Datblygiad Proffesiynol i Ymarferwyr Fferylliaeth (MSc)

Sut y caf fy addysgu?

Mae'r Ysgol Fferylliaeth a Gwyddorau Fferyllol wedi ymrwymo i ddatblygu'r wybodaeth, y sgiliau a'r cymwyseddau sydd eu hangen ar weithwyr gofal iechyd proffesiynol i wella canlyniadau iechyd a gofal iechyd i gleifion. Byddwch yn cael eich addysgu gan dîm academaidd arbenigol sy'n gwneud gwaith ymchwil blaengar sy'n arwain y byd, a byddwch hefyd yn cael dysgu gan ymarferwyr arbenigol o amrywiaeth o leoliadau iechyd a gofal cymdeithasol a fydd yn rhoi profiad a dealltwriaeth drylwyr o arfer cyfoes a datblygol. 

Mae'r rhaglen yn ddysgu cyfunol rhan amser ond bydd gan bob modiwl ofynion penodol.  Cyflwynir y rhan fwyaf o fodiwlau trwy ddysgu o bell gyda diwrnodau astudio ar-lein (trwy Microsoft Teams fel arfer), ac felly gallwch gael mynediad i'r modiwlau hyn o unrhyw le yn y byd fel aelod o'r gymuned broffesiynol gofal iechyd ryngwladol.  Fodd bynnag, cyflwynir rhai modiwlau trwy ddysgu cyfunol a all gynnwys diwrnodau astudio wyneb yn wyneb, dysgu trwy brofiad, e-ddysgu, gweithdai ar-lein neu setiau dysgu gweithredol.  Lle mae modiwlau’n cynnwys gweithdai wyneb yn wyneb, bydd y rhain yn cael eu cyflwyno’n bersonol yng Nghaerdydd yn ein Hadeilad Redwood, a enwyd ar ôl Athro Fferylliaeth cyntaf y DU.

Ym mhob modiwl, mae pwyslais ar adnabod eich anghenion dysgu penodol i gyfeirio eich astudiaeth annibynnol ac i sicrhau bod addysgu ac asesu pob modiwl yn berthnasol i'ch ymarfer.  Rydym yn credu bod cydweithio â'ch cyfoedion yn gwella dysgu, ac felly rydym yn ceisio defnyddio dulliau lluosog i adeiladu cymuned o ymarfer.

Sut y caf fy asesu?

Mae'r dulliau asesu yn amrywio yn dibynnu ar y modiwlau a ddewisir a'u canlyniadau dysgu. Mae asesiadau wedi'u cynllunio i fesur ymarfer proffesiynol, academaidd a/neu ymarfer.  Mae llawer o fodiwlau'n cynnwys asesiadau ffurfiannol (asesiadau nad ydynt yn cyfrif tuag at farc y modiwl) y bwriedir iddynt roi adborth ac arwydd o'ch cynnydd. 

Mae enghreifftiau o asesiadau crynodol (asesiadau sy'n cyfrif tuag at farc y modiwl) yn cynnwys portffolios, cyflwyniadau llafar, arholiadau clinigol strwythuredig gwrthrychol (OSCEs), aseiniadau ysgrifenedig megis posteri, problemau rheoli cleifion, aseiniadau myfyriol ac adolygiadau dadansoddol.  Lle mae elfen ymarfer trwy brofiad o'r modiwl, gellir cynnal asesiad o'ch perfformiad gan eich Goruchwyliwr Ymarfer neu Ymarferydd Rhagnodi Dynodedig (DPP).  Mae'r Goruchwylwyr Ymarfer a'r DPPau hyn yn cael eu hyfforddi, eu cefnogi a'u harwain gan staff academaidd y Brifysgol. Ar gyfer y modiwl MSc 60 credyd (traethawd hir), cwblheir prosiect ymchwil mewn maes penodol sy'n cwrdd â'ch datblygiad proffesiynol.

Bydd angen presenoldeb ym Mhrifysgol Caerdydd ar gyfer yr OSCE yn y modiwl Rhagnodi Fferyllwyr Annibynnol. Gellir asesu'r OSCE trwy gyfrwng y Gymraeg.

Byddwch yn derbyn adborth adeiladol rheolaidd trwy gydol y modiwl, i ysgogi brwdfrydedd a darparu cefnogaeth. Gall adborth ar eich gwaith fod mewn amrywiaeth o fformatau, gan gynnwys adborth llafar ac adborth ysgrifenedig electronig ar waith cwrs a aseswyd.  Bydd cyfle hefyd i ddeall a defnyddio adborth yn adeiladol trwy gyfarfod ag arweinydd y modiwl neu diwtor personol os oes angen.

Sut y caf fy nghefnogi?

Tiwtor Personol

Bydd tiwtor personol yn cael ei neilltuo i chi, sydd fel arfer yn aelod o dîm academaidd yr ysgol. Mae system y tiwtoriaid personol yn rhan hanfodol a chanolog o’r gefnogaeth i fyfyrwyr yn yr Ysgol. Rôl y tiwtor personol yw monitro cynnydd academaidd cyffredinol a darparu cymorth bugeiliol, gan fod yn bwynt cyswllt cyntaf a phorth i'r gwasanaethau cymorth i fyfyrwyr sy’n cael eu darparu gan y Brifysgol (sy’n cynnwys y Gwasanaeth Gyrfaoedd, y Gwasanaeth Cwnsela, y Gwasanaeth Anabledd a Dyslecsia, y Gwasanaeth Cymorth i Fyfyrwyr). Bydd eich tiwtor personol yneich arwain at gyfuniadau o fodiwlau neu lwybrau astudio sy'n addas ar gyfer eich gofynion datblygiad proffesiynol ac amgylchiadau personol.  Bydd eich tiwtor personol yn eich cefnogi i adolygu eich portffolio modiwl yn flynyddol, yr amserlen sy'n weddill ar gyfer cwblhau dyfarniad a'r opsiynau sydd ar gael i chi, i'ch helpu i gynllunio'ch astudiaethau.

Mae'r Cyfarwyddwr Rhaglen ac arweinwyr modiwlau hefyd ar gael i ateb eich cwestiynau a mynd i'r afael ag unrhyw anawsterau a allai fod gennych gyda'ch astudiaethau.  Bydd amseroedd penodol yn cael eu hysbysebu i fyfyrwyr gysylltu ag arweinwyr modiwl a Chyfarwyddwyr Rhaglen.

Adnoddau

Ar ddechrau'r rhaglen mae wythnos ymsefydlu orfodol ar-lein. Bydd hyn yn eich helpu i ganfod eich ffordd o amgylch amgylchedd dysgu rhithiol y Brifysgol, a bydd hefyd yn darparu gwybodaeth gyffredinol gan gynnwys am y system tiwtor personol, a sut bydd ein timau gweinyddu a TG yn eich cefnogi chi. Mae'r amgylchedd dysgu rhithiol yn hygyrch drwy ddyfeisiau bwrdd gwaith a symudol, sy'n eich galluogi i gael mynediad at ddeunydd amlgyfrwng perthnasol, cyflwyniadau, taflenni gweithdai, llyfryddiaethau, dolenni pellach, ymarferion electronig ac ati o unrhyw le.

Mae llyfrgell y Brifysgol ar gael drwy gydol y flwyddyn. Mae staff ar gael i'ch cynorthwyo a rhoi cefnogaeth a chyngor. Mae gan y llyfrgell lawer o gyfnodolion a llyfrau electronig y byddwch yn gallu eu cyrchu i'ch helpu gyda'ch astudiaethau.

Mae'r Brifysgol yn cynnig amrywiaeth o wasanaethau a digwyddiadau cymorth i'ch helpu i reoli eich iechyd emosiynol, meddyliol a chorfforol, cefnogaeth gyda materion ariannol, a chymorth i fyfyrwyr ag anableddau.  Mae modd cael mynediad atynt wyneb yn wyneb yng Nghanolfan Bywyd y Myfyrwyr yn y Brifysgol, neu o bell drwy'r manylion cyswllt a nodir ar y Fewnrwyd i Fyfyrwyr.

Adborth ar Asesiadau

Byddwn yn darparu adborth i chi ar eich gwaith yn aml. Daw hyn mewn amrywiaeth o fformatau gan gynnwys adborth ffurfiannol yn ogystal â sylwadau ysgrifenedig ar waith cwrs (gweler Sut byddaf yn cael fy asesu?).

Adborth gan Fyfyrwyr i Dîm y Rhaglen

Ar ddechrau pob blwyddyn penodir Cynrychiolydd Academaidd Myfyrwyr ar gyfer y rhaglen o blith y myfyrwyr.  Gwahoddir y cynrychiolydd hwn i eistedd ar y paneli Myfyrwyr-Staff a mynychu'r Bwrdd Astudiaethau.  Bydd y Cyfarwyddwr Rhaglen yn cyfarfod â'r cynrychiolydd bob semester; anogir y cynrychiolydd i gael adborth gan ei gyd-fyfyrwyr i fwydo i'r cyfarfod hwn. Gall hyn gynnwys adborth ar gynnwys modiwl, yn ogystal â chymorth a ddarperir.

Yn ogystal, bydd system e.e. Padlet wedi'i sefydlu ar gyfer y rhaglen, lle gall myfyrwyr adael sylwadau ar gyfer Tîm y Rhaglen.

Pa sgiliau y byddaf yn eu hymarfer a’u datblygu?

Mae Deilliannau Dysgu’r rhaglen hon yn disgrifio'r hyn y byddwch chi’n gallu ei wneud o ganlyniad i astudio ym Mhrifysgol Caerdydd. Byddant yn eich helpu i ddeall yr hyn a ddisgwylir gennych. Mae Deilliannau Dysgu’r rhaglen hon wedi’u nodi isod.

Ar ôl cwblhau’r MSc mewn Datblygiad Proffesiynol ar gyfer Ymarferwyr Fferylliaeth yn llwyddiannus byddwch yn gallu dangos:

Gwybodaeth a Dealltwriaeth:

• Dangos dealltwriaeth gysyniadol o lywodraethu, rheolaeth ac arweinyddiaeth gwasanaethau a systemau iechyd a gofal cymdeithasol yn y DU ac yn fyd-eang, a gellir nodi sut mae newid yn cael ei roi ar waith yn effeithiol
• Gwerthuso’n feirniadol y defnydd o ddulliau gwella ansawdd ac ymchwil a ddefnyddir mewn gofal iechyd, a’r materion moesegol a threfniadol sy’n berthnasol i’w cymhwyso mewn ymarfer
• Yn annibynnol, dadansoddi'n feirniadol integreiddiad a chymhwysiad y gwyddorau sylfaenol sy'n cefnogi ymarfer clinigol a seiliedig ar dystiolaeth.
• Dangos dealltwriaeth systematig o ofal sy’n canolbwyntio ar yr unigolyn sy’n hybu iechyd a llesiant cleifion drwy wneud y mwyaf o’r budd therapiwtig o feddyginiaethau ac sy’n bodloni’r holl ofynion cyfreithiol, moesegol a phroffesiynol cyfredol

Sgiliau Deallusol:

• Arddangos y gallu i weithio'n annibynnol fel ymarferydd hunanfyfyriol, sy'n gweithredu o fewn eu cymwyseddau eu hunain, yn cymryd cyfrifoldeb personol am eu gweithredoedd, ac yn ystyried cyd-destun cymdeithasol, clinigol a diwylliannol eu penderfyniadau ar yr un pryd
• Dadansoddi a dehongli'n feirniadol ddata sy'n deillio o arsylwadau, polisïau ac arfer er mwyn llywio arfer.   
• Adnabod a chymhwyso sgiliau datrys problemau a chyfathrebu priodol, gan gynnwys dylanwadu, rhesymu, perswadio a thrafod i wahanol gynulleidfaoedd
• Ymchwilio, dadansoddi a chymhwyso ffynonellau llenyddiaeth sylfaenol i ddatblygu dadleuon, damcaniaethau a phenderfyniadau rhesymegol manwl. 

Sgiliau Ymarferol Proffesiynol:

• Dangos y gallu i weithio'n annibynnol ac ar y cyd â chleifion, teuluoedd, a gweithwyr proffesiynol eraill ym maes iechyd a gofal cymdeithasol mewn amrywiaeth o leoliadau ac amgylchiadau
• Nodi cyfrifoldebau moesegol wrth gyflawni prosesau gwneud penderfyniadau priodol ar y cyd sy'n ymwneud ag iechyd sy'n parchu hawliau, diwylliant, anghenion ysbrydol a dewisiadau cleifion
• Cyfathrebu’n effeithiol, gan rannu syniadau a dadleuon mewn moesau sy’n briodol i gynulleidfaoedd arbenigol ac anarbenigol.
• Dangos gallu i werthuso'n feirniadol sgiliau arwain a rheoli newid a dulliau gweithredu i gefnogi gwaith tîm effeithiol ac arfer dyddiol.

Sgiliau Trosglwyddadwy/Allweddol:

• Cymhwyso sgiliau datrys problemau a gwneud penderfyniadau uwch, gan ddefnyddio barn a chreadigrwydd beirniadol i fynd i'r afael â materion a heriau cymhleth o fewn y proffesiwn cyfathrebu.
• Defnyddio strategaethau hunanreoli a gwydnwch personol effeithiol i fynd i'r afael â'r heriau o ymdopi ag ansicrwydd
• Cynllunio a chyfarwyddo eich dysgu eich hun yn annibynnol gan reoli eich llwyth gwaith yn effeithiol i gwrdd â therfynau amser. 
• Cydweithio'n effeithiol trwy ddangos gwaith tîm a phroffesiynoldeb, parchu gwahanol gyfraniadau neu safbwyntiau, a gallu datrys gwrthdaro mewn modd rhesymol a drwy negodi.
• Dangos chwilfrydedd deallusol, meddwl beirniadol annibynnol a’r gallu i fynegi syniadau'n effeithiol, gan gyfathrebu'n glir ar lafar ac yn ysgrifenedig, gan ddefnyddio amrywiaeth o gyfryngau.