Seicoleg (MSc)

Sut y caf fy addysgu?

Caiff ein dulliau addysgu eu llywio’n helaeth gan ymchwil ac maen nhw’n cyfuno manylrwydd academaidd gyda pherthnasedd ymarferol. Mae ein tîm addysgu, sydd o fri rhyngwladol, yn cynnwys academyddion sydd ar flaen y gad o ran gwybodaeth yn eu maes. Maen nhw’n dod â’r gwersi maen nhw wedi eu dysgu o’u hymchwil ddiweddaraf i’r ystafell ddosbarth, gan eich galluogi i feddwl yn feirniadol am seicoleg a chynnig enghreifftiau a senarios cyfredol, go iawn.

Mae'r rhan fwyaf o’r modiwlau yn cynnwys cymysgedd o ddarlithoedd, addysgu mewn grwpiau bach (seminarau a thiwtorialau), a sesiynau ymarferol. Mewn darlith, bydd y darlithydd yn rhoi trosolwg o agwedd benodol ar gynnwys y modiwl (yn ogystal â chyfleoedd i chi ofyn cwestiynau a bod yn fyfyriol). Caiff darlithoedd eu recordio a byddant ar gael yn fuan ar ôl eu traddodi i helpu gydag eglurder a dealltwriaeth o'r pwnc. Mewn seminarau a thiwtorialau, cewch gyfle i drafod syniadau, cymhwyso cysyniadau, a chyfnerthu eich dealltwriaeth yn y pwnc. Mewn sesiynau ymarferol, byddwch yn gallu cymhwyso'r technegau a'r theori rydych chi wedi dysgu amdanyn nhw a chael profiad o gynnal arbrofion.

Bydd modiwl y lleoliad, a gwblheir dros yr haf, yn cynnwys dysgu trwy brofiad (hyfforddiant “yn y gwaith”). Byddwch yn ennill sgiliau a gwybodaeth trwy weithio'n agos gyda seicolegydd proffesiynol.

Sut y caf fy asesu?

Mae tasgau asesu yn amrywio o fodiwl i fodiwl. Gallwch ddisgwyl cymysgedd o arholiadau, gwaith cwrs, traethodau, gwaith ymarferol, cyflwyniadau, prosiectau unigol a grŵp, a phortffolio myfyriol.

Sut y caf fy nghefnogi?

Byddwch yn cael tiwtor personol ar ddechrau eich astudiaethau. Fel arfer, bydd eich tiwtor personol yn addysgu ar eich cwrs gradd chi a byddwch yn cadw’r un tiwtor personol drwy gydol eich cwrs.

Bydd eich tiwtor personol yn gallu rhoi cyngor i chi ar faterion academaidd. Os cewch broblemau sy'n effeithio ar eich astudiaethau, eich tiwtor personol bob tro yw’r person cyntaf y dylech gysylltu ag ef gan y bydd yn gallu eich cyfeirio at ystod eang o wasanaethau cymorth arbenigol i fyfyrwyr drwy law’r Brifysgol ac Undeb y Myfyrwyr fel y bo'n briodol.

I gael gwybodaeth gyffredinol, mae staff cymorth academyddion proffesiynol y Tîm Myfyrwyr Ôl-raddedig ar gael wyneb yn wyneb, dros y ffôn neu e-bost yn ystod y tymor i ateb eich cwestiynau.

Byddwch yn cael adborth ysgrifenedig ar yr holl waith cwrs. Bydd hyn yn cael ei roi mewn digon o amser i'ch hysbysu sut i gwblhau'r darn nesaf o waith cysylltiedig. Fe'ch anogir hefyd i siarad â'ch tiwtoriaid os oes angen arweiniad ychwanegol arnoch ar sut i wella.

Pa sgiliau y byddaf yn eu hymarfer a’u datblygu?

Mae deilliannau dysgu’r rhaglen yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu meithrin. Byddant hefyd yn eich helpu i ddeall yr hyn a ddisgwylir gennych.

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth

• Dangos gwybodaeth systematig a dealltwriaeth feirniadol o ddamcaniaethau a chysyniadau seicolegol allweddol a'u datblygiad hanesyddol.
• Gwerthuso damcaniaethau a chysyniadau seicolegol yn feirniadol, gan ddefnyddio tystiolaeth empirig i gefnogi dadansoddi a dadlau, o fewn a thu hwnt i faes seicoleg.
• Dangos gwybodaeth systematig a dealltwriaeth feirniadol o berthnasedd a chyfyngiadau ymchwil seicolegol mewn cyd-destunau yn y byd go iawn ac ar draws diwylliannau a chymunedau.
• Dangos gwybodaeth arbenigol am batrymau ymchwil allweddol, gan gynnwys dulliau meintiol ac ansoddol, materion moesegol, offer digidol, a thechnegau ystadegol priodol, i ymchwiliadau seicolegol.

Sgiliau Deallusol

• Cymhwyso a gwerthuso ystod o dechnegau ymchwil yn feirniadol, gan gynnwys dulliau meintiol ac ansoddol, a thechnegau mesur, i ymchwilio i gwestiynau, gan ddefnyddio offer digidol/electronig a dulliau ystadegol priodol.
• Dangos defnydd effeithiol o sgiliau ymchwil gwyddonol i ddylunio arbrofion moesegol gadarn ac asesiadau beirniadol o gwestiynau ymchwil gan ddefnyddio dulliau ansoddol a meintiol.
• Cynllunio a chynnal prosiect ymchwil yn annibynnol gan ddefnyddio theori ac ymchwil empirig.
• Gwerthuso'n feirniadol i lefel arbenigol sut mae ffactorau seicolegol yn dylanwadu ar ymddygiad mewn ymchwil a chyd-destunau yn y byd go iawn.

Sgiliau Ymarferol Proffesiynol

• Dangos sut mae cymhwyso egwyddorion moesegol arbenigol mewn ymchwil seicolegol ac ymarfer proffesiynol.
• Myfyrio ar gymhwyso theori ac ymarfer seicolegol, a’u gwerthuso, mewn lleoliad proffesiynol yn y byd go iawn.
• Cyfleu syniadau seicolegol cymhleth a'u gwerthusiad yn glir, gan ddefnyddio fformatau llafar, ysgrifenedig a digidol, wrth ystyried amrywiaeth a goblygiadau moesegol.

Sgiliau Trosglwyddadwy/Allweddol

• Casglu gwybodaeth a chreu syniadau’n annibynnol, gan gynnwys defnyddio ystod o offer digidol i gyfleu gwybodaeth yn glir ac yn briodol, gydag ymwybyddiaeth o'r gynulleidfa.
• Cyfrannu at waith tîm mewn amrywiaeth o sefyllfaoedd gyda'r sgiliau angenrheidiol ar gyfer cydweithio, gan ddangos sensitifrwydd i ffactorau rhyngbersonol a chyd-destunol.
• Casglu, storio a defnyddio data yn effeithiol mewn ymchwil ac ymarfer seicolegol, a dangos gwerthfawrogiad beirniadol o wahanol dechnegau ar gyfer gwneud hynny.
• Cyflwyno gwybodaeth gymhleth yn glir mewn amrywiaeth o gyd-destunau a thimau i gynulleidfaoedd arbenigol ac anarbenigol.
• Myfyrio ar gryfderau a gwendidau personol ar gyfer datblygiad parhaus.