Diwylliannau Byd-eang (MA)

Sut y caf fy addysgu?

Mae dulliau addysgu ac asesu, ffurfiannol a chrynodol, yn amrywiol ac yn ysgogol, ac yn ymgorffori ystod eang o ddulliau a dulliau gweithredu. Mae'r dulliau hyn yn cynnwys darlithoedd, seminarau a thiwtorialau, lle cewch gyfle i gael budd o drafodaethau, gwaith grŵp a thasgau ysgrifennu. Bydd y sgiliau a ddatblygir wedyn yn ystod cam a addysgir (Diploma Ôl-raddedig) y radd yn eich paratoi ar gyfer y broses o wneud gwaith ymchwil ac ysgrifennu eich traethawd hir yn ystod ail gam y rhaglen: Cam gradd meistr (traethawd hir).

Yn ystod y cam Diploma Ôl-raddedig byddwch yn cael eich addysgu drwy gyfuniad o ddarlithoedd, tiwtorialau, gweithdai a seminarau. Mae’r darlithoedd yn amrywio o ran ffurf ond yn gyffredinol yn darparu strwythur eang ar gyfer pob pwnc, yn cyflwyno cysyniadau allweddol a gwybodaeth gyfredol. Mewn tiwtorialau byddwch yn cael y cyfle i drafod themâu neu bynciau penodol, i atgyfnerthu gwaith dysgu unigol a chael adborth arno ac i feithrin sgiliau cyflwyno llafar. Caiff eich sgiliau cyfathrebu eu datblygu mewn tiwtorialau, lle byddwch yn gorfod gwneud cyfraniadau unigol at astudiaethau grŵp, er enghraifft, drwy grynhoi darlleniad neu ddadl benodol i'r grŵp.

Bydd cymryd rhan mewn gweithgareddau dysgu amrywiol, fel trafodaethau grŵp bach, dadleuon, cyflwyniadau llafar, tasgau ymchwil annibynnol ac aseiniadau ysgrifenedig yn datblygu eich sgiliau deallusol a’ch sgiliau cyflwyno.

Mae'r Ysgol Ieithoedd Modern ym Mhrifysgol Caerdydd yn elwa ar raglen reolaidd o gyflwyniadau gan ysgolheigion gwadd, y mae eu harbenigeddau yn berthnasol i'r rhaglen. Byddwch yn gallu dod i’r cyflwyniadau hyn er mwyn ehangu eich dealltwriaeth o faterion sy'n allweddol i'r rhaglen astudio hon. Mae'r rhaglen meistr hon hefyd yn cynnwys cyfraniadau rheolaidd gan weithwyr proffesiynol yn y sectorau diwylliannol a threftadaeth.

Un o nodau'r dull addysgu a nodir uchod yw cyfoethogi eich profiad dysgu a dyfnhau eich dealltwriaeth ddamcaniaethol o bwnc diwylliant byd-eang, gan gryfhau eich rhagolygon ar ôl i chi raddio, mewn marchnad yrfaoedd fyd-eang.

Sut y caf fy asesu?

Bydd yr asesiad yn cynnwys asesiad ffurfiannol a chrynodol.

Tasgau Ffurfiannol

Nid yw tasgau ffurfiannol yn cyfrannu at ddosbarth terfynol eich gradd ond maen nhw wedi’u cynllunio i roi cyfle i chi ddatblygu sgiliau ac ymarfer ar gyfer asesiadau crynodol. Maen nhw’n eich galluogi chi a'ch tiwtoriaid i werthuso datblygiad eich sgiliau a'ch cynnydd ym mhob modiwl. Fel arfer bydd tasgau ffurfiannol yn cynnwys gwaith cwrs ysgrifenedig neu asesiad dosbarth neu gallai gynnwys cyflwyniadau gan fyfyrwyr unigol.

Asesiadau Crynodol

Mae asesiadau terfynol yn cyfrannu at ddosbarth terfynol gradd. Mae canlyniadau yn yr asesiadau hyn yn:

• Pennu dilyniant ffurfiol o'r cam Diploma Ôl-raddedig i'r cam Gradd meistr (Traethawd Hir); ac yn
• Pennu’r dyfarniad terfynol.

Bydd natur yr asesiadau crynodol yn y cam Diploma Ôl-raddedig yn amrywio yn ôl modiwl, ond fel arfer byddant yn cynnwys gwaith cwrs ysgrifenedig terfynol (traethodau), aseiniadau ymarferol, fel cyflwyniadau llafar neu gyflwyniadau poster, neu weithdai. Mae asesiad crynodol yn y cam Gradd Meistr (traethawd hir) yn cynnwys y traethawd hir (15,000 o eiriau).

Byddwch yn cael cyfle i adolygu a thrafod y dull(iau) asesu sy'n gysylltiedig â phob modiwl gydag aelod o staff wrth wneud penderfyniadau am eich llwybr astudio.

Sut y caf fy nghefnogi?

Ar y rhaglen MA hon, mae gan gynullydd y rhaglen drosolwg o ddarpariaeth y rhaglen a thiwtoriaid modiwlau sy’n rheoli opsiynau a modiwlau craidd. Yn y lle cyntaf, byddwch yn gweithio gyda chynullydd y rhaglen i nodi eich prif ddiddordebau ymchwil ac i greu rhaglen astudio gyda dewis o fodiwlau priodol. Mae tiwtor personol wedi'i neilltuo i chi, a fydd y gyfrifol am eich gofal bugeiliol a'ch datblygiad academaidd. Byddwch hefyd yn cael budd o oruchwyliaeth unigol ar gyfer eich asesiadau ysgrifenedig a hynny gan aelodau unigol o staff sydd â diddordebau ymchwil priodol. Bydd goruchwyliwr traethawd hir penodol yn cael eich neilltuo i chi, yn seiliedig ar eu diddordebau ac ar arbenigedd y staff perthnasol.

Mae amryw o staff eraill ar gael i ddarparu cymorth pellach, gan gynnwys tîm gwasanaethau proffesiynol yr Ysgol, llyfrgellwyr arbenigol, a Swyddog Anabledd ac Amrywiaeth sy'n sicrhau bod addasiadau rhesymol yn cael eu gwneud i fyfyrwyr ag anableddau.

Mae sgiliau astudio’n cael eu cynnwys yn y modiwl Dulliau Ymchwil ac Ymarfer craidd, ond mae gennych hefyd fynediad i raglen Sgiliau Astudio Academaidd y Brifysgol, sy’n cael ei darparu gan y Tîm Sgiliau Astudio Academaidd a Mentora.

Mae pob modiwl yn y rhaglen yn defnyddio amgylchedd dysgu rhithwir y Brifysgol, Dysgu Canolog, yn helaeth. Yma, gallwch gael mynediad i fforymau trafod a dod o hyd i ddeunyddiau cwrs, gan gynnwys recordiadau o ddarlithoedd, dolenni i ddeunyddiau cysylltiedig, ac ati

Mae cynullydd y rhaglen hefyd yn eich cefnogi yn i gynllunio eich gyrfa, ar y cyd â Gwasanaeth Gyrfaoedd y Brifysgol.

Pa sgiliau y byddaf yn eu hymarfer a’u datblygu?

Gwybodaeth a Dealltwriaeth:

Ar ôl cwblhau'r rhaglen yn llwyddiannus byddwch yn gallu dangos:

• Y gallu i werthuso’n feirniadol a chymhwyso fframweithiau damcaniaethol sy’n ymwneud â globaleiddio diwylliant a rhyngweithiadau diwylliannol trawswladol;
• Y gallu i fynd ati i asesu’n feirniadol rôl amrywiaeth o sefydliadau ac unigolion diwylliannol yn y cyd-destun byd-eang, gan gynnwys ymarferwyr creadigol, sefydliadau diwylliannol, sefydliadau rhyngwladol, gweithwyr proffesiynol treftadaeth a defnyddwyr;
• Y gallu i gynnal dadansoddiad cymharol o gynhyrchiant a defnydd diwylliannol mewn cyd-destun byd-eang.

Sgiliau Deallusol:

Ar ôl cwblhau'r rhaglen yn llwyddiannus byddwch yn gallu dangos:

• Y gallu i lunio a chynnal prosiectau ymchwil annibynnol sy’n canolbwyntio ar ddiwylliant byd-eang yng nghyd-destun astudiaethau meysydd cymharol;
• Y gallu i asesu manteision a heriau ymchwil ryngddisgyblaethol ac amlddisgyblaethol wrth astudio diwylliant byd-eang;
• Y gallu i ddadansoddi’r defnydd posibl o ymchwil ar gyfer y rhai hynny sy’n gweithio yn y sector diwylliannol neu lunwyr polisïau diwylliannol;
• Y gallu i ystyried eich dysgu eich hun drwy ddefnyddio adborth adeiladol.

Sgiliau Ymarferol Proffesiynol:

Ar ôl cwblhau'r rhaglen yn llwyddiannus byddwch yn gallu dangos:

• Y gallu i werthuso a chyfosod dadleuon a data o ddisgyblaethau amrywiol yng nghyd-destun astudiaethau meysydd cymharol;
• Y gallu i ddadansoddi heriau byd-eang allweddol y mae’r sector diwylliannol yn eu hwynebu, er enghraifft o ran amrywiaeth ddiwylliannol, dynameg rhyngweithiadau trawswladol, a chreadigrwydd unigol;
• Y gallu i ysgrifennu i safon uchel ar gyfer ystod eang o gynulleidfaoedd gan gynnwys y byd academaidd, cyrff cyllido, llunwyr polisïau, sefydliadau celfyddydol a’r cyfryngau.

Sgiliau Trosglwyddadwy/Allweddol:

Ar ôl cwblhau'r rhaglen yn llwyddiannus byddwch yn gallu dangos:

• Y gallu i weithio'n annibynnol, gan ddangos sgiliau trefnu a rheoli amser;
• Y gallu i gyfleu syniadau’n effeithiol ac yn rhugl, yn ysgrifenedig ac ar lafar;
• Y gallu i gymhwyso sgiliau rhesymegol a rhesymu drwy drafod a dadlau.