Hanes (MA)

Sut y caf fy addysgu?

Mae addysgu ein MA yn canolbwyntio ar seminarau mewn grwpiau bach a dosbarthiadau meistr, a ategir gan diwtorialau unigol a sesiynau goruchwylio. Defnyddir amrywiaeth o weithgareddau ar draws ein modiwlau MA, sy'n amrywio o ran arddull a dulliau rhwng y modiwlau craidd, modiwlau dewisol a'r traethawd hir. Maen nhw'n cynnwys seminarau a thiwtorialau mewn grwpiau bach a arweinir gan fyfyrwyr a thiwtoriaid, dosbarthiadau meistr, ymarferion ymarferol, a sesiynau goruchwylio'r traethawd hir.

Mae seminarau fel arfer yn ddwy awr o hyd ac yn amrywio rhwng tua 10 a 20 o fyfyrwyr o ran maint. Mewn seminarau, byddwch yn cyfrannu at drafodaethau a dadleuon yn ogystal â chyflwyno'ch canfyddiadau, eich dehongliadau o ddarlleniadau, a'ch ymchwil yn fwy cyffredinol. Ar gyfer eich traethawd hir, byddwch yn ymgymryd ag astudiaeth ac ymchwil annibynnol, gydag arweiniad gan oruchwyliwr academaidd.

Mae'r dulliau addysgu hyn yn eich galluogi chi i ddatblygu sgiliau cyfathrebu a dadansoddi, ac i ddatblygu dulliau o feddwl yn feirniadol mewn amgylchedd cefnogol.

Addysgu yn yr Iaith Gymraeg

Rydym yn cynnig cyfleoedd i ddysgu ac addysgu drwy gyfrwng y Gymraeg. Gan ddibynnu ar y staff sydd ar gael, cynigir tiwtorialau yn y Gymraeg ar rai neu'r holl gyrsiau craidd ac mewn rhai modiwlau dewisol. Mae goruchwyliaeth drwy gyfrwng y Gymraeg hefyd ar gael ar gyfer y traethawd hir Meistr, a gallwch ddewis ysgrifennu'r cyfan neu ran o'ch gwaith a asesir a'ch arholiadau yn Gymraeg.

Sut y caf fy asesu?

Rydym yn defnyddio ystod eang o ddulliau asesu, gan gynnwys traethodau gwaith cwrs, beirniadaeth o ffynonellau, llyfryddiaethau anodedig, blogiau, adolygiadau beirniadol, posteri a chyflwyniadau llafar.

Defnyddir gwaith cwrs ar gyfer dibenion asesu, ac fel ffordd o ddatblygu eich gallu i gasglu, trefnu, gwerthuso a defnyddio syniadau a gwybodaeth berthnasol o wahanol ffynonellau mewn dadleuon rhesymegol. Bydd asesiadau'n profi'r sgiliau gwahanol rydych wedi'u dysgu.

Rhoddir adborth ar asesiadau er mwyn rhoi'r cyfle i chi ystyried eich lefel cyrhaeddiad bresennol neu ddiweddar. Gall adborth fod ar sawl ffurf, gan gynnwys adborth unigol un-i-un; adborth gan gymheiriaid; a hunanwerthusiadau i'w cyflwyno ynghyd â'r asesiad. Cynigir cyfleoedd i drafod cynlluniau traethawd a chynigion traethawd hir drwy gydol y rhaglen.

Sut y caf fy nghefnogi?

Mae'r rhaglen BA Hanes yng Nghaerdydd yn cael ei haddysgu gan dîm, gyda'r rhaglen yn ei chyfanrwydd yn cael ei goruchwylio gan Gynullydd y Rhaglen. Yn y rhan o'r MA a addysgir, cewch eich cefnogi gan sawl aelod o staff sy'n canolbwyntio ar berfformiad academaidd yn y modiwlau rydych yn eu hastudio. Cewch hefyd diwtor personol penodol, a fydd mabwysiadu dull mwy cyfannol o drin eich dysgu a'ch cynnydd. Byddwch yn cwrdd â'ch tiwtor personol yn rheolaidd. Gall eich tiwtor personol hefyd eich arwain tuag at gymorth priodol os ydych chi'n cael trafferth. Byddwch yn parhau â'r un tiwtor personol drwy gydol eich gradd, oni bai nad yw ar gael yn yr ail flwyddyn oherwydd caniatâd i fod yn absennol, ei fod yn ymddeol, ac ati.

Cewch eich arholi yn ail ran yr MA drwy draethawd hir, lle byddwch yn cael goruchwyliaeth un-i-un i'ch helpu i lunio, ymchwilio ac ysgrifennu eich traethawd hir.

Trwy gydol yr MA fe'ch anogir i drafod eich syniadau gyda thiwtoriaid modiwl mewn seminarau yn un-i-un yn ystod oriau swyddfa, a thrwy ymgynghori â'ch tiwtor personol penodol.

Mae ein Tîm Gwasanaethau Proffesiynol yn rhoi cefnogaeth academaidd a chefnogaeth i fyfyrwyr. Cewch hyd i'r tîm yn yr 'hyb y myfyrwyr' pwrpasol yn yr Ysgol. Mae hefyd gennym Swyddog Cymorth i Fyfyrwyr pwrpasol, sy'n gallu rhoi'r cyngor a'r arweiniad angenrheidiol i chi mewn amgylchedd cefnogol, gofalus a chyfrinachol. Byddwch hefyd yn elwa ar gael cyngor gan Swyddog Lleoliadau Gwaith penodedig a fydd yn eich cefnogi chi gyda chyfleoedd profiad gwaith yn ystod y tymor ac yn ystod y gwyliau.

Y tu hwnt i'r Ysgol, mae'r Brifysgol yn cynnig amrywiaeth o wasanaethau sy'n cynnwys y Gwasanaeth Gyrfaoedd, y Gwasanaeth Cwnsela, y Gwasanaeth Anabledd a Dyslecsia, y Gwasanaeth Cymorth i Fyfyrwyr, y Ganolfan Datblygu Sgiliau Academaidd a llyfrgelloedd a chanolfannau adnoddau ardderchog.

Pa sgiliau y byddaf yn eu hymarfer a’u datblygu?

Mae'r Deilliannau Dysgu ar gyfer y Rhaglen hon yn disgrifio'r hyn y byddwch yn gallu ei wneud o ganlyniad i'ch astudiaeth ym Mhrifysgol Caerdydd. Byddant yn eich helpu i ddeall yr hyn a ddisgwylir gennych.

Gellir gweld y Deilliannau Dysgu ar gyfer y Rhaglen hon isod:

Gwybodaeth a Dealltwriaeth:

Ar ôl cwblhau'r Rhaglen yn llwyddiannus byddwch wedi datblygu:

• gwybodaeth a dealltwriaeth gynhwysfawr o brosesau a newidiadau hanesyddol mewn cyfnod penodol, rhanbarth ddaearyddol neu ddull thematig
• gwybodaeth a dealltwriaeth feirniadol o dueddiadau, dulliau ac ymagweddau cyfredol yn y ddisgyblaeth Hanes, ymchwil hanesyddol a rheoli a gwarchod y gorffennol
• gwybodaeth a dealltwriaeth feirniadol o ffyrdd o fynd ati i drin deunyddiau archifol, print neu ddigidol er mwyn gwneud ymchwil i gwestiynau hanesyddol
• gwybodaeth feirniadol am rôl a gwerth y ddisgyblaeth Hanes yng nghyd-destun ymchwil a chyflogaeth.

Sgiliau Deallusol:

Ar ôl cwblhau'r Rhaglen yn llwyddiannus byddwch yn gallu dangos gallu uwch:

• i ddefnyddio deunydd ffynonellau hanesyddol yn greadigol, yn berswadiol ac yn ddiddwythol
• i ystyried gwybodaeth hanesyddol yn fanwl a dangos ymwybyddiaeth o ddadleuon cyfredol i ddatblygu damcaniaethau newydd yn sgil fframweithiau amgen a chystadleuol
• i ddadansoddi amrywiaeth o bynciau hanesyddol yn sgil fframweithiau amgen a chystadleuol
• i ddod o hyd i ddeunyddiau archifol, print neu ddigidol a'u gwerthuso'n feirniadol er mwyn gwneud ymchwil i gwestiynau hanesyddol penodol
• i lunio a chynnal dadleuon hanesyddol annibynnol, cynnig tystiolaeth briodol i'w cefnogi a chyfeirnodi ffynonellau'r dystiolaeth a ddefnyddiwyd.

Sgiliau Ymarferol Proffesiynol:

Ar ôl cwblhau'r Rhaglen yn llwyddiannus byddwch wedi datblygu'r canlynol i lefel uchel:

• y gallu i gyfleu a chyfuno syniadau drwy amrywiaeth o gyfryngau o ran lleoliadau, dibenion a chynulleidfaoedd gwahanol
• meddwl yn feirniadol, rhesymu, a'r gallu i dderbyn a chrynhoi gwybodaeth a syniadau cymhleth drwy ddadansoddi a gwerthuso llenyddiaeth ysgolheigaidd berthnasol a thystiolaeth ffynhonnell, a dod i gasgliadau annibynnol ynghylch dilysrwydd tystiolaeth a deunydd a archwiliwyd
• y gallu i nodi problemau, asesu tystiolaeth, a dod i gasgliadau sy'n gyson â nhw ar bynciau hanesyddol a dulliau methodolegol
• y gallu i gyfleu a chyfuno syniadau ar lafar, yn ysgrifenedig ac ar ffurf clyweledol o ran lleoliadau, dibenion a chynulleidfaoedd gwahanol
• y gallu i weithio ar y cyd ac ar eich pen eich hun ar brosiectau sydd â sail ddamcaniaethol ac empirig sy'n defnyddio tystiolaeth ymchwil briodol a pherthnasol.

Sgiliau Trosglwyddadwy/Allweddol:

Yn fwy cyffredinol, ar ôl cwblhau'r Rhaglen yn llwyddiannus, byddwch wedi datblygu'r canlynol i lefel uwch:

• y gallu i ddatrys problemau a gwreiddioldeb wrth feddwl drwy ddefnyddio gwybodaeth a sgiliau i fynd i'r afael â phroblemau cyfarwydd ac anghyfarwydd
• y gallu i lunio a chyfiawnhau dadleuon a chasgliadau am amrywiaeth o faterion, a chyflwyno tystiolaeth ategol briodol
• y gallu i ymateb yn adeiladu i ddadleuon a beirniadaeth
• y gallu i gyfleu gwybodaeth gymhleth mewn amrywiaeth o fformatau i gynulleidfaoedd arbenigol ac anarbenigol
• sgiliau rheoli amser yn effeithiol, gan gynnwys y gallu i weithio'n gynhyrchiol ar eich pen eich hun ac fel rhan o dîm.