Electroneg Lled-ddargludyddion Cyfansawdd (MSc)

Sut y caf fy addysgu?

Defnyddir ystod eang o arddulliau addysgu i ddarparu'r deunydd amrywiol sy'n llunio’r cwricwlwm.

Gall darlithoedd fod ar amrywiaeth o ffurfiau yn dibynnu ar y pwnc sy'n cael ei addysgu. Yn gyffredinol, defnyddir darlithoedd i gyfleu cysyniadau, rhoi cyd-destun i weithgareddau ymchwil yn yr Ysgol ac i ddangos dulliau damcaniaethol, cysyniadol a mathemategol allweddol.

Byddwch yn ymarfer ac yn datblygu sgiliau gwerthuso, myfyrio, dadansoddi a chyflwyno trwy gymryd rhan mewn gweithgareddau dysgu amrywiol fel cyfarfodydd grŵp ymchwil, seminarau a thrafodaethau grŵp agored. Cewch eich annog bob amser i fyfyrio ar yr hyn rydych wedi’i ddysgu, a sut gallwch ei gyfuno â thechnegau a chysyniadau eraill i fynd i’r afael â phroblemau newydd.

Yn y sesiynau ymarferol yn y labordy, byddwch yn defnyddio ehangder eich gwybodaeth a'ch sgiliau, boed hynny'n defnyddio'ch sgiliau codio i awtomeiddio arbrawf labordy, dylunio cydrannau ar gyfer darn mawr o offer neu ddatrys problemau caledwedd ymchwil. Mae pwyslais yr MSc mewn Electroneg Lled-ddargludyddion Cyfansawdd yn llwyr ar ddatblygu a dangos sgiliau ymarferol a fydd o ddefnydd mewn amgylchedd ymchwil ac y bydd galw mawr amdanyn nhw ymhlith cyflogwyr.

Pan fyddwch yn gweithio ar eich traethawd hir byddwch yn cael goruchwyliwr o blith ein staff addysgu. Mae pynciau traethawd hir fel arfer yn cael eu dewis o amrywiaeth o deitlau prosiect a gynigir gan staff academaidd, fel arfer mewn meysydd o ddiddordeb ymchwil cyfredol, er bod myfyrwyr yn cael eu hannog i gyflwyno eu syniadau prosiect eu hunain. Gall darpar gyflogwyr a phartneriaid yn y diwydiant gynnig prosiectau hefyd, ac efallai y gallant gynnig lleoliadau gwaith yn ystod cyfnod y gwaith prosiect.

Sut y caf fy asesu?

Mae nifer o ddulliau asesu yn cael eu defnyddio er mwyn gwella dysgu ac adlewyrchu eich perfformiad yn gywir ar y cwrs. Yn y modiwlau gofynnol, defnyddir cymysgedd o ddysgu seiliedig ar broblemau, asesiadau yn y labordy, aseiniadau ysgrifenedig, ymarferion efelychu, arholiadau ysgrifenedig a llafar ac astudiaethau achos mewn grŵp.

Bydd adborth sy’n cael ei ddarparu gan eich Tiwtor MSc, Arweinwyr Modiwlau a’ch cydfyfyrwyr ar gyfer rhai modiwlau, yn caniatáu i chi wella yn raddol wrth ddatblygu eich set sgiliau craidd.

Mae'r dulliau a ddefnyddir ar gyfer y modiwlau dewisol yn amrywio yn dibynnu ar y dull asesu mwyaf priodol ar gyfer pob modiwl. Ond fel arfer, maen nhw’n cynnwys aseiniadau ysgrifenedig a/neu ymarferol ynghyd ag arholiad ysgrifenedig a/neu lafar.

Beth sy’n ddisgwyliedig gennyf?

Sut y caf fy nghefnogi?

Eich Tiwtor MSc fydd eich Tiwtor Personol fel arfer hefyd. Bydd yn eich helpu i fyfyrio ar eich perfformiad ac yn rhoi cyngor i chi ar dechnegau ymchwil ac astudio, dewis modiwlau a chynllunio gyrfa (ar y cyd â Gwasanaeth Gyrfaoedd y Brifysgol). Eich tiwtor personol fydd y pwynt cyswllt cyntaf i chi hefyd os ydych chi’n cael unrhyw anawsterau.

Gwahoddir myfyrwyr MSc i bob digwyddiad ôl-raddedig gan gynnwys y Gyfres o Ddarlithoedd Ôl-raddedig a'r Cynadleddau Ymchwil Ôl-raddedig. Yn y digwyddiadau hyn, gallwch gyfarfod a siarad â myfyrwyr PhD, ymchwilwyr a mynychu darlithoedd allweddol sy'n cwmpasu gweithgareddau ymchwil, arfer gorau a diogelwch yr Ysgol.

Mae ein modiwlau i gyd yn defnyddio Amgylchedd Dysgu Rhithwir y Brifysgol, Dysgu Canolog, yn helaeth. Yma gallwch gael mynediad at fforymau trafod a dod o hyd i ddeunyddiau cwrs gan gynnwys recordiadau o ddarlithoedd (os ydyn nhw ar gael), dolenni i ddeunyddiau cysylltiedig, sleidiau darlithoedd, sgriptiau asesu, atebion enghreifftiol ac enghreifftiau o waith myfyrwyr o flynyddoedd blaenorol.

Pan fyddwch yn ymgymryd â phrosiect ymchwil yr haf byddwch yn cael goruchwyliwr academaidd a fydd yn gyfrifol am roi cyngor a chefnogaeth briodol i chi drwy gydol eich prosiect ymchwil. Eich goruchwyliwr fydd eich pwynt cyswllt cyntaf yn ystod y prosiect ymchwil ac fel arfer, eich goruchwyliwr fydd yr ymchwilydd arweiniol mewn unrhyw grŵp / is-grŵp rydych yn ymuno ag ef fel rhan o’ch prosiect.

Mae'r rhaglen hon wedi'i chynllunio i feithrin ysbryd cymunedol cryf o fewn carfan yr MSc. Byddwch yn aml yn gweithio gyda'ch gilydd mewn parau, mewn grwpiau ac fel carfan. Yn gyffredinol, bydd grwpiau MSc yn cyfarfod bob wythnos, er mwyn i chi adrodd ar gynnydd, trafod problemau ac awgrymu atebion. Mae'r gefnogaeth gref hon gan gymheiriaid ac addysgu/dysgu gyda chymheiriaid wedi profi'n hynod bwerus o ran gwella dysgu ein myfyrwyr.

Pa sgiliau y byddaf yn eu hymarfer a’u datblygu?

Drwy gymryd rhan lawn yn y cwrs hwn, byddwch yn caffael ac yn datblygu amrywiaeth o sgiliau gwerthfawr, yn rhai penodol i’r ddisgyblaeth a ""sgiliau cyflogadwyedd"" mwy cyffredinol.

Gwybodaeth a Dealltwriaeth:

Bydd myfyrwyr sy’n cwblhau’r Rhaglen yn gallu:

• Dangos lefel soffistigedig o wybodaeth a dealltwriaeth o'r methodolegau a'r offer peirianneg ym maes electroneg lled-ddargludyddion cyfansawdd; ?
• Cyflawni rôl flaenllaw mewn gweithgarwch dylunio a datblygu, gan gynnwys gwybodaeth gyfredol am y llenyddiaeth academaidd, y prif gwmnïau a phwysau'r farchnad yn y diwydiant, y cyd-destun lled-ddargludyddion cyfansawdd ehangach, a materion cyfreithiol a diogelwch perthnasol; ?
• Deall elfennau hanfodol materion cymhleth, a deall sut gellir datrys y rhain mewn modd systematig a chreadigol i fynd i'r afael â phroblemau'r byd go iawn.

Sgiliau Deallusol:

Bydd myfyrwyr sy’n cwblhau’r Rhaglen yn gallu:

• Dangos gwreiddioldeb, cymhwysedd a hyder wrth fynd i'r afael â phroblemau cyfarwydd ac anghyfarwydd
• deall sut mae defnyddio Electroneg Lled-ddargludyddion Cyfansawdd i ddylunio, gweithredu a rheoli systemau sy'n gallu casglu, trin, dehongli, cyfosod, cyflwyno ac adrodd ar ddata
• cyfrannu at ddatblygiad parhaus ymarfer peirianneg ac ymchwil yn seiliedig ar werthusiad beirniadol o'r dulliau presennol.

Sgiliau Ymarferol Proffesiynol:

Bydd myfyrwyr sy’n cwblhau’r Rhaglen yn gallu:

• Integreiddio'n effeithlon ac yn effeithiol i amgylchedd grŵp ymchwil, gan gynnwys adrodd yn gryno ar gynnydd, trafod gweithgareddau ac amserlenni, cefnogi cydweithwyr a gweithio mewn tîm;
• Cynllunio, cynnig a gweithredu prosiect ymchwil soffistigedig gyda nodau realistig, pethau y gellir eu cyflawni a chynlluniau wrth gefn;
• Nodweddu cydrannau lled-ddargludyddion yn fanwl ar lefel dyfais a dylunio cymwysiadau yn seiliedig ar ddealltwriaeth fanwl o'r prif faterion sy'n ymwneud â phensaernïaeth a strwythurau;
• Gwerthfawrogi'r camau sy'n gysylltiedig â gwireddu dyfeisiau lled-ddargludyddion cyfansawdd yn ogystal â'r systemau cyfathrebu uwch sy'n eu defnyddio, gan gynnwys nodweddu a mesur, modelu, dylunio trwy gymorth cyfrifiadur, optimeiddio, saernïo a phrofi.

Sgiliau Trosglwyddadwy/Allweddol:

Bydd myfyrwyr sydd yn cwblhau’r Rhaglen yn arddangos:

• Sgiliau cyfathrebu effeithiol, gan gynnwys adolygiadau llenyddiaeth, gwerthusiadau llenyddiaeth, ysgrifennu erthyglau academaidd, ysgrifennu adroddiadau hir a chyflwyniadau gwyddonol ffurfiol ?
• Sgiliau gweithio'n effeithiol ac yn effeithlon mewn grwpiau a thîm, gan gynnwys negodi, cyfaddawdu, cynllunio wrth gefn, rheoli amser a chadw cofnodion; ?
• Ymgysylltu, cysylltu a chydweithio â gwyddonwyr ymchwil arbenigol academaidd a diwydiannol a'r gallu i drosglwyddo cysyniadau, methodolegau a dulliau cyflwyno rhwng y ddau amgylchedd; ?
• Gallu ysgwyddo rôl lefel uchel mewn sefydliad, gan gynnwys bod yn barod ar gyfer astudiaethau ymchwil lefel uwch.

Beth yw deilliannau dysgu’r cwrs/rhaglen?