• Dangos dealltwriaeth o’r heriau ymarferol a wynebir wrth gasglu data empirig a dangos gwydnwch, y gallu i addasu a chreadigrwydd wrth ymateb.

Sgiliau trosglwyddadwy/allweddol:

• Ymgysylltu’n gynhyrchiol ag adborth i weithredu gwelliannau, gan gymryd cyfrifoldeb am eich perfformiad eich hun.
• Cyfathrebu’n effeithiol mewn ystod o fformatau (gan gynnwys strwythur, cywirdeb gramadegol ac ymwybyddiaeth o gynulleidfa/genre).
• Defnyddio a chymhwyso technoleg gwybodaeth mewn gwaith ysgolheigaidd ac i gynnal ymchwil ansoddol neu feintiol.