Rheoli Adnoddau Dynol (MSc)

Sut y caf fy addysgu?

Caiff ein dulliau addysgu eu llywio’n helaeth gan ymchwil ac maen nhw’n cyfuno manylrwydd academaidd gyda pherthnasedd ymarferol. Mae ein cyfadran sydd o fri rhyngwladol yn cynnwys academyddion sydd ar flaen y gad o ran gwybodaeth o fewn eu maes. Maen nhw’n dod â’r gwersi maen nhw wedi eu dysgu o’u hymchwil ddiweddaraf i’r ystafell ddosbarth, gan eich galluogi i feddwl yn feirniadol am fusnes a chynnig enghreifftiau a senarios go iawn.

Byddwn yn darparu eich adnoddau addysgu a dysgu, ac yn ymateb i’ch anghenion a’ch safbwyntiau. O'ch rhan chi, bydd gofyn i chi wneud y gwaith angenrheidiol yn ystod a thu allan i’r sesiynau addysgu ffurfiol, a gwneud defnydd da o'r cyfleusterau a ddarperir.

Dulliau Addysgu

Mae'r rhan fwyaf o fodiwlau yn cynnwys cymysgedd o ddarlithoedd ac addysgu mewn grwpiau bach (dosbarthiadau, seminarau, gweithdai neu sesiynau tiwtorial).

Mewn darlith, byddwch yn cael trosolwg o agwedd benodol ar gynnwys y modiwl (yn ogystal â rhoi’r cyfle i fyfyrwyr ofyn cwestiynau a bod yn fyfyriol). Yna mewn dosbarthiadau a gweithdai, cewch gyfle i ymarfer technegau, trafod syniadau, cymhwyso cysyniadau a chyfnerthu eich dealltwriaeth yn y pwnc.

Sut y caf fy asesu?

Mae'r dulliau asesu'n amrywio o fodiwl i fodiwl ond, ar draws cynllun y radd yn gyffredinol, gallwch ddisgwyl cymysgedd o arholiadau, gwaith cwrs, traethodau, gwaith ymarferol, cyflwyniadau a phrosiectau unigol ac mewn grŵp.

Cofnodion Adfyfyriol

Bydd gofyn i chi gadw cofnod myfyriol a fydd yn cofnodi agweddau ar eich dysgu yn ystod y rhaglen MSc. Yn ystod y rhaglen byddwch yn datblygu sgiliau astudio, sgiliau effeithiolrwydd personol a sgiliau Adnoddau Dynol penodol ac yn ysgrifennu cofnodion myfyriol yn manylu ar sut y caiff y sgiliau hyn eu defnyddio a'u datblygu.

Defnyddir y myfyrdod hwn i'ch helpu i nodi cysylltiadau rhwng y gwahanol fodiwlau a datblygu'r ystod o sgiliau sydd eu hangen i weithredu'n llwyddiannus mewn rôl Adnoddau Dynol.

Mae'r cofnodion myfyriol yn un o ofynion y cwrs a rhaid eu cwblhau i safon dderbyniol cyn y gallwch gwblhau'r rhaglen MSc.

Sut y caf fy nghefnogi?

Byddwch yn cael tiwtor personol ar ddechrau eich astudiaethau. Fel arfer, bydd eich tiwtor personol yn addysgu ar eich cwrs gradd chi a byddwch yn cadw’r un tiwtor personol drwy gydol eich cwrs.

Bydd eich tiwtor personol yn gallu rhoi cyngor i chi ar faterion academaidd, gan gynnwys dewis modiwlau ac asesu. Os cewch unrhyw broblemau sy'n effeithio ar eich astudiaethau, eich tiwtor personol yw eich pwynt cyswllt cyntaf bob tro. Bydd eich tiwtor yn gallu eich rhoi mewn cysylltiad ag ystod eang o wasanaethau cymorth arbenigol ar gyfer myfyrwyr a ddarperir gan y Brifysgol, ac Undeb y Myfyrwyr, fel y bo'n briodol. Bydd gofyn i chi gyfarfod â’ch tiwtor personol dair gwaith yn ystod pob blwyddyn academaidd, ond fe’ch anogir hefyd i gysylltu â nhw ar unrhyw adeg arall os oes angen help neu gyngor arnoch chi.

I gael gwybodaeth gyffredinol, mae staff ein Hyb Myfyrwyr Ôl-raddedig ar gael, yn bersonol, dros y ffôn neu trwy ebost, bob dydd o'r wythnos yn ystod y tymor i ateb eich cwestiynau.

Byddwn hefyd yn defnyddio Dysgu Canolog, sef amgylchedd dysgu rhithwir y Brifysgol. Cyhoeddir deunyddiau pob rhaglen a modiwl yma.

Mae'r Brifysgol yn cynnig cyfoeth o gefnogaeth i fyfyrwyr ôl-raddedig y gellir eu gweld ar ein tudalennau cefnogi myfyrwyr canolog.

Adborth

Byddwn yn rhoi adborth i chi ar eich gwaith yn rheolaidd. Cyflwynir adborth mewn amrywiaeth o fformatau gan gynnwys adborth ar lafar, adborth personol ar waith ysgrifenedig, ac adborth ysgrifenedig cyffredinol.

Byddwch yn cael adborth cyffredinol mewn perthynas ag arholiadau ar ôl pob cyfnod arholi a byddwch yn gallu trafod eich perfformiad cyffredinol gyda'ch tiwtor personol.

Wrth weithio ar eich traethawd hir/prosiect, mae disgwyl i chi gyfarfod â’ch goruchwylydd yn rheolaidd i adolygu eich cynnydd a thrafod unrhyw gwestiynau. Bydd eich goruchwylydd yn gallu rhoi adborth i chi ar eich cynllun ymchwil ac ar ddrafftiau o’ch gwaith wrth i chi weithio arnynt.

Pa sgiliau y byddaf yn eu hymarfer a’u datblygu?

Mae'r Deilliannau Dysgu ar gyfer y rhaglen hon yn disgrifio beth fyddwch yn gallu ei wneud o ganlyniad i’ch astudiaeth ym Mhrifysgol Caerdydd. Bydd y rhain yn eich helpu i ddeall yr hyn a ddisgwylir gennych.

Mae’r Deilliannau Dysgu ar gyfer y rhaglen hon i’w gweld isod:

Gwybodaeth a Dealltwriaeth:

Ar ôl cwblhau'r rhaglen yn llwyddiannus byddwch yn gallu dangos:

• Gwybodaeth a dealltwriaeth o waith ymchwil damcaniaethol ac empirig cyfredol ym maes eang Rheoli Adnoddau Dynol ac o'i fethodoleg ymchwil sylfaenol
• Gwybodaeth a dealltwriaeth o ddimensiynau allweddol o strwythur cymdeithasol a threfniadaeth gwaith, o wahanol ddulliau a safbwyntiau damcaniaethol o brosesau sefydliadol, a natur rheolaeth gan reolwyr a strategaethau rheoli sydd ar gael i reolwyr.
• Gwybodaeth a dealltwriaeth dda o'r prif weithgareddau a thasgau sy'n gysylltiedig â rheoli adnoddau dynol
• Gwybodaeth a dealltwriaeth o'r prif ddulliau o reoleiddio cyflogaeth, gan gynnwys systemau cenedlaethol mewn amrywiaeth o wledydd

Sgiliau Deallusol:

Ar ôl cwblhau'r rhaglen yn llwyddiannus byddwch yn gallu dangos:

• Eich bod yn gallu asesu gwyddoniaeth gymdeithasol ym maes HMRC yn feirniadol ac yn gallu ymgymryd â phrosiect ymchwil gwreiddiol gydag adroddiad rheoli
• Y gallu i drafod materion a dadleuon cyfoes mewn theori ac ymarfer sefydliadol
• Eich bod yn gallu gwerthuso sut y mae grymoedd economaidd, cymdeithasol, cyfreithiol a gwleidyddol yn llywio cysylltiadau cyflogaeth
• Y gallu i werthuso priodoldeb deunydd sy'n seiliedig ar ymchwil a gafwyd wrth astudio sefydliadau a rheoli adnoddau dynol

Sgiliau Ymarferol Proffesiynol:

Ar ôl cwblhau'r rhaglen yn llwyddiannus byddwch yn gallu dangos:

• Y gallu i gyfrannu at ddatblygu ac adolygu polisi mewn Rheoli Adnoddau Dynol o fewn sefydliadau rheoli, polisi cyhoeddus a sefydliadau llafur
• Eich bod yn gallu ysgrifennu adolygiad o lenyddiaeth a dylunio cynnig ymchwil i astudio gwahanol faterion rheoli adnoddau dynol
• Eich bod wedi ennill y sgiliau angenrheidiol i gyflawni ac ysgrifennu'r cynnig ymchwil a gynlluniwyd uchod

Sgiliau Trosglwyddadwy/Allweddol:

Ar ôl cwblhau'r rhaglen yn llwyddiannus byddwch yn gallu dangos:

Eich bod wedi ennill sgiliau mewn:

• ymchwil yn seiliedig o’r llyfrgell
• gwaith a thrafodaethau tîm
• cyflwyniadau ysgrifenedig a llafar;
• dadlau, trafodaeth, cyflafareddu a chyd-drafod
• TGCh, gan gynnwys Photoshop ac SPSS