Cwnsela Genetig a Genomig (MSc)

Sut y caf fy addysgu?

Byddwch yn cael eich addysgu drwy gyfuniad o ddarlithoedd wyneb yn wyneb ac ar-lein, tiwtorialau, seminarau, astudio hunangyfeiriedig a dysgu drwy brofiad ar leoliad.

Mae'r rhaglen yn cynnwys tiwtorialau ar-lein wythnosol gorfodol wedi'u hamserlennu yn ystod y tymor drwy gydol y cwrs.

Mae’r darlithoedd yn amrywio o ran ffurf ond yn gyffredinol maen nhw’n ceisio darparu strwythur eang ar gyfer pob pwnc, i gyflwyno cysyniadau allweddol, a chyfleu gwybodaeth gyfredol a pherthnasol. Mewn tiwtorialau a seminarau, byddwch yn cael y cyfle i drafod pynciau cwnsela genetig a genomig penodol, i atgyfnerthu eich dysgu unigol a chael adborth arno, ac i ddatblygu sgiliau cyflwyno llafar. Bydd tiwtorialau yn eich galluogi i wneud cyfraniadau unigol i waith astudio grŵp, er enghraifft drwy grynhoi cyflwr genetig penodol neu eich prosiect traethawd hir ar gyfer y grŵp.

Byddwch yn cael y cyfle i ymarfer a datblygu sgiliau cwnsela, sgiliau deallusol, sgiliau gweithio mewn tîm a sgiliau cyflwyno drwy gymryd rhan mewn gweithgareddau dysgu amrywiol, fel datrys problemau clinigol, trafodaethau mewn grwpiau bach, dadleuon, cyflwyniadau llafar, tasgau ymchwil annibynnol ac aseiniadau ysgrifenedig yn ogystal â'ch gweithgareddau ymarferol ar leoliad ym mlwyddyn 2.

Sut y caf fy asesu?

Byddwch yn cael eich asesu drwy gyfuniad o ddulliau gan gynnwys gwaith ysgrifenedig (blogiau, traethodau), cyflwyniadau, darnau myfyriol, asesiad sgiliau fideo a thraethawd hir.

Mae'r traethawd hir yn seiliedig ar adolygiad o lenyddiaeth neu astudiaeth empirig ac fel arfer nid yw dros 20,000 o eiriau, gydag unrhyw ddeunydd arall y gellir ei ystyried yn briodol i’r pwnc yn ei ategu, a dylai gynnwys canlyniadau cyfnod eich gwaith prosiect. Gallai meysydd pwnc gynnwys, er enghraifft: profiadau unigolyn, teulu neu glaf o brofion a chwnsela genetig neu genomeg; canlyniadau cleifion o brofion a chwnsela genetig neu genomeg; goblygiadau cymdeithasol a moesegol technolegau genetig a chwnsela genetig neu genomeg; neu brofiadau proffesiynol cwnselwyr genetig.

Adborth Ffurfiannol

Mae adborth ffurfiannol yn adborth nad yw'n cyfrannu at gynnydd na phenderfyniadau dosbarthiad gradd. Nod adborth ffurfiannol yw gwella eich dealltwriaeth a'ch dysgu cyn i chi gwblhau eich asesiad crynodol. Yn fwy penodol, mae adborth ffurfiannol yn:

• eich helpu i ganfod eich cryfderau a’ch gwendidau a thargedu meysydd y mae angen gweithio arnyn nhw;
• helpu staff i’ch cefnogi a rhoi sylw i'r problemau a ganfuwyd, gyda strategaethau wedi'u targedu ar gyfer gwella.

Adborth Crynodol

Adborth crynodol yw adborth ar asesiadau sy'n cyfrannu at gynnydd neu benderfyniadau dosbarthiad gradd. Nod asesiad crynodol yw rhoi syniad o ba mor dda rydych chi wedi llwyddo i fodloni deilliannau dysgu bwriadedig Modiwl neu Raglen a bydd yn eich galluogi i nodi unrhyw gamau sydd eu hangen er mwyn gwella.

Byddwch yn cael cyfle i drafod adborth un-i-un gyda chyfarwyddwyr y cwrs, darlithwyr a thiwtoriaid yn ôl yr angen. Byddwch hefyd yn cael y cyfle i elwa o adborth gan gymheiriaid gan eich cydfyfyrwyr. Mae sesiynau tiwtorial yn fforwm ar gyfer adborth grŵp i gyfarwyddwyr y cwrs a ganddyn nhw.

Sut y caf fy nghefnogi?

Bydd tiwtor personol yn cael ei ddyrannu i chi a fydd yn eich helpu i fyfyrio ar eich perfformiad ar y cwrs a'ch cynghori ar dechnegau astudio a chynllunio gyrfa. Hefyd, os byddwch yn cael unrhyw anawsterau, dylech gysylltu â’ch tiwtor personol yn gyntaf. Cewch gyfle i gyfarfod (ar-lein neu fel arall) un-i-un gyda'ch tiwtor personol unwaith y tymor.

Mae llawer o arbenigedd gyrfaoedd ar gael yn yr Ysgol. Yn ogystal, mae aelodau o dîm ein rhaglen yn gwnselwyr genetig profiadol sydd wedi cofrestru gyda’r EBMG a/neu’r GCRB a gallant roi cyngor ar yrfaoedd pan fo hynny'n briodol.

Mae amryw o staff ar gael i ddarparu cymorth pellach, gan gynnwys tiwtor cefnogaeth academaidd a llyfrgellydd meddygol arbenigol. Mae aelod o staff academaidd yn gweithredu fel Swyddog Anabledd ac Amrywiaeth dynodedig ac yn sicrhau bod addasiadau rhesymol yn cael eu gwneud ar gyfer myfyrwyr ag anableddau.

Mae pob modiwl yn y rhaglen yn defnyddio ein hamgylchedd dysgu rhithwir, Dysgu Canolog, yn helaeth. Yma gallwch gael mynediad at fforymau trafod a dod o hyd i ddeunyddiau cwrs gan gynnwys recordiadau o ddarlithoedd, dolenni i ddeunyddiau cysylltiedig, profion amlddewis, papurau arholiad blaenorol ac enghreifftiau o waith myfyrwyr o flynyddoedd blaenorol. Bydd Dysgu Canolog hefyd yn cael ei ddefnyddio ar gyfer byrddau trafod, tiwtorialau, cyflwyniadau myfyrwyr a thrafodaethau dosbarth.

Byddwch yn cael goruchwyliwr enwebedig pan fyddwch yn gweithio ar eich traethawd hir. Byddwch yn trefnu cyfarfodydd â’ch goruchwyliwr, boed hynny dros Skype neu amgylchedd ar-lein arall, i drafod cynnydd. Bydd yn rhoi cyngor ac arweiniad i chi, a bydd hefyd yn rhoi adborth ysgrifenedig i chi ar un fersiwn ddrafft o’ch traethawd hir.

Bydd tîm y rhaglen yn eich cefnogi chi a'ch cyfoedion i ddatblygu perthynas gref yn y dosbarth. Mae eich cydfyfyrwyr yn ffynhonnell wych o gymorth, a bydd tîm y rhaglen yn gweithio'n galed i greu amgylchedd a fydd yn meithrin hyn gan y bydd eich cydfyfyrwyr yn parhau i fod yn ffynonellau cymorth defnyddiol drwy gydol eich gyrfa fel cwnselydd genetig. Byddwn yn ymdrechu i greu cyfleoedd i'r grŵp gyfarfod a chael hwyl yn gymdeithasol yn ystod y blociau wyneb yn wyneb yng Nghymru. Mae tîm y rhaglen hefyd yn cymedroli grŵp caeedig ar Facebook ar gyfer pob myfyriwr presennol a blaenorol, a byddwch yn cael eich annog i greu eich grŵp caeedig ar Facebook eich hun ar gyfer eich dosbarth (nad yw tîm y rhaglen yn ei ddefnyddio) i feithrin perthnasoedd cefnogol yn y dosbarth.

Pa sgiliau y byddaf yn eu hymarfer a’u datblygu?

Bydd y cwrs yn rhoi cyfle i chi ennill ystod o sgiliau gwerthfawr, yn sgiliau penodol i’r ddisgyblaeth a sgiliau cyflogadwyedd mwy generig. Drwy'r rhaglen, byddwch yn cael y cyfle i ddatblygu sgiliau cwnsela a chyfathrebu, TG a sgiliau clinigol ymarferol, a byddwch yn cael nifer o gyfleoedd i ymestyn eich sgiliau cyfathrebu a dadansoddi.

Gwybodaeth a Dealltwriaeth:

Ar ôl cwblhau'r Rhaglen, byddwch yn gallu:

1. Gwerthfawrogi ffyrdd y mae amrywiaeth o wyddorau gofal iechyd yn cyfrannu at ymarfer cwnsela genetig

2. Cyfuno gwybodaeth am eneteg a genomeg ddynol gan gynnwys patrymau etifeddu Mendelian, cytogeneteg, genomeg a geneteg foleciwlaidd, at ddibenion cwnsela genetig a genomig.

3. Asesu a chyfrifo risgiau genetig unigolion gan ddefnyddio egwyddorion tebygolrwydd ac ystadegau.

4. Rhagweld agweddau seicogymdeithasol cyflyrau genetig gan ddefnyddio cwnsela, cymdeithaseg iechyd a salwch, ymwybyddiaeth ddiwylliannol, dynameg teulu a gwneud penderfyniadau.

5. Cyfrifo risg unigolyn o etifeddu neu ddatblygu cyflwr genetig sy'n rhedeg neu a allai redeg yn ei deulu, gan ystyried patrwm etifeddiaeth y cyflwr, strwythur ei deulu ac unrhyw ddigwyddiadau amodol a allai fod wedi dylanwadu ar ei risg.

Sgiliau Deallusol:

Ar ôl cwblhau'r Rhaglen, byddwch yn gallu:

1. Cyfuno gwybodaeth am eneteg a genomeg, gan gynnwys dysmorffoleg, anhwylderau etifeddol ac amlffactoraidd, geneteg canser, profion genetig a genomig, biowybodaeth a sgrinio gan gynnwys diagnosis cyn-geni at ddibenion cwnsela genetig a genomig.

2. Defnyddio ac arfarnu'n feirniadol dystiolaeth a gyhoeddwyd at ddibenion cwnsela genetig a genomig cywir a phriodol.

3. Gwerthfawrogi ac arfarnu’n feirniadol y materion athronyddol, cyfreithiol a moesegol sy'n codi ym maes cwnsela genetig a genomig a chymhwyso fframweithiau damcaniaethol priodol i ddatrys y materion hyn.

4. Cynnig sut gall theori cwnsela cyfredol a thystiolaeth ymchwil lywio ymarfer ym maes cwnsela genetig a genomig.

5. Gwerthuso rôl a datblygiad gwasanaeth geneteg glinigol yn y GIG ac yn rhyngwladol

6. Gwerthuso tystiolaeth ymchwil a gyhoeddwyd yn feirniadol a'i rôl o ran darparu gwasanaethau cwnsela genetig a genomig o safon.

7. Dylunio, gweithredu a chwblhau prosiect ymchwil, archwilio clinigol, arloesi neu werthuso gwasanaeth bach.

Sgiliau Ymarferol Proffesiynol:

Ar ôl cwblhau'r Rhaglen, byddwch yn gallu:

1. Darparu cwnsela genetig a genomig diogel, effeithiol, sy'n canolbwyntio ar y claf gyda phroffesiynoldeb priodol.

2. Cymhwyso sgiliau cwnsela'n briodol ym maes ymarfer cwnsela genetig a genomig.

3. Gwerthuso effaith ehangach anabledd ar unigolion a theuluoedd a'r gwasanaethau sydd ar gael i'r bobl hyn.

4. Asesu ymatebion seicogymdeithasol i ddiagnosis o gyflwr genetig, statws risg genetig, canlyniadau profion genetig neu genomig neu derfynu beichiogrwydd, gan ddefnyddio theorïau ymdopi a galar/profedigaeth.

5. Amddiffyn pwysigrwydd cyfrinachedd gwybodaeth enynnol.

6. Gwerthuso’r ffyrdd y mae cwnsela genetig a genomig yn integreiddio â gwyddorau gofal iechyd a phroffesiynau iechyd eraill.

7. Sicrhau hunanfyfyrio a hunanymwybyddiaeth broffesiynol wrth ddatblygu’n broffesiynol ei hun, mewn ffyrdd sy’n gwella ei ymarfer yn y maes cwnsela genetig a genomig, ac sy’n gwella canlyniadau i gleifion.

Sgiliau Trosglwyddadwy/Allweddol:

Ar ôl cwblhau'r Rhaglen, byddwch yn gallu:

1. Defnyddio sgiliau datrys problemau'n effeithiol gydag amrywiaeth o faterion amrywiol

2. Rheoli a blaenoriaethu llwyth gwaith ac amser yn effeithiol
   er mwyn cwblhau prosiectau o ansawdd, gan gynnwys gweithio i derfynau amser

3. Dangos eich bod yn gallu gweithio'n effeithiol gydag eraill i ddatblygu atebion arloesol a datrys problemau

4. Dangos mentergarwch, gan gymryd cyfrifoldeb am gyflawni amcanion a nodau

5. Gwrando’n effeithiol i ddeall a phrosesu gwybodaeth bwysig a/neu gymhleth

6. Cyfathrebu'n gywir, yn glir ac yn gryno mewn amrywiaeth o arddulliau, gan ddefnyddio ystod o gyfryngau ar gyfer amrywiaeth eang o gynulleidfaoedd.