Meddygaeth Genomeg a Gofal Iechyd (MSc)

Sut y caf fy addysgu?

Cewch eich addysgu gan arbenigwyr cenedlaethol a rhyngwladol o fri mewn ymchwil, addysg ac ymarfer ym maes geneteg a genomeg. Felly gallwch fod yn sicr bod y dysgu y byddwch yn ymgymryd ag ef yn cael ei lywio gan y dystiolaeth orau sydd ar gael a'i fod ar flaen y gad. Yn ystod yr elfen a addysgir, byddwch yn astudio 4 modiwl craidd, ac yna bydd gennych yr opsiwn i ddewis 2 fodiwl arall o restr o fodiwlau dewisol. Er y byddwch yn cofrestru ar gyfer Gradd Meistr, mae yna bwyntiau ymadael ar y rhaglen a all arwain at ddyfarnu credydau sefydliadol, Tystysgrif Ôl-raddedig a Diploma Ôl-raddedig.

Byddwch yn cael eich addysgu trwy amgylchedd ar-lein sy'n defnyddio cyfuniad o weithgareddau cydamserol ac anghydamserol diddorol, a’r rheiny’n seiliedig ar ddamcaniaeth a thystiolaeth addysgol gadarn i ysgogi myfyrdod, trafodaeth a synthesis mewn ymarfer. Mae’r dulliau a ddefnyddir yn amrywio o fodiwl i fodiwl ac yn dibynnu ar yr hyn sy’n cael ei addysgu a’r modd y cewch eich asesu. Byddwch yn cael profiad o grwpiau tiwtorial ar-lein, byrddau trafod, darlithoedd wedi’u recordio, podlediadau ac erthyglau i’w darllen a myfyrio arnynt, sydd oll yn darparu ar gyfer y modd yr hoffech ddysgu, a hynny ar adegau y gallwch gynllunio eich gwaith astudio. Mae yna gyfleoedd i drafod, dadlau, archwilio a rhyngweithio â chyfoedion a thiwtoriaid, cyfleoedd sydd wedi'u cynllunio i wella'r dysgu, yn ogystal ag astudio dan arweiniad ac astudio annibynnol.  Bydd y dysgu yn mynd â chi o'r labordy i erchwyn y gwely wrth i chi astudio'r wyddoniaeth a'i chymhwyso i senarios yn y byd go iawn ac achosion cleifion.

Mae elfennau ymarferol yn nodwedd allweddol o'r cwrs, a byddwch yn cael eich annog i roi cynnig ar ddulliau newydd o addysgu a dysgu ar-lein trwy gydol y rhaglen. Bydd cyfuno eich gwybodaeth a chymhwyso damcaniaeth i ymarfer yn eich lleoliad addysgu clinigol eich hun yn un o ofynion canolog yr asesiadau ffurfiol a’r gwaith ffurfiannol.  

Bydd cyfleoedd i ddatblygu eich sgiliau gwaith tîm a’ch sgiliau cydweithio i’w cael trwy eich tasgau ar-lein, trwy weithgareddau, a thrwy gymryd rhan yn gyffredinol mewn dadleuon a gwaith archwilio ar y cyd â thiwtoriaid a chyfoedion. Mae cam y traethawd hir yn cynnwys prosiect annibynnol dan oruchwyliaeth, a drafodir â chyfadran a goruchwyliwr y rhaglen.

Sut y caf fy asesu?

Bydd yr asesiad yn cael ei gynnal ar ddiwedd pob modiwl yn ystod yr elfen a addysgir. Bydd yr asesiadau hyn yn rhoi cyfle i chi ddangos y dysgu yr ydych wedi ymgymryd ag ef yn unol â'r canlyniadau dysgu ar gyfer y modiwl ac ar gyfer y rhaglen. Bydd yna gyfleoedd ar gyfer asesu ffurfiannol i sicrhau eich bod yn cael adborth a chyngor ar gyfer y dyfodol i lywio'r asesiadau crynodol y byddwch yn ymgymryd â nhw. Bydd yr amrywiaeth yn yr asesiadau ar draws y modiwlau yn ategu cynnwys y modiwl a astudir. Gall asesu crynodol a ffurfiannol gynnwys astudiaethau achos, portffolios, cyflwyniadau llafar (wedi'u recordio a byw), gwaith grŵp, cyflwyniadau poster, a mwy, gan brofi eich gallu i gyfathrebu, meddwl yn feirniadol, myfyrio, syntheseiddio a datrys problemau.

Sut y caf fy nghefnogi?

Wrth i’r rhaglen gael ei chyflwyno ar-lein, gallwn eich cefnogi i astudio o amgylch eich ymrwymiadau o ran gwaith/bywyd. Byddwch yn cael eich cyfeirio o amgylch y llwyfan dysgu trwy gyfrwng arwyddion clir, a byddwch yn cael cyfarwyddiadau manwl ar sut i drafod y cynnwys. Bydd gan bob modiwl ddisgrifydd; bydd hwn yn cynnwys trosolwg o'r modiwl, pa ddeilliannau dysgu a fwriedir, briff yr aseiniad a chyfleoedd ar gyfer adborth ffurfiannol a chyngor ar gyfer y dyfodol, a'r ffyrdd y byddwch yn cael eich addysgu ac yn dysgu. Byddwch yn cael llawlyfr ar gyfer y rhaglen ar ddechrau'r cwrs; mae hwn yn rhoi gwybodaeth fanwl am y brifysgol, am y rheolau a’r rheoliadau sy'n llywodraethu trylwyredd ein rhaglenni, ac am eich rôl chi, y myfyriwr. Darperir sgiliau astudio i chi i gefnogi eich dysgu, a chewch eich cyflwyno i'r gyfadran a'ch cyd-fyfyrwyr.

Neilltuir tiwtor personol i bob myfyriwr; mae yno i'ch cefnogi yn ystod eich astudiaethau, a gall roi cyngor i chi ar faterion academaidd a phersonol a allai fod yn effeithio arnoch. Dylech gael cyfarfodydd rheolaidd â’ch tiwtor personol er mwyn sicrhau eich bod yn cael cefnogaeth lawn.  Bydd y tiwtoriaid personol yn gallu trafod eich amgylchiadau unigol a'ch arwain trwy eich dewis o fodiwlau a'ch llwybr.  Gall eich tiwtor personol eich cefnogi i symud ymlaen tuag at eich nod arfaethedig. 

Fe'ch cyflwynir i lyfrgellydd ein Hysgol, a fydd yn rhoi trosolwg i chi o'n hadnoddau ar-lein ac yn eich helpu i chwilio am dystiolaeth i gefnogi eich dysgu.

Pa sgiliau y byddaf yn eu hymarfer a’u datblygu?

O gwblhau’r rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

GD 1 Myfyrio’n feirniadol ar y modd y mae meddygaeth enomig yn chwarae rhan allweddol o ran galluogi gweithwyr iechyd proffesiynol i ddysgu, deall ac integreiddio data genomig i mewn i ymarfer clinigol. 

GD 2 Dadansoddi sut y mae data genomeg ddynol a data omig eraill yn personoli gofal meddygol, gan fyfyrio ar y modd y gall gwybodaeth am gyfansoddiad genetig unigolyn arwain at yr unigolyn cywir yn cael y diagnosis a'r driniaeth gywir ar yr amser cywir.

GD 3 Gwerthuso’r modd y mae technolegau a ddefnyddir i nodi amrywiolion a biofarcwyr genetig yn darparu mewnwelediad swyddogaethol i ystod o fecanweithiau clefydau ac ymatebion i driniaethau.

GD 4 Cymharu a chyferbynnu cemegau a llwyfannau dilyniannu ecsomau cyfan a genomau cyfan. 

GD 5 Myfyrio ar ragdueddiadau genetig clefydau cyffredin a phrin, a’r modd y mae risgiau amgylcheddol yn dylanwadu arnynt.

GD 6 Mynd ati mewn modd beirniadol i adolygu sut y gall biowybodeg a bioleg gyfrifiadurol alinio dilyniannau â genomau cyfeirio a nodi amrywiolion dilyniannau clinigol berthnasol yn gywir.

GD 7 Gwerthuso’r modd y gellir defnyddio gwybodaeth enetig ar gyfer gwneud penderfyniadau clinigol yn y llwybr gofal ac i drin cleifion (ffarmacogenomeg)

GD 8 Mynd ati mewn modd beirniadol i werthuso perthnasedd clinigol posibl canfyddiadau genomeg swyddogaethol a'u goblygiadau ar gyfer diagnosis, prognosis a thriniaeth yn achos clefydau.

Sgiliau Deallusol:

SD 1 Myfyrio ar gyfyng-gyngor a heriau moesegol posibl a gwirioneddol sy’n codi yng nghyd-destun meddygaeth enomig a gofal iechyd, megis preifatrwydd a chyfrinachedd, cydsyniad gwybodus a phrofion, a’u trafod.

SD 2 Ffurfio dadl ddiduedd, seiliedig ar ymchwil ac sy'n canolbwyntio ar y claf ynghylch cryfderau a chyfyngiadau haenu unigol a meddygaeth fanwl neu bersonol.  

SD 3 Mynd i’r afael ag arweinyddiaeth, newid clinigol a gofal clinigol gyda phersbectif beirniadol sy’n seiliedig ar eich gallu uwch yn rôl ymarferydd myfyriol a all ddefnyddio data, adnoddau a chanllawiau mewn modd arloesol, cynaliadwy ac adeiladol. 

SD 4 Datblygu dull beirniadol gwybodus o chwilio am dystiolaeth, gwerthuso a graddio cryfder y dystiolaeth, myfyrio ar gryfderau a gwendidau’r dystiolaeth, a chyfuno’r canlyniadau i lywio ymarfer.

SD 5 Defnyddio ystod o dechnolegau blaengar a data genomig i gefnogi gofal cleifion.

Sgiliau Ymarferol Proffesiynol:

SY 1 Cymhwyso mecanweithiau moleciwlaidd clefydau i ddeall cychwyniad a chynnydd.

SY 2 Meistroli'r sgiliau gofynnol i fod yn ddysgwr gydol oes sy'n dylanwadu ar ofal, gan ddefnyddio offer dilys a dibynadwy i weithredu a gwerthuso newid.

SY 3 Llywio Dysgu Canolog ac ymgyfarwyddo â chyfleusterau’r llyfrgell dysgu o bell, y byrddau trafod, y Ganolfan Graddau a Turnitin. 

SY 4 Defnyddio cwnsela genetig a sgiliau cyfathrebu uwch i gyflwyno materion cymhleth mewn ffyrdd y bydd eraill yn eu deall, ac i gefnogi a rheoli effaith y diagnosis a roddir. 

SY 5 Arwain timau a gweithio ynddynt mewn modd cydweithredol a chadarnhaol, gan barchu eraill. 

Sgiliau Trosglwyddadwy / Allweddol:

SA 1 Ymdrin â gofal iechyd o safbwynt moesegol, cymdeithasol ac amgylcheddol.

SA 2 Cymhwyso hunanymwybyddiaeth broffesiynol a hunanfyfyrdod i'ch datblygiad proffesiynol eich hun mewn ffyrdd sy'n gwella eich ymarfer ac yn gwella canlyniadau cleifion.

SA 3 Amlygu mentergarwch, ymreolaeth a chyfrifoldeb personol wrth gynllunio a gweithredu atebion ym maes gofal iechyd.  

SA 4 Cynllunio, trefnu a rheoli gwaith cwrs yn effeithiol, gan amlygu annibyniaeth, blaengaredd a gwreiddioldeb.

SA 5 Mynd ati’n bwrpasol i fyfyrio ar eich astudiaethau eich hun, eich cyflawniadau a’ch hunaniaeth.

Ymgysylltu â syniadau, cyfleoedd a thechnolegau newydd, gan feithrin gwybodaeth a dealltwriaeth mewn modd hyderus ac mewn amrywiaeth o gyd-destunau.