Ieithyddiaeth Fforensig (MA)

Sut y caf fy addysgu?

Yn ystod y cam a addysgir, byddwch yn cael eich addysgu'n bennaf drwy seminarau / gweithdai wythnosol, lle cewch gyfle i ddatblygu dealltwriaeth o bynciau penodol sy'n ymwneud ag iaith ac ieithyddiaeth.

Byddwch yn gallu trafod cysyniadau a syniadau mewn grwpiau bach a thrafodaethau dosbarth agored, i atgyfnerthu a chael adborth ar eich dysgu unigol, yn ogystal â datblygu sgiliau cyfathrebu mewn trafodaethau grŵp anffurfiol a chyflwyniadau llafar. Yn dibynnu ar eich profiad blaenorol, efallai y cewch eich annog i fynychu'r darlithoedd ar gyfer gwahanol fodiwlau israddedig hefyd.

Mae'r addysgu ar gyfer modiwlau craidd yn cyfuno trafod materion damcaniaethol a heriau ymarferol a godwyd gan y lleoliad fforensig, ac mae’r addysgu ar gyfer modiwlau dewisol yn darparu trafodaeth ddamcaniaethol bellach, gan ganolbwyntio rhywfaint ar ddatblygu sgiliau ymchwil ymarferol. Mae'n rhaid i chi baratoi’n dda ar gyfer sesiynau.

Mae pob modiwl sy’n rhan o’r MA mewn Ieithyddiaeth Fforensig yn defnyddio amgylchedd dysgu rhithwir y Brifysgol, Dysgu Canolog, yn helaeth. Yma, gallwch gael mynediad at fforymau trafod a dod o hyd i ddeunyddiau cwrs.

Yn ystod cam y traethawd hir, byddwch yn cynnal ymchwil annibynnol ar bwnc o'ch dewis, a bydd aelod o staff yn eich goruchwylio’n rheolaidd.

Sut y caf fy asesu?

Mae'r modiwlau a addysgir ar y rhaglen hon yn cael eu hasesu drwy amrywiaeth o ddulliau, gan gynnwys traethodau academaidd, dadansoddiadau ieithyddol, adroddiadau dadansoddol, prosiectau ymchwil a chyflwyniadau llafar. Nodir ffurf(iau) asesu modiwlau unigol yn y disgrifiad o’r modiwl perthnasol. Caiff modiwlau eu hasesu ar sail disgrifiadau dadansoddol o ddeunydd llafar neu ysgrifenedig neu gyfryngau eraill a/neu draethodau disgyrsiol. Yn aml, byddwch yn cael eich annog i ddewis eich deunydd eich hun i'w dadansoddi, neu i gasglu data gwreiddiol, ac i gysylltu eich dadansoddiadau â meysydd o ddiddordeb personol. Wrth asesu, rhoddir pwyslais ar soffistigeiddrwydd beirniadol a chysyniadol yn ogystal ag ar gynhyrchu traethodau clir, argyhoeddiadol ac ysgolheigaidd wedi’u cyflwyno mewn modd proffesiynol ac ar amser.

Cynigir gwaith ffurfiannol ar gyfer rhai o'r modiwlau, yn enwedig y rhai lle gallech ymgymryd â ffurfiau asesu a allai fod yn newydd i chi. Mae modiwlau eraill yn cynnig cyfres o aseiniadau gyda'r bwriad penodol y gallech ddysgu'n gynyddol. Mewn man arall, fe'ch anogir i ymgynghori ag arweinydd y modiwl perthnasol i drafod y prif syniadau a'r cynllun ar gyfer eich aseiniadau.

Sut y caf fy nghefnogi?

Bydd Cyfarwyddwr Ôl-raddedig a Addysgir y pwnc yn darparu pwynt cyswllt ar gyfer trafod unrhyw broblemau sy’n codi o’r rhaglen. Bydd tiwtor personol hefyd yn cael ei neilltuo i chi trwy gydol eich astudiaethau. Bydd ar gael i drafod eich cynnydd academaidd cyffredinol a'ch profiad fel myfyriwr.

Gallwch gael trafodaethau un-i-un â chynullydd y rhaglen neu gydag aelodau eraill o staff perthnasol yn ystod oriau swyddfa penodol yn ystod wythnosau addysgu.

Mae pob aelod o staff yn gweithio oriau swyddfa wythnosol yn ystod wythnosau addysgu a gallwch wneud apwyntiadau un-i-un i weld arweinwyr modiwlau ynghylch unrhyw faterion. Mae cymorth sgiliau ysgrifennu ar gael i bob myfyriwr gan y staff academaidd a thrwy Ganolfan Datblygu Ysgrifennu yr Ysgol.

Mae'r cymorth gyrfaoedd yn cynnwys cyfarfodydd un-i-un i gael cyngor ar gynllunio gyrfa, a gwybodaeth am gyfleoedd lleoliad.   

Tu hwnt i’r Ysgol, mae’r Brifysgol yn cynnig ystod o ddigwyddiadau a gwasanaethau cymorth sy’n eich helpu i gynllunio’ch gyrfa, rheoli eich iechyd meddwl, emosiynol, a chorfforol, yn rhoi cyngor i chi ar faterion ariannol, ac yn rhoi mynediad at gymorth yn ymwneud ag anableddau a dyslecsia. Lleolir y gwasanaethau hyn yng Nghanolfan Bywyd Myfyrwyr y brifysgol.

Pa sgiliau y byddaf yn eu hymarfer a’u datblygu?

Mae Deilliannau Dysgu’r rhaglen hon yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

Mae nifer o’r deilliannau dysgu yn cynnwys ymarfer sgiliau y mae modd eu trosglwyddo i nifer o feysydd cyflogaeth.

Pan fyddwch wedi llwyddo i gwblhau’r rhaglen, byddwch chi’n gallu:

Gwybodaeth a Dealltwriaeth(GD):

• Gwerthuso defnydd o iaith mewn lleoliadau cyfreithiol o safbwyntiau ieithyddol, cyfathrebu a rhyngddisgyblaethol.
• Gwerthuso tystiolaeth ac adroddiadau ieithyddol fforensig.
• Categoreiddio ystod o ffenomenau ieithyddol empirig a defnyddio'r derminoleg ddisgrifiadol berthnasol.
• Asesu sut mae gwahanol gyd-destunau cyfreithiol yn effeithio ar natur iaith a chyfathrebu.

Sgiliau Deallusol:

• Gwerthuso’n feirniadol syniadau, dadleuon ac ymchwil empirig mewn ieithyddiaeth fforensig.
• Egluro gwybodaeth a syniadau yn glir ac yn gydlynol mewn fformatau ysgrifenedig a/neu llafar.
• Cynnal dadl feirniadol sy'n ymateb i gonfensiynau penodol y genre.

Sgiliau Ymarferol Proffesiynol:

• Gwerthuso, cyfosod a dehongli data ieithyddol fforensig ansoddol a / neu feintiol.
• Dylunio a chyflawni astudiaeth annibynnol fach.

Sgiliau Trosglwyddadwy/Allweddol:

• Datblygu sgiliau cyflogadwyedd amrywiol, gan gynnwys rheoli amser, cyfathrebu effeithiol a'r gallu i ddilyn cyfarwyddiadau.
• Dangos ymwybyddiaeth o'r ystyriaethau personol a phroffesiynol sydd eu hangen i gynnal ymchwil yn foesegol.
• Gwerthuso gwahanol ffynonellau gwybodaeth yn feirniadol.