Rhagnodi Annibynnol ar gyfer Optometryddion (Tystysgrif Ôl-raddedig)

Sut y caf fy addysgu?

Mae pob modiwl yn cynnig amrywiaeth o ddulliau addysgu a dysgu, ac yn defnyddio'r Amgylchedd Dysgu Rhithwir ac adnoddau ar-lein yn helaeth. I gyd-fynd â darlithoedd ar-lein ac erthyglau mae gweminarau sy'n galluogi trafodaethau o bell am achosion. 

Rhoddir cyfleoedd addysgu a dysgu gan optometryddion (rhagnodwyr annibynnol), offthalmolegwyr, ffarmacolegwyr, meddygon teulu, microbiolegwyr, fferyllwyr offthalmig a chlinigol.  Pan fyddwch ar leoliad, byddwch yn cael eich goruchwylio gan Ymarferydd Rhagnodi Dynodedig (DPP). 

Dysgu dan gyfarwyddyd a dysgu hunangyfeiriedig

Byddwn yn rhoi gweithgareddau dysgu hunangyfeiriedig i chi lle bydd disgwyl i chi ymgymryd â gweithgareddau darllen penodol a gweithgareddau eraill y tu allan i'r amser cyswllt arferol yn eich amserlen. Mae'r adnoddau hyn yn helpu i ategu'r gweithgareddau addysgu a dysgu ffurfiol a’r gweithgareddau sgiliau.

Sut y caf fy asesu?

Amrywiaeth o ddulliau asesu gan gynnwys cyflwyno cofnodion achos ac arholiadau wedi'u hamseru.  Mae hyn yn adlewyrchu'r lefel uchel o sgiliau penderfynu a gwybodaeth sy'n ofynnol ar gyfer gofal clinigol uwch mewn optometreg.

Bydd portffolio yn cael ei gwblhau yn ystod eich amser yn ymarfer a bydd yn dangos eich gallu i integreiddio gwaith theori i’ch gwaith ymarferol. Mae'n cynnwys gwybodaeth am eich cwmpas ymarfer a'ch cofnodion clinigol a bydd eich Ymarferydd Rhagnodi Dynodedig yn nodi sut rydych wedi cyflawni'r canlyniadau dysgu.

Mae'r rhaglen yn defnyddio asesiadau ffurfiannol a chrynodol ym mhob modiwl gan roi'r cyfle i chi gael adborth manwl cyn cyflwyno eich asesiad crynodol.  

Sut y caf fy nghefnogi?

Ar ddechrau'r rhaglen mae wythnos ymsefydlu orfodol ar-lein. Bydd hyn yn eich helpu i ddod i ddeall yr amgylchedd dysgu ar-lein a sut y bydd y tîm yn eich cefnogi yn ystod eich astudiaethau.  Bydd angen i chi fod yn bresennol mewn diwrnod addysgu ar-lein, a gynhelir tua dechrau'r rhaglen gan roi cyfle i chi gwrdd â myfyrwyr eraill yn ogystal â'r tiwtoriaid. 

Yn ystod eich modiwl lleoliad bydd gennych oruchwyliwr, a elwir yn Ymarferydd Rhagnodi Dynodedig (DPP). Byddwch hefyd yn cyfarfod ar-lein gyda thiwtor o’r Brifysgol a fydd yn trafod eich cynnydd.

Dyrennir Tiwtor Personol ar ddechrau'r rhaglen a bydd yn bwynt cyswllt ar gyfer unrhyw faterion academaidd neu bersonol.  Mae Arweinwyr a Thiwtoriaid modiwlau ar gael drwy e-bost ac ar fyrddau trafod. Maent hefyd yn cynnal gweminarau ar-lein rheolaidd a fydd yn eich galluogi i ryngweithio â myfyrwyr eraill ac arweinydd y modiwl. 

Byddwch yn cael adborth gan diwtoriaid y Brifysgol ar ôl asesiadau, yn ystod y diwrnod addysgu wyneb yn wyneb, a thrwy gydol y rhaglen drwy weithgareddau ar-lein gan gynnwys byrddau trafod.  Byddwch hefyd yn cael adborth gan eich goruchwylwyr lleoliad ac Ymarferydd Rhagnodi Dynodedig.

Mae'r Brifysgol yn cynnig amrywiaeth o wasanaethau a digwyddiadau cymorth i'ch helpu i reoli eich iechyd emosiynol, meddyliol a chorfforol, cefnogaeth gyda materion ariannol, a chymorth i fyfyrwyr ag anableddau.  Mae modd cael mynediad atynt wyneb yn wyneb yng Nghanolfan Bywyd y Myfyrwyr yn y Brifysgol, neu o bell drwy'r manylion cyswllt a nodir ar y Fewnrwyd i Fyfyrwyr. Mae ein llyfrgelloedd yn cynnig amrywiaeth eang o adnoddau electronig yn ogystal â chopïau caled ar y campws.  

Pa sgiliau y byddaf yn eu hymarfer a’u datblygu?

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

GD 1 (CDY3) Dangos gwybodaeth a dealltwriaeth systematig o asesiadau clinigol, diagnosis, a rheoli cleifion o fewn cwmpas ymarfer, gan gynnwys sut i ragnodi'n rhesymegol ac yn ddiogel.

GD 2 (CDY3\) Dangos gwybodaeth a dealltwriaeth systematig o gyflyrau clinigol a gweithredoedd cyffuriau drwy wneud defnydd effeithiol o wybodaeth sy'n seiliedig ar dystiolaeth.

Sgiliau Deallusol:

SD 1 (CDY4) Gwerthuso'n feirniadol ymchwil a chanllawiau a fframweithiau cenedlaethol, rhanbarthol a lleol i lywio'r broses o wneud penderfyniadau clinigol fel rhagnodwr annibynnol.

SD 2 (CDY6) Dadansoddi'n feirniadol a rheoli gwahanol lefelau o risg glinigol gan gynnwys arferion neu systemau rhagnodi anniogel, gan gymryd camau i sicrhau amgylchedd diogel i gleifion a'r cyhoedd.

Sgiliau Ymarferol Proffesiynol:

SY 1 (CDY1) Dangos cyfathrebu a chydweithio effeithiol gyda thîm amlddisgyblaethol sy'n ymwneud â gofal cleifion, gan gynnwys rhagnodi, cyflenwi a rhoi meddyginiaethau.

SY 2 (CDY2) Dangos dull sy'n canolbwyntio ar yr unigolyn drwy ddewis a chymhwyso strategaethau effeithiol ar gyfer ymgynghori, cyfathrebu, negodi, gwneud penderfyniadau ar y cyd a chyd-gynhyrchu gyda chleifion a gofalwyr.

SY 3 (CDY5) Dangos bod deddfwriaeth briodol, a llywodraethu moesegol, proffesiynol a chlinigol briodol yn cael eu cymhwyso’n systematig wrth ragnodi.

Sgiliau Trosglwyddadwy/Allweddol:

SA 1 (CDY7) Dangos ymrwymiad i ddatblygu a chynnal gwybodaeth a sgiliau clinigol sy'n briodol i ragnodwr annibynnol gan ddefnyddio myfyrio a rhyngweithio â chymheiriaid.