Cysylltiadau Cyhoeddus Rhyngwladol a Chyfathrebu (MA)

Sut y caf fy addysgu?

Byddwch yn cael eich dysgu drwy ddarlithoedd, deunyddiau ar-lein, seminarau, a gweithdai i gyflwyno elfennau ymarferol ac academaidd y cwrs. Byddwch hefyd yn clywed gan weithwyr proffesiynol sy'n arwain y diwydiant drwy'r gyfres darlithoedd arbenigol sy'n rhan reolaidd o'r rhaglen hon.

Sut y caf fy asesu?

Y prif ddull asesu ar y rhaglen yw gwaith cwrs ysgrifenedig, megis traethawd academaidd neu adroddiad proffesiynol. Mae'r rhan fwyaf o'r asesiadau hyn yn cael eu cwblhau'n unigol ac mae rhai prosiectau grŵp wedi'u cynnwys i ddangos eich profiad o weithio mewn tîm a chydweithio.

Sut y caf fy nghefnogi?

Rydym yn cynnig cyfoeth o gefnogaeth i fyfyrwyr ôl-raddedig, gan gynnwys cymorth arbenigol i fyfyrwyr rhyngwladol drwy dîm Cyswllt Myfyrwyr sydd wedi'i leoli yng Nghanolfan Bywyd y Myfyrwyr y brifysgol. Mae gan yr Ysgol Newyddiaduraeth, y Cyfryngau a Diwylliant dîm Cymorth Myfyrwyr pwrpasol hefyd i'ch helpu gyda llawer o agweddau ymarferol ar eich rhaglen neu i'ch cyfeirio at adnoddau eraill.

Cefnogaeth academaidd

Yn ystod y rhaglen, bydd ein darlithwyr a'n tiwtoriaid profiadol wrth law i roi help gyda'r cynnwys academaidd ar gyfer pob un o'ch modiwlau. Mae eu cymorth a'u cefnogaeth ar gael o fewn y seminarau personol rheolaidd a gallwch hefyd gysylltu â nhw drwy e-bost yn ystod yr wythnosau addysgu os oes gennych gwestiynau pellach.

Ym mhob modiwl byddwch yn derbyn adborth ar eich gwaith ac ar gyfer pob asesiad rydym yn darparu adborth ysgrifenedig fel rhan o'r broses farcio. Mae adborth arall yn llai ffurfiol ac yn digwydd wrth i chi gymryd rhan yn y seminarau a'r gweithgareddau amrywiol a gynhelir yn ystod y rhaglen.

Adnoddau academaidd

I gefnogi eich astudiaeth bydd gennych fynediad i lyfrgell fawr o adnoddau a deunyddiau eraill. Byddwch yn cael eich cyfeirio at lawer o’r rhain wrth i’r cwrs fynd yn ei flaen, ond mae holl ddeunyddiau hanfodol y rhaglen a’r modiwl ar gael ar-lein mewn porth ar-lein pwrpasol. Bydd ar gael drwy’r amser drwy gydol y rhaglen.

Byddwch hefyd yn gallu cael mynediad at lyfrgelloedd Prifysgol Caerdydd ar draws y campws, gan gynnwys llyfrgell yr ysgol yng nghanol ein hadeilad yn y Sgwâr Canolog. Ceir mynediad ar-lein hefyd i fwy na 1.5 miliwn o lyfrau, cyfnodolion ac adnoddau eraill. Mae ein hadnoddau llyfrgell yn arbennig o ddefnyddiol wrth weithio ar eich prosiect ymchwil a pharatoi eich traethawd hir tuag at diwedd y rhaglen. Mae hon yn rhan hanfodol a sylweddol o'r radd a byddwn yn gwneud yn siŵr eich bod yn cael cynnig cefnogaeth goruchwyliwr academaidd wrth i chi ddatblygu eich prosiect.

Mathau eraill o gefnogaeth

Hefyd, bydd gennych diwtor personol yn ystod y rhaglen. Gall y tiwtor roi cyngor academaidd a chyffredinol. Os ydych chi'n profi anawsterau, byddant yno i wrando a'ch helpu i'ch cyfeirio at y ffynhonnell gymorth briodol. Yn ogystal, mae mwy o wasanaethau cymorth arbenigol ar gael drwy Gyswllt Myfyrwyr a'n timau Bywyd Myfyrwyr.

Wedi'u lleoli yng Nghanolfan Bywyd Myfyrwyr a adeiladwyd yn bwrpasol, mae'r gwasanaethau cymorth hyn yn cynnwys: Cyngor ac Arian, Dyfodol Myfyrwyr ar gyfer cymorth gyrfaoedd, gwasanaethau Cwnsela, Iechyd a Lles, y Gwasanaeth Anabledd Myfyrwyr gan gynnwys cymorth dyslecsia, Sgiliau Astudio Academaidd a Mentora Myfyrwyr. Gall ein gwasanaethau Cyswllt Myfyrwyr hefyd roi cyngor mewn meysydd sy'n fwy penodol i fyfyrwyr rhyngwladol megis fisas a gofynion mewnfudo.

Pa sgiliau y byddaf yn eu hymarfer a’u datblygu?

Mae deilliannau dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Dangos dealltwriaeth feirniadol o’r fframweithiau damcaniaethol, cysyniadau ac egwyddorion sy’n sail i gysylltiadau cyhoeddus a’i rol ar lefelau lleol, cenedlaethol a rhyngwladol o sefydliadau economaidd, gwleidyddol a chymdeithasol. 
• Cysylltu amrywiaeth o ddulliau cysylltiadau cyhoeddus a chyfathrebu â pharthau neu yrwyr ymarfer presennol, gan werthuso eu goblygiadau diwylliannol, cymdeithasol a gwleidyddol.
• Trafod eich dulliau gwerthuso yn fanwl wrth asesu effeithiolrwydd ac effaith ymgyrchoedd cysylltiadau cyhoeddus, neu weithgareddau strategol eraill.
• Archwilio safbwyntiau a’r ddeinameg rhyngddiwylliannol byd-eang sy’n dylanwadu ar arfer cysylltiadau cyhoeddus, gan ddangos ymwybyddiaeth o’u heffaith ar enw da sefydliadol ac effeithiolrwydd y cyfathrebu.

Sgiliau Deallusol:

• Asesu a chymhwyso’n feirniadol dealltwriaeth berthnasol i ystod o sefyllfaoedd cymhleth gan ddefnyddio technegau ymchwil ac ymholi addas. Drwy wneud hyn, byddwch yn archwilio’n fanwl materion cysylltiadau cyhoeddus yn eu cyd-destun sefydliadol, cymdeithasol a diwylliannol.
• Crynhoi gwybodaeth gymhleth o sawl disgyblaeth er mwyn datblygu strategaethau cyfathrebu dealladwy a darbwyllol, sydd wedi’u teilwra i randdeiliaid a chyd-destunau amrywiol.
• Ymchwilio i faterion rheoli cysylltiadau cyhoeddus a chyfathrebu, gan ddangos dealltwriaeth feirniadol o sut i werthuso (cadernid a dilysrwydd) data newydd neu ddata sydd eisoes yn bodoli, a’i gymhwyso i sefyllfaoedd neu ddulliau ymarfer newydd. 

Sgiliau Ymarferol Proffesiynol:

• Datblygu a chynllunio ymgyrchoedd cysylltiadau cyhoeddus sy’n alinio â nodau ac amcanion sefydliadol drwy integreiddio meddwl yn strategol, dadansoddi’r gynulleidfa a chynllunio tactegol sianelau ar-lein ac all-lein.
• Dewis a chymhwyso ystod o arferion cyfathrebu a chyfryngau proffesiynol mewn ymateb i faterion neu broblemau sefydliadol, gan ddangos sgiliau meddwl yn strategol a gweithredu pragmatig. 
• Ymchwilio ac ymgysylltu â phrosesau creadigol i greu ystod o allbynnau cysylltiadau cyhoeddus, gan ddeall sut i ddehongli'r deunydd hwn ar gyfer anghenion gwahanol gynulleidfaoedd, rhanddeiliaid, llwyfannau ac amcanion cyfathrebu.
• Dangos cyfrifoldeb a hunanreolaeth wrth symud ymlaen â'u datblygiad dysgu a phroffesiynol, gan fyfyrio ar gynnydd ac ymateb i adborth gyda chamau priodol.

Sgiliau Trosglwyddadwy/Allweddol:

• Gweithio ar draws amrywiaeth o ddulliau astudio unigol, grŵp a hunan-reolir, gan ddangos menter, cymhelliant, creadigrwydd a'r gallu i hunan-fyfyrio yn feirniadol.
• Cydweithio'n effeithiol trwy ddangos gwaith tîm a phroffesiynoldeb, parchu gwahanol gyfraniadau neu safbwyntiau, a gallu datrys gwrthdaro mewn modd rhesymol a drwy negodi. 
• Cymhwyso sgiliau datrys problemau a gwneud penderfyniadau uwch, gan ddefnyddio barn a chreadigrwydd beirniadol i fynd i'r afael â materion a heriau cymhleth o fewn y proffesiwn cyfathrebu.
• Dadansoddi a syntheseiddio data a gwybodaeth o amrywiaeth o ffynonellau, er mwyn gwerthuso ei berthnasedd a'i ddilysrwydd, a syntheseiddio ei gymhwysiad i sefyllfaoedd byd go iawn neu gyd-destunau proffesiynol. 
• Dangos chwilfrydedd deallusol, meddwl beirniadol annibynnol a’r gallu i fynegi syniadau'n effeithiol, gan gyfathrebu'n glir ar lafar ac yn ysgrifenedig, gan ddefnyddio amrywiaeth o gyfryngau.