Cyllid gyda Thechnoleg Ariannol (MSc)

Sut y caf fy addysgu?

Mae dull dysgu gweithredol wedi’i ymgorffori yn y rhaglen. Credwn fod dysgu effeithiol wedi’i seilio ar ddau beth – cymryd rhan mewn profiadau amrywiol, a’r ffordd rydych yn gwneud synnwyr o’r profiadau hynny, yn unigol ac ar y cyd ag eraill. 

Mae pob bloc dysgu yn cynnwys amrywiaeth o weithgareddau megis astudiaethau achos, fideos, heriau bach mewn tîm a chwarae rôl, ac mae’r cyfan yn ceisio cyflwyno syniadau newydd a datblygu’ch dealltwriaeth.

Byddwn yn eich helpu i wella’r sgiliau technegol a dadansoddi beirniadol a gyflwynwyd i chi yn ystod eich gradd gyntaf, er mwyn datblygu’ch gallu a’ch proffil fel arbenigwr cyllid. Byddwn hefyd yn eich helpu i weithio gyda myfyrwyr eraill i fyfyrio ar eich gwybodaeth a’ch sgiliau presennol a datblygu dealltwriaeth o’r newydd o natur cyllid a thechnoleg ariannol mewn amrywiaeth o gyd-destunau. Cewch eich annog i gydweithio mewn timau amrywiol i ystyried ystod o ddealltwriaethau ac arferion amgen.

Mae rhoi’r hyn a ddysgwyd o’r newydd ar waith yn bwysig hefyd. Byddwch yn integreiddio ac yn cymhwyso dealltwriaeth newydd, ynghyd â sgiliau cyllid a thechnoleg ariannol newydd, mewn tasgau ymarferol sydd wedi'u hymgorffori ym mhob bloc dysgu, ac mewn gweithgareddau gwaith cwrs ffurfiol.

Sut y caf fy asesu?

Mae strwythur blociau’r rhaglen yn rhoi digon o gyfleoedd i chi fyfyrio’n anffurfiol ar yr hyn sydd wedi’i ddysgu ac ar eich datblygiad. Ym mhob modiwl, mae gweithgareddau byr ar gyfer adolygu gwybodaeth a medrau fel y gallwch chi gadw llygad ar eich cynnydd a gwella’ch ffordd o ddysgu. Bydd hynny’n cryfhau’ch hyder ac yn gwella eich ffordd o drin a thrafod gorchwylion asesu ffurfiol.

Mae amrywiaeth o dasgau asesu ffurfiol yn rhoi cyfle i ystyried cysyniadau a modelau mewn ffyrdd creadigol ac ymarferol. Bydd y rhain yn cynnwys cyflwyniadau ar ffurf poster, astudiaethau achos, cyflwyniadau grŵp, adroddiadau a fideos. Byddwch yn gweithio'n unigol ac yn rhan o dîm, yn union fel y byddech chi yn y gweithle.

Bydd addysgu mewn blociau’n eich galluogi i atgyfnerthu’r hyn rydych chi wedi’i ddysgu cyn ei ddefnyddio i gyflawni’r gorchwylion asesu sydd wedi’u seilio ar waith cymhleth gweithwyr proffesiynol ym maes cyllid. Er enghraifft, mae profion dosbarth ac arholiadau yn adlewyrchiad realistig o’r amserlenni ar gyfer cwblhau tasgau yn y gweithle.

Sut y caf fy nghefnogi?

Mae’r Brifysgol yn cynnig llawer o gymorth i ôl-raddedigion, gan gynnwys: 

Dysgu Canolog

Amgylchedd dysgu rhithwir y Brifysgol yw Dysgu Canolog.  Cyhoeddir deunyddiau pob rhaglen a modiwl yno ar gyfer sylw myfyrwyr cyn darlithoedd, yn eu hystod ac wedyn.

Llyfrgelloedd

Mae dros 1.1 miliwn o lyfrau printiedig yn ein llyfrgelloedd ar draws y campws. Bydd dros 1.5 miliwn o lyfrau ar-lein, cyfnodolion, adnoddau a chronfeydd data ar gael i chi, hefyd.

System y Tiwtoriaid Personol

Byddwch yn cael tiwtor personol.  Bydd eich tiwtor personol yw goruchwylio’ch dysgu a’ch profiad addysgol.  Bydd eich tiwtor personol yno i wrando ar unrhyw bryderon gan gynnig cyfarwyddyd proffesiynol lle bo modd neu ddangos ble mae’r cymorth priodol.

Ar ben hynny, mae ein timau Bywyd Myfyrwyr yn cynnig cyfres o wasanaethau cymorth. Mae'r gwasanaethau hyn wedi'u lleoli yn adeilad pwrpasol Canolfan Bywyd y Myfyrwyr ac yn cynnwys: Cyngor ac Arian, Dyfodol Myfyrwyr ar gyfer cymorth gyrfaoedd, gwasanaethau Cwnsela, Iechyd a Lles, y Gwasanaeth Anabledd Myfyrwyr gan gynnwys cymorth dyslecsia, Sgiliau Astudio Academaidd a Mentora Myfyrwyr.

Pa sgiliau y byddaf yn eu hymarfer a’u datblygu?

Mae'r Deilliannau Dysgu ar gyfer y Rhaglen hon yn disgrifio'r hyn y byddwch yn ei gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Gwerthuso'r cysylltiadau rhwng theori, egwyddorion ac arferion ym maes cyllid.
• Cynnal gwerthusiad beirniadol o faterion cyfoes ym maes cyllid drwy ddefnyddio ymchwil gyfredol a nodi’r goblygiadau posibl i ymchwil ac arferion yn y dyfodol.
• Cynnal gwerthusiad beirniadol o berthnasedd cysyniadau damcaniaethol modern yng nghyd-destun yr amgylchedd ariannol deinamig.
• Cymhwyso ymchwil ym maes cyllid a gwybodaeth broffesiynol i ddatrys senarios busnes go iawn.
• Defnyddio a gwerthuso atebion technoleg ariannol megis dadansoddi data mawr a dysgu peirianyddol ar gyfer rhaglenni ariannol.

Sgiliau Deallusol:

• Diffinio problem fusnes neu ymchwil yn glir.
• Adolygu a dethol dull ymchwil priodol.
• Dewis offerynnau priodol i ymchwilio i broblemau busnes neu broblemau sy’n seiliedig ar ymchwil.
• Dadansoddi’n feirniadol safbwyntiau cyferbyniol a thystiolaeth ategol, eu cyfosod a’u gwerthuso.
• Creu dealltwriaeth ar sail data a’i chyfleu er mwyn llywio strategaethau a gwneud penderfyniadau sy'n seiliedig ar dechnoleg ariannol.

Sgiliau Ymarferol Proffesiynol:

• Dadansoddi data, nodi’r sefyllfa bresennol a rhagweld tueddiadau yn y dyfodol.
• Dewis ac archwilio cronfeydd data priodol a phecynnau meddalwedd perthnasol.
• Datblygu sgiliau rhaglennu sy'n hanfodol er mwyn creu datrysiadau technoleg ariannol a’u rhoi ar waith.
• Cymhwyso gwybodaeth ariannol berthnasol er mwyn gwneud penderfyniadau o ddydd i ddydd yn effeithiol.
• Datblygu perthnasoedd gwaith effeithiol gyda chymheiriaid.

Sgiliau Trosglwyddadwy/Allweddol:

• Defnyddio technoleg ariannol i ddatrys problemau cymhleth.
• Cyfathrebu â chynulleidfaoedd amryfal trwy nifer o gyfryngau.
• Herio tybiaethau ar sail tystiolaeth gadarn.
• Gweithio’n annibynnol/cydweithio.
• Cymryd y cam cyntaf a bod yn rhagweithiol.