Llenyddiaeth a'r Amgylchedd (MA)

Sut y caf fy addysgu?

Bydd pob modiwl yn cael ei addysgu mewn sesiynau gweithdy neu seminarau dwy awr wythnosol fel arfer, ac eithrio’r modiwl Briff Prosiect Byw, a fydd yn cael ei addysgu drwy gymysgedd o sesiynau gweithdy a seminarau dwy awr a chyfarfodydd ymchwil annibynnol gyda’ch grŵp ymchwil.

Byddwch hefyd yn cymryd rhan mewn taith maes i leoliad astudiaeth achos.

Bydd pwyntiau addysgu ychwanegol yn cynnwys y gweithdy traethawd hir a chynhadledd y traethawd hir.

Byddwch yn cael eich annog i fynychu digwyddiadau grŵp ymchwil Diwylliannau Amgylcheddol Caerdydd, a gynhelir drwy gydol y flwyddyn.

Sut y caf fy asesu?

Mae'r tri modiwl gofynnol a modiwl y traethawd hir yn cynnwys amrywiaeth eang o ddulliau asesu. Ar y modiwlau gofynnol gall y rhain gynnwys ysgrifennu podlediad ac ysgrifennu blog ar gyfer cynulleidfa gyhoeddus. Bydd y modiwl gofynnol Briff Prosiect Byw yn cael ei asesu trwy adroddiad 2500 o eiriau, cyflwyniad grŵp 10 munud o ganfyddiadau ymchwil eich adroddiad, a thraethawd myfyriol 500 gair ar eich cyfranogiad a’ch datblygiad sgiliau proffesiynol eich hun trwy gydol y modiwl.

Er bod pob modiwl gofynnol yn cael ei asesu drwy sawl darn o waith o wahanol fath, yn aml, ond nid bob amser, caiff y modiwlau dewisol eu hasesu drwy un darn o waith hir (4,000 o eiriau). Mae hyn er mwyn sicrhau eich bod chi’n cael digon o brofiad yn ysgrifennu traethodau hirach cyn i chi symud ymlaen i gam traethawd hir y rhaglen.

Bydd y traethawd hir yn cael ei asesu ar sail prosiect 15,000-16,000 o eiriau a thrwy gyflwyno ffurflen cynnig traethawd hir a gaiff ei hasesu, sy’n amlinellu eich prosiect ymchwil arfaethedig, gan fyfyrio ar y methodolegau y byddwch chi’n eu defnyddio yn eich ymchwil, ac yn cynnwys llyfryddiaeth anodedig.

Sut y caf fy nghefnogi?

Bydd tiwtor personol yn cael ei neilltuo i chi. Byddwch yn cwrdd â'r tiwtor unwaith y semester o leiaf, a bydd yn eich helpu i fyfyrio ar eich gwaith ac yn rhoi cyngor i chi, gan gynnwys eich cyfeirio at y cymorth sydd ar gael mewn cysylltiad â thechnegau astudio neu wasanaethau cymorth i fyfyrwyr yn y Brifysgol. Mae'r cyfarfodydd ffurfiol â'ch tiwtor personol wedi'u dylunio i lunio strategaethau cadarn i'ch helpu i wireddu eich potensial academaidd a phroffesiynol. Eich tiwtor personol yw eich pwynt cyswllt cyntaf os byddwch yn cael unrhyw anawsterau yn ystod eich astudiaethau. Gall myfyrwyr sy'n siarad Cymraeg ofyn am diwtor personol sy'n siarad Cymraeg.

Mae arweinwyr modiwlau ar gael yn ystod eu horiau swyddfa neu drwy apwyntiad er mwyn trafod unrhyw faterion sy'n ymwneud yn benodol â'u modiwlau. Fe'ch anogir i drafod pynciau a deunydd darllen ar gyfer eich asesiadau gyda'ch arweinwyr modiwl yn y lle cyntaf. Mae pob modiwl yn defnyddio amgylchedd dysgu rhithwir y Brifysgol i’ch cefnogi drwy eich dysgu.

Gallwch gwrdd â Chyfarwyddwr y Rhaglen MA Llenyddiaeth a’r Amgylchedd i drafod eich cynnydd ac unrhyw anawsterau rydych yn eu cael.

Gellir trafod cynlluniau traethawd a chynigion ar gyfer y traethawd hir drwy gydol y rhaglen, a darperir adborth ysgrifenedig ar asesiadau ffurfiannol a chrynodol er mwyn i chi ddatblygu asesiadau dilynol yng ngoleuni eich adborth. Mae modd cael adborth pellach ar eich cynnydd yn ystod trafodaethau seminar ac yn y gynhadledd i fyfyrwyr.

Byddwch yn cael goruchwyliaeth un-i-un wrth weithio ar eich traethawd hir ar ôl i chi gwblhau y cam a addysgir. Cefnogir y traethawd hir gan y modiwlau craidd sy’n rhedeg drwy’r cam a addysgir.

Mae cymorth sgiliau ysgrifennu ar gael i bob myfyriwr gan y staff academaidd a thrwy Ganolfan Datblygu Ysgrifennu yr Ysgol.

Mae'r cymorth gyrfaoedd yn cynnwys cyfarfodydd un-i-un i gael cyngor ar gynllunio gyrfa, a gwybodaeth am gyfleoedd lleoliad.

Tu hwnt i’r Ysgol, mae’r Brifysgol yn cynnig ystod o ddigwyddiadau a gwasanaethau cymorth sy’n eich helpu i gynllunio’ch gyrfa, rheoli eich iechyd meddwl, emosiynol, a chorfforol, yn rhoi cyngor i chi ar faterion ariannol, ac yn rhoi mynediad at gymorth yn ymwneud ag anableddau a dyslecsia. Lleolir y gwasanaethau hyn yng Nghanolfan Bywyd Myfyrwyr y brifysgol.

Pa sgiliau y byddaf yn eu hymarfer a’u datblygu?

Mae Deilliannau Dysgu’r rhaglen yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

Erbyn diwedd y rhaglen, byddwch yn gallu:

Gwybodaeth a Dealltwriaeth(GD):

• Deall yn systematig y berthynas rhwng testunau llenyddol a syniadau am Natur a’r amgylchedd, o fewn ac ar draws ystod eang o wahanol gyfnodau hanesyddol.
• Asesu'n feirniadol y perthnasoedd rhwng testunau llenyddol a'u cyd-destunau diwylliannol, hanesyddol, esthetig ac amgylcheddol.
• Deall yn systematig y dadleuon allweddol mewn ecofeirniadaeth, Llenyddiaeth a’r Amgylchedd, a’r Dyniaethau Amgylcheddol ehangach.
• Deall yn systematig destunau llenyddol o ystod o safbwyntiau ecofeirniadol.
• Deall yn systematig gonfensiynau ysgrifennu academaidd ar lefel ôl-raddedig.

Sgiliau Deallusol:

• Archwilio testunau llenyddol a syniadau am Natur o amrywiaeth o ffynonellau, cyfnodau a chyd-destunau.
• Asesu’n feirniadol y problemau cyfredol a datblygu mewnwelediadau newydd ym maes Llenyddiaeth a’r Amgylchedd.
• Datblygu dulliau methodolegol o ecofeirniadaeth a’r Dyniaethau Amgylcheddol ehangach, gan ddefnyddio’r dulliau hyn i ddadansoddi testunau’n feirniadol a chynnal ymchwil wreiddiol.
• Datblygu ymchwil wreiddiol i berthynas/berthnasau testunau llenyddol â’u cyd-destunau amgylcheddol, hanesion, a gyda syniadau esblygol am Natur a’r amgylchedd dros amser.

Sgiliau Ymarferol Proffesiynol:

• Casglu a datblygu gwybodaeth o ffynonellau niferus wrth ymdrin â materion cymhleth o fewn ac ar draws meysydd pwnc Llenyddiaeth Saesneg a'r Dyniaethau Amgylcheddol.
• Cyfathrebu syniadau cymhleth wedi'u hymchwilio'n annibynnol yn glir i gynulleidfaoedd arbenigol neu anarbenigol.
• Asesu a datrys problemau'n annibynnol, gan ystyried barn pobl eraill mewn ffordd systematig a gwerthusol.

Sgiliau Trosglwyddadwy/Allweddol:

• Datblygu menter drwy gymryd cyfrifoldeb a rheoli amser ar dasg ymchwil fawr.
• Cyfathrebu'n berswadiol, gan gyfleu syniadau academaidd uwch a dadleuon technegol i gynulleidfaoedd arbenigol neu anarbenigol a hynny drwy ddefnyddio technegau ysgrifenedig neu lafar.
• Cysylltu a chasglu canfyddiadau ymchwil, gan ddefnyddio ystod o ddulliau ac ymagweddau ar sail dyniaethau.
• Meithrin mentergarwch a chyfrifoldeb personol wrth ddysgu’n annibynnol ac olrhain datblygiad proffesiynol parhaus.