Prosesu Iaith Naturiol (MSc)

Sut y caf fy addysgu?

Mae gan yr Ysgol Cyfrifiadureg a Gwybodeg ddiwylliant ymchwil cryf a gweithgar sy'n llywio ac yn arwain ein haddysgu. Rydym wedi ymrwymo i ddarparu addysgu o'r safon uchaf.

Defnyddir ystod amrywiol o dulliau addysgu a dysgu trwy'r MSc. Cyflwynir modiwlau drwy gyfres o naill ai sesiynau cyswllt diwrnod llawn neu hanner diwrnod, sy’n cynnwys darlithoedd, seminarau, gweithdai, tiwtorialau a dosbarthiadau yn y labordy. Cyflwynir y rhain gan staff academaidd ac arbenigwyr yn y diwydiant, gan gynnwys aelodau o'r cyfleusterau Cyfrifiadura Ymchwil Uwch (ARCCA), a fydd yn canolbwyntio ar ddefnyddio caledwedd gyfrifiadurol perfformiad uchel ar gyfer NLP.

Bydd gan y mwyafrif o'ch modiwlau a addysgir wybodaeth bellach i chi ei hastudio a bydd disgwyl i chi weithio drwy hyn yn eich amser eich hun, yn unol â'r arweiniad gan y darlithydd ar gyfer y modiwl hwnnw.

Bydd ymarferion dosbarth ffurfiannol a labordy yn eich galluogi i ymarfer y sgiliau y byddwch yn eu dysgu, cael adborth ar eich cynnydd, a rhoi'r cymorth sydd ei angen arnoch i barhau i ddatblygu ymhellach

Byddwch hefyd yn ymgymryd â phrosiect ac astudiaeth annibynnol i’ch galluogi i gwblhau eich traethawd estynedig. Gallwch awgrymu testun ar gyfer eich traethawd eich hun, neu gallwch ei ddewis o restr o opsiynau a gynigiwyd gan staff academaidd a phartneriaid diwydiannol, gan adlewyrchu eu diddordebau cyfredol. Bydd y dewis o brosiectau a fydd ar gael i chi yn cael eu cadarnhau yn ystod y cam dewis prosiect, a gallant ddibynnu ar y modiwlau y byddwch yn eu cymryd, ac argaeledd goruchwyliwr/partneriaid diwydiannol.

Pa gyfleoedd sydd ar gael i astudio drwy gyfrwng y Gymraeg?

Gellir darparu tiwtora personol, asesiadau a seminarau yn Gymraeg.

Sut y caf fy asesu?

Asesir y modiwlau a addysgir o fewn y rhaglen drwy ystod eang o asesiadau, megis aseiniadau ymarferol; adroddiadau ysgrifenedig; traethodau; ac arholiadau.

Gallai adborth am waith cwrs gael ei roi ar ffurf sylwadau ysgrifenedig ar waith a gyflwynir, atebion 'enghreifftiol' a/neu drafodaeth mewn sesiynau cyswllt.

Mae'r prosiect a'r traethawd hir unigol yn galluogi myfyrwyr i ddangos eu gallu i adeiladu ar wybodaeth a sgiliau a enillwyd yng nghamau cynharach y Rhaglen, ac yn eu galluogi i’w datblygu. Yn ogystal, mae'n rhoi cyfle i fyfyrwyr ddangos meddwl beirniadol a gwreiddiol yn seiliedig ar gyfnod o astudio a dysgu annibynnol.

Sut y caf fy nghefnogi?

Rydym yn ymfalchïo mewn darparu amgylchedd cefnogol lle gallwn helpu ac annog ein myfyrwyr.

Ar ddechrau eich cwrs bydd tiwtor personol yn cael ei ddyrannu i chi sy’n aelod o staff academaidd yn yr Ysgol ac sy’n gweithio fel pwynt cyswllt er mwyn rhoi cyngor am faterion academaidd yn ogystal â phersonol mewn ffordd anffurfiol a chyfrinachol. Bydd eich tiwtor personol yn monitro eich cynnydd drwy gydol eich cyfnod yn y Brifysgol ac yn eich cefnogi yn eich Cynllun Datblygiad Personol.

Y tu allan i’r sesiynau a drefnir gyda’ch tiwtor, gweithredir polisi drws agored gan yr Uwch-diwtor Personol, ac mae ar gael i roi cyngor ac ymateb i unrhyw faterion personol wrth iddynt godi.

Pa sgiliau y byddaf yn eu hymarfer a’u datblygu?

Mae'r Deilliannau Dysgu ar gyfer y Rhaglen hon yn disgrifio'r hyn y byddwch yn ei gyflawni erbyn diwedd eich rhaglen ym Mhrifysgol Caerdydd ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

Ar ôl cwblhau eich Rhaglen yn llwyddiannus byddwch yn gallu gwneud y canlynol:

Gwybodaeth a Dealltwriaeth:    

GD 1      mynegi pwysigrwydd curadu data yn systematig o ran llwyddiant dulliau NLP.

GD 2      adnabod ac adolygu'r cysyniadau a'r algorithmau allweddol sy'n sail i ddulliau NLP.

GD 3      gwerthuso priodweddau damcaniaethol gwahanol ddulliau NLP

GD 4      asesu'n feirniadol sut mae dulliau NLP yn dylanwadu ar lwyddiant tasg benodol

Sgiliau Deallusol:             

SD 1       gweithredu a gwerthuso dulliau NLP i ddatrys tasg benodol

SD 2       esbonio a chyfleu'r egwyddorion sylfaenol sy'n sail i ddulliau cyffredin NLP

SD 3       gwerthuso'n feirniadol y goblygiadau moesegol a'r risgiau cymdeithasol sy'n gysylltiedig â defnyddio dulliau NLP

Sgiliau Ymarferol Proffesiynol:  

SY 1        ffurfioli problemau'r byd go iawn mewn perthynas â dulliau NLP a ddewiswyd

SY 2        pennu'r dull NLP priodol (a'r strategaeth curadu data os oes angen) i fynd i'r afael ag anghenion lleoliad cais penodol

SY 3        Ymgymryd â phrosiect dadansoddi data testun NLP/dysgu peirianyddol/testun unigol nad yw'n ddibwys; diffinio nodau ac amcanion, dewis atebion a thechnegau priodol, cynnal gwerthusiad beirniadol o ganfyddiadau a chyfleu'r canlyniad yn glir

Sgiliau Trosglwyddadwy/Allweddol:        

SA 1       gwerthuso ac asesu’n feirniadol eich gwaith eich hun a gwaith eraill drwy ddulliau ysgrifenedig a llafar

SA 2       cyfleu syniadau, egwyddorion a damcaniaethau cymhleth yn glir drwy ddulliau llafar, ysgrifenedig ac ymarferol, i ystod o gynulleidfaoedd

SA 3       ystyried a datblygu cyfleoedd ar gyfer datblygu gyrfa

SA 4       astudio’n annibynnol, a myfyrio’n feirniadol.