Meddygaeth Lliniarol ar gyfer Gweithwyr Gofal Iechyd Proffesiynol (MSc)

Sut y caf fy addysgu?

Mae hon yn rhaglen ddysgu gyfunol sy'n cynnwys cydrannau wyneb yn wyneb byr ond sy’n cael ei chyflwyno’n bennaf ar ffurf dysgu o bell drwy ein hamgylchedd dysgu rhithwir lle byddwch yn dod o hyd i ddeunyddiau cwrs, dolenni i adnoddau cysylltiedig ac asesiadau.

Bydd modiwl a addysgir yn cael ei ddarparu ar ffurf dysgu o bell dros gyfnod o 12 wythnos fel arfer. Mae addysgu a chymorth ar-lein hefyd ar gael yn ystod y cam MSc. Bydd deunyddiau dysgu sy'n ymwneud â'r maes llafur ar gael i chi eu hastudio i baratoi ar gyfer cwblhau asesiadau.

Ar ddechrau pob blwyddyn academaidd ar y rhaglen, bydd cwrs rhyngweithiol wyneb yn wyneb o hyd at 5 diwrnod gwaith fel arfer. Mae'n ofynnol i bob myfyriwr fynychu'r gydran hon bob blwyddyn. Ni chodir ffi presenoldeb arnoch am yr elfen wyneb yn wyneb, ond bydd disgwyl i chi dalu'r holl gostau eraill sy'n gysylltiedig â mynychu gan gynnwys teithio, llety, cynhaliaeth ac unrhyw dreuliau personol eraill.

Mae'r cydrannau wyneb yn wyneb yn gyfle i gwrdd â'r staff a myfyrwyr eraill ac maen nhw wedi’u cynllunio i gefnogi dysgu drwy ddulliau amrywiol gan gynnwys cyflwyniadau, gweithdai/ymarferion a thrafodaeth rhwng cymheiriaid. Maen nhw’n agwedd werthfawr ar y rhaglen, ac yn annog cefnogaeth grŵp a gan gymheiriaid ar gyfer dysgu er mwyn gwella'r profiad dysgu.

Yn ystod y gydran wyneb yn wyneb, rydyn ni’n manteisio ar y cyfle i gyflwyno cysyniadau nad ydyn nhw’n cael eu haddysgu'n rhwydd drwy amgylchedd dysgu rhithwir. Mae’r rhain yn cynnwys sesiynau sgiliau cyfathrebu a hwylusir gan diwtoriaid profiadol mewn grwpiau bach, gan gynnig cyfle i ymarfer y sgiliau hyn.

Drwy gydol y camau a addysgir mae cyfleoedd i gael gwybodaeth a dealltwriaeth drwy amrywiaeth o ffyrdd gan gynnwys astudio'n annibynnol, ymarfer myfyriol, trafodaeth â chymheiriaid, gweithdai a thasgau/ymarferion, ymarfer sgiliau cyfathrebu a hunanasesu, adolygu deunydd dysgu a darlithoedd (podlediadau).

Mae gan bob modiwl ei ddeilliannau dysgu ei hun. Mae gennych gyfle i ddangos eich bod wedi cyflawni'r deilliannau dysgu hyn drwy'r asesiadau ffurfiannol a chrynodol a geir ym mhob modiwl. Mae'r deunydd addysgu a dysgu a gyflwynir yn y cydrannau ar-lein ac wyneb yn wyneb yn cyd-fynd â'r deilliannau dysgu i gefnogi eich dysgu.

Bydd astudiaethau ar lefel traethawd hir MSc yn cynnwys astudiaethau ac ymchwil annibynnol o dan arweiniad yn bennaf, gan ddefnyddio'r cyfleusterau dysgu ac ymchwil helaeth sydd ar gael, gan gynnwys deunydd dysgu sy’n cael ei ddarparu drwy ein platfform dysgu ar-lein.

Sut y caf fy asesu?

Mae'r asesiadau wedi'u dewis i sicrhau bod y deilliannau dysgu yn cael eu profi'n briodol ac yn rhoi cyfle i chi ddangos eich bod wedi eu cyrraedd. Mae manylion dulliau asesu penodol ar gyfer pob modiwl ar gael yn y Disgrifiad o’r Modiwl perthnasol.

Mae asesiadau ffurfiannol a chrynodol yn cael eu cynnal drwy aseiniadau modiwlau gan gynnwys dulliau fel: myfyrio ar achosion, arfarniadau beirniadol, cwisiau ar-lein, creu posteri, darnau mynegi barn, strategaethau cyfathrebu neu gynigion. Defnyddir cynlluniau marcio wedi’u safoni ar gyfer pob asesiad crynodol a'r adborth a ddarperir ar gyfer pob aseiniad sydd wedi'i gwblhau i roi arweiniad i’r myfyriwr ar gyfer aseiniadau yn y dyfodol.

Bydd cam y traethawd hir yn cael ei asesu yn seiliedig ar y traethawd hir terfynol. Bydd y traethawd hir yn cael 60 credyd ac, ar y cyd â'r cam(au) a addysgir, bydd yn cael ei bwysoli 50% at ddibenion cyfrifo'r marc terfynol.

Bydd y traethawd hir, a fydd fel arfer heb fod yn fwy na 20,000 o eiriau ac a gefnogir gan unrhyw ddeunydd arall a gaiff ei ystyried yn briodol i'r pwnc, yn ymgorffori canlyniadau eich cyfnod o waith prosiect.

Sut y caf fy nghefnogi?

Mae'r rhaglen yn cael ei darparu fel rhaglen dysgu o bell drwy ein Hamgylchedd Dysgu Rhithwir, lle byddwch yn dod o hyd i ddeunyddiau cwrs, asesiadau a dolenni i ddeunyddiau cysylltiedig. Ymhlith y cyfleusterau mae offer trafod ar-lein, gan gynnwys trafodaethau grŵp bach ar we-gamera i hwyluso’r cymorth gan y tiwtor a chymheiriaid i ddysgwyr.

Bydd Tiwtor Personol yn cael ei ddyrannu i chi i roi cymorth a chefnogaeth gydag anghenion academaidd a bugeiliol. Gallwch gysylltu â’ch tiwtor personol i drafod cynnydd ac i gael cyngor ac arweiniad fel bo angen.

Mae tiwtoriaid ar gael i'ch cynghori ynghylch unrhyw faterion academaidd. Nid darllen na marcio fersiynau drafft o aseiniadau yw rôl y tiwtor. Ond, gall gyfathrebu â myfyrwyr am unrhyw bwnc penodol a allai fod yn heriol iddyn nhw. Rhoddir adborth penodol hefyd unwaith y bydd aseiniad wedi'i farcio. Defnyddir cynllun marcio ar gyfer yr aseiniad penodol. Bydd croeso i chi drafod yr adborth hwn gyda thiwtor.

Yn ystod cam traethawd hir y cwrs MSc, bydd Goruchwyliwr Prosiect Traethawd Hir yn cael ei neilltuo i chi, a fydd yn eich rhoi ar ben ffordd gyda’ch gwaith cynllunio ac yn rhoi cyngor i chi wrth i chi gwblhau eich prosiect.

Adborth

Byddwch yn cael adborth ffurfiannol drwy ddulliau electronig ac ysgrifenedig mewn modd amserol. Bydd adborth crynodol ar asesu yn cael ei gyflwyno o fewn yr amserlen a bennwyd gan y Brifysgol.

Pa sgiliau y byddaf yn eu hymarfer a’u datblygu?

Drwy gymryd rhan lawn yn y cwrs hwn, cewch gyfle i ddatblygu cyfoeth o sgiliau a galluoedd y gallwch eu defnyddio mewn unrhyw leoliad proffesiynol. Yn ogystal â dealltwriaeth gysyniadol well o wybodaeth, ystyriaethau a dulliau cyfredol, byddwch yn cael y cyfle i ymarfer a datblygu galluoedd mewn dadansoddi beirniadol, mewn cymhwyso meddygaeth seiliedig ar dystiolaeth ac ymdrin â materion cymhleth yn systematig ac yn greadigol. Dylai eich astudiaethau hefyd eich helpu i ddatblygu eich gallu i ddatrys problemau a gwneud penderfyniadau drwy eich galluogi i ddefnyddio tystiolaeth yn effeithiol a chyfleu cysyniadau pwysig i gydweithwyr ac eraill. Drwy unrhyw elfennau sy'n canolbwyntio ar ymchwil cewch gyfle i ddatblygu a gwella sgiliau mewn agweddau fel adolygu llenyddiaeth, gwerthuso beirniadol a gwybodaeth am egwyddorion ymchwil.

Drwy gymryd rhan lawn yn y camau a addysgir, dylech allu gwneud y canlynol:

• Datblygu dealltwriaeth systematig o wybodaeth, egwyddorion craidd, fframweithiau ym maes meddygaeth liniarol a gofal lliniarol sy'n hyrwyddo arferion clinigol effeithlon ar sail gwybodaeth.
• Arfarnu'n feirniadol y meddylfryd a'r dystiolaeth gyfredol y tu ôl i ymyriadau gofal lliniarol
• Gweithio'n fwy effeithiol gyda gweithwyr proffesiynol eraill a gweithio mewn tîm rhyngbroffesiynol i wella'r ffordd y mae gofal lliniarol sy'n canolbwyntio ar y claf yn cael ei ddarparu.
• Datblygu dull cynhwysfawr o reoli symptomau mewn lleoliadau gofal lliniarol rhyngbroffesiynol.
• Dangos gwybodaeth fanwl am gymhlethdodau gofal lliniarol mewn sefyllfaoedd heriol mewn perthynas â materion cyfreithiol a moesegol, y tîm gofal iechyd ehangach a'r gymuned ehangach.
• Asesu a datblygu dulliau o reoli blwyddyn olaf bywyd, oriau olaf bywyd, marwolaeth a phrofedigaeth.
• Archwilio ffyrdd y gall gweithio mewn tîm ac arweinyddiaeth effeithio ar ddarparu gofal lliniarol.
• Arfarnu gwahanol ddulliau o fesur, ymchwilio a gwella ansawdd gofal lliniarol.
• Datblygu cynigion ar gyfer prosiectau ymchwil sy'n dangos dealltwriaeth gadarn o ddyluniad ymchwil, methodoleg a moeseg.
• Datblygu cynigion ar gyfer prosiectau gwella ansawdd sy'n dangos dealltwriaeth gadarn o ddyluniad, methodoleg a moeseg briodol.

Yn ogystal â'r deilliannau dysgu sydd i'w cyflawni yn ystod y camau a addysgir, drwy gymryd rhan lawn yng ngham traethawd hir yr MSc dylech allu:

• Dangos gwybodaeth fanwl am faes/feysydd astudio arbenigol a/neu gymhleth, a gallu cysylltu’r rhain â’i gyd-destun proffesiynol ei hun.
• Cwblhau prosiect cynhwysfawr sy'n dangos arfer da mewn ymchwil / gwella ansawdd ac sy'n cyfrannu at ddatblygu'r corff o wybodaeth a/neu ymarfer clinigol yn y maes.