Meistr mewn Pensaernïaeth (MArch)

Sut y caf fy addysgu?

Mae rhaglen MArch yn canolbwyntio ar eich datblygu i fod yn ddysgwr moesegol, creadigol, beirniadol a chwilfrydig, ac yn bensaer y dyfodol. Ym Mlwyddyn Un, byddwch yn dysgu o ymarfer proffesiynol; ym Mlwyddyn Dau bydd y dysgu a'r myfyrio hwn yn cael eu dwyn i mewn i amgylchedd yr ysgol, a arweinir gan ymchwil.

Bydd tiwtorialau ac ymgyngoriadau unigol a grwpiau bach yn darparu adborth a blaenborth ar eich gwaith. Mae teithiau maes ac ymweliadau astudio yn rhoi cyfle i chi brofi pensaernïaeth, lleoedd a gofodau yn uniongyrchol, tra bo ymweliadau safle sy'n ymwneud â phrosiectau dylunio yn darparu cyfleoedd i ddadansoddi cyd-destunau, diwylliant a chymunedau i lywio eich astudiaethau dylunio.

Mae astudio annibynnol yn hanfodol i lwyddiant yn eich astudiaethau, a gall gynnwys prosesau dylunio ailadroddol i ddeall a/neu ddatrys problem ddylunio, gwneud cysylltiadau rhwng pynciau, a pharatoi deunydd ysgrifenedig a chyflwyniadau. 

Sut y caf fy asesu?

Byddwch yn profi ystod o ddulliau asesu gwahanol a fydd yn eich galluogi i amlygu eich dysgu ar draws y pwnc a chael adborth gwerthfawr y gellir ei gymhwyso i ddysgu yn y dyfodol. 

Fel yn achos pynciau creadigol eraill, bydd llawer o'r asesu yn digwydd trwy gyfrwng eich gwaith cwrs. Gall y gwaith cwrs fod yn bwnc-benodol, megis adroddiad technegol, neu’n bortffolio o astudiaethau wedi'u coladu o un pwnc neu ragor. Trwy eich portffolio dylunio byddwch yn arddangos eich gwaith prosiect yn y stiwdio ac yn cynnwys tystiolaeth o ddysgu ar draws yr ystod o fodiwlau y byddwch wedi'u hastudio. Mae Adolygiadau o Brosiectau Dylunio, lle byddwch yn cyflwyno eich gwaith prosiect i banel o adolygwyr, yn darparu adborth gwerthfawr i lywio eich gwaith prosiect.  Bydd portffolios myfyriol yn asesu dirnadaeth bersonol mewn perthynas â gwybodaeth, arsylwi a phrofiadau ar draws pynciau a'r ddisgyblaeth.  

Sut y caf fy nghefnogi?

Byddwch yn cael eich cefnogi mewn nifer o ffyrdd trwy gydol eich profiad dysgu.  Rydym yn cynnal cyfarfodydd blwyddyn rheolaidd fel y gallwch chi a gweddill eich carfan drafod materion blwyddyn gyfan, ac fel y gallwn ninnau wrando ac ymateb i'ch adborth. Darperir cymorth ar lefel y modiwlau gan arweinwyr y modiwlau, a darperir cymorth ar gyfer prosiectau dylunio a thraethodau hir gan Diwtor Dylunio. Yn ystod eich lleoliad rydym yn eich annog i gadw mewn cysylltiad â'ch cyd-fyfyrwyr, a bydd 'ymwelydd cysylltiadau ymarfer' yn ymweld â chi i gefnogi'r profiad y byddwch yn ei gael trwy’r ymarfer. 

Byddwch yn cyfarfod â’ch Tiwtor Personol yn rheolaidd i fyfyrio ar eich cynnydd a’ch datblygiad, ac mae gan y Brifysgol hefyd wasanaeth mentora dan arweiniad myfyrwyr i’ch cefnogi trwy eich astudiaethau. 

Bydd gennych fynediad i holl ddeunyddiau'r cwrs, gan gynnwys recordiadau o ddarlithoedd, taflenni, manylion yr holl asesiadau, meini prawf asesu a dolenni i adnoddau digidol, a hynny trwy Amgylchedd Dysgu Rhithwir Prifysgol Caerdydd.

Y tu hwnt i’r Ysgol, mae’r Brifysgol yn cynnig amrywiaeth o wasanaethau i’ch helpu i gynllunio eich gyrfa, ac yn cynnal digwyddiadau i’ch helpu i reoli eich iechyd emosiynol, meddyliol a chorfforol, ynghyd ag i ddarparu cymorth gyda materion ariannol, a chymorth i fyfyrwyr ag anableddau.

Pa sgiliau y byddaf yn eu hymarfer a’u datblygu?

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

GD 1 Mynd ati mewn modd systematig i adnabod ac integreiddio gwybodaeth am adeiladu cynaliadwy a pherfformiad adeiladau mewn prosiectau dylunio.

GD 2 Gwerthfawrogi goblygiadau dylunio pensaernïol ar newid yn yr hinsawdd, bioamrywiaeth, iechyd a diogelwch, a llesiant cenedlaethau’r dyfodol.

GD 3 Gwerthuso hanesion a damcaniaethau pensaernïaeth, dylunio trefol a'r celfyddydau, technolegau a gwyddorau dynol cysylltiedig mewn modd beirniadol. 

GD 4 Cydnabod cost a gwerth penderfyniadau dylunio ar gyfer cylch bywyd prosiect a'i randdeiliaid.

Sgiliau Deallusol:

SD 1 Dylunio prosiectau cymhleth, cynaliadwy, sydd wedi'u datrys yn dda ar gyfer yr amgylchedd adeiledig ac o’i fewn, a’r rheiny’n brosiectau a ddatblygwyd o ymateb gwreiddiol i broblemau cyfredol a chyd-destunol ac ymwybyddiaeth feirniadol ohonynt. 

SD 2 Llunio briff dylunio creadigol a thrylwyr mewn ymateb i gwestiwn ymchwil a/neu broblem ymarfer.

SD 3 Holi a sefydlu methodolegau ymchwil dylunio priodol i archwilio problem ddylunio yn systematig.

SD 4 Cynnig a datblygu syniadau, cysyniadau a strategaethau creadigol i ffurfio synthesis o gyfyngiadau a chyfleoedd a nodwyd yn unigol ac ar y cyd o blith amrywiaeth eang o baramedrau sy’n aml yn gwrth-ddweud ei gilydd.

SD 5 Damcaniaethu a disgrifio dadl ymchwil yn rhan o sefydlu safle beirniadol o fewn y ddisgyblaeth.

Sgiliau Ymarferol Proffesiynol:

SYP 1 Amlygu ymrwymiad i ffactorau cymdeithasol, gwleidyddol, amgylcheddol ac economaidd o fewn cyd-destunau proffesiynol wrth baratoi dyluniadau pensaernïol.

SYP 2 Llunio dyluniadau sy’n ystyried y berthynas rhwng pobl a’r amgylchedd, a rhwng adeiladau a’u cyd-destun, ynghyd â’r angen i gysylltu adeiladau a’r gofodau rhyngddynt ag anghenion dynol, cynwysoldeb, profiad y defnyddiwr a graddfa.

SYP 3 Mynd ati mewn modd beirniadol i asesu strategaethau a datrysiadau dylunio sy'n ymateb i safonau ac amodau cysur amgylcheddol ffisegol a gofodol.

SYP 4 Cydnabod yr heriau a’r cyfrifoldebau moesegol i wneud penderfyniadau gwybodus ym maes dylunio, ymchwil ac ymarfer pensaernïol, ac ymateb iddynt.

SYP 5 Mynd ati mewn modd beirniadol i asesu rôl y pensaer o ran rheoli ymarfer a phrosesau cyfreithiol a rheoleiddiol mewn perthnasoedd proffesiynol cydweithredol.

SYP 6 Cyd-destunoli eich datblygiad proffesiynol trwy gyfrwng blwyddyn o addysg ar waith.  

Sgiliau Trosglwyddadwy/Allweddol:

SA 1 Cyfleu ymchwil, dadleuon, cysyniadau, strategaethau a dyluniadau i gynulleidfaoedd amrywiol gan ddefnyddio dulliau cynrychioli a chyflwyno priodol.

SA 2 Cyflwyno safbwyntiau dylunio, technegol, damcaniaethol a/neu hanesyddol a arweinir gan ymchwil trwy ddefnyddio dulliau cyfathrebu llafar, gweledol ac ysgrifenedig sy'n briodol i'r gynulleidfa.

SA 3 Defnyddio arferion myfyriol i ddatblygu galluoedd/cydnerthedd personol a phroffesiynol ar gyfer sefyllfaoedd cymhleth ac anrhagweladwy.

SA 4 Ymarfer amrywiaeth o sgiliau cyflogadwyedd trosglwyddadwy, sy’n cynnwys gweithio ar y cyd ac yn annibynnol; rheoli adnoddau ac amser; meddwl mewn modd dadansoddol a rhesymegol ac wysg eich ochr i fynd i'r afael â phroblemau cymhleth; entrepreneuriaeth; a gwrando ar farn eraill, ei pharchu a chyfrannu ati.